Për një post të zëvendësministrit në Qeverinë e Kosovës, Munir Bashës i është dashur që të presë tri vite. Liderit të Partisë Konservatore të Kosovës i ishte premtuar posti i zëvendësministrit nga ish-kryetari i PDK-së, Hashim Thaçi, në verën e vitit 2014. Asokohe PK-ja lidhi koalicion parazgjedhor me PDK-në.

Kryetari i Partisë Konservatore të Kosovës, Munir Basha është emëruar  zëvendësministër i Drejtësisë me kërkesë të Partisë Demokratike të Kosovës.

Por liderit të PKK-së, e cila në vitin 2014 lidhi koalicion parazgjedhor me Partinë Demokratike të Kosovës, e cila asokohe udhëhiqej nga Hashim Thaçi, i ishte premtuar ky post rreth tre vite më parë.

Ishte Hashim Thaçi ai, i cili në verën e vitit 2014 kur PKK-ja dhe PDK-ja hynë në një koalicion parazgjedhor së bashku, i kishte premtuar Munir Bashës një pozitë të zëvendësministrit në qeveri, njofton Insajderi.

Megjithatë, Thaçi nuk kishte respektuar marrëveshjen parazgjedhore që kishte bërë me PKK-në e Bashës.

Në muajin korrik të vitit 2015, një vit pas nënshkrimit të marrëveshjes Basha deklaronte se është një pritje që Thaçi t’ia realizonte premtimin.

“Ende jemi në pritje të implementimit të marrëveshjes”, kishte thënë Basha për “PrizrenPress”.

Ish-kryetari i PDK-së, i cili në fillim të vitit 2016 dha dorëheqje nga pozitat e tij në parti dhe në ekzekutivin e qeverisë, nuk e përmbushi asnjëherë premtimin e tij ndaj Munir Bashës.

Edhe pse Thaçi nuk e realizoi zotimin ndaj Bashës derisa ishte kryetar i PDK-së, këtë premtim ndaj kryetarit të Partisë Konservatore e përmbushi pasardhësi i Thaçit në parti, Kadri Veseli. Kjo pasi PDK ishte partia që i bëri kërkesë partnerit në koalicionin qeveritar që të emërojë Bashën zëvendësministër.

Këtë e ka konfirmuar sot shefja e stafit të kryeministrit Mustafa, Vlora Durmishi. Ajo ka thënë se ndryshimet në ministri janë bërë të enjten.

“Po janë bërë ndryshimet, këto kanë ardh prej partnerit të koalicionit, gjatë ditës së djeshme. Nehat Mustafa do të kalojë në Ministrinë e Tregtisë dhe Industrisë si zëvendësministër, në vend të Avni Kastratit, ndërkaq Behar Selimi do të kalojë si zv/ministër në MPB. Kurse Munir Basha zv.ministër në Ministrinë e Drejtësisë”, tha Dumoshi për Express.

Përveç ish-zëvendësministrit Avni Kastrati që është liruar nga detyra, para disa dite nga pozita e zëvendësministrit të Drejtësisë është liruar edhe Lirak Çelaj. /Insajderi.com

Si në asnjë komunë tjetër në Kosovë, në Komunën e Prizrenit, konkurset për punë,si sidomos në fushën e arsimit, i ka shpallur tash e sa kohë Zyra e Personelit.

Për zgjedhjen e drejtorëve dhe zëvendësdrejtorëve, pa pëlqimin e Drejtorisë së Arsimit dhe Ministrisë së Arsimit, kjo e fundit, kishte paditur Zyrën e Personelit, duke kërkuar të anulohen konkurset, raporton KTV.

Së fundi, Gjykata Themelore në Prishtinë, i ka dhënë afat 30 ditor Komunës së Prizrenit, që t’ia ofrojë përgjigjen me shkrim dhe të gjitha shkresat që kanë të bëjnë me lëndë kontestuese.

Në komunë kanë konfirmuar se kanë marrë shkresën e Gjykatës Themelore.

Partitë opozitare, ndërkaq, thonë se fuqia e Zyrës së Personelit, tregon pafuqinë e kryetarit Ramadan Muja.

Përgjegjës për këto punësime të pakontrolluara, sipas Vetëvendosjes, është pikërisht i pari i komunës, i cili i ka dhënë kompetenca kësaj zyre.

Burime brenda komunës kanë konfirmuar se drejtorët e përzgjedhur nga Zyra e Personelit, janë duke punuar pa kontrata pune.

Ndërkohë, Kohavisioni disa herë ka raportuar për punësimet që janë bërë në shkollat e Prizrenit.

Rasti i fundit, ishte me punësimin e motrës së rektorit të Universitetit të Prizrenit, Ramë Vataj, në Drejtorinë e Administratës.

Kryetari i LDK-së, Isa Mustafa tha se subjekti i tij politik po përkrahet në mënyrë masive në Prizren. Ai, për herë të parë është krenuar me punën që Dega e LDK-së në Prizren, ka bërë në këtë qytet.

“Shënuam sot në Prizren 27-vjetorin e themelimit të Degës së LDK-së, ku ishin të pranishëm një numër i madh i qytetarëve të Komunës së Prizrenit”, shkruan Mustafa në Facebook.

“Përkrahja e grupmoshave, gjinive dhe kategorive të ndryshme të shoqërisë, dëshmon besimin e qytetarëve në programin dhe potencialin e LDK-së për të vazhduar zhvillimin ekonomik dhe ndërtimin e gjithanshëm demokratik të shtetit”.

“Pjesëmarrja e shumë qytetarëve në këtë tubim dhe anëtarësimi i 300 të rinjve në LDK me këtë rast, është “sondazhi” dhe dëshmia më e mirë e përkrahjes masive të qytetarëve për LDK-në në Prizren dhe në krejt Kosovën”, shkruan Mustafa ./PrizrenPress.com/

Lëvizja Vetëvendosje akuzon pushtetin e Prizrenit se me akrobacionet e veta, gjendjen e vet të mjeruar është duke e shpërfaqur në të gjitha fushat ku po ka hapësirë veprimi. Ky mentalitet qeverisës, sipas VV-së, ka kohë që ka krijuar indinjatë dhe neveri të madhe tek qytetarët e Komunës së Prizrenit.

“Si rrjedhojë e këtyre veprimeve të pushtetit, nuk kanë kaluar pa u vërejtur as marifetet e konkursit të fundit, kur pushteti shpalli një konkurs për IT. Marifetet e këtij konkursi janë paraqitur që në fillim, kur në shpallje të konkursit janë eliminuar në mënyrë të kundërligjshme kriteret për pranimin e kandidatëve”, thuhet në reagimin e VV-së në Prizren.

“Fillimisht nuk është përcaktuar në mënyrë strikte arsimimi përkatës për këtë fushë e as përvoja në punë në fushën e IT, ndërsa vetë përbërja e komisionit përzgjedhës është një tjetër tregim në vete”.

“Me afrimin e fundit të këtij pushteti, niveli i abuzimit ka mbërri në një shkallë të paparë deri më tashti”.

“Lëvizja VETËVENDOSJE! kërkon anulimin e këtij konkursi dhe shpalljen e një konkursi të ri, bazuar në legjislacionin në fuqi”. /PrizrenPress.com/

Partia Demokratike e Kosovës ka miratuar një deklaratë politike në Konventën e tetë, përmes së cilës kanë rikonfirmuar qëndrimin se janë të gatshëm për zgjedhje parlamentare, kurdo që ato mbahen.

“PDK është e përgatitur për zgjedhjet lokale dhe në bashkëpunim e koordinim të plotë me degët do të nominojë kandidatët më të mirë dhe më profesionalë, të cilët do të dalin fitues në shumicën e komunave të Kosovës. PDK është e gatshme për zgjedhjet parlamentare, qoftë në afatin e rregullt, por edhe më herët, nëse për këtë ka dakordim nga i gjithë spektri politik”, thuhet në pikat 5 dhe 6 të deklaratës.Më poshtë deklarata e plotë politike e Konventës së tetë të PDK-së.1. PDK i jep mbështetje dhe besim të plotë Kryetarit të saj, Kadri Veselit, dhe strukturave drejtuese të partisë, në avancimin e proceseve që fuqizojnë shtetin dhe forcojnë besimin në institucionet e vendit.

2. PDK e vlerëson të rëndësishëm komunikimin e lidershipit të PDK-së me qytetarët e vendit, dëgjimin e shqetësimeve, preokupimeve dhe propozimeve të tyre te vlefshme, të cilat do të inkorporohen në platformën dhe vizionin e PDK-së për të ardhmen e vendit.
3. PDK mirëpret ardhjen e kuadrove dhe profesionistëve të dëshmuar dhe mbetet e hapur për të gjithë ata që duan t’i bashkohen vizionit të PDK-së dhe sjellin një konkurrencë cilësore dhe vlerë të shtuar demokratike.
4. PDK mbështet vizionin e lidershipit për përfaqësim dinjitoz dhe të barabartë të femrës në strukturat vendimmarrëse të partisë, por edhe në institucionet e vendit.

5. PDK është e përgatitur për zgjedhjet lokale dhe në bashkëpunim e koordinim të plotë me degët do të nominojë kandidatët më të mirë dhe më profesionalë, të cilët do të dalin fitues në shumicën e komunave të Kosovës.

6. PDK është e gatshme për zgjedhjet parlamentare, qoftë në afatin e rregullt, por edhe më herët, nëse për këtë ka dakordim nga i gjithë spektri politik.
7. PDK i jep mbështetje Qeverisë dhe institucioneve tjera të vendit në përmbushjen e detyrimeve kushtetuese.
8. PDK i jep mbështetjen e plotë Presidentit të vendit, Hashim Thaçit, në angazhimin e tij për fuqizimin të rolit dhe misionit të ri të FSK-së, edhe përmes ndryshimit të ligjit për FSK-në, dhe e sheh këtë si një hap të domosdoshëm, i cili i hap rrugë ndërtimit të kapaciteteve të nevojshme të sigurisë, sipas standardeve të NATO-s dhe e shpejton rrugën e integrimit të Kosovës në NATO-s.

PDK e vlerëson se formimi i ushtrisë se Republikës se Kosovës është një hap i domosdoshëm dhe në përputhje të plotë me procesin e Rishikimit Strategjik të Sektorit të Sigurisë, i cili është bërë me mbështetjen dhe miratimin e plotë të partnerëve ndërkombëtarë, veçanërisht të SHBA-ve.
9. PDK i inkurajon përfaqësuesit e serbëve në Kosovë që të bëhen pjesë konstruktive të këtij procesi dhe të gjitha proceseve me rëndësi për vendin dhe jetën e qytetarëve. Instrumentalizimi i tyre nga Beogradi dhe bojkotimi i institucioneve, mbi të gjitha, është në dëm të interesave të qytetarëve serbë të Kosovës.
10. PDK shpreh përkushtimin e saj për vazhdimin dhe thellimin e bashkëpunimit me partnerët strategjikë ndërkombëtarë, SHBA-të, Bashkimin Evropian dhe NATO-n.

11. PDK kërkon nga institucionet që t’i kryejnë obligimet e tyre në raport me procesin e liberalizimit të vizave dhe sa më shpejt t’u mundësohet qytetarëve lëvizja e lirë.

12. PDK shpreh vullnetin e saj që për çështjen e demarkacionit dhe çështje tjera të interesit nacional të punohet bashkërisht që të arrihet një konsensus institucional dhe të kontribuohet në zgjidhjen e kësaj çështjeje e cila është më shumë se e një partie politike. Ne duhet të tregojmë që jemi të gatshëm të marrim vendime të drejta, demokratike, që mbrojnë interesin nacional, respektojnë fqinjësinë e mirë dhe ruajnë partneritetin ndërkombëtar.
13. PDK mbështet dialogun si vlerë dhe alternativë e vetme për zgjidhjen e problemeve, por kërkon nga bashkësia ndërkombëtare si ndërmjetësuese e këtij dialogu që të bëjë presionin e duhur ndaj palës serbe që të respektojë marrëveshjet e arritura deri më tash dhe të ndërpresë provokimet e vazhdueshme që e minojnë këtë proces. Provokimet si ai me murin, trenin dhe provokime tjera janë të pajustifikueshme dhe nuk i shërbejnë ndërtimit të raporteve të mira fqinjësore.

14. PDK kërkon nga partnerët ndërkombëtarë, në radhë të parë BE dhe SHBA, që të bëjnë presion mbi Serbinë për tërheqjen e fletarresteve që kanë motive politike dhe nuk kanë bazë juridike në raport me qytetarët e vendit tonë.

15. PDK shpreh vendosmërinë dhe angazhohet fuqishëm për sundim të ligjit të luftës të pakompromis kundër korrupsionit dhe krimit të organizuar dhe dukurive tjera negative në shoqëri.
16. PDK mbështet institucionet e rendit dhe sigurisë në luftën e vazhduar kundër terrorizmit dhe çdo akti dhe veprimtarie që cenon lirinë dhe sigurinë e qytetarëve të vendit.
17. PDK ka qenë dhe mbetet një parti e qendrës së djathtë, puna e së cilës ka për qëllim zhvillimin dhe promovimin e vlerave demokratike dhe kushtetuese në Republikën e Kosovës, për të ndërtuar një vend sa më stabil dhe prosperues për brezat e ardhshëm.
18. PDK angazhohet fuqishëm në zhvillimin ekonomik të vendit në bazë të parimeve dhe vlerave kushtetuese të tregut dhe konkurrencës së lirë.
19. PDK angazhohet dhe është e vendosur në respektimin, mbrojtjen dhe afirmimin e lirive dhe të drejtave të njeriut pa dallim, si dhe respektimin, mbrojtjen dhe afirmimin e të drejtave të komuniteteve pakicë, në pajtim me kushtetutën dhe konventat ndërkombëtare.
20. PDK është e vendosur dhe synon të ndërtojë një pluralizëm politik të bazuar në frymën e tolerancës politike dhe bashkëpunimit të gjithmbarshëm të partive politike në të mirë të Republikës së Kosovës.

21. PDK punon fuqishëm për të mbrojtur vlerat kushtetuese të lirisë, paqes, barazisë, diversiteti etnik dhe shtetit laik e sekular, me qëllim të krijimit të një shteti të sigurt për të gjithë qytetarët.

22. PDK siguron të gjithë qytetarët e Republikës se edhe më tutje do të vazhdojë dhe do të intensifikojë aktivitetin e saj politik, me qëllim të jetësimit të vlerave të lartpërmendura, krijimit të vendeve të reja të punës, si dhe krijimit të një ambienti social të barabartë dhe të sigurt për të gjithë pa dallim.
23. PDK falënderon të gjithë qytetarët e Republikës së Kosovës për besimin dhe mbështetjen e dhënë në vazhdimësi për të qeverisur vendin.
24. PDK zotohet se do te angazhohet për një jetë më të mirë të qytetarëve tanë, për sigurinë e tyre, për kohezion nacional dhe qytetar, për partneritet ndërkombëtar në ndërtimin e Republikës së Kosovës vend të dashur për qytetarët tanë dhe të respektueshëm nga bota demokratike.
25. PDK angazhohet që Diaspora të ketë së paku tre deputetë në Kuvendin e Republikës së Kosovës.
26. PDK fton gjithë anëtarësinë e saj dhe çdo qytetar të Republikës së Kosovës për angazhim të përbashkët dhe për fuqizim të PDK-se dhe Republikës së Kosovës.

Kryeministri i Kosovës dhe lideri i LDK-së, ka mbajtur një fjalim në Prizren, ku u shënua 27 vjetori i themelimit të Lidhjes Demokratike të Kosovës.

Isa Mustafa tha se përkundër se në koalicion janë me Partinë Demokratike të Kosovës, Kosova është qeverisur mirë dhe se kjo qeveri është duke e zhvilluar vendin, njofton Klan Kosova.

Edhe Mustafa ka folur për transformimin e Forcës së Sigurisë në ushtri. Tha se themelimi i ushtrisë duhet të bëhet, por duke iu qëndruar besnikë marrëdhënieve me partnerët ndërkombëtar, siç janë Shtetet e Bashkuara të Amerikës dhe NATO.

Kryeministri s’e ka lënë pa e përmendur edhe Demarkacionin.

Ai pohoi se marrëveshja për vijën kufitare me Malin e Zi po shtyhet për qëllime politike – që më pas dikush ta votojë të njëjtën marrëveshje dhe t’i marrë meritat.

Ai foli edhe për çështjet identitare të kosovarëve. Deklaroi se himni i Kosovës dhe flamuri duhet të duhen e respektohen, sepse për këtë është luftuar dhe me to është shpallur pavarësia e Kosovës.