Presidenti i Ukrainës, Volodymyr Zelensky, e lavdëroi popullin ukrainas për luftën për “liri” në një fjalim të mbajtur më 24 gusht për ta shënuar Ditën e Pavarësisë së vendit, që për herë të dytë po festohet përderisa në disa zona të Ukrainës vazhdojnë luftime të ashpra kundër pushtimit rus.

“Sot ne festojmë 32 vjetorin e pavarësisë sonë – pavarësinë e Ukrainës. Një festë e njerëzve të lirë”, tha Zelensky, në një deklaratë të publikuar në rrjete sociale.

Liria “është një vlerë për secilin prej nesh dhe ne po luftojmë për të”, tha Zelensky, në një kohë kur lufta në Ukrainë po hyn në muajin e saj të 19-të.

Shefi i inteligjencës ushtarake të vendit, Kyrylo Budanov, tha në platformën Telegram se lufta për pavarësi “vazhdon edhe sot e kësaj dite – tani me agresorin perandorak”, duke iu referuar Rusisë.

Shefi i shërbimit të sigurisë së Kievit, Vasyl Maliuk, tha gjithashtu në Telegram se festa ka marrë tani “kuptime të reja” shkaku i luftës me Rusinë.

“Ajo u bë jo vetëm personifikimi i së drejtës sonë për jetë dhe liri, por edhe një simbol i heroizmit dhe trimërisë”, tha Maliuk.

Një seri ngjarjesh janë planifikuar në të gjithë Ukrainën për ta shënuar këtë ditë. Në Kosovë, Ministria e Punëve të Jashtme dhe Diasporës organizoi pritje zyrtare për gazetarët ukrainas që janë zhvendosur në Kosovë pas fillimit të luftës në Ukrainës, përmes programit “Journalists in Residence – Kosovo” – të iniciuar nga dy organizata evropiane të gazetarëve dhe të mbështetur financiarisht nga Qeveria e Kosovës.

Në Bruksel, ndërtesat e qeverisë së BE-së u ndriçuan me ngjyrat e flamurit të Ukrainës gjatë natës dhe flamujt ukrainas u ngritën përkrah atyre të BE-së.

Shefja e Komisionit të BE-së, Ursula von der Leyen, përgëzoi ukrainasit për “guximin, forcën dhe shpresën e tyre të qëndrueshme në një të ardhme paqeje dhe prosperiteti në një Evropë të bashkuar”.

“Ata janë një frymëzim për të gjithë evropianët”, tha ajo në rrjete sociale.

Një 59-vjeçar nga Kosova është vënë në pranga pasi mori peng për një orë gjashtë turistë italianë.

Kjo, pasi i dëmtuan orenditë e shtëpisë në Sarandë.

Policia tha se pas marrjes së njoftimit se në lagjen nr. 1, një shtetas iu kishte hequr lirinë, në mënyrë të kundërligjshme, disa shtetasve, në një apartament, shërbimet e Komisariatit te Policisë Sarandë kanë organizuar punën dhe kanë mbërritur në vendngjarje, me qëllim zbardhjen e rrethanave të rastit dhe arrestimin e autorit.

Si rezultat i veprimeve të menjëhershme të shërbimeve të Policisë, është vënë në pranga shtetasi J. A., 59 vjeç, banues në Prishtinë, si dhe është bërë lirimi i shtetasve, nga apartamenti.

59-vjeçari, për rreth 1 orë, iu ka hequr lirinë gjashtë shtetasve italianë, në apartamentin që iu kishte dhënë me qira, pasi pretendonte se këta shtetas i kishin dëmtuar disa pajisje në këtë apartament.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme, për veprën penale “Heqja e paligjshme e lirisë”.

Ka vdekur një vajzë 18-muajshe, pasi piu aksidentalisht metadonin e lënë nga daja brenda banesës në Delvinë.

Fëmija ndërroi jetë në orët e para të mëngjesit në Spitalin e Traumës. Viktima të dielën u nis me helikopter nga Spitali i Sarandës, pasi aty kishte marrë ndihmën e parë.

Vdekja e saj erdhi 5 ditë pas dëmtimeve që pësoi nga konsumimi aksidental i metadonit, raporton Euronews.al.

Metadoni ishte lënë mbi tavolinë nga daja i saj, i cili dyshohet se ishte përdorures lëndësh narkotike.

Fëmija i vdekur është vajza e një shtetasi italian, ndërsa nënën e saj është nga Delvina.