Kandidatit të LDK-së për kryetar të Prizrenit, Eqrem Kryeziut, i vjen marre të kritikojë “Qeverinë Muja”. Ai tha se ky pushtet ka punuar aq keq sa që nuk ia vlenë as të kritikohet. “Pushteti lokal në Prizren është marre të kritikohet. Ka punuar aq keq sa që nuk ia vlen të kritikohet ky pushtet. Po ta kritikojmë ata gëzohen, sepse mendojnë se punët tjera i kanë kryer mirë”, tha Kryeziu.
Sipas tij, investimet e këtij pushteti sot kushtojnë dhjetëfish më shtrenjtë se sa që kanë kushtuar në kohën kur ka qeverisur ai me Prizrenin.
Kandidati Kryeziu është takuar me Nëndegëne e LDK-së “2 Korriku” në Prizren. Ai kërkoi që të mobilizohen në zgjedhje dhe të ruajnë votën. “Secili duhet të jemi kujdestar të votës. Ai që vjedh shtëpinë e vet, do të vjedh çdo kund ku i jepet mundësia, pse jo edhe votën”.
Kryeziu u shpreh i kënaqur me lëvizjet që po bëhën në LDK. “Atë që kemi ruajtur si shpresë, ajo nuk u fik, por ka marr hov. Unë në këtë fushatë po shoh se Lidhja Demokratike e Kosovës po lëvizë, dhe kjo lëvizje po shihet çdokund në çdo lokalitet ku do ku po shkojmë, natyrshëm edhe tek ju”. /PrizrenPress.com/
