Vilson Kilica, një nga emrat më të njohur të arteve pamore në Shqipëri ka mbyllur sytë përgjithmonë në moshën 84-vjeçare.
Ai është një nga krijuesit më të rëndësishëm të pikturës shqiptare që fillon nga viti 1950 e deri në ditët tona, sidomos për periudhën e gjatë të viteve të diktaturës komuniste në Shqipëri.
Mbas studimeve në Akademinë e Artit në Leningrad, Vilson Kilica kthehet në atdhe për të dhënë një kontribut të rëndësishëm në kulturën dhe artin shqiptar. Kilica ishte themeluesi dhe dekani i parë i Institutit të Arteve në Shqipëri – sot Universiteti i Arteve. “Piktori i Popullit”, Kilica i përket brezit të nderuar të artistëve të artit shqiptar të gjysmës së dytë të shekullit XX. Emri dhe vepra e tij do jenë pjesë e historisë së arteve pamore shqiptare. Vepra e tij krijuese ruhet dhe ekspozohet në Galerinë Kombëtare të Arteve, Tiranë, në GA, Fier; në koleksionin e familjes dhe në koleksionistë privatë brenda dhe jashtë Shqipërisë. Në Galerinë Kombëtare të Arteve ndodhen 40 vepra të piktorit të viteve 1960-1989. Veprat e artistit janë pjesë e linjës aktuale muzeore të GKA-së.
“U nda nga jeta Piktori i Popullit, Vilson Kilica, mik i shtrenjtë dhe i paharrueshëm që jetoi me ngjyrat duke e ndarë bujarisht dijen e tij me të rinjtë”, do të shkruante në faqen e tij në “Facebook”, Kryeministri Edi Rama.