Deputeti i Nismës për Kosovën, Zafir Berisha ka deklaruar se ende nuk dihet data e saktë e mbajtjes së protestës që është paralajmëruar nga partitë opozitare.

“Nuk është caktuar ende data, pasi nuk është mbledhur opozita. Besoj që brenda këtij muaji do të ketë, marr parasysh rrethanat që janë krijuar e ku Qeveria po i bën dëm Kosovës. Pak rëndësi ka data. Do të kalojmë në një fazë tjetër bashkë me qytetarët për të mirën e Kosovës”, ka thënë Berisha në emisionin “Kontakt” në Tribuna Channel.

Sipas tij, opozita protestat vazhdimisht i ka thirrur paqësore dhe njëjtë pritet të ndodhë edhe në protestat që pritet të mbahet në muajin nëntor.

Berisha mendon se Kryesia e Kuvendit dhe kryetari, Kadri Veseli, e dinë mirë që nuk ka kushte për ta thirrur seancën e re pasi, sipas tij, do të paraqiste tensionim të situatës.

Ai tha se qëllimi kryesor është që ta ndalojnë mbajtjen e seancës dhe kështu do ta ndalojnë edhe punën e Qeverisë.

Deputeti Berisha ka folur edhe për Gjykatën Kushtetuese, për të cilën ka thënë se tani e ka momentin vendimtar që ta kthejë besimin e humbur të qytetarët. /Gazeta Tribuna/

Prokuroria Themelore në Prizren ka njoftuar se ka nxjerrë aktvendim për zgjerimin e hetimeve kundër tre të pandehurve, të cilët u arrestuan për dyshime në përfitime të kundërligjshme të dobisë pasurore.

Më poshtë gjeni njoftimin e plotë të Prokurorisë, ku sqarohet më gjerësisht për secilin të pandehur:
Prokuroria Themelore në Prizren, Departamenti për krime të rënda, ka nxjerrë aktvendim për zgjerimin e hetimeve kundër të pandehurve, H. G., F. B., I. R.

I pandehuri H.G., prej muajit mars 2013 e deri në muajin maj të vitit 2015, në cilësinë e personit zyrtar – inkasantit në kompaninë e ujësjellësit “Hidroregjioni Jugor” me seli në Prizren, me qëllim të përfitimit të kundërligjshëm të dobisë pasurore, përvetëson pasurinë e cila i është besuar për shkak të detyrës së tij. I pandehuri nuk i ka dorëzuar të hollat e inkasuara për 816 konsumatorë në vlerë prej 20.512.89 euro, të cilën shumë të parave e ka përvetësuar. Me këtë i pandehuri dyshohet se ka kryer veprën penale, përvetësimi në detyrë nga neni 425 paragrafi 2 i KP-së.

I pandehuri i dytë, F. B., gjatë periudhës kohore prej vitit 2012 e deri në vitin 2015, në cilësi të personit zyrtar – inkasantit në kompaninë e ujësjellësit “Hidroregjioni Jugor” me seli në Prizren, me qëllim të përfitimit të kundërligjshëm të dobisë pasurore, përvetëson pasurinë e cila i është besuar për shkak të detyrës së tij. I pandehuri nuk i ka dorëzuar tërë shumën e inkasuar si inkasant që i mbledh pagesat nga qytetarët sipas faturave për ujin e shpenzuar të faturuar nga “Hidroregjioni Jugor”, edhe atë nuk i dorëzon të hollat e inkasuara në vlerë prej 976.80 euro. Me këtë pandehuri ka kryer veprën penale, përvetësimi në detyrë nga neni 425 paragrafi 1 i KP-së.

Po ashtu, edhe i pandehuri I. R., gjatë viteve 2012-2015, në cilësi të personit zyrtar – kontrolluesit në kompaninë e ujësjellësit “Hidroregjioni Jugor” me seli në Prizren, me qëllim të përfitimit të kundërligjshëm të dobisë pasurore, përvetëson pasurinë e cila i është besuar për shkak të detyrës së tij. Prej secilit konsumator i ka marrë nga 58 euro, shumë kjo prej 2.958 euro të cilën e ka përvetësuar, çka do të thotë se me këtë ai ka kryer veprën penale përvetësimi në detyrë nga neni 425 paragrafi 1 i KP-së.

Hetimet kundër të pandehurve sipas aktvendimit të nxjerrë nga Prokurori i Shtetit, fillojnë prej datës 05 nëntor 2015.
Prokurori i Shtetit, ka bërë kërkesë për caktimin e masës së paraburgimit në Gjykatën Themelore, Departamenti i Krimeve të Rënda, tek gjyqtari i procedurës paraprake në Prizren, në bazë të dispozitës së nenit 164 paragrafi 7, neni 165 paragrafi 2 të KPP-së.