Shefi i grupit parlamentar i PDK-së, e cili e mban edhe postin e nënkryetarit të partisë, Adem Grabovci, ka thënë për gazetën “Epoka e re” se kandidati për postin e presidentit, Hashim Thaçi, është personi më i duhur për këtë pozitë.

Ai ka thënë se seanca e sotme do të jetë një ndër më të rëndësishmet në Kuvendin e Kosovës, pasi do të jetë përcaktuese për mandatin pesëvjeçar të presidentit.

“Shpresoj që qytetarët do ta shohin një seancë solemne me plot kuptimin e fjalës, ku deputetët e Kuvendit të Kosovës nëpërmjet votës së tyre do ta zgjedhin presidentin e vendit. Kjo do t’u bëjë nder edhe institucioneve të vendit dhe qytetarëve, sepse ky institucion ka nevojë për një njeri siç është z. Thaçi”, ka thënë Grabovci.

Sipas tij, Thaçi në këtë pozitë ka aftësi për t’u përballur me sfidat dhe vështirësitë e ndryshme që mund t’i dalin vendin.

“Kështu që, për president na duhet një njeri energjik, i guximshëm dhe vendimmarrës. Prandaj, mendoj se njeriu më adekuat për ta përfaqësuar këtë institucion është z. Thaçi”, ka deklaruar Grabovci, duke shtuar se Thaçi është njeriu më i votuar nga qytetarët e Kosovës jo vetëm në zgjedhjet e fundit, por në disa palë zgjedhje radhazi.

“Kjo nënkupton se është njeriu më gjithëpërfshirës dhe do ta luajë rolin e unifikuesit”, është shprehur Grabovci.

Ai u ka bërë thirrje deputetëve të opozitës që të kthehen në Kuvend dhe të shmangen nga përdorimi i dhunës e, po ashtu, ka apeluar që të ketë qetësi dhe festë për zgjedhjen e Hashim Thaçit president të Kosovës.

“U bëj thirrje të gjithë qytetarëve, pa përjashtim të përkatësisë nacionale, fetare, kulturore apo partiake, që të festojnë këtë ditë, pasi kemi të bëjmë me zgjedhjen e presidentit të vendit, i cili do të na përfaqësojë para botës demokratike, i cili do të ndikojë pozitivisht për krijimin e urave të miqësisë me shtetet e tjera. I bëj thirrje opozitës të kthehet në Kuvend, aty ku e ka vendin, pasi nuk ka asnjë arsye që nesër të protestohet”, ka deklaruar Grabovci. /Epoka e re/

Besa Luzha nga shoqëria civile, në intervistën “Ballë për Ballë” në Klan Kosova, ka deklaruar se situata është polarizuar mjaftë, ku janë dy anë, njëra planifikon festë kurse ana tjetër është e pakënaqur.

“Por një e mirë është këtu se njerëzit mund të shprehin pakënaqësinë e tyre, pra respektohet mendimi ndryshe”.

“Thaçi do të provojë ta mbyllë këtë proces, i cili duhet të ndodhë në kuvend, kjo është demokratike nëse ata vendosin me vullnetin e tyre të lirë”.

Luzha ka thënë të ketë vërejtur shqetësim edhe në prononcimin e Thaçit.

“Lista “Sprska” nuk i ka punët mirë, pasi ajo është kafshatë e vështirë në këtë moment, pasi thuhet se ata kërkojnë njërin nga postet kyçe”.

“Apelojë që nesër të jetë një protestë dinjitoze por e qetë, qytetaria shprehet ashtu, nuk ka nevojë për dhunë”, ka thënë Luzha.

Ajo ka thënë se beson që qytetarët e dinë se sa kemi pasur vështirësi për të ardhur deri këtu.

“Është normale kjo situatë, të dyja palët duan ta kenë pushtetin, por kjo varet e duan për vete apo për rregullimin e jetës së qytetarit”.

“Zgjedhjet janë të pashmangshme, u bë ose jo Thaçi president, në mënyrë që situata të qetësohet. E kjo duhet të bëhet në parlament”.

“Thaçi nuk ka kredibilitet. Mendoj që thirrja e tij të festohet nga shtëpitë e tyre është e mirë, pasi që situata mund të përshkallëzojë”.

“Edhe unë do të jem pjesë e protestës, por ne do të thërrasim në qetësi. Duam ta ruajmë popullatën pasi nuk kemi nevojë të luftojmë me vetveten”.

Luzha ka thënë se kjo situatë nuk është diçka dramatike, shkohet në zgjedhje maten forcat, njerëzit mund të zgjedhin për ndryshim, mund të votojnë përsëri njësojë.

“Ju bëjë thirrje qytetarëve që për zgjedhjet e ardhshme të maten mirë, para se të vendosin kënd ta votojnë. Fryma Rugoviane ka rënë tash në ujë, këtë e ka parasysh gjithkush sepse në këtë situatë nuk bëhet fjalë për këtë frymë”, ka thënë Luzha.