15.1 C
Prizren
E hënë, 12 Maj, 2025
Home Blog Page 6862

Kamuflimi special

0

Enis Veliu

Raporti final i Inspektoratit të Ministrisë së Arsimit, rreth hetimit special të diplomave false në Fakultetin e Pejës, më shumë duket si një kamuflazh i parregullsive të shumta që kanë ndodhur aty, menjëherë pas përfundimit të luftës e deri në vitin 2004, sesa një iniciativë e sinqertë e ministrit aktual për zbardhjen e rastit, i cili ka njollosur rëndë sistemin arsimor në vend.

Hetimi special i iniciuar me urdhër të ministrit, Arsim Bajrami, në njëfarë mënyre hodhi poshtë listën e Prokurorisë Themelore të Pejës me 503 persona, të cilët kanë qenë të dyshuar se i kanë marrë diplomat nga ky Fakultet pa qenë ndonjëherë të regjistruar aty.

Por, nëse shikohet me hollësi shihet qartë se raporti në fjalë është i kamufluar, pasi që përmes këtij është munduar të mbyllet një megaskandal, ku janë të përfshirë persona që aktualisht mbajnë pozita të rëndësishme në vend.

Në raportin voluminoz, por jopërmbajtjesor, u konstatua se gjithçka ishte në rregull e që në realitet nuk është ashtu, pasi që inspektorët e ministrit gjatë hetimit në të shumtën e rasteve nuk kanë gjetur dosjet e personave që dyshohen se kanë falsifikuar diplomat dhe në fund kanë konstatuar se diplomat e tyre janë valide.

Edhe më tutje mbetet e paqartë se si inspektorët e Bajramit konstatuan një gjë të tillë, kur dihet se për listën në fjalë kohë më parë janë dënuar shumë punëtorë të këtij Fakulteti.

Prokuroria Themelore në Pejë përfundimisht duhet ta thotë të vërtetën e listës me 503 persona, si dhe të dy listave tjera që edhe më tutje mbahen larg syve të opinionit pa ndonjë arsye.

Por, në këtë rast heshtja e këtyre të fundit (Prokurorisë) në njëfarë mënyre tregon qartë se në këtë rast dyshohet se bëhet fjalë për një veprim të koordinuar mes përpiluesve të listës dhe të atyre që më pas e hetuan atë me një hetim special vetëm e vetëm për ta mbyllur rastin dhe për t’i amnistuar ata që dyshohen se falsifikuan diplomat.

Pa hyrë në thellësi, vetë fakti që shumë studentë që nuk kanë mundur t’i kryenin provimet në Prishtinë, më pastaj janë bartur në Fakultetin e Pejës tregon shumë qartë se këtu ka pasur shitblerje të diplomave.

Po ashtu, inspektorët e Arsim Bajramit konstatuan se gjithçka është në rregullt edhe atëherë kur personi ka kryer shkollën e mesme më 11 tetor, ndërkaq më 1 tetor ka nisur studimet në atë Fakultet.

Po ashtu, edhe shumë parregullsi dhe shkelje të rënda të identifikuara nga Prokuroria janë hedhur poshtë nga inspektorët specialë të ministrit aktual.

Mirëpo si duket përmes hetimit special, ministri aktual i Arsimit, Arsim Bajrami, është munduar më shumë ta shpërlajë veten, pasi që në kohën kur dyshohet se kanë ndodhur veprime të tilla të jashtëligjshme, ai ka qenë prorektor në Universitetin e Prishtinës, pjesë e së cilës ka qenë edhe Fakulteti i Pejës.

Mirëpo, herët a vonë skandali i shitblerjes së diplomave në këtë Fakultet duhet të hetohet si duhet nga ata që janë të thirrur për këtë punë, e jo të mbyllen rastet përmes hetimeve të bëra nga persona, që nuk janë kompetentë për një gjë të tillë.

Punimet në Prizren, të jashtëligjshme

0

Punimet në kuadër të trashëgimisë kulturore në qytetin e Prizrenit kanë qenë temë në seancën e së mërkurës në Kuvendin e Kosovës.
Gjatë diskutimit është ngritur çështja e punimeve për Bibliotekën e Prizrenit, ndërtimi i së cilës po lidhet me zonën e mbrojtur të shkollës së mesme Ryzhdije në Prizren, e cila daton nga viti 1874.

Deputeti nga radhët e Lëvizjes Vetëvendosje!, Mytaher Haskuka, kërkoi sqarime nga Ministria e Kulturës për ato që ai i cilësoi punime pa leje dhe pa respektim të procedurave në shkollën Ryzhdije, që është ndër më të vjetrat në Kosovë dhe Ballkan.

Në anën tjetër, ministri i Kulturës, Kujtim Shala, njëherit zëvendës kryeministër, reagoi duke thënë se miratimi i lejes nuk është mekanizëm ligjor të cilin e posedon institucioni që ai kryeson. Ai tha se Komuna e Prizrenit ka vazhduar me punimet përkundër rekomandimeve të Qendrës Rajonale të Trashëgimisë Kulturore në Prizren.

“Ju informoj se nuk mund të bëjmë fuqizimin e lejeve të tilla sepse Ministria as që jep leje të tilla. Konstatimi ynë se është se punimet në fjalë janë të jashtëligjshme”, ka thënë Shala, duke shtuar se MKRS ka kërkuar të rishikohet procesi.

Një pjesë e përgjegjësisë në lidhje me këto ndërtime i është atribuuar edhe ministrit të Mjedisit, Ferid Agani, duke qenë se përbrenda ministrisë që ai kryeson ekziston një Task Forcë e krijuar për problemet e kësaj natyre.

“Është fakt që Ministria e Mjedisit i ka instrumentet ligjore për të reaguar në këtë situatë, dhe ka reaguar. Kemi kërkuar nga Komuna e Prizrenit që të shfuqizojë atë leje dhe kjo është bërë”, ka thënë Agani. (ksl)

Serbia hap zyre për punësim për goranët në Gorë të Dragashit

0

Ministri i Punës, Punësimit, Veteranëve dhe Çështjeve Sociale, Aleksandar Vulin, sot në Gorë të komunës së Dragashit në Kosovë ka hapur zyrën e Shërbimit Kombëtar të Punësimit të Serbisë dhe një zyre për punë.

“Unë jam i kënaqur që tani jemi në gjendje të hapim zyrën e Shërbimit Kombëtar të Punësimit për të punësuar njerëz të rinj, përkatësisht tani për dymijë të rinj është hapur shpresa”, tha Vulin për mediat serbe, transmeton Telegrafi.

Ai shtoi se tani është hapur edhe stacioni për të kërkuar punë në mënyrë që t’iu sigurojë qytetarëve të Gorës që përmes punëve publike të shtetit të Serbisë, tu ofrojnë komunitetit goranë mundësi në qasje të fondeve dhe programeve të shtetit serb.

“Departamenti im ka hapur dy zyra, ku janë punësuar dy persona, por kjo do të thotë se shumë njerëz tjerë nuk do të përfitojnë prej saj”, tha Vulin.

“Serbia kurrë nuk i ka ndarë goranët dhe serbët. Ata janë qytetar serb”, tha ndër të tjerash Vulin.
Ai rikujtoj se rreth 97 për qind të goranëve që jetojnë në Kosovë marrin ndihma nga Republika e Serbisë, ku pa të, jetë nuk do të kishte në Gore.

Jahjaga sfidon Thaçin për president?

0

Kandidati i vetëm për president i koalicionit qeverisës, PDK-LDK, Hashim Thaçi, mund të sfidohet nga presidentja e tanishme, Atifete Jahajga.
Kësaj të fundit i ka mbetur me pak se një vit në krye të shtetit, ndërsa një mandate i dytë, disa herë është përmendur nëpër qarqe të ndryshme.

I kontaktuar nga ORAinfo, këshilltari për media i presidentes, Arbër Vllahiu, nuk e ka pohuar e as mohuar, nëse presidentja Jahjaga do ta synojë postin e të parës së shtetit edhe për një mandate pesë vjecarë.

Vllahiu ka thënë se presidentja Jahjaga është e përqendruar në përmbushjen e detyrave dhe obligimeve të saj kushtetuese dhe në përfaqësimin e vendit brenda dhe jashtë saj në kuadër të mandatit aktual.

Sipas tij, ka ende kohë deri në përfundimin e mandatit aktual, andaj sipas tij, presidentja Jahjaga është duke u angazhuar në procesin e konsolidimit të demokracisë së brendshme.

“Ka edhe afro një vit deri në përfundimin e mandatit aktual dhe presidentja Jahjaga është e angazhuar në procesin e konsolidimit të demokracisë së brendshme, rritjes së mirëqenies së qytetarëve, stabilitetit dhe sigurisë, jo vetëm në vend, por edhe me gjerë si dhe në përfaqësimin dhe konsolidimin ndërkombëtarë të Kosovës”, ka thënë Vllahiu për ORAinfo.

Me marrëveshjen e arritur për krijim të institucioneve në mes të PDK-së dhe LDK-së, parashihet që në vitin 2016 president të bëhet kryetari i PDK-së Hashim Thaçi.

Ky i fundit, madje ka shprehur dëshirë që postin e presidentit ta kërkojë përmes votave të qytetarëve, duke paralajmëruar se shumë shpejt do të fillojë shpalosjen e programit të tij para qytetarëve të Kosovës.

Universiteti “Ukshin Hoti” kërkon bashkëpunim me universitetet franceze

0

Rektori i Universitetit “Ukshin Hoti” në Prizren,Ramë Vataj, të mërkurën, ka pritur në një vizitë,Isabelle Combarnous, këshilltare për bashkëpunim dhe veprimtari kulturore në Ambasadën e Francës në Prishtinë.

Rektori Vataj fillimisht e njoftoi atë për të arriturat dhe sfidat e Universitetit, duke i shprehur interesimin për të lidhur bashkëpunim me universitetet franceze, ku UPZ do përfitonte nga përvoja e tyre, në shumë dimensione.

Në këtë kuadër, Rektori Vataj theksoi rolin e madh që mund ta luaj Ambasada e Francës, si urë lidhëse, për gjetjen e universiteteve franceze për arritjen e bashkëpunimit në fushat akademike.

Në këtë kuadër,Isabelle Combanous, këshilltare për bashkëpunim dhe veprimtari kulturore në Ambasadën e Francës në Prishtinë u zotua se nuk do të mungojë angazhimi i sajë, në mbështetjen e Universiteti të Prizrenit në këtë drejtim por edhe në mënyra të tjera ku arrihet pajtueshmëri e përbashkët dhe ku janë mundësitë.

Rektori Vataj u zotua se do të angazhohet për afirmimin e gjuhës frënge në mesin e studentëve përmes organizmit të kurseve përkatëse, por edhe inkorporomi si lëndë zgjedhore të Gjuhës Frënge, krahas lëndëve të tjera në guhat e huaja, në planprogramet e drejtimeve përkatëse në UPZ, pasi kjo do tu krijoj lehtësira studentëve për të vazhduar studimet në nivelin Master dhe të Doktoratës në universitetet franceze. /PrizrenPress.com/

Hoxhaj e Krasniqi takohen për t’u ‘pajtuar’

0

Kundërthëniet mediale ndërmjet drejtuesve të Policisë dhe disa organeve të Drejtësisë në Prizren, me sa duket me rikthimin në postin e vjetër të Kryeprokurorit të Prokurorisë Themelore në Prizren, Sylë Hoxha, së shpejti pritet të zbuten.

Një gjë e tillë pritet të ndodh pas takimit të sotëm që është mbajtur ndërmjet drejtuesve kryesor të këtyre organeve,me ç’rast është diskutuar për thellimin e bashkëpunimit ndërinstitucional për sundim të rendit dhe ligjit në komunat e Regjionit të Prizrenit, ka bërë të ditur për medie, zëdhënësi i policisë rajonale, kapiteni Hazir Berisha.

Zëdhënësi Berisha, duke u përgjigjur në pyetjen tonë se a do të ketë normalizim të raporteve ndërmjet këtyre institucioneve pas këtij takimi, ai nuk e mohoi faktin se ka mosmarrëveshje, por tha se bashkëpunimi do të jetë edhe më i ngushtë ndërmjet këtyre institucioneve të rëndësishme të drejtësisë dhe sigurisë. Ndryshe,

Drejtori i Policisë në Prizren, Nexhmi Krasniqi, që nga fundi i vitit të kaluar kishte akuzuar Prokurorinë dhe Gjykatën në Prizren, se këto organe të drejtësisë nuk po e kryejnë si duhet punën e tyre.

“Ka prokurorë dhe gjyqtarë që e bëjnë punën me seriozitet dhe në mënyrë profesionale, por ka edhe nga ata që nuk i marrin me seriozitet rastet”, kishte deklaruar drejtori Krasniqi… /TV Prizreni/

Provimit të maturës, do t’iu nënshtrohen 32 mijë maturantë

0

Kryetari i Komisionit Qendror Shtetëror e Maturës, Azem Guri, në një prononcim për Telegrafin ka sqaruar se, gjatë këtij viti, provimit shtetëror të maturës do t’i nënshtrohen rreth 32 mijë maturantë.

Ai ka theksuar se 28 mijë maturantë janë të rregullt në sistem, ndërsa pjesa tjetër janë maturantë të cilët nuk e kanë kaluar provimin gjatë viteve të mëparshme.

“Provimi shtetëror i maturës, do të mbahet më 6 qershor, pjesa e parë, ndërsa më 20 qershor, pjesa e dytë. Në pjesën e parë maturantët do tu nënshtrohem testeve nga lëndët e përgjithshme, ndërkaq në pjesën e dytë, ata do t’iu nënshtrohen testeve nga lëndët zgjedhore”, ka theksuar Guri.

Ai më tutje ka sqaruar se projektligji i cili parasheh që pragu i kalueshmërisë, të shndërrohet në prag ta arritshmërisë, për provimin shtetëror të maturës është në duart e deputetëve të Kosovës.

“Nëse deri në fund të majit kalon ky projektligj, kjo gjeneratë e maturantëve do t’i nënshtrohet provimit me pragun e ri, atë të arritshmërisë. Sa i përket përgatitjeve për provimin e maturës, jemi duke i kontaktuar drejtorët e të gjitha shkollave, sepse jemi të fokusuar që çështjen e administrimit (si pikë të dobët) ta fuqizojmë më tepër”, ka shtuar Guri. /Telegrafi/

Sherr mes adoleshenteve, njera nxjerr armën (Video)

0

Kjo video tregon momentin kur dy adoleshnte përplasen fizikisht në një rrugë në SHBA.

Në kulmin e sherrit, njera duket sikur nxjerr një pistoletë.

Nuk dihen shkaqet e sherrit, por disa komentues dyshojnë mbi vërtetësinë e videos.

KUJDES: PAMJE SHQETESUESE

https://youtu.be/emirrxv6G3g

Është koha që Kosova ta ketë Universitetin e Teknologjisë Informative

0

Kryetari i Kuvendit të Kosovës, Kadri Veseli tha se është koha që Kosova ta ketë Universitetin e Teknologjisë Informative.

Ai këto komente i bëri në Forumin “Zhvillimi ekonomik përmes Teknologjisë së Informacionit dhe Inovacionit”.

Veseli theksoi se nuk mund të ketë zhvillim ekonomik pa përvetësim dhe përparim të teknologjisë së informacionit. Kreu i Kuvendit tha se teknologjia e informacionit tashmë është një domosdoshmëri, për faktin se zhvillimi i saj po ecën shumë shpejt dhe ne duhet t’i zëmë trendët e këtij zhvillimi.

Duke garantuar mbështetjen e Kuvendit të Kosovës për çdo iniciativë të qeverisë e cila pretendon të nxisë zhvillimin e këtij sektori dhe t’i eliminojë barrierat eventuale, kryeparlamentari Veseli vlerësoi se me një bashkim të forcave të të gjitha palëve: institucioneve, sektorit privat dhe donatorëve, mund të bëhet më tepër në këtë drejtim.

Kryetari i Kuvendit të Kosovës theksoi se është koha që Kosova ta ketë Universitetin e Teknologjisë Informative.

Në këtë funksion, kryetari Veseli propozoi që Objekti i Kuvendit në Gërmi t’i dorëzohet sektorit të TI-së, për t’u shndërruar në Universitet të Teknologjisë Informative.

“Mbështetja për këtë fushë tejet të rëndësishme, krijimin e vendeve të reja të punës dhe zhvillimin e qëndrueshëm të vendit, me theks për rininë, do ta ketë mbështetjen time të plotë në vazhdimësi”, tha kryetari Veseli. /Telegrafi/

Isa Mustafa kandidon për kryetar të LDK-së

0

Kryeministri i Kosovës dhe lideri aktual i LDK-së, Isa Mustafa e pranon për herë të parë se do të garojë edhe për një mandate për të parin e LDK-së.

Këtë e ka konfirmuar për Botapress.

Mustafa po ashtu ka vlerësuar zgjedhjet në LDK si një proces i organizuar mirë dhe krejtësisht demokratik.

Ai ka folur edhe për problemet e shfaqur në disa degë, si në Gjakovë, Obiliq e Skenderaj, me ç’rast i ka akuzuar ata të cilët “…i kanë falur votat e LDK-së për partitë e tjera në mandatet e kaluar dhe e kanë dëmtuar këtë degë. Ata njerëz sot flasin për vlera dhe për rugovizëm, ndërsa të njëjtit e kanë përdhosë LDK-në” ka thënë lideri Mustafa.

Në këtë intervistë Isa Mustafa gjithashtu ka folur për kundërkandidaturat e mundshme të Fatmir Sejdiut, Vjosa Osmanit dhe Lutfi Hazirit duke vlerësuar si “garë të brendshme demokratike!”.