Në Itali po pritet me padurim data 28 maj, atëherë kur kryeministri Conte do të marrë një vendim përfundimtar rreth datës së rifillimit të Serie A. Dy janë alternativat: 13 ose 20 qershori, teksa skuadrat vazhdojnë të stërviten për të rimarrë veten fizikisht.
Presidenti i FIGC (Federata Italiane e Futbollit) ka qenë gjithmonë i prerë pro rifillimit të futbollit. Gabriele Gravina analizon humbjet e mëdha financiare në një rrëfim për Riparte l’Italia, duke deklaruar shifra konkrete rreth krizës së krijuar.
“Kemi humbur 500 milion euro deri tani. Do të kemi dëme të pariparueshme nëse nuk fillon kampionati i futbollit. Duhet të mbrojmë 100 mijë punëtorët, puna e të cilëve është e lidhur me futbollin, 1.4 milion lojtarët e federuar dhe 4.7 miliardë eurot që xhirohen nga sektori i futbollit“, deklaron Gravina.
