Ka ndërruar jetë aktivistja e shoqërisë civile në Prizren, Drita Vukshinaj.
Ajo është varrosur sot në varrezat e qytetit.
Vukshinaj ka qenë e udhëheqëse e Shoqatës “Hendikos”.
Mos u ‘vrisni’ komandantë
Shkelqim Hysenaj
Shkëndija që lëshoi deklarata e njërit prej themeluesve të UÇK-së nga foltorja e Kuvendit, ditën kur i “pathyeshmi” i luftës u zgjodh president, u përhap shpejt duke u shndërruar në flakadan, efektet zinxhir të së cilës me gjasë do të vijojnë të përhapen dhe më tej.
Nga kjo përplasje brirësh e komandantëve, disa të nxitur nga emocionet e çastit, e të tjerë të shtyrë nga kryekomandantët, kredo politike do të sigurojnë vetëm këta të fundit.
Ndërsa ne të tjerëve që vështrojmë, siç kemi vështruar në kohën kur kishim mundësi të bënim epokë, do të na shërbejë vetëm si një leksion i mirë se si (nuk) duhet bërë luftë pas luftës. Meqë dolëm te lufta, përgjigjen më të mirë të kacafytjes së tyre e japin tri fjalitë e mëposhtme që komandantët i kishin aq për zemër kur kishin vendosur të bëheshin ushtarë:
“Unë, ushtari i Ushtrisë Çlirimtare të Kosovës, betohem se do të luftoj për çlirimin e tokave shqiptare dhe bashkimin e tyre.
Do të jem përherë ushtar besnik, luftëtar i denjë i lirisë, vigjilent, guximtar dhe i disiplinuar, i gatshëm që në çdo kohë, pa kursyer as jetën time, të luftoj për t’i mbrojtur interesat e shenjta të atdheut.
Nëse shkel këtë betim, le të ndëshkohem me ligjet më të ashpra të luftës dhe nëse tradhtoj, qoftë i humbur gjaku im.
Betohem, betohem, betohem.”
Ti komandant e ke shkelur këtë betim. Nuk je më ai që teksa shqiptoje tekstin e betimit me fytin që të çirrej të “ngriheshin qimet përpjetë”. Bëmat, komandant i zerove, i shite “për dy lekë”. Nuk e di nëse mund të të quaj ende sot ushtari im i UÇK-së. Nuk e di nëse mund të shpresoj edhe më tej te ti se do të jesh ushtar i lirisë. Shpatat që hapët ndaj njëri-tjetrit kanë vënë në pikëpyetje “mitin” që patëm krijuar për ju.
Shumë prej nesh tashmë të shohim me dyshim. Madje disa duan që të çlirohen prej teje. Nuk duan që ti të sakrifikosh asgjë për këtë vend. Me dhimbje e them se edhe unë mendoj se misioni yt (nuk) ka mbaruar. Komandant hiq dorë nga kjo “sakrificë”. Beteja jote nuk është më e jona. Mos na rikthe sërish në luftë. Mos na krijo konflikte të frymëzuara nga inatet e politikës ditore.
Gjej paqe sepse ne që besuam te ti me fanatizëm e ruajtëm pastërtinë e luftës dhe qëllimin e saj. Besuam shumë te ti dhe të bëmë hero, edhe pse ti ishe i gjallë. Ti e dije se lufta kishte edhe qëllime të tjera përveç largimit të pushtuesit. A ishin qëllim përmirësimi i gjendjes sociale, forcimi i rendit dhe ligjit si dhe zhvillimi ekonomik? Po! Tani po ju drejtohem në shumës. O ju, të plotfuqishëm, keni hedhur pas krahëve qëllimin për të cilin e bëtë betimin, kur u radhitët krah UÇK-së? Shtypja, shantazhet, keqpërdorimet, korrupsioni, nepotizmi, ndikimi në çdo proces në dobi të interesave personale qenë arma juaj e vetme që keni përdorur këto 16 vjet.
Muskujt për atë që ruajtët gjithë këto vjet, jo ajo fuqia që e përdorët gjatë luftës së viteve ’97 – ‘98. Nëse në diçka kemi besuar si popull, atëherë ne kemi besuar në UÇK-në. Kemi besuar në qëllimin e saj. Kemi besuar në pastërti pavarësisht se shumë shtete dhe individë me ndikim kanë tentuar t’ia hedhin një hije të zezë. Por nuk e di nëse jeni të vetëdijshëm se me akuzat që po bëni po humbisni çdo respekt. Nëse pas kaq shumë vitesh ende keni për çka të akuzoni njëri-tjetrin atëherë paskeni pasur vërtet diçka për të fshehur. Atë që keni për të fshehur mbajeni për vete. Nuk duam ta dimë se kush ishte patriot e kush tradhtar. Nuk na intereson kush shau kë me nënë e kush hëngri shpullë i pari. Janë të pavlera. Nuk përfiton kurrkush. Për hir të respektit ndaj luftës, gjynahet mbajini për vete. Mos na ngarkoni me to.
Nuk duam të jemi hisedarë. Nuk na duhen gjynahet tuaja. Vetëm kujtojeni shokun tuaj që u vra në frontin e luftës. Çka do të thoshte ai? Çka do të thoshte bashkëluftëtari që vdiq nga plagët në vijën e parë të fronit? Nëse nuk e kujtoni këtë, atëherë mendoni se çfarë tha fëmija i dëshmorit kur ti ia përmend prindin çdoherë që të rrezikon politika ditore. A e mendon faktin se ky jetim lëndohet prej teje?
Apo ke lënduar aq shumë njerëz saqë dhe po të lëndohet jetimi, ty nuk të plas?! Edhe pse me kalimin e kohës thonë se plagët mbyllen, por këto nuk janë të atij lloji, janë plagë që thellohen dhe gjakosen nga e para sa herë nëpërkëmben sakrificat e atyre që nuk jetojnë më. Ata nuk zgjodhën të flijoheshin, por iu desh ta bënin, për fëmijët e tyre, por dhe fëmijët e atyre që sot ulen këmbëkryq sipër kujtimit të heronjve. Heronjve të vërtetë, dhe jo të kohëve të sotme. Heronj të denjë për t’u nderuar duke iu thënë “faleminderit”, sa herë ti, unë, të gjithë kërkojmë të respektohen të drejtat tona si shqiptarë dhe si njerëz të lirë. Prandaj mos u “vrisni” komandantë!
Nexhat Çoçaj premton ndërtimin e shkollave të papërfunduara
Drejtori i Arsimit në Prizren Nexhat Çoçaj, ka premtuar ndërtimin shkollës së re në lagjen “ Bajram Curri”. Lajmin për ndërtimin e kësaj shkolle e ka dhënë dje, në shënimin e Ditës së Mësuesit.
Çoçaj, para të pranishmëve ka thënë se për 8 vite janë ndërtuar 22 objekte të reja shkollore.
Sipas tij, aktualisht janë duke u ndërtuar dhe do ndërtohen objekte të reja shkollore në Velezhë, Lukinaj, Piranë, Dedaj dhe në Gjonaj, pa treguar se pikërisht në lokalitetin e fundit projekti ka filluar para tre vitesh.
Në Gjonaj, objekti i ri ka pësuar dëmtime.
Para të pranishmëve në manifestimin e shënimit të Ditës së Mësuesit, ai ka thënë se ka një lajm të mirë për të gjithë, sepse në muajin maj do të përfundojnë punimet në realizimin e projektit të shkollës së mesme të mjekësisë po në të njëjtën lagje, ku punimet kishin filluar hiç më pak se para 5 vitesh, për të cilën çështje kishin pasur ankesa për vonesë të punimeve të gjitha grupet e këshilltarëve në Kuvendin e Prizrenit./TV Prizreni/
Stuhi e fuqishme në Teksas, shkatërrohen dhjetëra shtëpi
Dhjetëra shtëpi janë shkatërruar pas një stuhie të fuqishme që ka përfshirë veriun e Teksasit.
Konteja tarrant, që gjendet vetëm 40 km në lindje të Dallas, është pushtuar për orë të tëra nga erëra të fuqishme dhe shi të rrëmbyer.
Pasojat janë këto, shtëpi të shkatërruara e banesa të ndara më dysh.
Çatitë janë shkëputur nga shtëpitë, bizneset dhe ndërtesat.
Sipas mediave vendase, 2 persona janë lënduar rëndë pasi janë marrë me vete nga era e fortë.
Ramadan Muja kërkon një jurist
Kryetari i Prizrenit Ramadan Muja, kërkon një jurist në kabinetin e tij. Zyra e Personalit, tashmë ka hapur edhe një konkurs publik për këtë vend të punës. Titulli i vendit të punës është Zyrtar i lart ligjor.
Konkursi do të mbetet i hapur 15 ditë, duke filluar nga data e publikimit më 07.03.2016 deri më datën 21.03.2016.
Muja gjatë tre mandateve të qeverisjes është ballafaquar me ligjin. Ai për shkak të shkeljeve ligjore, është dënuar nga Gjykata Themelore në Prizren. Ndërkaq, betejën ligjore, Muja ende po e vazhdon në Gjykatën e Apelit dhe atë të Supremes. /PrizrenPress.com/
Selimi: Pushteti deshi të sjellë eksploziv në protestat tona
Rexhep Selimi, deputet i Lëvizjes Vetëvendosje, ka akuzuar Qeverinë e Kosovës për ushtrim të dhunës psikologjike ndaj protestuesve në protestat e organizuara nga kjo parti.
Për më tepër, Selimi akuzon pushtetin se është organizuar që të sjellë në këto protestat e 9 janarit dhe 17 shkurtit edhe eksploziv.
“Pushteti kishte organizuar të sjellë eksploziv në Prishtinë por protestuesit shpëtuan”, theksoi Selimi, duke sqaruar se kjo ishte ndaluar nga njësitet e Policisë së Kosovës.
“Pushteti ka bërë terror psikologjik ndaj protestuesve, protestave ju referofshin të dhunshme në mënyrë që t’i frikësojnë qytetarët. Edhe KFOR-in e EULEX-in i vënë në lajthitje, i dezinformuar duke ju thënë se do të ketë eksplozivë dhe dhunë ndaj institucioneve shtetërore”, shtoi Selimi.
Në anën tjetër deputetja tjetër e Vetëvendosjes, Aida Dërguti, ka thënë se ka pasur shkelje rregullave të sjelljes nga ana policisë së Kosovës brenda Kuvendit të Kosovës. Ajo ka qenë kritike sidomos në rastin e sulmit ndaj deputetes Albulena Haxhiut ku në tentim për arrestim ajo ishte alivanosur.
“Prezenca e policisë, nxjerrja nga salla janë të paligjshme dhe asnjëherë ndaj tyre nuk është marrë asnjë masë. As kryetari as Kryesia e Kuvendit nuk është e autorizuar më bërë keqtrajtime ndaj deputetëve”, tha Dërguti.
Ajo këtë e sheh si dhunë ndaj deputetëve ku sipas saj ëshët bërë tejkalimi i kompetencave me ligj.
“Policët janë përfshirë në kryerje të veprave penale në mënyrë të kundërligjshme”, theksoi ajo./Insajderi.com
Hajnat pushtojnë Kosovën
Vjedhjet nëpër dyqane, banesa private apo nëpër shtëpi, nga hajnat janë bërë dukuri shumë shqetësuese për qytetarët, raporton Gazeta Fjala.
Zyra për informim në Policinë e Kosovës ka konfirmuar për Gazetën Fjala se në të gjithë territorin e Kosovës për vitin 2015 janë kryer gjithsejtë 5 mijë e 988 vjedhje.
Nga kjo, rreth 13 mijë e 916 perona janë arrestuar në të gjithë territorin e Kosovës.
Nga ta 3 mijë e 873 persona janë dërguar në mbajtje.
Koloni artistike në Prizren, lobimi tjetër serb në UNESCO
Manastiri i Arkangjelit të Shenjtë pranë Prizrenit për disa ditë do të shndërrohet në koloni grafike të quajtur “Dhe kësisoj pas UNESCO”.
Ajo do të zgjasë shtatë ditë dhe në të do të marrin pjesë Velizar Krstic, Suzana Vuckovic Nenad Kostic, Goran ?eli?anin, Miroslav Saveli?, Nikola Milosavljevic, Milena Cvetkoviq dhe Jovan Milanoviq.
Siç raportojnë mediat serbe, kolonia ka për koncept pasqyrimin e shkatërrimeve të kishave e manastireve serbe nëpër Kosovë e Metohi, shkaktuar nga shqiptarët si mënyrë për të dëmtuar trashëgiminë e vjetër serbe. Më pas të njëjtat punime do të ekspozohen në Graçanicë dhe në Prizren, me datë 17 mars, kur edhe shënohet 12-të vjetori i masakrës së marsit ku u vranë tetë serbë në atë që quhet “martovskog pogroma”, shkruan KultPlus.
Më pas një katalog i punimeve do tu dërgohet vendeve anëtare të UNESCO-s, me synimin që ato të shohin se si kosovarët paskan shkatërruar ndër vite kulturën serbe dhe paskan terrorizuar njerëzit që banojnë dhe angazhohen për to.
Kolonia është ndihmuar nga Zyra për Kosovë e Metohi në Qeverinë e Serbisë.
Lista e Objekteve për Mbrojtje të Përhershme e ndihmon trashëgiminë kulturore
Ministri i Kulturës, Rinisë dhe Sportit, Kujtim Shala, ka zhvilluar sot një takim pune me Shafi Gashin, kryetar i Këshillit të Kosovës për Trashëgimi Kulturore.
Në këtë takim Shala kërkoi nga Këshilli që të punohet me kujdes të shtuar në procesin e finalizimit të Listës së Objekteve për Mbrojtje të Përhershme, në mënyrë që kjo liste të jetë sa më gjithëpërfshirëse dhe sa më profesionale.
Po ashtu, ministri kërkoi që ky proces të përmbyllet sa më parë, sepse është në dobi të trashëgimisë kulturore të Kosovës, dhe proceseve të rëndësishme që lidhen me këtë fushë.
Më te, Shala u shpreh se trashëgimia kulturore e Kosovës është interes i Kosovës. Ai i premtoi mbështetje dhe përkrahje kryetarit Gashi, sidomos në funksion të gjurmimit, ruajtjes, promovimit dhe afirmimit të trashëgimisë së pasur kulturore të Kosovës.
Ndërmjet ministrit Shala dhe kryetarit Gashi, u bisedua edhe për nevojën e bashkëpunimit ndërmjet institucioneve të ndryshme rreth ruajtjes së trashëgimisë kulturore të Kosovës, sidomos nga shkatërrimet dhe dëmtimet e qëllimshme.
Kryetari Shafi Gashi e falënderoi ministrin Shala për mbështetjen, dhe gjithashtu e informoi me sfidat që e presin Këshillin këtë vit, me prioritet në fushën e trashëgimisë, si dhe me nevojën për një vetëdijesim të përgjithshëm të shoqërisë sonë për ruajtjen e trashëgimisë kulturore të Kosovës. /PrizrenPress.com/
Peshqeshi i LDK-së
Nga Abdullah Thaçi
Vërtetë është e pa nevojshme më të merresh me arsyetimet e deputetëve të LDK-së, në ditën kur Hashim Thaçi u zgjedh president. Ofendimi ma i madh na bëhet kur dëgjojmë arsyetimet banale nga ata, “nuk ja bëra kourumi”, ” qëndrova po se votova”, e drroçka tjera që nuk pinë ujë.
Se çka fituan ata deputet që e votuan Hashim Thaçin është shumë më pak se sa çka do të del se kanë përfituar këta që deklarojnë se “qëndruam në seancë, por nuk e votuam”.!
Nuk do të kisha marr as më të voglin mundim të shkruajë më për këtë temë, sikur mos të isha nxituar nga ofendimi që Alma Lama, deputetja e kontrabanduar, e dyshuar për misionin e saj në Kosovë, të mos vazhdonte të na ofendojë intelegjencën.
Ajo, sikurse shumica dërmues e shtetit prej nga vije ajo, Kosovën dhe kosovarët, nuk i llogarisën për njerz normal. Kosovën i llogarisin si veri, kosovarët si “malok”, njerz që më tepër ngjajnë me majmunin se sa me njerz normal, një far lloj krijese që zgjohet dhe vepron me instikt.
E fajet për këtë dhuratë kundërmuese pa dyshim i ka “Vetevedosja”, kjo që na lodhi me “patriotizëm e Shqipëri etnike”, ajo që e para e kontrabadojë dhe e fuqizojë me renditje alfabetike këtë misionare të dyshimit në politikën kosovare!
E tash duhet vuajtur edhe më tutje pasojat e kundërmimit të kësaj kontrabande nën llogon dhe petkun e një partie që dikur kishte për traditë besën dhe fjalën.
E vërteta është se ne, që sot jemi të hidhëruar, të gjithë votuam dhe besuam në një ideal, besuam në një fjalë dhe premtim publik, nifar lloj “bese”, se kurr me PDK!. E për këtë veprim, asnjëri nga ne nuk duhet ndihet i turpëruar, turpi duhet të bie mbi ata që na gënjyen e mashtruan.
E pa falshme do të jetë, nëse të njëtit, ose shokët e tyre do të vijnë e do të na thonë, se kemi gabuar që bëmë koalicionin, na jepni ju votën se nuk do e përsërisim më këtë veprim, ne jemi ndryshe….!
Ata që dikur derdhnin lot krokodili mbi trupat e veprimtarëve të vrarë të LDK-së, e në emër të tyre delnin dhe mbledhnin vota për kolltukun e tyre, të njëjtit ishin dje që kërkon vota në emër të zbardhjes së vrasjeve politike që për adresë kishin SHIK-un dhe kreun e saj. Pikrisht janë po këta të njëjtit që e zgjodhën Kadri Veselin kryetar kuvendi, e Hashim Thaçin president shteti.
E sot, a thua me cilin” kod etik” po mundoheni të shpërlani ndytësirën kundërmuese nga trupi juaj ?!.
Thënë drejtën, përsonalisht as mirë as keq me asnjë zyrtar të PDK-së nuk kam. Ata që më njohin e dinë që e kam përjetuar rëndë vrasjen e figurave të LDK-së. Por përgjithësimi dhe adresimi i krimit në të gjithë antarësin e asaj partie asnjëher nuk mu ka duke punë e ndershme. Këta që sot shtirren si “patriot” e që dje thonin se “kurr me PDK”, ishin përgjithësuesit dhe linçuesit e djeshëm. Sikur të kishte pak moral në politikë, dikush nga të ndershmit e PDK-së duhej marr rrugën deri në prokurori, për të ngritur një kallzim penal për etiketimin e gjithë viteve të pas luftës që i’u kanë bërë dikur rivalët, tash bashkë qeverisësit nga LDK-ja.
Por si duket njerzit në LDK e kaën gjetë formulën e duhur për ta ngirtur pazarin për esape përsonale. Formulë e suksesshme kalkulative rezultoj të jetë “Thirrja për drejtësi”!
Këta ma kujtojnë kohën e mjerimit tek shkrimet e Migjenit, ku fjala ” Zoti të dhashtë” nënkuptonte “mos paq kurr”.
“Thirrja për drejtësi” është sinonim i dekriminalizimit të SHIK-ut.
Ky është pesqeshi i LDK-së, ai kundërmon rëndë, në momentin kur fillon ta hapësh !