Kreu i Kuvendit, Kadri Veseli, përmes një postimi në Facebook. ka sqaruar sërish mendimin e tij në lidhje me skeçin e “Stupcave”.
Veseli edhe pse ka treguar se as ai nuk e ka pëlqyer skeçin në fjalë duke e konsideruar si humor pashije, ka thënë se “Stupcat” mund të kritikohet po assesi të linçohet.

Lexojeni të plotë postimin e Veselit:

“Artistët mund të kritikohen, por në asnjë mënyrë, nga askush, nuk mund të linçohen

Në intervistën që kam dhënë sot në gazetën “Koha Ditore”, kam pasur një reagim në lidhje me debatin që ka nxitur një pjesë humoristike e ditëve të fundit, në të cilën subjekt është lufta e Ushtrisë Çlirimtare të Kosovës. Ajo që kam dashur të theksoj është ndarja e humorit të pashije nga respekti për vlerat nacionale që mishëron lufta jonë për liri.

Gjithashtu duhet bërë ndarja në mes kritikës dashamirëse dhe reagimeve cenuese me elemente të linçimit ndaj artistëve dhe qytetarëve tanë. Artistët mund të kritikohen për veprat e tyre, por në asnjë mënyrë, nga askush, ata nuk mund të linçohen.

Linçimi nuk përkon me idealin e të rënëve të UÇK-së për të qenë të lirë. Duke qenë të lirë gjithmonë bartim edhe mundësinë që të gabojmë. Është mirë që debati i nisur të marrë kahjen e kritikës dashamirëse dhe të zhvillohet larg tendencave linçuese. Edhe në kohërat më të rënda është bërë humor dhe kritikë, sepse askush dhe asgjë nuk është e përkryer” (sic), ka shkruar Veseli.

Kryeministri Isa Mustafa e shpalli në disa raste gjatë javëve të fundit zëvendësin e tij Hashim Thaçi si President të Kosovës gati tre muaj para se të vijë në rend të ditës një votim në Kuvend.

Në vështrimin e të parit të qeverisë, votimi për President që do të duhej të mbahej në Kuvend kah muaji mars i këtij viti duket të jetë vetëm akt formal.

Për herë të parë, Mustafa këtë e bëri në një ndejë fundviti me diplomatë të huaj. Ajo pritje qe bërë “darka e duhur” për Thaçin, të cilit postin e Presidentit ia garanton edhe marrëveshja për koalicion qeveritar e lidhur mes tyre në dhjetor të vitit 2014.

E Thaçi ka marrë zemër nga insistimi i Mustafës dhe po pret që “të mos ketë pengesa” në zgjedhjen e tij për këtë post.

Është e kuptueshme që pas dy mandateve si Kryeministër- sado që asnjërin prej tyre nuk e ka kryer të plotë- dhe një gjysmë mandati i Zëvendës Kryeministër e Ministër i Punëve të Jashtme, vetëm posti i Presidentit mund të jetë synimi për një politikan si Thaçi që e ka dominuar politikën 16 vjeçare të Kosovës, qoftë si opozitar, qoftë si qeveritar.

Dhe është totalisht e kuptueshme që ai të mos presë pengesa, pavarësisht se reagimet e disa deputetëve të LDK-së kanë filluar të bëhen më të zëshme sa më shumë që po afrohet koha e votimit në Kuvend. Marrëveshja është marrëveshje dhe Thaçi po pret që ashtu siç e bëri Isa Mustafën kryeministër, tash ky i fundit t’ia kthejë favorin.

Por pse po insiston Mustafa ta promovojë Thaçin në postin më të lartë shtetëror? Në atë post të cilin tash e gati pesë vjet, të gjitha vlerësimet ndërkombëtare thonë se Atifete Jahjaga e ka mbajtur më mirë se askush më parë.

Përtej një shërbimi rivalit më të madh të shndërruar tash e një vit në partnerin më të mirë politik, apo edhe një detyrimi për zbatimin e marrëveshjes për koalicion, ekonomisti që drejton qeverinë e vendit po kalkulon për vete.

Sado që ka postin e Kryeministrit, me Hashim Thaçin në postin e të dytit në qeveri, Isa Mustafa nuk e ka shijuar në ndonjë moment pozitën në vitin të parë të qeverisjes.

Andaj duket se iu ka ngulitur në kokë ideja se ai mund të performojë në krye të qeverisë vetëm kur Hashim Thaçi të mos sillet kah ndërtesa e qeverisë.

Përveç Zëvendës Kryeministër, Hashim Thaçi është edhe Ministër i Punëve të Jashtme, por deri më sot Thaçi nuk është parë të shkojë në atë ndërtesë.

Ka vendosur t’i bëjë karshillëk të heshtur Kryeministrit duke i qëndruar fizikisht pranë gjatë tërë kohës.

Në mos asgjë tjetër, deklaratat e javëve të fundit kanë treguar një ndryshim kolosal të Isa Mustafës ndaj vetvetes.

Për të ardhur në krye të LDK-së, Isa Mustafa kishte shfrytëzuar një momentum politik të elektoratit të LDK-së kundër PDK-së dhe veçanërisht Hashim Thaçit, atëherë kur Gjykata Kushtetuese e kishte gjetur në faj ish Presidentin Fatmir Sejdiu se po i mbante dy pozita drejtuese, një në shtet e tjetrën në parti.

Me parullë të njëjtë për ta ‘pensionuar’ politikisht Thaçin, Mustafa i kërkoi votat dhe pozitën e kryeministrit në zgjedhjet e vitit 2013 dhe gjatë tërë periudhës paszgjedhore.

Tash si kryeministër, Mustafa po lufton që Thaçit t’ia sigurojë një vend pune me mandat pesëvjeçar. Në krye të shtetit! /kallxo.com/

Presidenti i Aleancës Kosova e Re (AKR), Behgjet Pacolli, ka thënë se do të vazhdojnë ekzistimin si parti në skenën politike në vend.

Pacolli në një intervistë për numrin festiv të “Epokës së re”, ka bërë me dije se janë duke e analizuar situatën përbrenda AKR-së.

“Ka qenë një pikëpyetje nëse do të garojë AKR-ja, por duke e parë gjendjen aktuale dhe duke e parë punën e opozitës, bëj apel tek qytetarët të kuptojnë se ardhmëria e këtij vendi është në duart e tyre. Gjatë zgjedhjeve të ardhshme të jenë të kujdesshëm se kënd do ta votojnë. Jemi duke e analizuar situatën përbrenda AKR-së. Ndoshta do ta kërkojmë prapë votën e qytetarëve. AKR-ja do të ketë një program dinjitoz, i cili u shërben interesave të qytetarëve. Do të dëshiroja shumë që AKR-ja të jetë përkrah qytetarëve jo si forcë e vogël politike, por si një forcë e madhe, me përkrahje më të zgjeruar. AKR-së i nevojitën njerëz të sojit të vet, të sinqertë, që mendojnë vetëm për zhvillim e mirëqenie për Kosovën”, ka thënë Pacolli.

Pacolli ka komentuar edhe situatën politike të vitit të kaluar në Kuvendin e Kosovës. Ai ka thënë se si parti janë të zhgënjyer me situatën që është krijuar mes pozitës dhe opozitës.

“Të jem i sinqertë, AKR-ja është e zhgënjyer. Ne kemi qenë në opozitë dhe kemi pasur një opozitë shumë konstruktive, pasi kemi qenë të vetëdijshëm se jemi duke ndërtuar shtet. Kemi qenë bashkëpunues me çdo kënd kur është kërkuar ndihma jonë. Parimi im është ky: të jesh pjesë e parlamentit do të thotë të jesh konstruktiv, jodesktruktiv, jo ta përdorësh votën e qytetarit për ta shkatërruar shtetin. Në mandatin e kaluar kemi qenë të ballafaquar me sfidat në Qeveri dhe, t’jua them të drejtën, jemi demoralizuar dhe e kemi kuptuar se politika nuk punon për interesat e qytetarëve. Gjatë atij mandati kemi parë që politika punonte për interesa personale dhe klanore. Moskalimi i pragut zgjedhor ka qenë zhgënjim i madh”, ka deklaruar Pacolli. /Epoka e Re