Lideri i Lëvizjes Vetëvendosje, Visar Ymeri, ka shkruar një status në Facebook në lidhje me ngjarjet e ditës së sotme në Kuvendin e Kosovës.

“Koalicioni qeverisës e bojkotoi vazhdimin e seancës së caktuar në ora 20″.

“Tash po thonë që do të ketë seancë rreth orës 22”.

“Kjo është seancë e inatit, sepse nuk është as e rregullt e as e zakonshme. Cila na qenka ajo pikë kaq urgjente që po u dashka të diskutohet domosdoshmërisht sot, të premten, në mesnatë?”

“Ky koalicion nuk e qeverisë Kosovën, por e shpenzon atë gjatë ditës, ndërsa po synon ta cungojë atë natën”, ka shkruar Ymeri.

Shefi i grupit parlamentar të PDK-së, Adem Grabovci, ka deklaruar se seanca sipas tij patjetër do të mbahet dhe se deputetët e pozitës nuk do të largohen pa u mbajtur seanca.

“Seanca patjetër do të mbahet ashtu siç është e paraparë në rendin e ditës. Ne nuk dalim nga Kuvendi pa u mbajtur seanca”, ka precizuar Grabovci për Rrokum TV.

Ndryshe Grabovci kërkoi nga qytetarët që të shohin sipas tij veprimet e akterëve dhe të gjykojnë atë që po ndodh si shkak i opozitës.

Aleanca për Ardhmërinë e Kosovës ka dalur me një deklaratë lidhur me shtyrjen e seancës.

Ja teksti i plotë:

“Qeveria është ajo që duhet t’i thërrasë arsyes dhe të mos e vazhdojë provokimin e saj dhe lojën me nerva. Ata që insistojnë në mbajtjen e seancës në mesnatë, nuk janë as politikanë të përgjegjshëm e as ia duan të mirën këtij vendi.

Nuk kapërcehen gabimet tuaja katastrofike me këso farë lojërash të ulta.

Prandaj mbylleni seancën dhe tërhiqni marrëveshjet që e instalojnë Serbinë në Kosovë dhe që Malin e zi e ulin këmbëkryq në Bjeshkët e Rugovës.

Kreyministër nëse nuk je burrë të përballesh me gabimet tuaja, shko në shpi dhe mos vazhdo me lojëra të rrezikshme! Fati i individit e as i grupit, nuk lidhet me fatin e vendit. Të gjithë ata, që nuk e kuptojnë seriozitetin e situatës së krijuar, dhe që bëjnë provokime të kësaj natyre, nuk do të kalojnë.

Prandaj tërhiqni taborret dhe mos e sabotoni mundësinë e mbrojtjës së këtij vendi! Mos e provokoni as veten as neve dhe as njeri normal në këtë vend, që s’po e kupton se pse keni vendosur që punët t’i bëni natën!”

Ambasadori Amerikan, Greg Delawie, ka reaguar karshi situatës politike në vend.

Delawie ka vlerësuar se progresi në Kosovë është i pamundur, duke e sqaruar edhe arsyen.

“Progresi në Kosovë i pamundshëm pa një Kuvend funksional”, ka shkruar ai në Twitter.

Deputeti për Kosovën Zafir Berisha ka ironizuar me pozitën.

Nëpërmjet llogarisë së tij në rrjetin social Facebook, Berisha shkruan se ‘koalicioni i elefantëve’ dhe ‘numrat e Adem Grabovcit’ nuk po kryejnë punë.

“Vazhdon…Ademit nuk po i bejn pune numrat ndersa kualicionit ,,Elefandve,, as qindra polic qe i kanë fut mrenda ne Kuvende si…Z.B”, shkruan Berisha në Facebook.

Kryetari i Grupit Parlamentar të PDK-së Adem Grabovci ka përmendur shpesh ‘numrat e koalicionit’ kur duhej votuar çështje të ndryshme në Kuvend

Hetuesit policorë dhe Prokurori kanë shkuar në Kuvendin e Kosovës për të hetuar ngjarjet e fundit që kanë ndodhur atje, pas hedhjes së gazit lotsjellës.

Opozita ka hedhur sot sërish gaz lotsjellës në Kuvend, për t’i penguar punimet e tij, si protestë ndaj Marrëveshjes për Asociacionin dhe Marrëveshjes për Demarkacionin me Malin e Zi.

Nënkryetari i Kuvendit të Kosovës dhe anëtari i Partisë Demokratike të Kosovës, Xhavit Haliti, ka deklaruar se për situatat e sotme nuk ka faj kryesia e Kuvendit, por Qeveria e Kosovës, Ministria e Punëve të Brendshme, Policia e Kosovës, EULEX-i edhe KFOR-i, sepse këto janë organet për sigurinë e shtetasve të Kosovës dhe të tjerët.

“Kryesia e Kuvendit të Kosovës nuk ka asnjë kompetencë në këtë aspekt. Lexojeni rregulloren e Kuvendit dhe Kushtetutën e Kosovës. Prandaj kërkojeni dorëheqjen e atyre që s’i kryejnë detyrat e tyre”, pohoi Haliti. /Klan Kosova