Me aktivitete të ndryshme, gjimnazi “Hamdi Berisha” në Malishevë, është duke shënuar ditën shkollës, përkatësisht 57 vjetorin e lindjes së profesorit dhe dëshmorit të kombit, Hamdi Berisha, emrin e të cilit e mban gjimnazi. Për ti uruar me rastin e shënimit të kësaj date, gjimnazin “Hamdi Berisha”, sot e ka vizituar edhe kryetari i Komunës së Malishevës, Ragip Begaj dhe drejtori Drejtorisë për Arsim dhe Edukim, Blerim Thaçi.
Kryetari Begaj dhe drejtori Thaçi, janë takuar me organet drejtuese të gjimnazit dhe mësimdhënësit, të cilët i kanë uruar me rastin e ditës së gjimnazit.
“Ky gjimnaz e mban një emër të madh, emrin e njërit prej personaliteteve më të nderuara të Malishevës, emrin e profesor Hamdi Berishës, i cili përveç kontributit në arsim, një kontribut të jashtëzakonshëm i ka dhënë edhe luftës për liri, madje duke dhënë edhe jetën në luftën heroike të Ushtrisë Çlirimtare të Kosovës”, tha Begaj.
“Ne të gjallët, duhet ta arsyetojmë sakrificën e profesor Hamdiut dhe sakrificën e brezave të tërë, që luftuan për lirinë që ne sot gëzojmë. Në veçanti ju profesorët e këtij gjimnazi, duhet ta arsyetoni sakrificën e kolegut tuaj, dëshmorit të kombit Hamdi Berisha, me punën tuaj, në edukimin e nxënësve të këtij gjimnazi”, i porositi kryetari Begaj, mësimdhënësit e gjimnazit “Hamdi Berisha” në Malishevë.
Me rastin e shënimit të Ditës së Gjimnazit “Hamdi Berisha”, do të mbahen disa aktivitete, të organizuara nga mësimdhënësit me nxënësit e këtij gjimnazi, si ekspozita me punime të ndryshme nga nxënësit, pastaj program kulturor dhe artistik dhe aktivitete tjera. /PrizrenPress.com/