Në Bibliotekën Kombëtare të Kosovës “Pjetër Bogdani” u promovua libri më i ri i historianit dhe politikanit Jakup Krasniqi me titull “Zhurmuesit e Demokracisë”.

Përmes këtij libri autori sjell rrjedhën e Kosovës në shumë aspekte e me theks të veçantë politikën e sotme. Autori tregoi se kjo vepër përbëhet nga dy pjesë, trajtesa historike dhe ajo shoqërore, tha se shqetësimi i tij qëndron në trajtesat shoqërore në vend.

“Trajtesat shoqërore janë shqetësimet e mia për trajtesat në Kosovë. Njerëzit mund dhe kanë të drejtë të thonë se je shumë i shqetësuar në jemi njerëz dhe kemi emocione, shqetësime. Por, unë do të dëshiroja që realitetin shoqëror ta kem parë me shqetësimin më të madh se sa është. Me heshtjen realitetit shoqëror nuk bëhen ndryshimet”, tha Krasniqi.

Kritiku letrar nga Shqipëria, Behar Gjoka duke dhënë vlerësimet e tij për këtë libër potencoi se autori me këtë libër aspiron të vërtetën. Ndërsa kritiku tjetër letrar, Adem Gashi përveç paraqitjes së vlerësimeve për këtë libër kërkoi nga politikani Jakup Krasniqi që ta ndërpresë aktivitetin e tij politik.

Mirëpo, sipas Bilall Sherifit nëse kërkohet që Krasniqi të largohet nga politika atëherë duhet të largohet edhe nga libri. Ai përveç kundërshtimit të kësaj kërkese i bëri ftesë publike Gashit që të bashkëngjitet në politikë.

Një kitarë elektrike që i përkiste Prince dhe një tufe flokësh të David Bowie janë shitur në një ankand në ShBA për një vlerë totale prej 150 mijë dollarësh.

Kitara e quajtur “Reja e Verdhë” u ble për 137 mijë e 500 dollare nga koleksionisti amerikan Jim Irsay. Kitara ishte prodhuar në fund të viteve 1980 nga kompania Nat-Kupii Enterprajzis dhe u përdor nga këngëtari për një numër të madh koncertesh deri në mesin e viteve 90.

Koleksionisti Irsay njihet për afeksionin e tij për instrumentet muzikore. Në koleksionin e tij ka objekte që dikur u përkisnin Bob Dylan, John Lennon dhe Jerri Garcia.

Dhjetorin e shkuar bleu baterine e Ringo Star për një vlerë prej 2.1 milionë dollarë. Ndërsa një tufe nga flokët e Bowie, i cili ndërroi jetë në muajin janar, u shit për 18 mijë e 750 dollarë. Floket vinin nga një ish punonjës i muzeut të dyllit Madame Tussauds në Londër, i cili në vitin 1983 i kishte përdorur ato për të rikrijuar modelin e flokëve të ikonës së muzikës.

Në mjediset e bibliotekës komunale “Sulejman Krasniqi” në Rahovec, u bë promovimi i krijimtarisë letrare të poetit Hysni Gashi.

Me këtë rast u lexuan pjesë nga krijimet e Gashit, ku theks të veçantë zunë poezitë që poeti i kishte krijuar gjatë kohës sa ka punuar e jetuar në Rahovec, si dhe poezitë kushtuar njerëzve të vyeshëm të kësaj ane pas largimit të poetit.

Recensione, biografi dhe copëza nga jeta e poetit u shpalosën nga të pranishmit në këtë promovim, ndërsa vetë poeti foli për frymëzimin e vazhdueshëm që Rahoveci i jep atij për të shkruar.

Poeti Hysni Gashi, ka jetuar në vitet ’70 në Rahovec prej nga më pas është larguar si i papërshtatshëm për regjimin komunist. Mirëpo, poeti në shenjë respekti për njerëzit e kësaj ane dhe punën e tyre, ia ka kushtuar përmbledhjen me poezi “Balada e Rahavecit”, si dhe shumë poezi që mund të lexohen në përmbledhjet tjera. Deri më tani, në moshën 83 vjeçare, ka botuar këto përmbledhje me poezi: Nuk po u zhbëkan popujt, A do t’i falë atdheu, Kronikë në vargje, Ndodhi në agun e lirisë, Koha jonë e dy Ademave, Ejona, Portreti i babës, Zhgënjimi, Malisheva m’i çeli dyert, si dhe përmbledhjen e fundit botuar këtë vit “Kah po vemi”. Në dorëshkrim i ka edhe tri përmbledhje të gatshme me poezi, që sipas autorit presin të shohin dritën e botimit së shpejti. Botimin e një pjese të krijimtarisë poetike të Gashit e ka mbështetur edhe Komuna e Rahovecit.

Aktivitetin e organizoi Drejtoria për Kulturë, Rini dhe Sport në Rahovec. /PrizrenPress.com/