Drejtoria e Bujqësisë në Komunën e Rahovecit njofton se, në bashkëpunim me Ministrinë e Bujqësisë dhe Agjencinë e Ushqimit dhe Veterinarisë (AUV), ka nisur procesi i repelimit të bagëtive, përcjell PrizrenPress. Ky trajtim përfaqëson një masë të rëndësishme për mbrojtjen e shëndetit të kafshëve, duke parandaluar infektimin e tyre nga parazitët e jashtëm dhe të brendshëm.

“Ftojmë të gjithë fermerët të bashkëpunojnë me ekipet veterinare për realizimin e këtij procesi të domosdoshëm për mirëqenien e tufave dhe një prodhimtari më të shëndetshme blegtorale”, thuhet në njoftimin e komunës.

Për informata shtesë dhe koordinim, fermerët mund të kontaktojnë veterinerët e angazhuar në këtë projekt për komunën e Rahovecit./PrizrenPress.com

Sot në Malishevë u mbajt një mbledhje komemorative në nderim të Sabedin Kryeziut, Vehbi Halilajt dhe Mentor Kryeziut, tre qytetarëve të kësaj komune, të cilët u zhdukën më 4 prill 1999 në masakrën e Kralanit dhe u identifikuan së fundmi pas analizës së ADN-së.

Ceremonia u organizua nën përkujdesjen e kryetarit të Komunës së Malishevës, Ekrem Kastrati, duke mbledhur familjarë, përfaqësues të institucioneve qendrore dhe lokale, shoqata të personave të zhdukur dhe të dala nga lufta e UÇK-së, Policinë e Kosovës, klerin fetar dhe qytetarë të shumtë, përcjell PrizrenPress.

Në fjalën e tij, kryetari Kastrati theksoi dhimbjen e thellë dhe plagën e hapur të të pagjeturve, duke u shprehur: “Në vigjilje të 26-vjetorit të çlirimit, ne ende përballemi me dhimbjen e të pagjeturve. Ju duhet të jeni krenarë për sakrificën e bijve tuaj dhe për durimin që keni treguar për 26 vite”.

Ai gjithashtu kërkoi drejtësi për të gjitha krimet e kryera dhe ndriçimin e fatit të të pagjeturve.

Këshilltari i presidentes së Kosovës, Ismet Krasniqi, nënvizoi se kërkimi për drejtësi nuk do të ndalet: “Kjo është pjesë e historisë dhe sakrificës sonë për liri. Janë pritje të gjata, por ne nuk do të rreshtim së kërkuari drejtësi”.

Ndërkohë, kryesuesi i Kuvendit Komunal, Argjend Thaçi, e cilësoi këtë dhimbje si pjesë të historisë kombëtare, duke dënuar përpjekjet e shtetit serb për të fshehur krimet e tij.

Në këtë ceremoni, Andin Hoti, kryesues i Komisionit Qeveritar për Personat e Zhdukur, theksoi se lufta për zbardhjen e fatit të të pagjeturve vazhdon: “Edhe sot, pas 26 vitesh, përballemi me kriminelët që jo vetëm vranë, por edhe zhdukën trupat e të vrarëve”.

Në emër të familjarëve dhe shoqatës “Kujtesa”, Hysen Kryeziu kujtoi përpjekjet e vazhdueshme për gjetjen e personave të zhdukur, duke bërë thirrje për më shumë angazhim institucional. Sipas tij, në Malishevë gjatë luftës u zhdukën 85 persona, nga të cilët 38 ende mbeten të pagjetur.

Në përfundim të ceremonisë, familjarët falënderuan të gjithë të pranishmit për mbështetjen dhe nderimin e bërë për të afërmit e tyre.

Ceremonia e varrimit të Mentor Kryeziut dhe Vehbi Halilajt do të mbahet nesër, më 4 prill, në Llapçevë dhe Bubavec, ndërsa Sabedin Kryeziu është varrosur më herët./PrizrenPress.com