Akuzat e vazhdueshme në drejtim të drejtësisë kosovare, të tilla se ajo është e kapur dhe e dirigjuar nga njerëzit e politikës dhe ata të grupeve të ndryshme të interesit, nuk po e lënë kësisoj që drejtësia të marrë frymë lirshëm, por rrjedhimisht edhe as Kosovën. Veç kësaj, edhe perspektiva evropiane e vendit është në pikëpyetje, pasi ajo po mbahet peng nga kjo drejtësi e stërkequr që është instaluar në Kosovë që një kohë të gjatë dhe që konsiderohet pushtet në vete, duke mos i dhënë llogari askujt. Përveç në qarqet mediatike, kur flitet për këtë çështje, askush asnjëherë nuk është marrë seriozisht me këtë drejtësi të kalbëzuar, dhe as që ka diskutuar për të, madje as Kuvendi i Kosovës. Njohësit e kësaj fushe, thonë se pa dekriminalizimin e politikes dhe veç- mas pa një reformim rrënjësor të drejtësisë nga e para, Kosova, do ta ketë shumë të vështirë që të ecë përpara dhe drejt integrimeve evropiane, ky edhe si parakusht i zhvillimit ekonomik dhe i mirëqenies së qytetarëve. Deputeti nga radhët e koalicionit në pushtet nga LDK-ja, Adem Salihaj, në një prononcim për gazetën “Kosova Sot” ka thënë se drejtësinë në Kosovë e përcjellin një grumbull problemesh, përfshirë mungesën e kuadrove, të hapësirave, pastaj të kuadrit të nevojshëm, por edhe aspektet e tjera teknike dhe administrative.

“Por, ajo që e bën drejtësinë tek ne jo efikase është kapja e saj dhe korrupsioni. Për çdo ditë në Kosovë dënohen për hajni të vogla dhe korrupsion të parëndë- sishëm, derisa në anën tjetër askush nuk dënohet për hajni dhe korrupsion milionësh. Këto dukuri të rënda do ta përcjellin drejtësinë tonë edhe shumë vite, deri atëherë kur politika do të dekriminalizohet”, është shprehur Salihaj

Dibrani: Drejtësia me neglizhencën e vet kundër integrimeve Ndërkaq, analisti Shefqet Dibrani thotë për gazetën, “Kosova Sot” se peng i të gjitha zhvillimeve, por edhe i perspektivës evropiane të Kosovës është pikërisht sistemi i kalbur i drejtësisë, i cili duke mos qenë efikas ka lejuar të zgjerohet krimi dhe korrupsioni, që tashmë ka prekur tërë sistemin e administrimit, si dhe hallkat përcjellëse të sigurisë, politikës etj. “Prandaj, pa një sistem të mirëfilltë të drejtësisë nuk mund të funksionojnë siç duhet siguria, politika, shëndetësia, e as arsimi e madje nuk do të funksionojë as bujqësia në zonat më të thella të vendit tonë, dhe kësisoj shpresa për një perspektivë evropiane të Kosovës me këtë nivel administrimi dhe me këtë sistem të drejtësisë që ka Kosova është shumë e vogël”.

Më tej, Dibrani ka nënvizuar se në këtë drejtim do të duhej që secili institucion të jepte përgjegjësi dhe po ashtu edhe secili sistem, përfshirë edhe Prokurorinë dhe Gjyqësinë, që të kontrolloheshin nga ligjet në fuqi, të cilat duhet t’i menaxhojnë grupet dhe komisionet përkatëse. “Por, kur krijohet anarkia në vend si kjo në Kosovë, askush askujt nuk i jep përgjegjësi dhe të gjithë akuzojnë të tjerët, duke mos u bërë përpjekja më e vogël për të dalë nga kjo amulli që e ka pllakosur vendin tonë. Por, pa asnjë dyshim faji bie mbi oligarkët politikë, të cilët kontrollojnë drejtësinë, kurse kjo është bërë tolerante ndaj strukturave politike që shkelin ligjin dhe Kushtetutën, që abuzojnë me paranë publike dhe me ardhmërinë e vendit, kurse drejtësia me neglizhencën e vet duket se është edhe kundër perspektivës evropiane të shqiptarëve”. Dibrani thotë se Kuvendi, Qeveria dhe Presidenca janë tri dikasteret që udhëhiqen nga njerëzit, për të cilët flitet se ndaj tyre janë të hapura akuza të rënda, prandaj, sipas tij, tani për tani nuk duhet të llogaritet as në Kuvendin e Kosovës dhe të mos shpresohet për ndonjë reagim apo veprim të shpejtë në drejtësinë kosovare.

“Kjo garniturë politike është shumë e papërgjegjshme ndaj të gjitha zhvillimeve në Kosovë, duke përfshirë këtu edhe perspektivën evropiane të shqiptarëve. Nëse do të ndodhë liberalizimi i vizave, ai do të ndodhë më shumë si rast humanitar për të mos u bërë horë vetë Evropa për një grusht oligarkësh politikë të Kosovës, andaj zvarritje dhe prolongim të së vërtetës do të ketë, sepse vetëm në Kosovë flitet për zero tolerancë, kurse për atë që i shqiptonte këto fjalë, po të kishim nivel të mirë të drejtësisë, prokurori do të duhej të niste hetimet, sepse me këtë mendje Kosova zë vendin e parë për mosluftim të krimit dhe korrupsionit të organizuar”

Duket se presioni i shoqërisë civile, medieve si dhe partive opozitare ka pasur efekt. Kryetari i Komunës së Prizrenit Ramadan Muja do të veproj ndaj vdekjes së tre vjeçares Xheneta Gashi.

Gazeta Blic nga burime brenda Komunës së Prizrenit ka marrë vesh se gjatë javës së ardhshme do të ketë ndëshkime për rastin e Xhenetës tre vjeçare, e cila vdiq si pasojë e rrënimit të një objekti në qendrën historike të Prizrenit.

“Dy drejtorë do të shkarkohen nga Ramadan Muja, të cilët kanë përgjegjësi në këtë fushë”, ka theksuar ky burim për Gazetën Blic, duke mos dashur ti bëjë publik emrat e drejtorëve.

Megjithatë, Ramadan Muja nuk fo të dorëhiqet për vete.

“Presioni i madh që është bërë tash e sa ditë ka bërë që Ramadan Muja të veproj. Në fillim të javës në konsulltim me PDK-në dhe me partnerët e koalicionit në Prizren, Muja edhe do të dalë me vendim zyrtar”, tha ky burim.

Pas këtij rasti tragjik, pos presionit të vazhdueshëm nga opinioni publik, ishte organizuar një protestë nga shoqëria civile ku u kërkua dorëheqja e Ramadan Mujës dhe Ferid Aganit.

Xheneta trë vjeçare vdiq si pasojë e rrënimit të një ndërtese të vjetër, në qendrën historike të Prizrenit, e cila do të duhej të restaurohej, por që për shkak të zvarritjes së tenderit, kjo ndërtesë dhe shumë të tjera në këtë zonë janë në një gjendje të tmerrshme. /Gazeta Blic

Në nderim të figurës së legjendarit Adem Jashari në Dragash, ditë më paë është përuruar shtatorja e tij.  Ajo në këtë qytet ka ardhur si dhuratë nga Alush Shala, këshilltar i kuvendit të Prizrenit.

Shala tregon rrugën e shtatores së Adem Jasharit deri në vendin ku ajo po qëndron.

“Shtatorja më ka ardhur si dhuratë nga pronari i kompanisë “Neë Ballkan” në Suharekë, i cili quhet Josuf Ozer nga Afioni i Turqisë”, tregon ai.

“Me Bacin Josuf u njoftova në vitin 2005/2006, i cili fitoi besimin tim dhe respektin për Ushtrinë Çlirimtare të Kosovës”.

“Ai me privatizimin e Fabrikës së Ballkanit në Suharekë për hatër tim mori mbi njëqind punëtor kryesisht anëtar të familjeve të dëshmorëve si në Suharekë ashtu edhe në Prizren, ku për mua ishte një fillim i mbarë se më në fund po fillon respektimi i vlerave të luftës për këtë munden ta vërtetojnë si në Shoqatën e Familjeve të Dëshmorëve në Suharekë”, tregon Shala për Opoja.net.

“Në shenjë respekti për ushtrinë tonë UÇK-ën, dëshmorët ai nga Afioni solli material ndërtimor për varrezat e familjes Jashari në Prekaz”.

“Ai këtë e ka bërë për hatër të Zotit dhe timin, por më shumë për shpirtin e vet”.

Shala tregon se pas emërimit të Aeroportit të Prishtinës me emrin e Adem Jasharit, Jusufi ka kërkuar nga ai një foto të Ademit.

“Ai më kërkoi një foto të Komandantit pa me treguar arsyen apo qëllimin”.

“Pas disa muajve më ftoi në Fabrikën e Ballkanit në Suharekë dhe kur pash që kishte sjell shtatoren që është vendosur në Dragash”.

“Në atë çast m’u ndal fryma kur e pashë shtatoren dhe për disa minuta ka mbretëruar një heshtje e përzier me lot dhe pastaj me uruan dhe më thanë që këtë e ka bërë për ty me dëshirën ta vendosni në Aeroport “

“Pastaj më shkoj mendja që të dhurojë këtë shtatore, duke e pas parasysh se Dragashi ka buxhet tw vogël”,tregon ai./Opoja.net

Ajo që e dallon Prizrenin gjatë muajit të shenjtë të Ramazanit është fakti se tani për një muaj ka më shumë jetë nate. Ajo që këtë muaj e dallon është edhe fakti se në Prizren në këtë muaj pasurohen edhe shumë sofra dhe begatohen me ushqime. Megjithatë, papunësia e madhe dhe varfëria ekstreme që ka kapluar shumë familje bën që në shumë shtëpi të mos ketë ushqime të mjaftueshme as gjatë këtyre ditëve të këtij muaji të shenjtë, shkruan gazeta Kosova Sot.

Prizreni vërshohet edhe nga turistët

Në Prizren tash e sa kohë është krijuar tradita që pas iftarit qytetarët dalin në qytet deri në orën 3:00 të mëngjesit. Pos të rinjve, shumica dalin edhe me familje për të shijuar freskun e natës buzë lumit të qytetit, pas një dite të gjatë dhe të lodhshme me agjërim. Për besimtarët më të devotshëm, xhamitë e shumta lënë dyert e hapura po ashtu deri në orët e vona, ku ata i falen Zotit dhe i drejtojnë lutje. Kjo traditë ka bërë që gjatë këtij muaji Prizreni të josh edhe shumë vizitorë e turistë nga qytetet e tjera përreth, apo edhe më larg, dhe ndodh që numri i turistëve të jetë më i madh se vetë prizrenasve që dalin për shëtitje. Kështu, ndodh që në mbrëmje vështirë është madje të arrish të sigurosh një vend për t’u ulur në kafenetë e mbushura përplot.

Shumë tiranas joshen nga bukuria e Prizrenit

Ne takuam edhe Afërdita Bruzin nga Tirana, e cila me këtë rast na tregoi se vjen gati në secilin vikend në Prizren për shkak të bukurisë që ka ky qytet.”Jam këtu shpesh, sepse Prizreni është mrekullia e gjitha qyteteve të shqiptarëve dhe të Ballkanit. Personalisht vij këtu sepse relaksohem dhe ndihem mirë”, na thotë Afërdita Bruzi, e cila shprehet se i pëlqen edhe jeta e natës në qytet. Po kështu me admirim të veçantë shprehet edhe Zamira Take, po kështu nga Tirana. “Prizreni është i bukur, i lirë për të jetuar dhe ka tipare të një qyteti të traditës së vjetër shqiptare. Është vendi ku më me dëshirë vij. Këtu jam shpesh, sepse besoni se kudo në botë të shkoja s’do të mund të jetoja pa këto burime të “Shatërvanit”, pa kalldrëmin e bukur të këtij qyteti. Më pëlqejnë edhe njerëzit dhe kultura e tyre”, tha ajo. Kurse kamerieri Meriton Gashi pohon se ditët e vikendit ka shumë mysafirë në Prizren. Edhe lokal ku ai punon gumëzhin nga mysafirët e shumtë. “Kemi shumë klientë, sidomos gjatë ditëve të vikendit, por edhe në mbrëmje kur vijnë grupe të ndryshme për iftar”, na thotë Gashi.

Një vakt i ngrohtë për skamnorët

Por, edhe në muajin e shenjtë të Ramazanit familje të shumta po përballen me varfëri ekstreme. Një prej tyre është edhe ajo e Muhamet Hoxhajt. Kjo familje jeton në rrugën “Edit Durham” nr. 38, në një shtëpi të vjetër ku me vetëm 70 metra katrorë jetojnë gjashtë anë- tarë të familjes Hoxhaj. Muhameti pohon se është i papunë dhe jeton vetëm me ndihma sociale, pasi merr vetëm 75 euro në muaj. Ai edhe pse është vetë keq me shëndet, shprehet se shëndeti i djalit Endritit ia ka dërmuar tërësisht shpirtin atij dhe nënës së Endritit. Ndërkaq gjendja fare më të mirë nuk kanë as familjet që jetojnë në Qendrën kolektive si ajo Lubovci, Krasniqi e të tjera. Për skamnorët, por edhe për besimtarët e tjerë, në Prizren tash e sa vite organizohen iftare të përbashkëta, që organizohen nga shoqata të ndryshme humanitare. Këto darka pos që ofrojnë nga një vakt për skamnorët, janë edhe një përkujtues për gjendjen e rëndë në të cilën përballen shumë familje prizrenase që edhe në këtë shekull të ri përballen me mungesën e bukës së gojës.

(Kosova Sot)