Qendra e Prizrenit ka qenë e qetë në ndërrimin e motmoteve. Shumë pak qytetarë janë parë në “Shatërvan”, të cilë shrytëzuan rastin që edhe njëherë të fotografohen pranë bredhit të stolisur, raporton Gazeta Express.
Viti 2015, vit i humbur kundër korrupsionit
Korrupsioni në Kosovë vazhdon të jetë i pranishëm në shumë fusha.
Organizata të ndryshme vendore edhe ndërkombëtare, në hulumtimet që kanë bërë për vitin 2015, kanë treguar se perceptimi për korrupsionin në Kosovë është i lartë dhe i përhapur në pothuajse të gjitha institucionet.
Disa nga organizatat kanë konstatuar se “Kosova mbetet tolerante ndaj korrupsionit në të gjitha nivelet”.
Institucionet e Kosovës patën thënë se lufta kundër korrupsionit edhe gjatë vitit 2015, do të jetë prioritet, mirëpo, siç thuhet, “lufta ka qenë e padukshme”.
Përfaqësues organizatash dhe agjencish që merren me monitorimin e luftës kundër korrupsionit, thonë se drejtuesit e institucioneve të drejtësisë, përfshirë edhe udhëheqësit ndërkombëtarë të misionit të Bashkimit Evropian për sundimin e ligjit, EULEX, luftën kundër korrupsionit e kanë shndërruar në retorikë politike.
Presidentja e Kosovës, Atifete Jahjaga, në konferencën vjetore të prokurorive pati kërkuar nga mekanizmat e drejtësisë që të zbatojnë ligjet dhe të luftojnë korrupsionin.
“Ne jemi lodhur si shoqëri nga shkalla e lartë e korrupsionit. Ne kemi dëmtuar funksionimin e shtetit me politikat e mosndëshkimit të të gjithë atyre që janë përfshirë në afera korruptive. Ne kemi goditur jo vetëm imazhin në skenën ndërkombëtare me këtë shkallë të perceptimit për korrupsionin, dhe sërish nuk kemi vepruar aq dhe ashtu si duhet”.
“Sot nuk është koha për të shprehur me fjalë përkushtimin për luftën kundër korrupsionit. Sot është koha që, për hir të mirëqenies së qytetarëve dhe për hir të bërjes së shtetit të Kosovës, ta gjejmë forcën dhe guximin e ta përfundojmë këtë cikël të frikës dhe të mosndëshkimit”, ka thënë presidentja Jahajaga duke shtuar se “është koha ta bëjmë Kosovën vend të pa korruptuar”.
Presidentja Atifete Jahjaga, me 14 shkurt 2012, ka themeluar Këshillin Kombëtar Kundër Korrupsionit, këshill ky që ka për qëllim bashkërendimin e punës dhe aktiviteteve të institucioneve e agjencive, për të parandaluar dhe luftuar korrupsionin.
Në Institutin e Kosovës për Drejtësi, thonë se ndjekja e profilit të lartë të korrupsionit vazhdon të mbetet sfida kryesore e sistemit prokurorial.
Betim Musliu konsideron se mungesa e vazhdueshme e rezultateve për vite të tëra dhe zbatimi i drejtësisë selektive në raste të caktuara në ndjekjen e personave të fuqishëm ka ndikuar në humbjen e besimit të qytetarëve në sistemin prokurorial.
“Luftimi i korrupsionit është shndërruar në retorikë politike nga partitë udhëheqëse, drejtues të institucioneve të drejtësisë, përfshirë edhe udhëheqësit ndërkombëtarë të misioni të EULEX-it. Fatkeqësisht, përtej kësaj retorike nuk ka pasur vullnet dhe rezultate konkrete për të luftuar korrupsionin në Kosovë, sidomos korrupsionin e profilit të lartë. Kosova nuk vuan nga mungesa e ligjeve dhe politikave, por vuan nga zbatimi i tyre në praktikë”, tha Musliu.
Hasan Preteni, drejtor i Agjencisë Kundër Korrupsionit, pati deklaruar se Kosova edhe në vitin 2015, ka humbur luftën kundër dukurisë së korrupsionit.
“Janë të gjitha parakushtet për të luftuar, për të parandaluar korrupsionin. E vetmja gjë që po na mungon janë rezultatet. Të gjitha raportet dhe matjet e perceptimit të përgjithshëm na vlerësojnë njësoj dobët. Duhet një vullnet i fuqishëm politik, e ky vullnet politik po mungon dhe kursesi lufta kundër korrupsionit nuk po arrin të vijë në top agjendën e prioriteteve”, tha Preteni.
Lorik Bajrami nga Organizata për Demokraci dhe Anti-Korrupsion “Çohu”, mendon se problemi më i madh në Kosovë me rastet e dyshuara të korrupsionit qëndron te lëndët që kanë të bëjnë me nivelin e lartë politik.
“Unë mendoj se institucionet e Kosovës, gjithë ai mekanizëm institucional, i cili është i thirrur për të parandaluar dhe luftuar korrupsionin, kanë dështuar jo vetëm në adresimin e çështjes së korrupsionit të nivelit të ulët, mirëpo kanë dështuar posaçërisht me adresimin e korrupsionit të nivelit të lartë ose ndjekjen dhe gjykimin e zyrtarëve të lartë publik që janë të involvuar në korrupsion”, tha Bajrami.
Nivelin e lartë të keqpërdorimeve në fushën e prokurimit publik, autoritetet e Kosovës nuk kanë arritur ta zvogëlojnë, as në vitin 2015, kanë vlerësuar përfaqësues të organizatave ekonomike në Kosovë.
Drejtori ekzekutiv i Odës Ekonomike Amerikane në Kosovë, Arian Zeka, pati thënë se ende një pjesë e madhe e ankesave që i marrin nga bizneset lidhen me parregullsitë në fushën e tenderimit.
“Pavarësisht premtimeve të shumta që janë bërë nga ana zyrtarëve të ri të qeverisë dhe pavarësisht përfshirjes së nevojës për përmirësimin e aktiviteteve të prokurimit publik edhe në planin qeverisës të aprovuar nga qeveria në fund të vitit të kaluar, nuk ka pasur ndonjë progres apo ndonjë ndryshim substancial në fushën e prokurimit që nga viti i kaluar e tutje, dhe kjo lë shumë hapësirë për shqetësim nga ana e bizneseve”, kanë thënë Zeka.
Ambasadori amerikan në Kosovë Greg Delawie, me rastin e Ditës Ndërkombëtare Kundër Korrupsionit, 9 dhjetor, pati deklaruar se edhe pse ka disa përparime në luftën kundër korrupsionit, niveli i tij në Kosovë mbetet më i larti në krahasim me vendet e rajonit.
“Korrupsioni pengon punën e qeverisë, kufizon prosperitetin ekonomik, ndikon në cilësinë e demokracisë dhe zvogëlon legjitimitetin e qeverisë. Korrupsioni bllokon burimet publike, kufizon sipërmarrësit dhe largon investimet e huaja dhe vendase”, tha Delawie.
Në një hulumtim të Institutit Kosovës për Drejtësi thuhet se “prej 1 janarit 2015 deri më 30 shtator 2015, të dyshuar për korrupsion Prokuroria Speciale e Kosovës, ka zgjidhur raste ndaj 62 personave, prej tyre ndaj 51 personave ka ngritur aktakuza, ndaj 6 personave ka hedhur poshtë kallëzimet penale, ndërsa ndaj 5 personave ka pushuar hetimet.
Prej këtyre rasteve, Instituti Kosovës për Drejtësi ka gjetur se Prokuroria e Shtetit, ka bërë publikimin e informacioneve për këtë periudhë për ngritjen e aktakuzave vetëm në pesë raste, ku të përfshirë në bazë të pozitave janë: një ish-Kryetar i Gjykatës Kushtetuese, një ish-Kryetar Komune, një ish-Sekretar i Përgjithshëm, 18 zyrtarë komunalë, gjashtë pronarë të kompanive, një drejtor, një drejtor instituti, tre menaxherë, dy zyrtarë dhe një rast ndaj personave që ndërlidhet me dyshimet për keqpërdorime në ish-Ministrinë e Transportit dhe Telekomunikacionit”, transmeton Rel.
Organizata të ndryshme vendore dhe ndërkombëtare kanë thënë se mungesa e vullnetit politik në luftën kundër korrupsionit, mos-koordinimi dhe mos-bashkëpunimi efikas dhe efektiv në mes të agjencive dhe institucioneve ekzistuese dhe atyre të pavarura në parandalimin dhe luftimin e korrupsionit, ndikon drejtpërdrejtë në mungesën e rezultateve në luftimin e kësaj dukurie në Kosovë.
Zgjedhje të reja?
Shkruan: Angelika Viets
Kolumne ekskluzive e ambasadores gjermane për “Kosova Sot”
Organizimi i zgjedhjeve të reja merr kohë dhe para
Qeveria e radhës, pas zgjedhjeve të reja, do të ishte pashmangshëm identike, ose pjesërisht identike me të vjetrën
Ky vit në Kosovë, për fat të keq, po përfundon ashtu siç ka filluar: jostabil. Kjo situatë, për ne që mbi 15 vjet kemi investuar aq shumë në Kosovë, me përkrahje financiare dhe personale, me ekspertizë, me angazhim shoqëror, nuk mund të jetë dhe nuk është e parëndësishme.
Arsyet, në të cilat tani po thirren, siç kam thënë shumë herë, i konsideroj të cekëta. Ato mund të tejkalohen, nëse në të gjitha anët ka vullnet politik.
Ky vullnet, siç duket, po mungon dhe sugjeron që edhe në të ardhmen çdo vendim i qeverisë, çdo marrëveshje, të mund të jetë një arsye për ta paralizuar Kuvendin dhe për thirrje të anulimit, të zgjedhjeve të reja apo ndoshta për revolucion.
Shprehje e papjekurisë politike
Për shkak se popullsia e Kosovës fatmirësisht mbetet kryesisht e papërfshirë, meqenëse ka brenga dhe halle të tjera, dhe konfliktet politike të nivelit të lartë janë për keqardhje, më duket se ajo çfarë jemi duke vëzhguar që nga zgjedhjet e fundit është në radhë të parë shprehje e papjekurisë politike, e një mungese të mëtejme të kulturës politike dhe të tëhuajsuara nga realiteti.
Nëse mbahen tani zgjedhjet e reja, ashtu siç kërkon opozita në një prej tri opsioneve të tyre, ato do të ishin zgjedhjet e treta të parakohshme që nga shpallja e pavarësisë. Zgjedhjet e planifikuara për shkurt 2011 u mbajtën para kohe, pasi që LDK-ja doli nga koalicioni qeverisës me PDK-në dhe përmes një mocion besimi jokonstruktiv u shpërbë Qeveria ‘Thaçi’. Zgjedhjet filluan më 12.12.2010 dhe përfunduan pas përsëritjeve të ndryshme, më 16.1.2011. Fitues doli PDK-ja me Hashim Thaçin, me 32,11 %. Mbajtja e zgjedhjeve të parakohshme parlamentare me 8.6.2014 ishte bërë e nevojshme, sepse me 7 maj Parlamenti, për shkak të një shkeljeje procedurale nga 57 deputetë, mbajti një seancë të jashtëzakonshme me propozimin e shpërbërjes së Kuvendit për të vendosur për një pikë të vetme të rendit të ditës. 90 deputetë votuan për dhe katër kundër këtij propozimi; tre abstenuan. Fituese doli PDK-ja me Hashim Thaçin, me 30,38 %.Rezultati i zgjedhjeve në pranverë 2016, sipas të gjitha sondazheve, do të ishte i ngjashëm.
Një parim bazë i demokracisë është ndërrimi i Qeverisë përmes zgjedhjeve. Pas mbarimit të një periudhe legjislative, duhet që prapë të dilet në votim. Periudha legjislative mund të ketë gjatësi të ndryshme. Në shumicën e vendeve është katër, nganjëherë edhe pesë vjet.
Qeverisë gjatë kësaj kohe i nevojitet përkrahja e shumicës së deputetëve të Kuvendit. Mirëpo, nëse shfaqet situata që Qeveria të mos gjejë mbështetje në shumicë, atëherë ajo duhet të dorëhiqet. Atëherë ose konsolidohet një qeveri e re, ose (varësisht prej rrethanave) organizohen zgjedhje të reja.
Rezultati i zgjedhjeve të reja do të ishte përafërsisht i njëjtë
Një opsion i dytë është që Qeveria të japë dorëheqje, megjithëse gëzon shumicën parlamentare. Kjo ndodh kur Qeveria konsideron,që me zgjedhje të reja do të mund të arrinte rezultate më të mira sesa gjatë zgjedhjeve të fundit dhe pastaj p.sh. të qeverisë më lehtë, me më shumë vende në Kuvend.
Të dy rastet, mungesa e shumicës parlamentare apo rezultatet më të mira të zgjedhjeve nuk gjejnë zbatim për momentin në Kosovë. Koalicioni qeveritar e di që e ka mbështetjen e një shumice prej 89 deputetëve dhe, sipas sondazheve të ndryshme, del që rezultati i zgjedhjeve të reja do të ishte përafërsisht i njëjtë.
Nga themelimi i Republikës Federale Gjermane, para 66 vjetësh, ka ardhur tre herë të zgjedhjet e reja përmes një mocioni besimi. Ish-kancelari federal, Willy Brandt, në vitin 1972, ish-kancelari federal Helmut Kohl në vitin 1982 dhe në vitin 2005, ish-kancelari federal Gerhard Schröder kishin paraqitur mocionin e besimit. Tretë dëshironin të ketë zgjedhje të reja. Për këtë arsye, ata u kujdesën që të dështojnë në mocionin e tyre në Parlament. Presidenti federal shpërndau pastaj Parlamentin dhe u mbajtën zgjedhjet e reja.
Çfarë do të sillnin tani zgjedhjet e reja për Kosovën?
Më poshtë disa vlerësime nga pikëpamja ime personale:
– Zgjedhjet e reja kushtojnë në kohë dhe para. Kosova nuk e ka as njërën as tjetrën.
– Një humbje kohe, në rastin më të mirë prej 2-3 muajsh, për zgjedhjet e reja (vitin e kaluar Kosova humbi gjysmë viti) vonon punët e nevojshme për të përmbushur edhe 8 kriteret e fundit për liberalizimin e vizave, të cilat Kosova akoma nuk i ka përmbushur përfundimisht.
– Reformat ekonomike dhe me këtë edhe integrimi i mëtejmë evropian do të shtyheshin: Me MSA-në dhe vullnetin për një anëtarësim eventual të mëvonshëm në BE, Kosova ka obliguar veten për reforma strukturore gjithëpërfshirëse.
– Qeveria e radhës pas zgjedhjeve të reja do të ishte pashmangshëm identike ose pjesërisht identike me të vjetrën: Pra, pa ndryshim. Qytetarët e dinë këtë.
– Derisa nuk ecet përpara me ekonominë dhe nuk do të forcohet sektori privat, sjellja zgjedhore e votuesve (që kryesisht janë votues të punësuar në sektorin publik) nuk do të ndryshojë.
– Përmes zgjedhjeve të reja në 2014, investimet e huaja direkte janë përgjysmuar edhe një herë, në vetëm 151 milionë euro. Investitorët preferojnë stabilitetin politik.
– Finalizimi i tribunalit të posaçëm do të shtyhet – mbase kjo edhe dëshirohet?
– Imazhi i Kosovës do të pësonte edhe më tej.
Pavarësisht disa reformave të suksesshme, të cilat zvogëlojnë pengesat administrative për investime, Kosova edhe më tej përballet me papunësi të lartë, infrastrukturë të vjetërsuar, korrupsion të rrënjosur thellë dhe një sektor publik jo efiçentë. Këto mangësi minojnë thelbësisht parakushtet për kompanitë dhe trembin investitorët. Pa investitorë Kosova nuk është në gjendje të gjenerojë rritje të mjaftueshme ekonomike, në mënyrë që t’u ofrojë punësim 20.000 të rinjve, që çdo vit hyjnë në tregun e punës. Një nga nxitësit më me rëndësi të ndryshimit strukturor janë reformat e nevojshme, të cilat duhet të miratohen nga një Parlament funksional në interes të gjithë qytetarëve-votuesve. Detyrë parësore e të gjithë deputetëve – si të pozitës ashtu dhe të opozitës – është të kontribuojnë në këtë ndryshim. Këtë ata mund ta bëjnë në kuadër të instrumenteve parlamentare, ndërsa partitë e koalicionit duhet nga ana e tyre të përmbushin detyrat e tyre të këshillimit dhe informimit./ kosova sot/
Daut Haradinaj: S’ka rrugë tjetër, veç zgjedhje!
Deputeti i AAK-së, Daut Haradinaj në një intervistë për Indeksonline ka thënë se Qeverinë e kanë përcjell shumë dështime gjatë vitit 2015. Ai ka treguar për planet që i ka partia e tij në vitin e ardhshëm, për koalicionet e mundshme me partitë tjera, për mundësin e kandidimit si kryetar i Deçanit, për ushqimin e preferuar, për ekipin e futbollit që e ndjek dhe shumëçka tjetër.
Indeksonline: Si e vlerësoni 2015 në aspektin politik dhe ekonomik?
Daut Haradinaj: Në Aspektin Politik, Kosova ka marrë goditje të njëpasnjëshme duke filluar nga Gjykata Speciale, Demarkacioni, Zajednica, dështimi në mos pranimin ne UNESCO, mos liberalizimi i vizave për qytetarët e Republikës së Kosovës dhe asnjë njohje e vlefshme për Kosovën. Kjo e bën një vit të vështir për Kosovën. Ndërsa ne aspektin Ekonomik, stagnim total, mungesë investimeve te huaja.
Si pasoj e këtyre dështimeve, kishte një bilanc te dhimbshëm e njerëzve qe po iknin nga Kosova në kërkim të një perspektive më të mirë ekonomike. Si pasoj e vazhdimësisë së logjikës së njëjtë të politikave Qeveritare rritja Ekonomike ishte me ulëta që nga shpallja e pavarësisë.
Indeksonline: Një pjesë e deputetëve të opozitës janë arrestuar për shkak të hedhjes së gazit në Kuvend. A do të hidhni edhe ju gaz nëse iu kërkohet?
Daut Haradinaj: Gjykata Kushtetuese ju jep të drejt veprimeve të deputeteve, duke shpall të pavlefshme Bashkësinë e Komunave Serbe (Zajednicën), ashtu sikurse të gjithë, tashme e kanë kuptuar se Demarkacioni është ne dëm të Kosovës. Veprimet individuale të Deputeteve janë të parëndësishme kur bëhet fjalë për këto dy veprime të këqija për vendin tonë. Kundërshtimi ynë do të vazhdoj….
Indeksonline: A prisni zgjedhje të jashtëzakonshme në vitin 2016?
Daut Haradinaj: S’ka mbet shumë rrugë, ose zgjidhje, ose zgjedhje. Kjo Qeveri duhet të shkojë.
Indeksonline: Nëse do të ketë zgjedhje te reja, a do të shkoni në listë të përbashkët me partitë tjera opozitare?
Daut Haradinaj: Kjo donë kohë dhe do të shihet. E rëndësishme është se jemi te bashkuar kundër këtyre marrëveshjeve .
Indeksonline: A do të bënit koalicion me PDK-në, hipotetikisht, nëse rezultati del asisoj dhe nëse kemi zgjedhje të jashtëzakonshme?
Daut Haradinaj: Me rëndësi është të shkojë kjo Qeveri, që po i shkakton dëme të mëdha Kosovës.
Indeksonline: Ju jeni kthyer si kryetar dege i AAK-së në Deçan. A do të kandidoni për kryetar të Deçanit?
Daut Haradinaj: E rëndësishme është se është se kemi konsoliduar Degën e AAK-se ne Deçan në nivelin më të lartë, dhe pse jo në regjionin e Dukagjinit në bashkëpunim me kryetarët e degëve të Pejës, Gjakovës, Istogut, Junikut, Klinës, Rahovecit dhe Suharekës.
Indeksonline: Të flasim pak për gjërat e përditshme të Daut Haradinajt, jashtë politikës. Në sa e filloni ditën dhe në sa e përfundoni?
Daut Haradinaj: Gjithmonë varet prej angazhimeve.
Indeksonline: Sa orë gjumë bëni dhe sa keni kohë për familje?
Daut Haradinaj: Mesatarisht, ndërsa mundohem të jem i përkushtuar për familje.
Indeksonline: A jeni tip sportiv dhe a keni ndonjë klub të preferuar që e adhuroni?
Daut Haradinaj: Po, FC Chelsea në ligën e Anglisë është klubi im i preferuar, por nuk jam ndonjë tifoz i flakët.
Indeksonline: A jeni më i mirë në shenj ju apo Ramush Haradinaj?
Daut Haradinaj: Nuk e di!
Indeksonline: Çfarë veture vozisni dhe cili është tipi i veturës që e pëlqeni?
Daut Haradinaj: Nuk kam ndonjë preferencë.
Indeksonline: Cili është ushqimi i preferuar?. A më shumë ua ka ënda flinë apo piten me hitha?
Daut Haradinaj: Ne përgjithësi, ushqimi tradicional.
Indeksonline: Urimi juaj për vitin 2016?
Daut Haradinaj: Shpresoj te ju realizohen të gjitha dëshirat krejt Shqiptarëve kudo që janë. Gëzuar. /Indeksonline/
Burdushi: Fatmir Limajt i janë bërë shumë padrejtësi
Hysri Peqani i njohur ndryshe si “Burdushi” ka komentuar zhvillimet politike nëpër të cilën ka kaluar Kosova gjatë vitit 2015-të. Ai në një bisedë për gazetën “Zëri” ka folur edhe për personalitetet politike, duke përfshirë edhe kryetarin e Nismës për Kosovën,Fatmir Limajn.
“Limaj ka pasur telashe të mëdha dhe i janë bërë padrejtësi”, ka thënë Burdushi./Zëri/
Lëndohen shtatë persona në Malishevë
Pavarësisht thirrjeve për mor përdorim të mjeteve piroteknike, gjatë natës janë shënuar disa raste të lëndimeve nga mjetet piroteknike dhe së paku dy zjarre. Duke u bazuar nga të dhënat në shërbimet komunale të emergjencave, janë lehtë dhe rëndë janë lënduar shtatë persona, ndërsa janë shënuar edhe dy zjarre, që mendohet se janë shënuar nga fishekzjarrët.
“Tri raste të lëndimeve kanë qenë më të rënda dhe si rezultat, është dashur të dërgohen për trajtim në QKUK në Prishtinë, ndërsa rastet tjera kanë qenë më të lehta”, thuhet në deklarimin e emergjencës së QKMF-së në Malishevë, për Zyrën për Informim Publik të Komunës së Malishevës.
Po ashtu edhe Shërbim i Zjarrfikësve dhe Shpëtimit, është dashur të intervenojnë në së paku dy raste zjarre, që po ashtu besohet janë shkaktuar nga mjetet piroteknike. Njëri rast në Drenoc dhe tjetri në Marali.
Gjatë natës së mbrëmshme, krahas punëtorëve të këtyre shërbimeve emergjente, edhe organet komunale, të prira nga kryetari Ragip Begaj dhe drejtorët e drejtorive përkatëse komunale, Ahmet Morina dhe Hajdin Berisha, kanë qëndruar në këto institucione, edhe për ti uruar vitin e ri këtyre punëtorëve, por edhe për të parë nga afër situatën, për shkak të përdorimit të shumtë të mjeteve piroteknike.
Gjatë natës së ndërrimit të moteve, të gjitha shërbimet e emergjencës dhe sigurisë, kanë qenë në gatishmëri dhe kanë ofruar asistencën e tyre, varësisht prej nevojave të qytetarëve.
Verejtje: Ne lajmin e pare jane leshuar gabime teknike ne titullin e lajmit, ndersa tani e ne rregull dhe me foto nga nisja ei zjarrefikesve nga baza, per intervenim.
faleminderit per mirekuptim/PrizrenPress.com/
Viti i eksodit
Viti 2015 do të njihet si viti më i madh i eksodit të shqiptarëve. Afërsisht 110 mijë qytetarë të Kosovës e lëshuan vendin e tyre për një jetë më të mirë brenda dy viteve të fundit. Lot, zëra trishtimi të fëmijëve, përshëndetje nga familjarët, ishin pamjet më rrëqethëse për disa muaj në stacionet e autobusëve në Prishtinë. Kur ikja në përmasa të mëdha u ndal, shumë qytetarë u kthyen sërish në vendlindje
Fundi i vitit 2014, veçanërisht muajt e parë të vitit që po e lëmë pas, të ndikuar nga thashethemet andej e këndej Kosovës se vendet e BE-së do t’u japin azil qytetarëve të Kosovës, zbrazi shumë fshatra, por edhe qytete të Kosovës. Përmes stacionit të autobusëve, dhjetëra mijëra banorë, të mëdhenj e të vegjël, gra e fëmijë, ia mësynë perëndimit. Nuk i ndalonte shiu e as bora, acari pa fre i atyre muajve. Ishte një dramë e rëndë, fëmijë duke qarë, por edhe të mëdhenj me lot në sy që përcillnin familjarët për të shkuar rrugëve ilegale, nëpër Serbi e Hungari, për në perëndim. Skenat ishin rrëqethëse.
Njerëz që shtyheshin për të zënë një vend në autobus. Në anën tjetër, derisa rrugëtimet nuk kishin të ndalur, fshatrat kosovare mbesnin pa banorë, oxhaqet nuk nxirrnin më tym, e shumë dyerve tashmë u ishte vënë dryni. Pamje rrëqethëse mbretëronin gjithandej. Por, shumë qytetarë, në pamundësi për të siguruar vetë mjetet financiare për rrugëtim pa krye, shitnin pasuritë e tyre të vogla ose të mëdha, disa nga ta edhe shtëpitë, e disa zhyteshin në borxhe, vetëm e vetëm për të mos e lëshuar këtë mundësi. E gjithë kjo ngjarje, që mori përmasa të mëdha, rrodhi pasi që qytetarët e kishin humbur shpresën për ditë më të mira në vendin e tyre, pasi që kishin kaluar 16 vjet në liri dhe vendi po përballej me varfri të skajshme, pa punësi, korrupsion, nepotizëm, e çka jo tjetër../kosova sot/
Zafir Berisha: Isa Mustafa po ec në fushë të minuar
Deputeti i Nismës për Kosovën, Zafir Berisha, në prag të fundvitit ka shfrytëzuar rastin që edhe njëherë të flasë lidhur me Qeverinë dhe dështimet e saj.
Ai, në llogarin e tij në Facebook, ka thënë se Isa Mustafa është duke ecur në një fushë të minuar.
“Sot, po përfundon edhe një vit i dështimit të Kosovës si shtet i ri, si rezultat i qeverisjes së korruptuar dhe njerëzve që e udhëheqin atë me mentalitetin politikë esadistë qe s’kanë identitet njerëzor, qytetar, intelektual e as kombëtar”, ka shkruar Berisha.
“Isa Mustafa, si një figurë shahu po lëvizë nëpër fushë të minuar pa asnjë objektiv shtetformues, derisa ata që e lëvizin, objketiv të vetin e kanë defunksionalizimin e Republikës për hir të “paqes në ballkan””.
Po hyjmë në vitin vendimtarë për të ardhmen e vendit dhe gjeneratave të reja, dhe fusha e minuar nëpër të cilën po ecin Isa edhe Hashimi duhet të jetë fatale për ta, por jo edhe për Kosovën!” /PrizrenPress.com
Malisheva kërkon ndryshim e jo stagnim!
Nga Valon Hoti
Po bëhen dy vite që kur qeverisja në Malishevë u ndërrua, por logjika qeverisëse e instaluar nga pushteti i mëparshëm nuk po arrin të ndryshojë, me disa përjashtime. Secili qytetar i Malishevës i cili ka jetuar dhe vepruar këtu, e di mirë se çfarë qeverisje ka pasur në kohën e PDK-së dhe i di edhe të bëmat e saj. Nuk është e vështirë të bëhen krahasime apo të tërhiqen paralele mes pushtetit të kaluar dhe këtij aktual. Pushteti i kaluar ka qenë pushtet autoritar, me një kryetar despotik dhe të korruptuar i cili operonte përmes sekserëve dhe biznesmenëve partiak, të cilët për vite të tëra zhvatnin buxhetin e komunës dhe keqpërdornin pasurinë publike.
Qeverisja aktuale, ndonëse ka ardhur në pushtet me flamurin e ndryshimit për një qeverisje transparente, të përgjegjshme, profesionale e llogaridhënëse, ajo ende nuk ka arritur ta dëshmoj një gjë të tillë.
Malisheva edhe sot vazhdon të ballafaqohet me cilësi të ulët në arsim, me mungesë të një plani zhvillimor e ekonomik, përfshirë atë për zhvillimin e bujqësisë, me rritje të papunësisë, cilësi të dobët në infrastrukturë, jetë të varfër kulturore dhe sportive. Të gjitha këto janë shenja të qarta se kemi të bëjmë me një qeverisje pa vizion, pa planifikim dhe pa vullnet.
Arsimi, vazhdon të mbetet tema kryesore, në asamble, në debate publike, e kudo tjetër, fatkeqësisht si një nga dështimet, jo vetëm të pushtetit, por edhe të shoqërisë.
Për më keq, shkolla dhe arsimi, deri më tani mund të shihen nga dy këndvështrime. Së pari, duke u reduktuar vetëm në infrastrukturë dhe objekte shkollore, të cilat kanë shërbyer si potencial për marrje tenderësh, dhe së dyti, si mundësi për rehatimin e militantëve partiak, në shumë raste pa i plotësuar kriteret ligjore, profesionale, etike e pedagogjike, gjatë rekrutimit të stafit edukativo arsimor. Ku, për pasojë, kemi degradimin e sektorit të arsimit, i cili përveçse nuk ofron dije dhe edukim për brezat, ai në shumë raste, ka përbërë edhe rrezik për gjeneratat e reja, duke i bërë viktima edhe të cenimit të integritetit dhe dinjitetit fizik dhe moral.
Tjetërsimi i pronave publike, është fenomeni i radhës, i cili nxjerrë në pah lidhjen mafioze dhe ndërmarrjen kriminale në mes të zyrtarëve të lartë të nivelit lokal dhe qendrorë, sekserëve të pronave dhe organeve të drejtësisë, nga të cilët prona publike ka pësuar humbje në qindra hektarë dhe miliona euro, në formë të privatizimeve, shpronësime dhe kompenzimeve, kthimit të pronave nga publike në private, përmes dokumenteve të fabrikuara, si dhe dhënia në shfrytëzim të pronës publike pa kritere. Edhe sot, janë të freskëta, rastet si: privatizimi i ndërmarrjes “Mirusha” ( pronat e fshatit Bellanicë dhe fshatrave përreth), mbyllja e tregut të gjelbërt dhe tjetërsimi i pronës së këtij tregu, pronat në Golesh, pronat përreth liqenit artificial të Mirushës, si dhe prona publike- shoqërore brenda qytetit të Malishevës. Nga tjetërsimi i këtyre pronave publike, janë krijuar milionerë brenda natës, të cilët, qeverisja lokale edhe sot e kësaj dite nuk ka guxim t’i denoncojë. Për më tepër, pikërisht këta uzurpator të pronave, vazhdojnë të sillen lirshëm dhe të gllabërojnë edhe ato pak prona publike që kanë mbetur.
Tash, kur qeverisjes Begaj i kanë mbetur më pak se dy vjet, disa nga premtimet e kësaj qeverisje, edhe pse të pakta, duket sheshit se nuk do të arrijnë të përmbushen dot, nëse vazhdohet me avazin e njëjtë. Ndonëse kishte premtuar transparencë dhe llogaridhënie, një gjë e tillë ende nuk po ndodhë. Transparencën dhe llogaridhënien, kjo qeverisje e ka tkurrur vetëm në disa takime formale me qytetarë dhe në disa publikime në webfaqe, duke përjashtuar pjesëmarrjen aktive të qytetarëve në planifikimin e projekteve dhe inkorporimin e nevojave dhe të kërkesave të tyre në planifikimin e investimeve publike. Investimet në infrastrukturë, ndonëse janë duke u realizuar si sasi, atyre ju mungon një planifikim profesional paraprakë, mbikëqyrja gjatë realizimit dhe të cilat në fund rezultojnë me cilësi të dobët, të përcjellura nga tenderomania.
Një mangësi tjetër e qeverisjes Begaj, është edhe paaftësia e saj për të absorbuar mendimin ndryshe, kritikat dhe sugjerimet, ndonëse ka pasur përjashtime, si në rastin e hartimit dhe të miratimit të buxhetit të vitit 2016, kur për herë të parë, falë presionit tonë, por edhe të reflektimit të tyre është arritur të kemi një buxhet më gjithëpërfshirës që e kemi pasur deri më tani. Këtu nuk duhet harruar edhe miratimin e deklaratës kundër ‘’Zajednicës”. Përmes së cilave u dëshmua, se kur ekziston gatishmëria dhe vullneti politik, ato sjellin vendime që janë në funksion të interesave të qytetarëve dhe jo në funksion të klientelizmit dhe të logjikës së bastioneve, ku qytetarët nuk shihen si votë dhe farefis, por shihen si qytetarë të barabartë të komunës.
Hija e qeverisjes Kilaj ende vazhdon ta përcjellë qeverisjen aktuale, e cila urgjent përveç se duhet të distancohet nga mendësia e qeverisjes së PDK-së, ajo duhet ta denoncoj atë.
Fjalët, tashmë nuk mjaftojnë, duhet vendime dhe veprime konkrete, për të cilat duhet vullnet, guxim dhe dije. Një gjë e tillë kërkon reformim të thellë në stafin politik dhe menaxherial të komunës, ku të papërgjegjshmëve, të paaftëve, keqpërdoruesve dhe keqmenaxhuesve duhet t’u tregohet vendi dhe bashkë me këtë duhet të ndryshojë edhe mendësia qeverisëse, e cila qytetarin duhet ta ketë në qendër, e cila nuk amniston shkelësit, që udhëheq me politika të planifikuara dhe jo me mendësinë e “harrnimit”.
Komuna e Malishevës dhe qytetarët e saj nuk mund të mjaftohen më me justifikimin qeverisjes Begaj duke bërë me gisht dhe hedhur fajin kah keqqeverisja Isni Kilaj dhe PDK-së. Ata, duan dhe kërkojnë zgjidhjen e problemeve dhe përmbushjen e nevojave të tyre të përditshme dhe ekzistenciale. Ata, duan edukim cilësor dhe siguri për fëmijët e tyre, infrastrukturë kualitative dhe në përgjithësi një qeverisje që qëndron në anën dhe përkrah tyre dhe jo një qeverisje e shurdhër dhe përtace që qëndron karshi dhe kundrejt tyre.
Ka ardhur koha që të dalim përfundimisht nga mentaliteti provincial dhe t’i bashkohemi të resë!
Papa viziton Kosovën
Papa Françesku pritet që gjatë vitit 2016 të vizitojë Kosovën.
AFP, sipas burimeve të saj brenda Vatikanit, raporton se Papa do të vazhdojë vizitat në vendet e ndryshme të botës dhe pritet që në agjendën e tij ta inkuadrojë edhe Kosovën – e cila ende nuk është njohur nga Vatikani.