Dy shtetas nga Shqipëria janë arrestuar mbrëmë në Rahovec pasi që në emër të pagesës ia kanë dhënë viktimës tetë bankënota nga 50 euro, të cilat dyshohet se janë të falsifikuara.

Ngjarja ka ndodhur në rrugën “Xhelal Hajda” ku policia ka konfiskuar bankënotat e dyshuara, ndërsa të dyshuarit pas intervistimit me vendim të prokurorit janë dërguar në mbajtje

Mungesa e të akuzuarit G.  H. , për veprën penale “vjedhje e rëndë”, ishte shkak i shtyrjes së seancës, e cila ishte e paraparë të mbahej të premten në  Gjykatën Themelore në Prizren. I akuzuari Hoti, nuk kishte të angazhuar mbrojtës.

Gjykatësi Gani Kastrati, kishte lëshuar urdhër për sjellje me detyrim ndaj të akuzuarit, mirëpo nga konstatimi i policisë thuhet se i lartcekuri gjendet jashtë shtetit.

Gjykatësi Kastrati, tha se pasi nuk janë plotësuar kushtet ligjore, seanca nuk do të mbahet dhe e njëjta u shty për afat të pacaktuar.

G.  H. , për të cilin Prokuroria Themelore në Prizren ka ngritur aktakuzë, e ngarkon atë se më 01 mars 2012, në orët e hershme të mëngjesit, në Prizren, rruga “Remzi Ademi”, me qëllim të përvetësimit të kundërligjshëm për vete apo personin tjetër, ia merr pasurinë ë luajtshme të dëmtuarës, Sabrije Salaj. Sipas Prokurorisë, i akuzuari me mjete të forta, përkatësisht duke përdorur një kaçavidë, hap derën e kioskës dhe merr disa pako me cigare, të llojeve të ndryshme, si dhe një aparat për fotokopje. Në këtë mënyrë, të dëmtuarës i shkaktohet dëm i papërcaktuar.

Me këto veprime, i akuzuari, ngarkohet me veprën penale “vjedhje e rëndë” nga neni 253 paragrafi 1, nën paragrafi 1, i KPRK-së, vepër kjo e dënueshme me gjobë ose me burgim nga tre (3) deri në shtatë (7) vite./betimiperdrejtesi/

L. Q. , i akuzuar për veprën penale të kanosjes, pasi pranoi fajësinë, u dënua me tetë muaj burgim me kusht.

Në seancën e së premtes në Gjykatën Themelore në Prizren, i akuzuari tha se ndjen keqardhje për rastin, por deklaroi se për këtë ka kërkuar falje dhe se është pajtuar me të dëmtuarin, M. U.

I dëmtuari tha se kanosja ndaj tij ka ndodhur, mirëpo shtoi se pas dy jave, i akuzuari i ka kërkuar falje për rastin.

M. U.deklaroi se nuk kërkon kompensim, mirëpo qëndron pranë ndjekjes penale.

Prezent ishte edhe prokurori Fatos Ajvazi, i cili nuk kundërshtoi pranimin e fajësisë.

Gjykatësja e rastit Shpresa Emra, të akuzuarin e shpalli fajtor dhe e dënoi me tetë muaj burgim me kusht, i cili nuk do të ekzekutohet në afat prej dy vite.

Sipas aktakuzës, më 6 mars 2014, rreth orës 13:45, në Prizren, në pikën e karburanteve “Al Petrol”, i akuzuari L. Q. , seriozisht i kanoset personit tjetër me fjalët se do ta privoj nga jeta ose do t’i shkaktojë lëndime të rënda trupore. Në atë mënyrë, pasi që kishte pasur mosmarrëveshje me një nga punëtorët, pasi vjen në vendin e ngjarjes, zyrtari policor, ndryshe i dëmtuari , kanoset me fjalë nga i akuzuari.

Me këto veprime, sipas aktit të akuzës, i pandehuri, kishte kryer veprën penale “kanosja” nga neni 185 paragrafi 3 të Kodit të ri Penal të Republikës së Kosovës, vepër kjo e dënueshme me burgim prej gjashtë (6) muaj deri në pesë (5) vjet./betimiperdrejtesi/

I akuzuari I.  D. , pas leximit të aktakuzës, nuk pranoi fajësinë për veprën penale të mashtrimit, me të cilën e ngarkohet.

Në shqyrtimin fillestar të së premtes në Gjykatën Themelore në Prizren, prezent ishin prokurori Zenjullah Gashi, i akuzuari dhe e dëmtuara A.Q, me mbrojtësin e saj, Asman Hoxha.

Gjykatësi i rastit Fatmir Krasniqi, shqyrtimin e radhës e caktoi më 28 qershor 2017, në ora 9:00.

Prokuroria e ka ngarkuar me aktakuzë, I.  D. , se më 5 gusht 2014, në orë të papërcaktuar, në Prizren, me qëllim që t’i sjellë vetës apo personit tjetër ndonjë dobi pasurore, e mashtron ose e sjell personin tjetër në lajthim dhe me këtë e shtynë të veproj në dëm të pasurisë së saj.

Në këtë mënyrë, i akuzuari ia merr të dëmtuarës A.Q, 10.000 euro paradhënie, në mënyrë që pas dy muajve t’ia liroi banesën, mirëpo deri tani nuk e ka bërë, e as nuk i ka kthyer paratë.

I. D. , sipas Prokurorisë ka kryer veprën penale ‘mashtrim’ nga neni 335, paragrafi 2, të Kodit të Ri Penal të Republikës së Kosovës, e cila dënohet me gjobë dhe me burgim prej gjashtë (6) muaj deri në pesë (5) vite./btimiperdrejtesi/

Të premten, në varrezat e martirëve të Lagjes së Trimave (Tusus), kryetari i Komunës së Prizrenit Ramadan Muja me bashkëpunëtorët e tij, vendosën kurora lulesh dhe bënë homazhe, në nderim të 26 martirëve të kësaj lagjeje, që u vranë nga forcat serbe me 26 maj të vitit 1999.

Kryetari i Komunës së Prizrenit Ramadan Muja tha me këtë rast se këta martirë janë masakruar pa mëshirë.

“Fatkeqësisht në mesin e tyre ka pas edhe persona me të meta psiqike dhe mendore dhe këtë e bënë vetëm barbari serb” tha Muja.

Kryetari i Prizrenit tha më tej se nuk guxojmë ta harrojmë gjakun e martirëve dhe të dëshmorëve sepse edhe gjaku i tyre është gur themel i shtetit të Kosovës.

“Ne do ti përkujtojmë përgjithmonë me pietet” tha Muja dhe falënderoi familjarët e martirëve për edukimin në frymën e patriotizmit të të gjithë atyre që sakrifikuan vetveten për ti dal zot tokës së Kosovës.

Hajrim Qengaj, veteran i luftës nga kjo lagje tha me këtë rast se këta martirë qëndruan në shtëpitë e tyre dhe e dhanë shembullin e qëndresës deri në flijim, prandaj familjarët e këtyre personave meritojnë respekt nga institucionet gjatë gjithë kohës e jo vetëm në ditën e përkujtimit./Gazetaere.com/

Lidhja e papritur e koalicionit në mes të tri subjekteve politike, PDK-AAK-Nisma, që kishin një armiqësi të pashembullt në mes tyre gjatë së kaluarës së gjatë, nga analistët politikë po shihet edhe nga këndvështrimi i qëllimit të bashkimit në një bllok të përbashkët, si krah i luftës për shkak të Gjykatës Speciale për të provuar dhe për të mundur ta ndryshojnë ligjin e kësaj gjykate, meqë edhe në legjislaturën e fundit kishte disa nisma për ndryshimin e këtij ligji, por që nuk gjetën mbështetje të mjaftueshme. Tani se a do të mundet koalicioni i luftës, nëse i fiton zgjedhjet, të bëjë këto ndryshime kur nuk do ta ketë as përkrahjen ndërkombëtare dhe a do të rrezikojë t’i fusë në krizë këtë marrëdhënie me ndërkombëtarët, analistët thonë se mbetet një çështje që pritet të shihet në të ardhmen. Eksperti i fushës së drejtësisë, Blerim Burjani, thotë se ndikimi mund të jetë i madh dhe kapital, i rëndë dhe sfidues, kur dihet që nëse fiton krahu i luftës, që realisht e ndien veten të kërcënuar nga kjo gjykatë.

Prekja e Speciales, me efekte negative

Sipas Burjanit edhe veprimet mund të shkojnë në atë drejtim, pavarësisht se a do të mund t’i dilet me sukses dhe a do të pranohet një tendencë e tillë. “Janë grupuar në një koalicion të qëllimshëm që është tregues jo edhe i mirë, tregues tjetër është humbja e popullaritetit tek qytetarët, kur ata tentojnë që të gjithë së bashku ta rikthejnë pushtetin e tyre në mënyrë të fuqishme, duke mos hequr dorë nga pushteti me çdo kusht. E sprova më e madhe do të jetë për këtë koalicion kjo gjykatë”, u shpreh ai. “Unë konsideroj se, pavarësisht asaj që mund të synohet një ndryshim ligji, askush s’ka shpëtim veç vonim. Pra, ka procese të vështira për krahun e luftës, të cilët janë bërë bashkë mbase edhe për të shpëtuar më lehtë dhe për t’u përkrahur nga të tjerët. Pra, ka mjaft probleme të mëdha me këtë koalicion, ngase dihet mirëfilli që një shumicë e tyre janë në procedurë gjyqë- sore”, tha Burjani për “Kosova Sot”. Mirëpo, ataku në Ligjin për Specialen, Sipas Burjanit, mund të japë efekte negative. “Ky koalicion edhe po të fitojë nuk do të mund ta rikthejë Ligjin për Gjykatën Speciale në rend dite për plotësim-ndryshim. Realisht përpjekjen mund ta bëjë, por do të ballafaqohet me probleme tjera të natyrave të izolimit, edhe të tyre si politikanë, por edhe të shtetit të Kosovës dhe qytetarëve”, tha Burjani.

Një gjykatë e padrejtë

Është profesor Muhamet Kelmendi që thotë se personalisht, edhe në cilësinë e ish-politikanit, por edhe si ekspert i fushës, ka qenë kundër një gjykate të tillë të padrejtë dhe mendon që legjislatura e re e Kuvendit të Kosovës dhe Qeveria duhet ta anulojnë atë si të tillë.”Unë de-fakto kam qenë dhe jam kundër Gjykatës Speciale. Kjo për faktin se është në kundërshtim me parimet bazike mbi luftërat e drejta dhe të padrejta, si dhe me parimet mbi të cilat është ndërtuar e drejta ndërkombëtare. Sipas kësaj, çdo vend dhe politikë, apo shtet, i cili është agresor dhe dhunon, kryen krim gjenocide mbi një popull, e humb sovranitetin dhe vendoset nën kontrollin ndërkombëtar. Te Serbia dhe ish-Jugosllavia nuk u veprua kështu. Serbia bëri luftë dhunuese dhe gjenocid në Kosovë. Ajo vrau dhe masakroi mbi 13 mijë shqiptare brenda një periudhe prej disa muajve. Dogji dhe plaçkiti më se 150 mijë objekte. Qeveritarët dhe njerëzit e regjimit shovinist gjenocidial dhunuan mbi 20 mijë femra shqiptare dhe i dëbuan mbi 1 milion shqiptar”, tha Kelmendi, duke konsideruar se një speciale e ngjashme me atë për Kosovën do të duhej gjykuar pikërisht ato krime dhe jo për të ndjekur dhe kërkuar kriminelë tek viktima. “Kriminelët e udhëheqin sot Serbinë, Aleksandër Vuçiq ishte ministër i Informacionit në kohën kur u bë dhuna dhe u bë gjenocidi në Kosovë. Daçiq ishte shef i zyrës së informimit të kriminelit Millosheviq. Edhe ushtarakët aktualë ishin në ballë te dhunës. Askush nuk u përgjigj”, potencoi Kelmendi.

Përmbaruesi privat, Mehdi Reshani, të enjten, gjatë shqyrtimit gjyqësor të mbajtur në Gjykatën Themelore në Prizren, ka thënë se me rastin e përmbarimit të lëndës për të cilën akuzohet, nuk e ka shkelur ligjin për përmbarues privat.

I akuzuari, Reshani ka thënë se nuk e ka ekzekutuar dy herë vendimin e njëjtë gjyqësor, por se në pamundësi që vendimin ta përmbarojë brenda një dite, e ka bërë në dy ditë, më 26 dhe 29 shtator 2014. Tutje, ka shtuar se vetë nga procesverbali i përmbarimit vërehet se përmbarimi nuk ka përfunduar dhe se mund të vazhdojë në ditët në vijim, e që një përmbarim mund të zgjasë edhe me muaj.

Tutje, ka thënë se në punën e tyre janë të pavarur dhe se i japin llogari Ministrisë së Drejtësisë, e cila edhe i emëron, ndërsa ndaj procedurës përmbarimore kanë të drejtë palët në ankesë nëse mendojnë se nuk është kryer sipas rregullave. Për rastin konkret, ka thënë se i është përmbajtur vendimit të gjykatës dhe asgjë më shumë.

Në këtë seancë, po ashtu janë administruar edhe provat materiale nga shkresat e lëndës e ndër të tjera edhe një vendim i Gjykatës Themelore në Prishtinë, Departamentit Ekonomik. Sipas të cilit vendim, e dëmtuara në këtë rast, ndërmarrja “QMI” është rikthyer në bashkë-menaxhim të “Agrokosova Holding” pas më shumë se një viti nga largimi i tyre prej përmbaruesit të akuzuar.

Palët në procedurë kanë kërkuar kohë për të përgatitur fjalët përfundimtare, andaj kryetarja e trupit gjykues, Ajser Skenderi, ka shtyrë seancën për 9 qershor 2017, në ora 13:30.

Ky rast zhvillohet në bazë të aktakuzës së Prokurorisë Themelore në Prizren, e cila e akuzon Reshanin se ka tejkaluar kompetencat e tij me qëllim të përfitimit të dobisë pasurore për personin tjetër, e njëkohësisht duke i shkaktuar dëm personave tjerë.

Sipas aktakuzës, i akuzuari, përkundër faktit se e kishte përmbaruar lëndën përmbarimore të kreditorit “Gruppo Vinicolo Fantineli”  ndaj debitorit “QMI”, të dy palët si aksionarë në “Agrokosova Holding”, ai ka marrë sërish veprime ekzekutive pa e njoftuar debitorin “QMI”, duke nxjerrë nga objekti i “Agrokosova Holding” të gjithë stafin e të dëmtuarit “QMI”./betimiperdrejtesi/