Kryetari i NISMA për Kosovën në protestën e përbashkët të organizuar me AAK-në, ka thënë se janë mbledhur në qendër të Prishtinës, në shesh, për ta kundërshtuar qeverinë antikushtetuese, siç e ka quajtur ai koalicionin PDK-LDK.

“Jemi këtu me mesazhin e qartë: “Ne nuk jemi ndalur. Ne po vazhdojmë me kundërshtimin e kësaj qeverie antikushtetuese”. Nga të gjitha ato që thanë parafolësit, ata dërguan mesazhin e tyre, për kërkesat e opozitës që do të vazhdojnë të jenë të tilla derisa ky koalicion vazhdon të funksionojë”.

“Edhe sot nga ky shesh iu bëjmë thirrje të dorëhiqen. Që nga dita e parë, kjo qeveri në vend se të punojë për të përmirësuar gjendjen në vend, ajo ka mashtruar”.

Limaj ka ironizuar me qeverinë dukë thënë se po mundohen ta mashtrojën popullin me disa pazare të këqija për vendin, ndërsa ka premtuar se janë të gatshëm jo vetëm për të kundërshtuar, por edhe për të fituar në zgjedhjet e reja, që sipas tij do të mbahen së shpejti.

“Siç e keni parë ditëve të fundit, kanë nisur ta shesin para popullit një pazar. Po thonë “po i marrim vizat dhe po japim tokë. Por ne ju themi: “Ne i meritojmë vizat dhe asnjë centimetër nuk e japim”. Pak më vonë ata do të na thonë se po e pranojmë Asociacionin dhe po e krijojmë ushtrinë. Por ne sot nga këtu ju themi se nuk e pranojmë Asociacionin dhe ushtrinë do ta krijojmë”.

“Tani e tutje ky Asociacion do ta ketë përballë një opozitë që është e gatshme jo vetëm për të kundërshtuar, por edhe për të fituar në zgjedhjet tjera”, njofton Klan Kosova.

Jakup Krasniqi nga Nisma për Kosovën, i cili ka hapur protestën opozitare në Prishtinë, ka deklaruar se Kryeministri Isa Mustafa dhe Presidenti Hashim Thaçi janë e keqja e Kosovës.

Ai ka pohuar se të dy ata duhet të dorëhiqen dhe vendi të shkojë në zgjedhje, duke konstatuar se kështu shënohet fundi i krizës në Kosovë.

Krasniqi ka deklaruar se i thuhet JO Dearkacionit me Malin e Zi, i cili, sipas tij, me të drejtë është kontestuar, si dhe të gjitha marrëveshjeve që ai i ka quajtur të dëmshme për Kosovën.

“Këta qeveritarë i kanë bërë dëme të pariparueshme vendit, në të gjitha sferat e jetës”.

“Vetëm qytetarët e Kosovës, në zgjedhjet e parakohshme, mund t’ia rikthejnë legjitimitetin vendit”.

“Mirupafshim në zgjedhjet e parakohshme, të lira e demokratike”.

Krasniqi, në fjalimin e tij para protestuesve në Sheshin “Skënderbeu”, pos arsyeve për protestë, ka përmendur edhe sukseset e Kosovës të kohëve të fundit: Rekomandimin për liberalizim të vizave, si dhe pranimin në UEFA dhe FIFA. / Politiko.net/