Këshilli Drejtues i Universitetit të Prishtinës ka dështuar edhe sot që ta miratojw buxhetin për këtë vit. Kjo ka ndodhur për faktin se nuk ka pasur kuorum të mjaftueshëm për mbajtjen e mbledhjes së organit më të lartë drejtues të Universitetit të Prishtinës. Kështu i kanë thënë burime brenda universitetit më të madh publik në vend.
“Tash e disa herë po dështon miratimi i buxhetit. Në mbledhje kanë marrë pjesë vetëm anëtarët e KD-së të emëruar nga Ministria e Arsimit, derisa nga anëtarët që vijnë nga radhët e UP-së ka marrë pjesë vetëm Blerim Kamberi, i cili është baxhanaku i rektorit Zejnullahu”, ka thënë ky burim.
Për mbajtjen e mbledhjes, ku diskutohen çështje të rëndësishme, si çështja e buxhetit, atëherë prezent duhet të jenë të paktën 6 anëtarë. “Në mbledhje sot ishin prezent vetëm pesë anëtarë të KD-së, andaj kjo është arsyeja e dështimit të buxhetit ashtu siç e parasheh statuti i UP-së”, tha ka burim.
Mos miratimi i buxhetit, edhe për disa javë mund ta paralizoj funksionimin e UP-së.
“Buxheti ndahet në përputhje me nevojat e njësive akademike. Këto njësi kanë dërguar kërkesat e tyre, mirëpo, pa u miratuar buxheti nga ana e Këshillit Drejtues, ai buxhet nuk mund të përdoret”, tha ky burim.
Nga Këshilli drejtues që kanë qenë prezent në mbledhjen e sotme, askush nuk ka dashur që të flas zyrtarisht për Gazetën Blic.
Në anën tjetër, një anëtar i KD-së në kushte anonimiteti i ka thënë Gazetës Blic se 4 anëtarët e Universitetit nuk kanë marrë pjesë në këtë mbledhje për faktin se janë të pakënaqur me vendimin e rektorit për mos pranimin e studentëve të familjeve të dëshmorëve, invalidëve dhe veteranëve të luftës së UÇK-së, dhe me vendimin për ndërprerjen e kontratave të profesorëve që në të njëjtën kohë mbajnë edhe pozita të larta publike.
Për këto dy vendime të rektorit Zejnullahu, edhe para pak ditësh ka pasur përplasje e tensione në mbledhjen e Këshillit Drejtues, ndërmjet anëtarëve që vijnë nga ministria e Arsimit dhe atyre që vijnë nga Universiteti./Gazeta Blic/