Në shkollën më të madhe të Suharekës është punësuar pa konkurs gruaja e asamblistit më të votuar të partisë në pushtet.
Ardian Shala, asamblisti më i votuar i LDK-së në Suharekë, parti që qeveris që shtatë vjet këtë qytet, mohon se ka ndikuar që gruaja t’i punësohet në Shkollën Fillore dhe të Mesme të Ulët “7 Marsi”.
“Nuk qëndron fakti se gruaja ime është pranuar pa konkurs, pasi e njëjta iu ka nënshtrua konkursit, si çdo qytetar tjetër i Suharekës dhe përderisa është pranuar, edhe i ka plotësuar kushtet,” thotë Ardian Shala.
Por drejtori i Arsimit në Suharekë Sherif Berisha e pranon se në “7 Mars” nuk u hap konkurs për gruan e asamblistit, por ajo sipas tij, konkursit iu nënshtrua për një vend pune në një shkollë tjetër, ndërsa ndodhej në listën e pritjes.
“Konkursi ka qenë i hapur për Shkollën Fillore të Mesme të Ulët ‘Sadri Duhla’ në Duhël, paralelja te Lagjja e Reshanëve, ku kanë konkurruar 14 kandidatë. Të 14-ët janë intervistuar, është bë lista e të intervistuarve në bazë të anëtarëve të komisionit që e kanë bë vlerësimin dhe tre kandidatët e parë janë sistemuar, një në shkollën fillore ‘7 marsi’,” shpjegon drejtori Berisha.
Vetë e punësuara në Shkollën “7 Marsi” nuk e ngriti telefonin kur iu kërkua nga gazetari i KALLXO.com që ta komentojë punësimin e saj.
Punësimin e gruas së asamblistit të LDK-së e konteston Alush Shala i PDK-së, parti që është opozitare në Suharekë.
“Një tjetër shkelje është bërë edhe në shkollën fillore 7 marsi në Suharekë ku pa konkurs është pranuar bashkëshortja e asamblistit më të votuar në komunën tonë, Ardian Shalës, i cili është asamblistit i LDK-së dhe kjo tregon se kemi një familjarizëm dhe nepotizëm në punësime,” thotë Shala.
Edhe asamblistja e Lëvizjes “Vetëvendosje” në Suharekë Zana Zyba, thotë se janë duke u punësuar vetëm të lidhurit me partinë në pushtet.
“Partia në pushtet po punëson mësimdhënës ata kandidatë të cilit janë militantë të partisë së saj si dhe familjarët e pushtetarëve,” thotë Zyba.
Alush Shala nga PDK-ja bën thirrje që të gjitha keqpërdorimet ne arsim të hetohen nga organet e drejtësisë, pasi këtu sipas tij ka vend edhe për përgjegjësi penale.