Kryetari i partisë Guxo në Prizren, Haxhi Avdyli, ka reaguar pas ngritjes së aktakuzës ndaj shtatë zyrtarëve të Komunës së Prizrenit për keqpërdorim të detyrës zyrtare dhe mashtrim në prokurim publik.

Përmes një postimi në rrjetin social Facebook, Avdyli ka shprehur qëndrimin e tij kritik ndaj qeverisjes aktuale komunale, duke e cilësuar si të dështuar dhe të zhytur në afera korruptive.

“Ekipi i Shaqir Totajt, që zhvatjen e buxhetit e ka kthyer në specialitet, qenkan më në fund akuzuar për keqpërdorim të qindra mijëra eurove të qytetarëve”, shkruan ai.

Ai shton se mandati i kësaj qeverisjeje ka qenë i karakterizuar nga “manipulim me tenderë, punësime të paligjshme, nepotizëm, falsifikim, politizim dhe mashtrime”, duke e cilësuar pushtetin aktual si një “qeverisje në ikje”.

Avdyli kritikoi gjithashtu mungesën e transparencës dhe përmendi mospërfilljen e nevojave reale të qytetarëve.

“Atmosfera e zymtë politike dhe jo bashkëpunuese është bërë letërnjoftimi politik i kryetarit në ikje të Prizrenit”.

Avdyli shprehet se qyteti i prizrenit duhet të çlirohet nga ndikimi i grupeve të interesit, të cilat, sipas tij, shpesh janë të lidhura me krimin: “Prizreni duhet t’u kthehet qytetarëve të tij”./PrizrenPress.com/

Në ambientet e Qendrës Kryesore të Mjekësisë Familjare (QKMF) “Nexhip Berisha” në Prizren, u mbajt sot një mbledhje komemorative në nderim të dr. Kujtim Bakiqit, i cili u nda nga jeta mëngjesin e 17 majit, në moshën 62-vjeçare.

Në këtë ceremoni të përmbushur me ndjenja të thella respekti e dhimbjeje, u përkujtua jeta dhe kontributi i çmuar i dr. Bakiqit, i cili për dekada të tëra shërbeu me përkushtim në QKMF Prizren, duke dhënë një kontribut të jashtëzakonshëm në kujdesin parësor shëndetësor.

I pranishëm në këtë mbledhje ishte edhe kryetari i Komunës së Prizrenit, Shaqir Totaj, i shoqëruar nga bashkëpunëtorët e tij.

Në fjalën e rastit, Totaj e cilësoi dr. Kujtimin si një profesionist të rrallë, të cilit pacientët i ishin gjithmonë prioritet.

“Kjo është një humbje e madhe për të gjithë ne që e njohëm dhe bashkëpunuam me të”,  u shpreh ai.

Ushtruesi i detyrës së drejtorit të QKMF-së, Fadil Bajraktari, e përshkroi të ndjerin si një figurë shembullore për përkushtim, profesionalizëm dhe humanitet.

Ai theksoi se dr. Bakiqi gjithmonë tregoi kujdes të veçantë për secilin pacient që trajtonte.

Ndërsa kolegu i tij, Eshref Kryeziu, foli nën emocionet e humbjes për një mik dhe bashkëpunëtor të dashur, duke e përshkruar atë si një profesionist të përkushtuar dhe njeri të jashtëzakonshëm.

Nga familja, me një fjalim prekës, foli vajza e dr. Kujtim Bakiqit, Melisa, e cila mes lotësh kujtoi babanë si një prind shembullor, humanist dhe njeri me zemër të madhe.

Dr. Kujtim Bakiqi ka qenë për shumë vite shef i Shërbimit të Urgjencës në QKMF Prizren, ku ka lënë gjurmë të pashlyeshme në fushën e mjekësisë dhe shëndetësisë publike.

Në shenjë nderimi të veçantë, Shërbimi i Urgjencës në Prizren e përcolli kortezhin funeral drejt varrezave të qytetit me autombulanca, duke e përshëndetur për herë të fundit kolegun dhe mikun e tyre./TV Prizreni

Komuna e Prizrenit ka njoftuar se ndërtesa e Stacionit të Autobusëve në Prizren do të rinovohet bashkë me rregullimin e infrastrukturës përkatëse.

Ky projekt sipas njoftimit të Komunës do të realizohet me mjetet nga Granti i Performancës Komunale.

“Kryetari Shaqir Totaj nënshkroi sot marrëveshje për mbështetje financiare të projektit “Rregullimi i infrastrukturës dhe renovimi i objektit të Stacionit të Autobusëve në Prizren”, i cili projekt do të mbështetet nga skema e grantit për performancë komunale, nga e cila Komuna e Prizrenit është shpërblyer me 2.047.132,85 euro, në bashkëpunim me Ministrinë e Administrimit të Pushtetit Lokal dhe Helvetas Swiss Intercooperation, përfaqësuar nga menaxheri i projektit DEMOS”, thuhet në njoftimin e Komunës së Prizrenit.

Marketing

Me rastin e Ditës Ndërkombëtare të Hipertensionit, Qendra Kryesore e Mjekësisë Familjare (QKMF) në Prizren, në bashkëpunim me ekipet profesionale shëndetësore, ka organizuar sot aktivitete vetëdijësuese për qytetarët, me fokus në parandalimin dhe kontrollin e shtypjes së lartë të gjakut.

Kliko videon:https://www.facebook.com/PrizrenPress/videos/1391943991952736

Gjatë ditës, qytetarët kanë mundësinë të përfitojnë nga shërbime falas për matjen e tensionit të gjakut, si dhe të marrin këshilla nga profesionistët shëndetësorë mbi rëndësinë e një jetese të shëndetshme. Aktivitetet po zhvillohen në disa pika të qytetit dhe janë të hapura për të gjithë të interesuarit.

Drejtori i QKMF-së në Prizren, Fadil Bajraktari, theksoi rëndësinë e këtyre iniciativave në edukimin dhe ndërgjegjësimin e qytetarëve për shëndetin kardiovaskular.

“Hipertensioni është një ndër sëmundjet më të përhapura, por edhe më të parandalueshme. Përmes këtyre aktiviteteve, synojmë t’i japim qytetarëve mjetet dhe njohuritë që u duhen për të ndërmarrë hapa konkret drejt një jete më të shëndetshme,” – u shpreh Bajraktari.

Kliko linkun:https://www.facebook.com/PrizrenPress/videos/876934154597918

Përveç matjes së tensionit, qytetarët informohen për mënyrat më efikase për të mbajtur nën kontroll hipertensionin, përfshirë ushqimin e shëndetshëm, aktivitetin fizik të rregullt dhe shmangien e faktorëve të rrezikut si duhani, stresi dhe mbipesha.

QKMF -ja apelon tek qytetarët që të jenë proaktivë në kujdesin ndaj shëndetit të tyre dhe i inkurajon të marrin pjesë në këto aktivitete, si një hap i rëndësishëm drejt përmirësimit të cilësisë së jetës dhe parandalimit të sëmundjeve kardiovaskulare./PrizrenPress.com/