Gjashtë kandidatë kanë konkurruar për një vend në Këshillin e Trashigimisë Kulturore në Prizren.
Kandidatët janë: Senat Haliti, Mujë Berisha, Hermin Memishi, Artnet Haskuka, Arbnora Kolgjeraj dhe Agon Rrezja./PrizrenPress.com/
Nis viti i ri akademik në UP
Në të gjitha institucionet e larta arsimore publike dhe private në Republikën e Kosovës sot fillon viti i ri akademik 2015/2016. Megjithatë, edhe ky vit akademik i gjen universitetet publike me probleme të vjetra.
Kosova tashmë ka gjashtë universitete publike, tri prej të cilave në Gjilan, Gjakovë dhe Mitrovicë që kanë filluar punën tash vonë.
Universiteti i Prishtinës, ka ulur ndjeshëm numrin e studentëve të cilët janë të pranuar në vitin e ri akademik 2015/2016.
Vetëm në UP “Hasan Prishtina” për këtë vit akademik janë hapur dyert për 7.800 studentë të rinj në 17 fakultete.
Vitin e kaluar numri i studentëve të pranuar në UP ishte 12 mijë, ndërkaq këtë vit numri i studentëve të pranuar në UP është më i ulët, për rreth 4 mijë studentë.
Numri i studentëve është ulur pas rekomandimeve që janë bërë nga ekspertët ndërkombëtarë në raportin e vlerësimit të jashtëm në vitin 2014.
Me rastin e fillimit të vitit të ri akademik 2015/2016, ministri i Arsimit, Shkencës dhe Teknologjisë, Arsim Bajrami, do të vizitojë Fakultetin Juridik. Vizita do të bëhet në ora 11:00, në Amfiteatrin e Madh të këtij fakulteti.
Pozitën e opozitën i bashkon luksi
Beneficionet, luksi, mëditjet e udhëtimet zyrtare i bëjnë bashkë deputetët opozitarë me pushtetarët, pavarësisht dallimeve të mëdha që kanë në politikë. Blloku opozitar, që tashmë është bashkuar në një front të përbashkët, ka paralajmëruar për bojkotim të seancave plenare dhe mbledhjet e Kryesisë, por jo edhe udhëtimet zyrtare dhe shfrytëzimin e privilegjeve që iu ofron pozita e të qenit deputetë.
Nuk janë vetëm 20 deputetë të partive në pushtet, PDK-së dhe LDK-së, që gjenden në udhëtime jashtë shtetit, por bashkë me ta janë edhe ligjvënësit opozitarë. Nga gjashtë deputetët sa ka “Nisma për Kosovën”, gjysma prej tyre janë në udhëtime zyrtare jashtë shtetit. Deputeti, Haxhi Shala, ka konfirmuar për gazetën “Zëri” shkuarjen e tre deputetëve të partisë së tij në vizita zyrtare.
“Shefja e Grupit, Valdete Bajrami, ka kohë që ka marrë ftesën nga Instituti Nacional Demokratik (NDI), ndërkaq deputetja tjetër, Shukrije Bytyqi, ka shkuar në kuadër të Komisionit, që të dyja në SHBA. Edhe deputeti, Zafir Berisha, gjendet për një vizitë zyrtare në Hungari”, ka thënë ai.
Qeverinë nuk e rrëzon Asociacioni, por korrupsioni
“Mënyra e vetme për ta luftuar krimin dhe korrupsionin në Kosovë është që të hiqen nga pushteti të korruptuarit, rrjedhimisht të rrëzohet kjo Qeveri, e cila e ka kapur tërë shtetin, pra edhe sistemin e drejtësisë, pikërisht përmes krimit dhe korrupsionit”, tha Driton Çaushi nga lëvizja ‘Vetëvendosje’
Përfaqësues të subjekteve politike në opozitë kanë thënë se nevoja për të kundërshtuar paraprakisht këto marrëveshje të arritura në Bruksel me Serbinë dhe për t’i vendosur ato në prioritet para denoncimit të krimit të organizuar dhe korrupsionit, që po e zhytin në mjerim popullin e Kosovës, për shkak të punësimeve militanteske dhe monopolet, që favorizojnë oligarkët e bizneseve, nuk do të mund ta amnistojë për asnjë milimetër Qeverinë e kriminalizuar. Opozitarët thonë se paraprakisht duhet të bëhet luftë për sigurimin e tërësisë së pacenueshme territoriale të vendit, sovranitetit dhe integritetit kushtetues.
“Zgjidhjet që po jep dialogu i Brukselit po e degjenerojnë Republikën, duke e shndërruar Kosovën në një Bosnjë të dytë. Ky proces po udhëhiqet nga liderë, që lëshimet ndaj Serbisë i shohin si monedhën e vetme këmbyese, që ua mundëson mbijetesën politike. Në Bruksel nuk po mbrohet interesi i Kosovës, por interesi personal i duos Thaçi-Mustafa. Ekipet negociatore me përgatitje mediokre janë tregues i heqjes dorë të udhëheqjes së vendit nga përgjegjësia për ta mbrojtur interesin e vendit”, tha Driton Çaushi nga lëvizja ‘Vetëvendosje’./kosova sot/
Muja nuk e di kush po e zëvendëson të suspenduarin Nexhmi Krasniqi
Në mbledhjen e sotme të Këshillit Komunal për Bashkësi në Prizren, ka habitur të pranishmit kryetari i komunës, Ramadan Muja, i cili ka pyetur zyrtarët e policisë se kush është duke e zëvendësuar aktualisht drejtorin e suspenduar të policisë, Nexhmi Krasniqi.
Ai ka thënë gjithashtu se kjo nuk është hera e parë që nuk është i informuar për kësi lloj rastesh.
Përveç se është kryetar i komunës, ai gjithashtu është edhe kryetar i Këshillit Komunal për Bashkësi, e që i bie se në vazhdimësi duhet të jetë i informuar me të gjitha ndodhitë në organet përkatëse që kanë të bëjnë me sigurinë e qytetarëve, dhe padyshim se bashkëpunimi me drejtuesit më të lartë të policisë duhet të jetë në nivelin më të lartë të mundshëm. /Tv Prizreni
Universiteti i Prizrenit e ai në Ankona lidhin memorandum
Rektori Rame Vataj dhe Kryesuesi Bekim Gashi, të mërkurën kanë vazhduan vizitën në Universitetin Politecnica delle Marche në Ankona të Italisë, ku janë takuar me rektorin e këtij universiteti, prof. Sauro Longhi dhe prorektorin për marrëdhënie me jashtë prof. Mario Giordano.
Në këtë rast, është nënshkruar edhe memorandumi për bashkëpunim në mes të dy universiteteve. Në kuadër të këtij memorandumi ndër të tjera përfshihet pranimi në këtë universitet dhe lirimi nga taksat universitare në studimet e doktoraturës të studentëve nga UPZ, pastaj mbështetja e UPZ-së në themelimin e programeve të reja studimore dhe shkëmbimin e studentëve dhe stafit akademik.
Rektori Vataj foli për të arriturat dhe sfidat si dhe për çështjet specifike që e karakterizojnë Universiteti “Ukshin Hoti”. Edhe kryesuesi Gashi e elaboroi strukturën organizative të universitetit dhe mënyrën e menaxhimit të tij, por dhe rreth punës që po bëhet për themelimin e fakultetit te ri në kuadër të UPZ-së. Gjatë këtij takimi u diskutuan edhe shumë çështje të tjera të cilat kanë të bëjnë me shkëmbimin e studentëve e në veçanti për mundësinë e vazhdimit të studimeve të doktoratës, të stafit dhe studentëve të UPZ në këtë universitet.
Në bazë të marrëveshjes së arritur, rektori i këtij universiteti ofroi mundësinë që për studentët që vijnë me rekomandimin e UPZ për studimet e doktoratës (PhD) të lirohen nga të gjitha taksat e universitetit (semestrat dhe taksat tjera administrative) si dhe mundësinë për aplikim në bursat e këtij universiteti për të gjitha shpenzimet tjera. Rektori Vataj kërkoi nga menaxhmenti i këtij universiteti që ta thelloj bashkëpunimin në veçanti në aspektin e projekteve të përbashkëta, hulumtimeve shkencore, evaluimin e stafit akademik dhe administrativ të UPZ, vizitat studimore të stafit dhe studentëve, etj.
Më pas në vazhdën e vizitave dhe marrëveshjeve për themelimin e fakultetit të ri u realizua edhe dy vizita të tjera nëpër njësi akademike të këtij universiteti, ku rektori Vataj dhe kryesuesi Gashi u mirëpritën nga drejtori i departamentit të Shkencave të Jetës dhe Mjedisit, prof. Paolo Mariani.
Edhe në këtë rast u kërkua që të krijohet mundësi që së paku një nga stafi i UPZ të regjistrohet në PhD studime pranë këtij fakulteti meqë edhe në UPZ po punohet të ngrihet një fakultet i tillë. Përgjegjësi i kësaj njësie e siguroj rektorin Vataj që për vitin a ardhshëm akademik ta ndaje një vend për PhD për stafin e UPZ.
Vizita vazhdoi në njësinë tjetër, në Fakultetin e Bujqësisë, Ushqimit dhe Mjedisit, ku u pritën nga drejtori prof. Bruno Mazzeti dhe përgjegjësi i programit studimor të Shkencave të Pyjeve dhe Mjedisit, prof. Carlo Urbinati. Edhe në këtë takim u diskutua rreth përgatitjes për hapjen e fakultetit të ri në UPZ.
Edhe në këtë rast UPZ si program model për Shkencat e Pyjeve dhe Mjedisit e ka pikërisht këtë universitet. Përsëri edhe këtu u arrit mirëkuptim që në kuadër të marrëveshjes të dërgohet një student në studimet PhD për Shkencat e Pyjeve dhe Mjedisit dhe eventualisht një tjetër për Shkencat e Ushqimit. Përgjegjësit e këtyre programeve treguan gatishmërinë që të vijnë në UPZ për ta ndihmuar atë për ngritjen e fakultetit të ri të Shkencave të Jetës dhe Mjedisit, sidomos për çështjet e mësimdhënies fillimisht por edhe hulumtimeve të përbashkëta shkencore.
Në fund, Rektori Vataj dhe kryesuesi Gashi i falënderuan të gjithë menaxhmentin dhe stafin e këtij universiteti për mikpritjen dhe bashkëpunimin e ofruar e sidomos për mundësinë për studimet e doktoratës në këtë universitet pa pagese për stafin dhe studentët e UPZ. /PrizrenPress.com
Në 2015, asnjë i vdekur nga pickimi i rriqrave
Ka përfunduar faza e katërt e projektit të financuar nga Komisioni Evropian dhe përkrahur nga Agjencia e Ushqimit dhe Veterinës për repelimin e kafshëve shtëpiake si gjedhe, dele e dhi.
Në kuadër të Strategjisë për parandalimin e sëmundjes së Etheve Hemoragjike Krime-Kongo, kompania “Fauna”, e cila ka implementuar projektin, ka bërë repelimin e kafshëve në 44 fshatra të komunës së Malishevës, e cila njihet për raste të shumta të të pickuarve nga rriqrat.
Ky projekt i financuar nga Komisioni Evropian kishte filluar në muajin gusht, ndërsa për rezultatet e tij tregon më së miri edhe numri shumë i vogël i të pickuarve të sivjetmë, që për dallim nga vitet e kaluara askush nuk ka humbur jetën nga ethet hemoragjike.
Menaxheri i kompanisë “Fauna”, Bashkim Kurti, thotë për Telegrafin se qëllimi i këtij projekti të financuar nga Komisioni Evropian ka qenë që përmes repelimit të kafshëve, rriqrave t’iu pamundësohet të ushqyerit me gjakun e kafshëve, sepse sipas tij, gjaku i kafshëve është burimi kryesor i zhvillimit dhe shumëzimit të rriqrave.
“Nëse një rriqër femër arrin të thithë gjakun nga kafsha, ajo prodhon deri në 8 mijë vezë dhe i bie se nga një rriqër krijohen edhe rreth 8 mijë rriqra të reja. Përmes repelimit të kafshëve, ne kemi arritur të parandalojmë shumimin e tyre në masë të madhe dhe në këtë mënyrë kemi ulur edhe incidencen e sëmundjes, pra të etheve hemoragjike”, thotë Kurti për Telegrafin.
Kurti tregon se i njëjti proces i repelimit të kafshëve është realizuar edhe në gjashtë fshatra të komunës së Suharekës, duke përfshirë fshatrat si Dobërdelan, Semetishtë, Nishor, Breshanc, Kosterc dhe Bllacë.
“Repelimi i kafshëve tani është duke vazhduar në fshatrat e komunës së Rahovecit. Këtu njëherë i kemi pasur të përfshira vetëm 7 fshatra, por me kërkesë të Drejtorisë së Shëndetësisë e Mirëqenies Sociale dhe asaj të Bujqësisë të komunës së Rahovecit, drejtuar në Komisionin Evropian, është vendosur që repelimi të bëhet në të gjitha fshatrat e Rahovecit. Por, ai pastaj do të vazhdojë edhe në 13 fshatra të komunës së Klinës”, tregon më tej Kurti.
Ndryshe, si zona dhe grupe më të rrezikuara ndaj kësaj sëmundje janë vlerësuar banorët që jetojnë në rajonet ku sëmundja ka më shumë prevalencë, siç janë Malisheva, Suhareka, Rahoveci dhe Klina.
Komuna e Malishevës kundër “Zajednicës”
Lëvizja VETËVENDOSJE! Qendra në Malishevë sot në mbledhjen e Kuvendit Komunal të Malishevës, ka propozuar një deklaratë e cila kundërshton marrëveshjen e arritur në Bruksel ndërmjet Kryeministrit të Republikës së Kosovës dhe atij të Serbisë, në theks të veçantë krijimin e Asociacionit të Komunave me shumicë serbe/”Zajednicës”.
Deklarata u mbështet nga anëtarët e subjekteve tjera politike Nisma dhe AAK, derisa u kundërshtua nga LDK-ja dhe PDK-ja, të cilat në momentin e votimit të saj lëshuan edhe sallën, duke treguar se janë për krijimin e Zajednicës, dhe i qëndrojnë besnik shefave të tyre që këto marrëveshje i arritën në dëm të vendit.
Negociatat mes Qeverisë së Republikës së Kosovës dhe asaj të Serbisë, përgjatë gjithë kësaj kohe kanë qenë të favorshme për këtë të fundit. Ajo që dihet tashmë hapur është se pikërisht nga këto negociata pa kushte dhe pa parime Serbia po i afrohet më shumë Bashkimit Evropian dhe po e forcon pozitën e saj në raport me çështjet e brendshme të Kosovës, ndërsa në anën tjetër Kosova po dëmtohet në vazhdimësi.
Më poshtë Deklarata e votuar.
Negociatat mes Qeverisë së Republikës së Kosovës dhe asaj të Serbisë, përgjatë gjithë kësaj kohe kanë qenë të favorshme për këtë të fundit. Ajo që dihet tashmë hapur është se pikërisht nga këto negociata pa kushte dhe pa parime Serbia po i afrohet më shumë Bashkimit Evropian dhe po e forcon pozitën e saj në raport me çështjet e brendshme të Kosovës, ndërsa në anën tjetër Kosova po dëmtohet në vazhdimësi.
Pas disa marrëveshjeve të dëmshme dhe jo kushtetuese në kurriz të qytetarëve dhe shtetit të Kosovës, të martën me datë 25 gusht, Kryeministri i Republikës së Kosovës nënshkroi marrëveshjen për krijimin e “Zajednicës”.
Krijimi i “Zajednicës” është në kundërshtim të plotë me Kushtetutën e Republikës së Kosovës dhe ligjet e aplikueshme dhe cenon sovranitetin e vendit.
Krijimi i “Zajednicës” e zhvesh shtetin e Kosovës nga përkufizimi kushtetues si shtet i pavarur, sovran, demokratik, unik, dhe i pandashëm.
Krijimi i “Zajednicës” ka për synim ndarjen mbi baza etnike dhe është një mini shtet i Serbisë brenda territorit të Republikës së Kosovës. Ky është procesi më i dëmshëm që mund t’i ndodh Kosovës.
“Zajednica” do të ketë territor të vetin dhe ai është, pjesa veriore e qytetit të Mitrovicës, komunat Zubin Potok, Zveçan dhe Leposaviq, por synimi do të jetë përfshirja e të gjitha komunave me shumicë të popullatës serbe.
Përveç territorit “Zajednica” do të ketë edhe Kuvendin e vet, ku do të përfaqësohen gjitha Komunat me shumicë serbe, pra do të ketë të drejtën e ligjvënies.
“Zajednica” do të ketë kompetenca të plota dhe të pavarura në zhvillim ekonomik, infrastrukturë, shëndetësi, arsim, planifikim urban e rural. Po ashtu “Zajednica” do ta ketë edhe policinë, gjyqësinë dhe pavarësinë financiare.
Në mbështetje të dispozitave të Nenit 12 paragrafit 2 pikës d, lidhur me Nenin 40 paragrafi 2 pika l të Ligjit NR. 03/L-040 për Vetëqeverisje Lokale, Nenin 10 pikës 2 të Statutit të Komunës së Malishevës , Kuvendi i Komunës së Malishevës në mbledhjen e datës 30.09.2015 miraton këtë:
D E K L A R A T Ë
1. I ashtuquajturi Asociacioni/“Zajednica” i/e komunave me shumicë serbe shprehë themelimin e një etniteti juridik të themeluar mbi bazën e pastrimit etnik të shqiptarëve.
2. Themelimi i një Asociacioni të tillë, krahas dëmit juridiko-administrativ dhe organizimit shtetëror që i bënë Republikës së Kosovës si shtet me karakter unitar të përkufizuar me Kushtetutë, juridizon formalizimin e një strukture juridike me tipare etnike. Me këtë karakter tani më të përkufizuar me Marrëveshjen e Brukselit dhe me marrëveshjen e fundit të datës 25 gusht 2015, Republika e Kosovës po bëhet shtet diskriminues ndaj shumicës shqiptare, por edhe ndaj qytetarëve të tjerë që janë shtetas të Republikës së Kosovës.
3. Themelimi i këtij Asociacioni/Zajednicë me pushtet të ndërmjetëm e tejkalon çdo qëllim të organizimit të pushtetit lokal si organizim themelor administrativ. Qëllimi i këtij etniteti legal nuk është asgjë tjetër veçse një strukturë formale me baza etnike që përjashton të gjithë qytetarët të tjerë që nuk janë të përkatësisë kombëtare serbe.
4. E themeluar me përmbajtje tërësisht në kundërshtim me Kushtetutën e Republikë së Kosovës, legjislacionin pozitiv nga fusha e organizimit të pushtetit lokal dhe atij përkitazi me financat publike të pushtetit lokal, Kartës Evropiane Për Vetëqeverisje Lokale (Strasburg, 15 tetor 1985).
5. Kuvendi i Komunës së Malishevës nxjerrë qëndrim për arsyet e mësipërme:
5.1 Kuvendi i Komunës së Malishevës nuk do të njoh një formacion juridik i quajtur Asociacion/ “Zajednicë” e Komunave me Shumicë Serbe, duke përfshirë vendimet që do të merren nga organet e këtij konstruksioni formal kundërkushtetues;
5.2 Kuvendi i Komunës së Malishevës zotohet se nuk do të mbajë asnjë raport me strukturat e këtij organizimi kriminal dhe me prapavijë të spastrimit etnik;
5.3 Kuvendi i Komunës së Malishevës i bënë thirrje Qeverisë së Kosovës që të heqë dorë nga cilido veprim i cili do t’i kontribuojë themelimit të Asociacionit/“Zajednicës”;
5.4 Kjo Rezolutë do të hyjë në fuqi ditën e miratimit të saj nga Kuvendi i Komunës së Malishevës.
/PrizrenPress.com
Në 17 vjetorin e rënies përkujtohet dëshmori Shpëtim Robaj
Mbahet akademi përkujtimore, me rastin e 17 vjetorit të rënies së dëshmorit të kombit Shpëtim Robaj.
Sot në Malishevë, organizuar nga Qendra Kryesore e Mjekësisë Familjare (QKMF), është mbajtur një akademi përkujtimore, me rastin e 17 vjetorit të rënies së dëshmorit të kombit, anesteziologut Shpëtim Robaj, emrin e të cilit mban edhe kjo qendër shëndetësore.
Në këtë akademi morën pjesë, ministri i Ministrisë së Mjedisit dhe Planifikimit Hapësinor, Ferid Agani, nënkryetari i Komunës së Malishevës, Rexhep Mazreku, përfaqësues të mistrisë së shëndetësisë, të Forcës së Sigurisë së Kosovës (FSK), kryesuesi i KK të Malishevës, Aziz Thaçi, përfaqësues të shoqatës së Familjeve të Dëshmorëve, familjarë, bashkëpunëtor, përfaqësues të partive politike në Malishevë, dhe qytetar të shumtë.
Me këtë rast, nga folësit, u çmua lartë jeta dhe vepra e dr.Shpëtim Robajt, kontributi i tij në organizimin e spitaleve ushtarake të UÇK-së, përkujdesja nga plagosurve gjatë kohës së luftës, guximi dhe trimëria e treguar, deri në ditën e 30 shtatorit të vitit 1998, kur në përpjekje për tu ofruar ndihmë të plagosurve në masakrën e Abrisë, vetura bie në mina, ku edhe gjen vdekjen dr.Shëptim Robaj.
“Bijtë dhe bijat e Komunës së Malishevës, dëshmuan që i takojnë historisë dhe lavdisë kombëtare, dhe këtë nam e arritën me sakrificën e tyre sublime. Në mesin e këtyre, është edhe dr.Shpëtimi, i cili më shumë e deshi lirinë se jetën e tij. Vepra e tij i bën dritë lirisë sonë, i bën mjekësisë dhe ishte shembull i atdhedashurisë”, tha mes tjerash në fjalën e tij, nënkryetari i Malishevës, Rexhep Mazreku.
Ndërsa ministri i MMPH, Ferid Agani, tha se veprat e njerëzve të mirë, shkojnë duke u rritur.
“Shpëtimi ishte shembull i rrallë i përkushtimit profesional në shëndetësi. Ishte i përkushtuar ndaj të sëmurit, ndaj njerëzve në nevojë, dhe sot është shembulli më i mirë për gjenerata e reja në mjekësi”, tha ministri Agani.
Për jetën, veprimtarin e tij gjatë luftës së UÇK-së, folën bashkëpunëtorët e tij, të cilët sollën kujtime të angazhimit të dr.Shpëtim Robajt.
Në emër të familjes, e bija Erleta Robaj, i falënderoi të gjithë për këtë organizim dhe pjesëmarrje, në kujtim jo vetëm të prindit të saj, por të të gjithë dëshmorëve të kombit.
Më pas, në oborrin e QKMF “Dr.Shpëtim Robaj” në Malishev, janë bërë nderime dhe janë vendosur lule, pranë bustit të dr.Shpëtim Robaj. /PrizrenPress.com
Ministri Bajrami i përgjigjet rektorit Zejnullahu
Ministri i Arsimit, Arsim Bajrami i është përgjigjur sot letrës së hapur të rektorit të Universitetit “Hasan Prishtina”, Ramadan Zejnullahu.
Fejzullahu dje ia shihte për të madhe Bajramit se i ka “ndërruar fjalët” rreth një marrëveshje të tij me të, duke hedhur poshtë edhe akuzat që ai ia bënte këtij.
Kjo është përgjigjja e plotë e ministrit Arsim Bajrami në letrën e rektorit Zejnullahu:
“Përgjigje në letrën e hapur të Rektorit të Universitetit të Prishtinës “Hasan Prishtina”
z. Rektor,
E lexova i befasuar letrën tuaj të hapur që kishit drejtuar për mua. Vërtetë u befasova me keqinterpretimin dhe manipulimin që i kishit bërë intervistës time dhënë para disa ditësh për RTV21. Nga rreth një orë intervistë, çuditërisht, ju më shkëputni 4-5 fjali për t’i interpretuar dhe manipuluar pastaj ato në mënyrën më brutale të mundshme. Unë nuk munda të gjej askund
Nuk e kam të qartë për çfarë ndryshimi të qëndrimeve aludoni në letrën tuaj, siç nuk e kuptoj pse më atribuoni mua thirrjet për zbutje të standardeve dhe qëndrimeve në çështjet akademike të Universitetit.
Megjithatë, duke marrë parasysh që po flasim për Universitetin e Prishtinës, për universitetin tim, po aq tëndin dhe të secilit, e ndjej të nevojshme të ju jap disa sqarime publike për ju dhe të gjithë të tjerët që dëshirojnë të informohen drejt, përtej keqinterpretimeve të nxituara dhe paragjykuese në letrën tuaj.
Unë nuk kam asnjë rezervë në zbatimin e standardeve ligjore dhe akademike të përcaktuara në Statutin e Universitetit. Përkundrazi, angazhohem me gjithë qenien time për mbrojtjen e tyre dhe çdo shmangie nga këto standarde e konsideroj që përbën shkelje të rëndë në punën e Universitetit. Si juve, ashtu edhe anëtarëve tjerë të Senatit, ju kam sqaruar vazhdimisht rëndësinë dhe domosdoshmërinë për gjetjen e zgjidhjeve që nuk cenojnë kriteret e cilësisë dhe që janë të bazuara në kuadrin ligjor të përcaktuar me Statut dhe Ligj.
Ju kam bërë të qartë ju dhe të gjithë anëtarëve tjerë të Senatit, që çështja e avancimeve akademike në universitet është çështje e brendshme akademike e Universitetit dhe të mos prisni, në asnjë formë, nga Ministri si përfaqësues politik, të ndërhyj për të zgjidhur çështje të tilla. Këtë qëndrim timin ju kam shprehur juve, në takimet e mbajtura me kërkesat e juaja, e po ashtu edhe Dekanëve të Universitetit, sërish në takimin e kërkuar publikisht nga ana e tyre.
Kam qenë mjaft i qartë në çdo takim të përbashkët, me ju dhe të tjerët, që unë përkrah pa asnjë rezervë vetëm kriteret që i përcakton Statuti i Universitetit. Me këtë rast, çdoherë kam kërkuar me ngulm që pavarësisht mospajtimeve lidhur me çështjen e avancimeve akademike, të mos lejohet të cenohen në asnjë formë çështjet tjera që ndërlidhen me interesin e studentëve, me organizimin dhe mbarëvajtjen e studimeve dhe jam i lumtur që një gjë e tillë, të paktën deri më sot, nuk ka ndodhur. Në këtë frymë, besoj të gjithë jeni të vetëdijshëm që në një nga takimet e fundit të Senatit, ishte arritur mirëkuptim për shqyrtimin të disa çështjeve tjera në interes të studentëve dhe fillimit të vitit të ri akademik.
Është shumë e vërtetë që për të tejkaluar mosmarrëveshjet eventuale në Senat, ju kam propozuar që të organizoni debate të hapura akademike me udhëheqës të njësive akademike, me profesorë të shquar të universitetit, me bashkëpunëtorë të jashtëm ndërkombëtarë të universitetit, me intelektual nga shoqëria civile, duke konsideruar që debati i hapur do të ishte forma më e civilizuar e gjetjes së zgjidhjes dhe tejkalimit të mosmarrëveshjeve në Senat. Nuk e kuptoj pse ju keni konsideruar të nevojshme pjesëmarrjen time në debate të tilla të karakterit akademik dhe nuk shoh asnjë arsyeje pse të tillat nuk i organizoni pa praninë time. Në çdo rrethanë tjetër, unë me shumë kënaqësi do të merrja pjesë në debate të tilla, mirëpo në pozicionin në të cilin gjendem aktualisht, do të duhej ta kuptonit që pjesëmarrja ime si i përfaqësues politik, në debate të tilla akademike, me shumë të drejtë do të mund konsiderohej si ndërhyrje në autonominë akademike të Universitetit dhe me shumë gjasë vetëm sa do të lëndonte dhe rëndonte edhe më tej Universitetin.
Unë besoj thellë që Universiteti i Prishtinës nuk ka nevojë për implikimin tim, sikurse të asnjë Ministri dhe përfaqësuesi politik në diskutimet e brendshme akademike. Në fakt, unë jam i bindur dhe për këtë angazhohem vazhdimisht, që politika të qëndrojë sa më larg çështjeve të brendshme akademike të Universitetit. Këtë, ju e dini që nuk është fare një punë e lehtë, por, këtë angazhim timin, ju keni pasur mundësinë ta kuptoni në së paku dhjetëra raste. Kjo në asnjë formë nuk nënkupton edhe shmangie të përgjegjësisë time për garantimin e ligjshmërisë institucionale dhe autonomisë akademike të Universitetit.
Sa më sipër, z. Rektor, më lejoni të ju përgjigjem dilemave të juaja:
z. Rektor, ju nuk keni asnjë nevojë dhe as nuk guxoni të lejoni, të ju shmangeni kritereve akademike të përcaktuar me Statutin e Universitetit, pavarësisht çfarëdo rrethane.
z. Rektor, zgjidhja e problemeve në proces, nënkupton, zgjidhjen e problemeve në formë institucionale dhe të qëndrueshme duke vendosur mekanizma afatgjatë të adresimit të problemeve në Universitet. Një mënyrë se si mund ta bëni këtë është funksionalizimi i Këshillit të Etikës së Universitetit dhe trajtimi i të gjitha rasteve, veç e veç, të dyshimeve etike për punën shkencore dhe akademike të personelit të Universitetit. Nuk mjafton për një Universitet kredibil, vetëm ndalimi i zgjedhjeve akademike të pamerituara, por ju duhet të angazhohen edhe në marrjen e masave konkrete ndëshkuese për cilindo shkelës të etikës akademike dhe shkencore në Universitet. Deri më sot, fatkeqësisht një gjë të tillë nuk e kemi parë. Pra, uroj ta keni të qartë, që zgjidhja e problemeve në proces në asnjë formë nuk nënkupton kompromise ndaj dukurive negative dhe këtë nuk e kuptoj si keni mundur ta keqinterpretoni në intervistën time.
z. Rektor, është bindja ime personale që Universiteti i Prishtinës, si institucioni më i madh dhe më prestigjioz i arsimit të lartë në Kosovë, me një traditë 45 vjeçare, nuk ka asnjë nevojë të ketë për referencë me rastin e zgjedhjeve akademike të kuadrit të saj, revista të institucioneve private të arsimit të lartë në Kosovë, që as përafërsisht nuk arrijnë traditën dhe veprimtarinë shkencore të Universitetit të Prishtinës. Këtë qëndrim timin, keni pasur mundësinë ta dëgjonit edhe në intervistën të cilës ju i jeni referuar.
z. Rektor, unë vërtetë mendoj që cilësia e programeve të studimit dhe e mësimdhënies në Universitet nuk është e kënaqshme. Për këtë, ju si profesor dhe rektor keni përgjegjësi po aq sa kam unë si profesor dhe ministër, e po aq sa kanë përgjegjësi edhe qindra kolegë tanë në Universitet. Në këtë drejtim, krahas sukseseve dhe rezultateve pozitive, të dy jemi të vetëdijshëm që kemi edhe shumë dështime që do të kishim dashur të mos i kemi, por ja që kanë ndodhur. Kjo, jo për shkak të mosangazhimit tuaj si rektor apo mosangazhimit tim si ministër, sesa për faktin që reforma të tilla kërkojnë një angazhim të sinqertë dhe përkushtim profesional më të madh të gjithë komunitetit akademik të Universitetit. Ju besoj e kuptoni, që jo çdo herë kjo është lehtë e arritshme.
z. Rektor, unë vërtetë mendoj që puna e një Rektori është t’i përkushtoj dekanët që të punojnë për cilësi. Ashtu siç me të drejtë, presin të tjerët nga unë që të përkushtoj vartësit tim në Ministri në përmirësimin e performancës dhe dhënies së rezultateve pozitive. E kuptoj mirë që kjo nuk është fare një punë e lehtë, mirëpo, këtë detyrë ne kemi pranuar. Ne të dy jemi të vetëdijshëm që javë më parë, lexuam raportin e vlerësimit të programeve të Fakultetit të Arteve. Besoj, pajtoheni që dështimi i akreditimit të gjitha programeve të Fakultetit, do të duhej të përbënte shqetësim serioz për të gjithë në Universitet. Fatkeqësisht, deri më sot, nuk kam dëgjuar që dikujt t’i keni kërkuar përgjegjësi për këto rezultate. Situata të ngjashme të papërgjegjësive janë me dhjetëra në universitet dhe përgjegjësia për adresimin e tyre na takon neve. Urdhëroni, z. Rektor, merrni masa konkrete të përgjegjësisë ndaj secilit person në Universitetit, për të cilin vlerësoni që po bllokon punën e Universitetit. Mos u mjaftoni vetëm me deklarata, për aq sa ju keni të gjithë autoritetin dhe kompetencat e nevojshme për të ndaluar këto veprime. Në këtë rast, ju siguroj, që do të keni edhe mbështetjen time të plotë si Ministër i Arsimit, Shkencës dhe Teknologjisë.
z. Rektor, jo rrallë herë kam dëgjuar nga ju në diskutime tona të përbashkëta, shqetësimet e juaja lidhur me keqpërdorime dhe abuzimeve të ndryshme, për cilat ju aludoni që përballeni në Universitet. Sikurse çdo herë, sërish ju bëj apel që çdo rast të tillë të keqpërdorimeve ta adresoni pa humbur kohë në organet përkatëse të drejtësisë. Çështje të tilla kaq serioze nuk guxojmë t’i kalojmë kurrsesi vetëm me deklarata pompoze.
z. Rektor, në universitet dhe në shoqëri është biseduar mjaft edhe rreth cilësisë së ligjëratave dhe mbarëvajtjes së tyre, të paktën, unë këtë e di nga Fakulteti Juridik, ku unë angazhohem si mësimdhënës. Po ashtu, ju besoj e dini, që në universitet shpesh ka ndodhur që edhe të manipulohet nga grupe të ndryshme, çështja e mbarëvajtjes së ligjëratave. Pikërisht për këtë, ju duhet të angazhoheni në ndërtimin e mekanizmave transparent për mbikëqyrjen e mbarëvajtjes së ligjëratave, provimeve dhe punës së secilit anëtarë të personelit akademik.
z. Rektor, unë nuk e quaj bllokim asnjë përpjekje për të parandaluar çfarëdo ngritje akademike apo çështje tjetër që bie në kundërshtim me Statutin e Universitetit dhe Ligjin. Përkundrazi, një akt të tillë nga kushdo qoftë, e vlerësoi si një kontribut dhe akt të çmueshëm për Universitetin.
z. Rektor, ju dhe bashkëpunëtorët tuaj, jeni dëshmitarë që zyra ime ka qenë çdo herë e hapur për ju, sikurse për secilin, për të diskuar çdo çështje në interes të Universitetit. Në shumë takime kemi biseduar për një varg çështjesh me qëllim të përmirësimit të cilësisë në Universitet. Konkretisht, për herë të parë, kemi zvogëluar ndjeshëm numrin e studentëve në disa drejtime dhe kjo është bërë me qëllim të reflektimit të kapaciteteve kadrovike të Universitetit. Po ashtu, për herë të parë, kemi ngritur pragun e provimit pranues në Universitetit në 40%, me qëllimin e vetëm të pranimit të studentëve me rezultatet më të mira të dijes. Besoj e keni parasysh angazhimin tim maksimal për mbrojtjen e autonomisë akademike të Universitetit të Prishtinës, në fillim të mandatit tim, dhe në anën tjetër do të duhej të kujtoni gjithashtu angazhimin tim për gjetjen e një zgjidhje në interes të Universitetit, për tejkalimin e problemeve rreth çështjes së borxheve të akreditimit të UP-së ndaj AKA-së, të cilat muaj më parë rrezikonin shpalljen e konkursit për pranim të studentëve këtë vit akademik. Urdhëroni, z. Rektor, gjeni qoftë edhe një rast të vetëm timin, apo të ndonjërit nga bashkëpunëtorët tim, të kërkesave apo ndërhyrjeve për çështje të interesave të ngushta apo personale në punën e Universitetit.
z. Rektor, ju kujtoj që ka mbi tetë muaj që unë jam angazhuar në rishikimin e Ligjit për Arsimin e Lartë. Pjesë e reformimit të ligjit kanë qenë edhe dispozitat që ndërlidhen me çështjen e kushteve dhe kritereve akademike për titujt akademik. Me mbështetjen e ekspertizës ndërkombëtare, kemi arritur të definojmë kriteret për avancim të stafit akademik, duke rritur ndjeshëm përgjegjësitë dhe obligimet për secilin, karshi punës kërkimore dhe njohjes ndërkombëtare të saj. Në këtë proces, ishin të përfshirë shumë kolegë tanë të Universitetit, e ku ndër ta, një kontribut kyç ka dhënë edhe prorektori për shkencë i Universitetit të Prishtinës. Ai, sikurse edhe kolegët tjerë, mund të ju dëshmojnë për përkushtimin tonë në ngritjen e standardeve më të larta të vlerës akademike dhe shkencore, e po ashtu mund të ju dëshmojë nëse gjatë punës së tyre kanë pasur ndonjëherë çfarëdo ndërhyrje nga jashtë.
z. Rektor, nga pesha e përgjegjësisë dhe angazhimeve që keni si Rektor i Universitetit, besoj e keni fare të lehtë ta kuptoni peshën e përgjegjësisë dhe angazhimeve që mund t’i ketë një Ministër i Arsimit, që krahas mbështetjes së UP-së, duhet mendoj edhe për mbështetjen e punës edhe të gjashtë universiteteve tjera publike, dhjetëra kolegjeve private dhe qindra e mijëra shkollave dhe mësimdhënësve në arsimin parauniversitar. Në këto rrethana, më e lehta që mund të bëjmë secili nga ne është të polemizojmë dhe akuzojmë njëri-tjetrin, mirëpo, përtej kësaj, qytetarët me të drejtë presin nga të gjithë ne zgjidhje dhe përmirësim të cilësisë së arsimit në vend.
Në fund, më duhet të shpreh zhgënjimin tim të sinqertë për qasjen arrogante dhe konfliktuoze që keni shprehur në letrën tuaj. Aq më pak, nuk arrij të kuptoj, gatishmërinë tuaj për të dhënë vlerësime personale për punën time para 10 vite në Universitetit, në kohën kur ju ishit Dekan i FSHMN-së. Përkundrazi, unë ndaj kujtimet dhe përshtypjet më të mira për angazhimin dhe punën tuaj në atë kohë.
Përvoja personale më ka mësuar që shpesh herë duhet sakrifikuar shumëçka nga egoja personale, për hir të një interesi më të madh shoqëror. Prandaj edhe sot, pozita që ushtrojmë unë dhe ju, më kufizon të ju përgjigjem drejtpërdrejt paragjykimeve personale që ju keni drejtuar ndaj meje. E kam të pamundur ta bëj këtë, për aq kohë sa Universiteti gjendet mes nesh. Por një gjë të jeni të bindur, që sot universiteti gjendet në një situatë më të keqe se dikur, dhe unë sikurse edhe shumë të tjerë ju mirëkuptojmë plotësisht që përgjegjësia për këtë nuk është drejtpërdrejt e juaja, për aq kohë sa gjërat nuk varen krejtësisht nga ju. Këtë konsideratë do të duhej ta kishte secili që dëshiron ta kuptojë drejt Universitetin dhe këtë do të duhej ta kishit parasysh edhe ju kur vlerësoni punën e të tjerëve para 10 viteve.
z. Rektor, për të ju përgjigjur dilemës tuaj, ju sqaroj që ajo që pres nga ju unë si Ministër i Arsimit, është pikërisht ajo që pret prej jush, secili student, prind dhe profesor. Një angazhim të sinqertë, në përputhje me kompetencat tuaja ligjore dhe me angazhimin e gjithë potencialin tuaj moral dhe intelektual, në respektim të përpiktë të kritereve të cilësisë akademike dhe shkencore të përcaktuara me legjislacion, si dhe në ngritjen e cilësisë në Universitetit.
Unë i gëzohem suksesit tuaj, meqë i njëjti do të ishte sukses për Universitetin, për arsimin e lartë në vend dhe për të ardhmen e fëmijëve tanë. Po ashtu, i bashkohem mbështetjes së shoqërisë për ju për reforma në Universitet, por ju lutem që këtë mbështetje ta kuptoni si përgjegjësi të shtuar për të vepruar me maturi dhe korrektësi në interes të Universitetit, dhe jo ta shfrytëzoni mbështetjen tonë që me sjellje arrogante dhe logjikë inatesh të akuzoni në mënyrë oportune të tjerët, për të ngritur imazhin tuaj publik. Të jeni të bindur, që qasje të tilla nuk na bëjnë nder askujt nga ne, e më së paku Universitetit. Urdhëroni, z. Rektor, shfrytëzoni këtë mbështetje tonë si një mundësi për të punuar fort për përmirësim të cilësisë së studimeve dhe shërbimeve të Universitetit, dhe në këtë formë për të ju dhënë të rinjve shembull të mirë se si duhet të sillet një intelektual dhe akademik.
Nesër do të filloj viti akademik për mijëra studentë të Universitetit, ndërsa ne ka dy ditë që shohim me keqardhje se si rreth 30 të rinj ka dy netë që i kalojnë jashtë, përballë Rektoratit të Universitetit. Ngjashëm ndjej keqardhje të thellë që padrejtësisht, juve ju pamundësohet dje qasja në vendin tuaj të punës. Prandaj, përkundër keqkuptimeve që mund të kenë këta të rinj, ju lutem të angazhoheni me gjithë potencialin tuaj që të tejkaloni këtë situatë, sepse, universiteti nuk ka nevojë më tutje për situata të tilla dhe as ju nuk e meritoni këtë.
Gjithë të mirat,
Arsim Bajrami”, përfundon përgjigjja e ministrit Bajrami.