Katër persona të dyshuar për aktivitet terrorist janë arrestuar në aeroportin e Mançesterit (Angli), pasi janë deportuar nga Turqia.
Arrestimet vijnë pas një hetimi ndaj 9 pjesëtarëve të një familjeje, ku përfshihen edhe 4 fëmijë, të cilët ishin përpjekur të hynin ilegalisht në Siri në datën 1 prill.
Fëmijët janë të moshës 1, 3, 8 dhe 11 vjeç.
Të arrestuarit janë të moshës 22 deri në 47 vjeç.
Policia po punon për të zbardhur arsyet e udhëtimit të tyre në Siri./Top Chanel/
Ajo është një yll në Gjermani. Megjithatë kjo nuk i mjaftoi këngëtares Kim Gloss.
22- vjeçarja është zhveshur përpara kamerave të revistës Playboy.
E pyetur nga Bild se pse u zhvesh tani, ajo tha se ka pasur vazhdimisht oferta për foto nudo.
“Pas shtatzënisë mendova se isha gati. Pasi bëhesh nënë, e ndjen veten tamam grua”.
Ajo thekson se pjesa e preferuar e trupit të saj janë të pasmet, por për të ‘balancuar’ veten përpara setit të fotove, ka bërë gjoksin operacion.
Ylli i filmit ‘Fast and Furious 7’, Michelle Rodriguez, e cila në të kaluarën ka qenë në romancë me yje të famshëm si Cara Delevingne dhe Zac Efron, insiston se është natyrale që të tërhiqesh nga të dyja gjinitë dhe e pëlqen që të eksperimentojë me jetën e saj.
“Të jesh biseksuale, është diçka natyrale dhe organike. Dua të provojë gjëra të reja dhe dua të ndjehem e lirë”, ka thënë ajo.
zeshkania e bukur 36-vjeçe, babai i së cilës është nga Porto Riko, ndërsa e ëma nga Republika Dominikane, ka luftuar ashpër kundër stereotipeve në Hollivud dhe për shmangien e roleve seksi.
“Kam shmangur role që përfshinin seksin sikur të isha duke shmangur plumbat, pasi rolet hispanike gjithmonë kanë qenë rreth vajzave të këqija, joshjeve dhe lavireve. Dhe unë nuk dua asgjë nga kjo. Liria seksuale më ka pushtuar”, ka thënë ajo për medie.
Michelle së fundmi e ka pranuar se ishte çmendur pasi kolegu i saj nga filmi ‘Fast and Furious’, Paul Walker kishte vdekur në aksident trafiku dhe për ta zbutur dhimbjen, ajo kishte udhëtuar shumë dhe kishte bërë seks me partnerë të shumtë. Ajo ka deklaruar se me mendje të kthjellët nuk do t’i bënte këto gjëra, por nuk kishte rrugëdalje tjetër.
Kryeministri i Kosovës Isa Mustafa, ka folur sot për protestën e 18 prillit të paralajmëruar nga tri partitë opozitare, Vetëvendosje, AAK dhe Nisma.
Duke folur për këtë në mbledhjen e qeverisë, Mustafa tha se zgjidhja e problemeve duhet të gjendet në institucione të Kosovës e jo në rrugë.
“Shpreh bindjen time se problemet aktuale që ekzistojnë ne Kosovë duhet t’i zgjedhim brenda institucioneve të Kosovës, duhet të zgjidhet me votën e lirë të qytetarëve”, tha Mustafa.
Mustafa ka folur edhe për nënshkrimin e kontratës për investimet në Brezovicë, që sipas tij do të hapin mundësi të mëdha zhvillimore edhe për turizmin edhe për punësimin e njerëzve jo vetëm në atë pjesë po edhe pjesë e të tjera.
Mustafa tha se me nënshkrimin e kësaj kontrate po vërehet se po fitohet besimi i investitorëve.
“Kjo flet se ngadalë po e fitojmë besimin e investitorëve të jashtëm, ardhjen e tyre në Kosovë dhe shpresoj që masat që po i marrim tani do të arrijmë të kemi më shumë investitorë”, tha shefi i ekzekutivit kosovar.
Mustafa konsideron se është një hap shumë i mirë propozimi i Ministrisë së Financave për uljen e TVSh-së në disa produkte.
“Është një hap tjetër drejt zhvillimit ekonomik”, u shpreh ai në mbledhjen e sotme të qeverisë./Kallxo.com/
Augustin Palokaj
Nuk janë vetëm politikanët e rajonit ata të cilët duan që fjalët e tyre të kuptohen ndryshe nga populli dhe ndryshe nga bashkësia ndërkombëtare. Edhe politikanët e BE-së preferojnë që deklaratat e tyre të mos kuptohen njësoj. Sa u përket thënieve të kryeministrit të Shqipërisë, Edi Rama, për bashkim, ato, me thënë të drejtën, nuk kanë lënë as përafërsisht përshtypje në Bruksel sa mendohet në rajon. Në Bruksel vetëm thonë se “jemi mësuar me politikanë të Ballkanit dhe ata i gjykojmë në bazë të asaj që bëjnë e jo asaj që thonë”
Nuk mund të ketë deklarata të qarta nga ata që nuk kanë qëndrime të qarta. Kjo vlen në politikë më shumë sesa në temat tjera. E kur është fjala për rajonin e Ballkanit kjo thënie është edhe më e vlefshme. Në diskursin publik politik ka shumë raste kur politikanët thonë gjëra të paqarta, sepse nuk kanë guxim të kenë qëndrim të qartë apo thjesht e bëjnë një gjë të tillë qëllimisht për të lënë mundësi që ndryshe të kuptohet ajo që thonë.
Duke e pasur parasysh se në Ballkan liderët janë mësuar se, përpos votave të popullit, ardhja dhe mbetja e tyre në pushtet, ushtrimi i papenguar i pushtetit, pos nga votat e qytetarëve varet edhe nga mbështetja e bashkësisë ndërkombëtare, ata nuk duan të prishen as me njërën e as me tjetrën anë. Sa herë që thonë diçka që tingëllon bukur në veshin e qytetarëve bëjnë përpjekje që kjo të mos tingëllojë keq as në veshët e atyre që në Kosovë quhen “ndërkombëtarë”. Kjo ka bërë që shpesh në vendin e tyre politikanët të paraqiten si patriotë dhe nacionalistë, ndërsa kur dalin në Evropë bëhen menjëherë kozmopolitë.
Këto ditë në opinionin e rajonit, sidomos në atë shqiptar dhe serb, debatohet shumë për një thënie të kryeministrit të Shqipërisë, Edi Rama, dhënë në një intervistë në Klan Kosova rreth bashkimit të mundshëm të shqiptarëve, përmes BE-së apo ndryshe. Thënë të drejtën, ato deklarata të Ramës nuk kanë lënë as përafërsisht përshtypje në Bruksel sa mendohet në rajon. Në Bruksel vetëm thonë se “jemi mësuar me politikanë të Ballkanit dhe ata i gjykojmë në bazë të asaj që bëjnë e jo të asaj që thonë”. Nëse Rama ka menduar që me këto deklarata t’i dërgojë porosi dikujt në Bruksel, Berlin, Londër, Paris a Vjenë, që të përshpejtohet procesi i integrimit të Shqipërisë dhe Kosovës në BE atëherë ia ka huqur. Ajo deklaratë nuk do të shpejtojë as heqjen e vizave për kosovarët e as për dhënien e një date për nisjen e negociatave të anëtarësimit të Shqipërisë në BE. Në Bruksel nuk kalojnë më porositë se, nëse ju nuk na doni, ne do të bëjmë këtë apo atë. Rama dhe Thaçi do të donin që këto deklarata nga shqiptarët të kuptoheshin si një platformë politike për bashkimin kombëtar, ndërsa partnerët ndërkombëtarë ta kuptojnë se Kosova dhe Shqipëria do të jetë të bashkuara në BE aq sa edhe Holanda dhe Belgjika. Por nëse shikohen realisht gjasat për zgjerimin e BE-së në të ardhmen, Shqipëria do të bashkohet më shpejt me Greqinë dhe Malin e Zi sesa me Kosovën.
Me deklaratat e Ramës në Bruksel në fakt nuk është marrë askush. Nuk ka pasur as reagim të BE-së. Ajo që ka thënë zëdhënësja e përfaqësueses së lartë të BE-së, Maja Kocijançiq, rreth deklaratës së Ramës nuk ka qenë reagim. Ka qenë vetëm një përgjigje e përgjithësuar në një pyetje të gazetarit nga Serbia. Dhe ajo deklaratë ka qenë aq e paqartë, saqë nuk mund të quhet as reagim, e sidomos jo dënim i deklaratës së Ramës. Në fakt, as Rama nuk e kishte dhënë “idenë” e tij si deklaratë, por thjesht si përgjigje të një pyetjeje në një intervistë.
Ja si ishte përgjigjur në emër të BE-së zëdhënësja:
“Pas verifikimit të asaj që ka thënë kryeministri Rama në intervistë, ne nënvizojmë se Ballkani Perëndimor ka një perspektivë të qartë evropiane, të vendosur nga BE-ja në nivelin më të lartë politik. Të gjithë partnerët në rajon e kanë konfirmuar përkushtimin e tyre ndaj këtij qëllimi dhe ambiciet e tyre për të plotësuar kriteret e nevojshme, në respektim të plotë të parimeve dhe standardeve evropiane. Ata janë duke avancuar me shpejtësinë e tyre, në këtë rrugë dhe ne presim që ata të vazhdojnë përpjekjet e domosdoshme për progresin e mëtejmë. Përkushtimi përfshin edhe bashkëpunimin rajonal, ripajtimin dhe fqinjësinë e mirë; çfarëdo deklarate provokuese në këtë kontekst nuk është e pranueshme”.
Kjo është përgjigjja e zëdhënëses së Mogherinit e formuluar nga burokratët në Bruksel, të cilën secili mund ta kuptojë si duhet, por nuk duhet të shkaktojë kurrfarë shqetësimi të Ramës sikurse as ajo që ka thënë Rama nuk duhet të shkaktojë as shqetësim të dikujt e as entuziazëm të shqiptarëve. Në Bruksel vetëm thonë se “jemi mësuar me politikanë të Ballkanit dhe ata i gjykojmë në bazë të asaj që bëjnë e jo asaj që thonë”. Në Bruksel kanë heshtur sa herë që kryeministri i Kosovës, Thaçi, ka dhënë interpretime të marrëveshjeve me Serbinë, të cilat janë krejtësisht të kundërta me ato që ka bërë Beogradi. “Le të thonë çfarë të duan për opinionin e tyre nëse atyre u hyn në punë. Nëse kjo u ndihmon atyre ne nuk kemi asgjë kundër”, ka qenë gjithmonë qëndrimi i BE-së. Në BE nuk preferojnë të prononcohen fare dhe nuk u pëlqen as kur gazetarët bëjnë pyetje, sepse atëherë duhet të thonë diçka. Dhe kur thonë atëherë e thurin në mënyrë aq burokratike, saqë është vështirë të kuptohet. Sikur të mos pyesnin gazetarët shumë rrallë nga Brukseli do të dëgjohej këto ditë ndonjë prononcim i ndonjë shteti të rajonit të Ballkanit. BE-ja ka shumë probleme të veta, ndërsa vendet e rajonit janë shumë larg nga anëtarësimi në BE.
Nuk janë vetëm politikanët e rajonit ata të cilët duan që fjalët e tyre të kuptohen ndryshe nga populli dhe ndryshe nga bashkësia ndërkombëtare. Edhe politikanët e BE-së preferojnë që deklaratat e tyre të mos kuptohen njësoj.
Ja një shembull tjetër i mirë për këtë. Kur ishte në Prishtinë përfaqësuesja e lartë e BE-së për Politikë të Jashtme dhe Siguri, Federika Mogherini, prapë duke u përgjigjur në një pyetje, iu referua, siç duket rastësisht, Kosovës si shtet sovran dhe i pavarur, duke thënë se “dialogu është mes dy shteteve sovrane dhe të pavarura”. Kjo na gëzoi shumë dhe u raportua nga të gjitha mediat. Edhe unë personalisht doja të besoja se kjo është një kthesë në qëndrimet e BE-së ndaj Kosovës. Por sapo shkoi në Beograd ajo, nëse është për t’iu besuar burimeve të BE-së, “sqaroi se çfarë ka thënë dhe çfarë ka menduar”, ndërsa sipas burimeve serbe ajo madje i ka kërkuar falje Serbisë për këtë deklaratë. Ministri i Jashtëm i Serbisë, Ivica Daçiq, ka thënë se “Mogherini ka kërkuar falje dhe ka sqaruar se ka menduar në dy palë e jo dy shtete”. Kur pyetëm në Bruksel se “a është e vërtetë thënia e ministrit Daçiq se Mogherini ka kërkuar falje për deklaratën në të cilën i është referuar Kosovës si shtet sovran?” kemi marrë me shkrim këtë përgjigje: “Çështja është sqaruar. Nuk ka nevojë për kërkim falje”. E tash kuptojeni si të doni. Beogradi le ta kuptojë se ajo nuk ka menduar dhe nuk ka dashur të thotë se Kosova është shtet, ndërsa Kosova dhe shqiptarët ta kuptojnë se ajo ka thënë qartë se Kosova është shtet sovran. Dhe e tërë sjellja e BE-së me votë është e tillë, e shumëkuptimtë. I tërë roli i BE-së në dialog është që të jetë neutral ndaj statusit dhe të tilla janë edhe të gjitha marrëveshjet Kosovës me Bashkimin Evropian. Le të mendojnë kosovarët se BE-ja i trajton si shtet dhe le të mendojë Serbia se Kosova nuk është shtet.
Ajo që në BE nuk do të donin të ndodhte është që për dështimet e tyre liderët e Ballkanit të fajësojnë qëndrimet e BE-së. Edi Rama mund të bëhet më kritik ndaj BE-së edhe për shkak se po e kupton se, së paku këtë vit, nuk mund të presë ndonjë datë për nisjen e negociatave të Shqipërisë për anëtarësim në BE. Në anën tjetër edhe ish-kryeministri i Kosovës, Hashim Thaçi, mund të zemërohet për faktin se as sivjet nuk do të realizohen premtimet e tij për heqjen e vizave për qytetarët e Kosovës, siç nuk janë realizuar as në shumë vjet që kanë kaluar e për të cilat ai kishte garantuar se një gjë e tillë do të ndodhte. Dhe mund ta fajësojnë Brukselin dhe BE-në për mosrealizimin e këtyre aspiratave, por nuk do arrijnë asgjë, sepse në këtë proces ndaj shqiptarëve, as ndaj Shqipërisë e as ndaj Kosovës, nuk do të ketë lëshime. Shqipëria duhet të japë edhe më shumë dëshmi për luftë kundër korrupsionit dhe krimit të organizuar, për funksionimin e duhur të shtetit, nëse dëshiron të nisë negociatat e anëtarësimit. Kosova duhet të përmbushë edhe disa kushte nëse dëshiron që në BE të rritet gatishmëria për heqjen e vizave, gatishmëri e cila për momentin nuk ekziston. Rama nuk do të kërkojë që, për shkak të solidaritetit me vëllezërit kosovarë, BE-ja t’ua kthejë vizat shtetasve të Shqipërisë. Shqipëria mund të ndihmojë më së shumti Kosovën në sigurimin e liberalizimit të vizave nëse ndikon që të zvogëlohet numri i atyre që kërkojnë azil në shtetet e BE-së dhe vijnë nga Shqipëria, nëse ndihmon autoritetet e Kosovës me këshilla se si të përmbushin kriteret.
Deklaratat e Ramës dhe të Thaçit do të shkaktonin probleme në raportet e Brukselit me ta sikur ata në takime zyrtare të thoshin se do të veprojnë në kundërshtim me parimet e BE-së dhe me zotimet për mosndryshimin e kufijve. Prandaj edhe nuk shqetësohen për këto thënie sikur nuk shqetësohen as për atë që thonë në Beograd, Sarajevë e Banjallukë, Shkup e Tetovë. Janë mësuar me sjellje të tilla. E realiteti i Kosovës në këtë moment është se Serbia ka rol shumë të më madh në jetën politike të Kosovës sesa Shqipëria, dhe këtë falë rezultateve të dialogut nën ndërmjetësimin e Bashkimit Evropian, dialog që me entuziazëm e bën Qeveria e Kosovës dhe e mbështet fuqishëm ajo e Shqipërisë, sepse e mbështesin edhe BE-ja dhe Shtetet e Bashkuara të Amerikës./Koha Ditore/
Ndërtimi kundërthënës i objektit të Bibliotekës së Qytetit në oborrin e Ryzhdijes së Prizrenit të shekullit XIX ka detyruar autoritetet komunale që të hyjnë në dialog me përfaqësuesit nga Republika e Turqisë, me qëllim që të gjejnë një rrugëdalje për realizimin e këtij projekti, por edhe për restaurimin e objektit të vjetër të trashëgimisë kulturore.
Në këtë drejtim autoritetet komunale nuk kanë zhvilluar diskutime me Ambasadën e Turqisë, por vetëm me zyrtarët e Agjencisë Turke për Bashkëpunim dhe Koordinim (TIKA).
“Kemi marrëveshje me agjencinë turke TIKA që bashkërisht të realizojmë restaurimin e objektit të Ryzhdijes, i cili do të integrohet në kuadër të kompleksit të Bibliotekës që është duke u ndërtuar”, ka thënë shefi i Zyrës për informim në Komunën e Prizrenit, Ymer Berisha.
Burime të besueshme të gazetës kanë konfirmuar se “TIKA është e interesuar që të restaurojë objektin e vjetër të Ryzhdijes, në mënyrë që kësaj ndërtese t’i kthehet pamja e saj e vjetër”. Kësisoj nënkuptohet se marrëveshja mes dy palëve ende nuk është firmosur. Madje një burim tjetër brenda Komunës së Prizrenit ka theksuar se kërkesa e qeverisë lokale për restaurimin në adresë të TIKA-s është dërguar një javë më parë.
Shkolla e mesme “Ryzhdije”, pranë kompleksit të Tabakhanës, u hap në vitin 1874 dhe paraqet themelimin e arsimit të ri të mesëm në Prizren. Kur më 13 janar 1992 zjarri e kaplon objektin, ai lihet në mëshirë të kohës dhe gradualisht shkatërrohet, kështu që sot nga objekti kanë mbetur vetëm rrënojat/Koha Ditore/
Stambolli, i ngjyer me një gamë të larmishme kulturash, gjuhësh dhe besimesh, i pasur në histori dhe bukuri estetike. Erbil e vëzhgon qytetin me sy të pasionuar dhe mbërthen realitetin me shprehi poetike. E shndërron historinë dhe kujtimet në mënyrë romantike në ritmin e të pikturuarit.
Në Galerinë Kombëtare të Arteve çelet sot ekspozita e piktorit kontemporan turk, Devrim Erbil. Artisti sjell magjinë e Stambollit në kryeqytetin shqiptar
“Me dashuri nga Stambolli” titullohet ekspozita e piktorit të njohur turk, Devrim Erbil, e cila çelet sot në mbrëmje në Galerinë Kombëtare të Arteve. Në prezantimin e tij të parë për publikun shqiptar, Erbil sjell një përzgjedhje prej rreth tridhjetë veprash në pikturë, shumica në teknikën akrilik dhe vaj në kanavacë dhe në dimensione të mëdha, të cilat në fokusin e tyre kanë Stambollin. Bukuria legjendare e natyrës së këtij qyteti dhe pamjet panoramike të krijuara nga dora e njeriut kanë frymëzuar artistë të ndryshëm për shekuj me radhë. Ata i kanë dhënë një histori të gjatë artit turk.
Stambolli, i ngjyer me një gamë të larmishme kulturash, gjuhësh dhe besimesh, i pasur në histori dhe bukuri estetike. Erbil e vëzhgon qytetin me sy të pasionuar dhe mbërthen realitetin me shprehi poetike. E shndërron historinë dhe kujtimet në mënyrë romantike në ritmin e të pikturuarit.
Devrim Erbil lindi në vitin 1937 dhe studioi pikturë në Akademinë Shtetërore të Arteve të Bukura në Stamboll më 1955, fillimisht nën Halil Dikmen dhe më vonë në studion e Bedri Rahmi Eyüboglu. Nga viti 1965, stili unik i piktorit Devrim Erbil tërhoqi vëmendjen e një audience ndërkombëtare. Atij iu dha një bursë arti nga qeveria spanjolle për të studiuar pikturë në Madrid dhe Barcelonë. Më vonë vazhdoi karrierën e tij akademike në Paris dhe Londër. Më1968-n Erbil u zgjodh “Artisti i ri i vitit” në Turqi dhe më 1991-shin u nderua me titullin e rëndësishëm “Artist i Shtetit të Turqisë”.
Përveç karrierës në pikturë, Erbil ka dhënë kontribut për zhvillimin dhe promovimin e arteve në Turqi. Ka qenë president i Shoqatës Turke të Arteve dhe president i Shoqatës së Arteve Pamore Bashkëkohore. Gjithashtu ka qenë edhe drejtor i Muzeut të Pikturës dhe Skulpturës në Stamboll.
Erbil ka një karrierë të pasur dhe të gjatë edhe në qarqet akademike. Aktualisht është Profesor i Pikturës në Departamentin e Pikturës në Universitetin ‘Mimar Sinan’.
Ashtu si thotë përshkrimi në Christie’s, shtëpia e famshme e ankandeve, ku veprat e këtij autori kapin shifra të konsiderueshme, me dhjetëra mijë dollarë, puna e hershme e Devrim Erbil të kujton fort veprat dhe ilustrimet e Matrakci Nasuh, një nga figurat më të rëndësishme të Turqisë së shekullit XVI, dhe aktiv gjatë kohës së Sulltan Sulejmanit të Madhërishëm, të cilat kombinonin një mori ngjyrash natyrore me perspektivën ajrore dhe lartësinë horizontale. Në pikturat e mëvonshme Devrim Erbil trajton perspektivën dhe proporcionet në mënyrë më natyrale, ndërsa ngjyra në punët e tij bëhet monokrome dhe ekspresive.
Arti për Erbil është ajo lloj gjëje që i lejon njerëzit të kenë një sens njëherazi të bukurisë dhe lumturisë. “Prandaj shpresoj që kur njerëzit të shohin artin tim, pikturat e mia, ata të marrin një ndjesi të ngrohtë, një fllad të ngrohtë që valëvitet në shpirtrat e tyre dhe që krahët e zogjve të prekin ujin ndërsa kalojnë. Nëse mund të përcjell 10 sekonda nga ai lloj gëzimi, do ndjej se kam arritur qëllimin tim më të madh. Më shumë se të pikturuarit një peizazh, të përshkruash lumturinë. Unë dua të shoh sytë e shikuesve të pasqyruar në punët e mia”.
Vendin e tij në pikturën turke e sheh si të një artisti produktiv. Kjo është bërë realitet me një studio sistematike që e lejon njëherazi të përdorë një sërë teknikash.
“Mund të them me plot besim se jam artisti më produktiv i Turqisë në pikturë dhe forma të tjera. Kam bërë rreth 2500 deri 3000 vetëm piktura në vaj. Gjenialiteti artistik ecën paralel me produktivitetin”.
Përveç ekspozimit të punëve të tij në Turqi e më gjerë, ai ka shërbyer si komisioner për ekspozita turke në Aleksandri, Beograd, Sofje dhe Kuvajt. Aktualisht vazhdon të japë mësim dhe të publikojë artikuj në artin turk në të gjithë botën. Veprat e tij të artit mbahen si koleksione të përhershme në shumë muze ndërkombëtare dhe fondacione publikë. Përveç pikturës, ai eksploron në shumësi teknikash si punimi i qilimave, peksiklazit, qeramikës.
Ekspozita që do të qëndrojë e hapur deri më 17 maj, është organizuar nga Galeria Kombëtare e Arteve, Ambasada e Turqisë dhe Instituti Kulturor “Junus Emre” dhe kurohet nga Beste Gürsu.
Gjatë ditës së djeshme policia ka sekuestruar dy armë në dy lokacione të ndryshme të Suharekës.
Një pushkë dhjetëshe është sekuestruar në fshatin Sallagrazhdë, e dorëzuar në mënyrë vullnetare, ndërsa një pistoletë e llojit “Ekol Tuna “ është sekuestruar në një veturë e cila ishte në oborrin e një shtëpie në fshatin Shirokë.
Shkas për gjetjen e kësaj arme kishin qenë disa krisma që janë dëgjuar nga një patrullë policore e cila kishte rastisur të ishte afër vendit të ngjarjes dhe lehtë e ka identifikuar oborrin e qytetarit të dyshuar i cili është arrestuar dhe është dërguar në stacion për t’u pyetur për rastin.
Pas intervistës është informuar prokurori i shtetit i cili ka nënshkruar vendimin për ndalimin e të dyshuarit për 48 orë. /PrizrenPress.com/
Gjykata e Tiranës ka liruar me kusht Lavdërim Tufën, i dënuar për vrasjen e Fatmir Ramës apo i njohur ndryshe si ‘Miri i Xhikes’. I arrestuar në vitin 2004, Tufa përfundimisht u dënua me 20 vite burg për vrasjen te Kartodromi. Pas disa procesesh gjyqësore, në shkurt të vitit 2013 Tufa u dënua me 20 vjet burg, pasi më parë ishte dënuar me burgim të përjetshëm. Pasi ka shlyer pjesën më të madhe të dënimit, i akuzuari për tri vrasje dhe një plagosje i është drejtuar Gjykatës së Tiranës me një kërkesë për lirim para kohe me kusht.
Kjo çështje u gjykua nga gjyqtarja Enkeleda Hajro, e cila pasi mori miratimin e prokurorit, përfaqësuesve të burgut ku vuan dënimin Tufa dhe raportit për dinamikën e vuajtjes së dënimit, pranoi kërkesën e tij për ta liruar para kohe me kusht. Në fund të muajit mars, Hajro vendosi të pranojë kërkesën e Tufës duke urdhëruar lirimin e menjëhershëm.
“Gjykata vendosi pranimin e kërkesës, lirimin me kusht të të dënuarit Lavdërim Tufa, 39 vjeç, dënuar me vendimin nr. 540, datë 13 shkurt 2013, të Gjykatës së Apelit Tiranë. Urdhëroj pezullimin e pjesës së mbetur pa vuajtur të dënimit prej 1 vit, 8 muaj e 10 ditë burgim, për një kohë provë prej 4 vjetësh, me kusht që gjatë kësaj kohe i dënuari të mos kryejë vepër tjetër penale”, thuhet në vendimin e gjykatës.
Sipas vendimit, i dënuari Lavdërim Tufa detyrohet që gjatë kohës së provës të ushtrojë veprimtarinë profesionale, si dhe të mbajë kontakte të rregullta me Shërbimin e Provës. “Urdhërohet lirimi i menjëhershëm i të dënuarit Lavdërim Tufa nga IEVP Fier, në qoftë se nuk mbahet i ndaluar, i arrestuar apo i dënuar për ndonjë vepër tjetër penale”, thuhet në vendim.
Sipas vendimit të gjykatës, Tufa akuzohej për vrasje në rrethana të tjera cilësuese në dëm të shtetasve Fatmir Rama, Julian Durishti, Kristaq Cani dhe ka plagosur shtetasin Fatmir Rrapaj, ngjarje e ndodhur në vitin 2004 në periferi të Tiranës. Gjykata e Krimeve të Rënda në vitin 2006 e deklaroi Lavdërim Tufën fajtor për akuzën e vrasjes së trefishtë dhe e dënoi atë me burgim të përjetshëm. Apeli i Krimeve të Rënda në vitin 2007 vendosi ta lërë në fuqi këtë vendim.
Gjykata e Lartë në shkurt të vitit 2009 prishi vendimin dhe e delegoi çështjen sërish në Apelin e Krimeve të Rënda. Apeli i Krimeve të Rënda në muajin maj 2009 vendosi të prishë vendimin e dënimit me burgim të përjetshëm dhe dërgoi çështjen në Gjykatën e Rrethit Tiranë, si gjykatë kompetente për shqyrtimin e kësaj akuze.
Prokuroria i bëri rekurs këtij vendimi, por Gjykata e Lartë në shtator 2009 vendosi të mos e pranojë kërkesën. Më pas, çështja kaloi në Gjykatën e Tiranës, e cila kreu një hetim të ri gjyqësor dhe në përfundim e dënoi të pandehurin Lavdërim Tufa me 20 vjet burg.
Këshilli i Prindërve të Arsimit të Kosovës ka përshëndetur fillimin e vlerësimit ndërkombëtar PISA të nxënësve në vendin tonë.
Këshilli vlerëson se aktiviteti i filluar sot në Kosovë është një ngjarje e madhe për sistemin e Arsimit në Republikën e Kosovës.
Shpresojmë dhe dëshirojmë që organizimi i kësaj ngjarjeje të rëndësishme të jetë në nivelin e duhur dhe se të gjithë aktorët e duhur të jenë mobilizuar me kohë dhe të përkrahin zhvillimin e këtij aktiviteti.
Nxënësve të përzgjedhur u urojmë fat dhe arritshmëri të lartë në këtë test ndërkombëtar, kurse nga prindërit kërkojmë që të jenë pjesë aktive e këtij procesi duke ndihmuar dhe motivuar fëmijët e tyre, thuhet në kumtesën e Këshillit të Prindërve të Kosovës.