Policia e Kosovës, në bashkëpunim me Drejtorinë e Arsimit, kanë përfunduar ciklin e ligjëratave në shkollat e mesme të larta të Komunës së Malishevës. Në këto ligjërata është ngritur çështja e sigurisë në shkolla.
Ligjëratat janë mbajtur nga komandanti i stacionit policor në Malishevë, kapitenit Halil Morina dhe drejtorit komunal për arsim, Blerim Thaçi.
“Siguria në shkollat e Komunës së Malishevës, është në nivelin e kënaqshëm, pasi nuk janë shënuar raste të rënda të prishjes së imazhit të sigurisë në shkolla, por qëllimi ynë është që ta ruajmë këtë gjendje të mirë të sigurisë”, tha Morina.
Sipas tij, ngjarjet e fundit në disa shkolla në qytete të ndryshme të Kosovës, i kanë shtyrë që të mbajnë këto takime, me qëllim të vetëdijesimit të nxënësve dhe stafit mësimor.
“Ne si polici, jemi të gatshëm të ofrojmë siguri të plotë për të gjithë, edhe jashtë ambienteve të shkollave, por na duhet edhe bashkëpunimi i juaj dhe i qytetarëve, për ruajtjen e sigurisë, pavarësisht se deri më tani përveç incidenteve të vogla, në shkollat tona, nuk janë regjistruar raste të cilat rrezikojnë sigurinë e nxënësve apo të mësimdhënësve”.
Nga ana tjetër, drejtori i Drejtorisë për Arsim dhe Edukim, Blerim Thaçi, ka falënderuar Policinë e Kosovës, “jo vetëm për këto ligjërata, por edhe për kujdesin e shtuar në raport me shkollat e Komunës së Malishevës dhe përkrahjen që po japin për krijimin e sigurisë së plotë në shkolla tona”.
“Pavarësisht se nuk ka pasur raste të rrezikimit të sigurisë në shkolla, masat parandaluese duhet të merren edhe nga menaxhmenti i shkollave”, tha Thaçi.
Ligjërata e mbajtur sot në Qendrën e Kompetencës në Malishevë, ishte e treta me radhë në kuadër të ligjëratave në shkollat e nivelit të mesëm të lartë, pasi paraprakisht, këto ligjërata dhe debate, janë mbajtur në shkollën profesionale në Kijevë dhe Gjimnazin në Malishevë./PrizrenPress.com/