Ish-deputetja e Lëvizjes Vetëvendosje! Drita Millaku, kërkon dorëheqjen e presidentit të Kosovës, Hashim Thaçi.
Sipas saj, Thaçi duhet të mbrojë luftën e pastër të UÇK-së.
“Presidenti, Hashim Thaçi, duhet të jap dorëheqje nga posti që mban dhe të mbrojë pastërtinë e luftës së UÇK-së, pas publikimit të aktakuzës nga Prokuroria e Specializuar ndaj tij dhe ish- kryeparlamentarit, Kadri Veseli”, tha Millaku për TV Prizrenin.
Millaku, në maj të këtij viti, pati deklaruar se presidenti Thaçi nuk do ta përfundojë mandatin e tij.
“Thaçi së shpejti do ta nxjerrë biletën njëdrejtimëshe për në Hagë”, pati thënë Millaku.
Ish-deputetja e LVV-së nga Prizreni, Drita Millaku, e cila nuk e kishte votuar themelimin e Gjykatës Speciale, tha se subjekti i saj politik, kishte kundërshtuar formimin e Gjykatës Speciale.
Sipas saj, Thaçi, kishte bërë presion ndaj deputetëve për të votuar këtë gjykatë.
Zyra e Prokurorit të Specializuar, të mërkurën, njoftoi se ka ngritur aktakuzë ndaj Presidentit Hashim Thaçi dhe ish-kryeparlamentarit Kadri Veseli për krime kundër njerëzimit.
