Akademik Rexhep Qosja ka thënë se veprimet e sotme të Lëvizjes Vetëvendosje, të AAK-së dhe të Nismës janë të nxitura prej veprimeve politike, shtetërore dhe kundërshtetërore të qeverisë në krye me Isa Mustafën. “Qeveria e sotme e Kosovës në krye me ish ministrin e qeverisë së Millosheviqit në Kosovë, Isa Mustafën, po e dëshmon demokracinë e saj të rreme duke tradhtuar interesat kombëtare dhe shtetërore të Kosovës. Nuk ka dyshim së autonomia e veçantë e komunave serbe në Veri të Kosovës e cenon fort sovranitetin e Kosovës. Kjo autonomi bëhet rrezik për ardhmërinë e Kosovës shtet. Me marrëveshjen për demarkacionin me Malin e Zi, lehtë e shpejt i falen Malit të Zi disa mijëra hektarë tokë të Kosovës. Me njohjen e sovranitetit të Malit të Zi mbi këtë tokë Kosova cenohet në pikëpamje territoriale dhe në pikëpamje gjeostrategjike”, ka thënë Qosja në një intervistë për gazetën “Dita”.
Ai ka shtuar se opozita vendosmërisht po kërkon të tërhiqet nënshkrimi prej atyre dy marrëveshjeve, që dëmtojnë rëndë Kosovën. “Kryeministri i Kosovës vendosmërisht po mohon gatishmërinë që ta tërheqë nënshkrimin e tij. Ky mospajtim thelbësor Opozitë -Qeveri ka sjellë bllokimin e punës së Kuvendit të Kosovës tani e një muaj. Kjo gjendje s’mund të vazhdojë gjatë si e tillë”, ka deklaruar Qosja, duke shtuar se arrestimi i disa protestuesve, kërcënimet për denoncimin e deputetit Albin Kurti e të deputetes, Albulena Haxhiu, për vepër penale pse kanë qitur gaz lotsjellës në Kuvend i përkeqësojnë edhe më tej marrëdhëniet mes qeverisë dhe opozitës..
“Nuk ka dyshim se Kosova po përjeton edhe një krizë të rëndë politike që ka drojë të bëhet konflikt shoqëror! Ky konflikt mund të ketë pasoja në trajtimin e shtetit të Kosovës nga ana e faktorëve ndërkombëtarë, para së gjithash nga BE dhe SHBA”, është shprehur Qosja.
Ai ka thënë se rrugëdaljen e sigurt e sheh në mbajtjen e referendumit për deklarimin e popullit për ato dy marrëveshje. “Do të ishte shumë tragjike për Kosovën në qoftë se faktorët ndërkombëtarë lejojnë që të përdoret dhuna shtetërore për ta nënshtruar opozitën e panënshtrueshme”, ka deklaruar Qosja.
Profesor Qosja, faleminderit për këtë intervistë. Pyetja e parë është kjo: Jemi dy vjet pas ndryshimit të qeverisë në Shqipëri. Ç’ndryshim mund të nxirrni, çfarë note do t’i vinit qeverisjes së deritashme të Edi Ramës dhe koalicionit të majtë?
Qosja: Me nota, prej 1 deri në 5 apo prej 5 deri në 10 nuk është e lehtë dhe nuk është e drejtë të vlerësohet a të zhvlerësohet puna politike dhe shtetërore e një qeverie. Në praktikën e qeverive që janë vërtet demokratike ka shumë ngjyresa mes masave e vendimeve që merr ajo, vlera e të cilave mund të shquhet shumë më tepër në vitet e ardhshme, domethënë në fund të mandatit se ç’duken në të tashmen. Por, meqenëse po këmbëngulni që të përgjigjem më prerazi në pyetjen, do të them: me ndryshimet e sendërtuara në politikën shtetërore, koalicioni i majtë, shikuar në përgjithësi, ishte kryesisht i suksesshëm.
Z, Qosja a prisnit më shumë ju personalisht nga Rama?
Qosja: Nuk kam pritur më shumë se ç’është arritur nga qeveria, kryeministër i së cilës është Edi Rama, dhe nuk kam pritur më shumë se ç’është arritur për arsye se isha dhe jam i vetëdijshëm për vështirësitë e quajtura objektive dhe për pengesat e quajtura subjektive, që i janë bërë dhe po i bëhen kësaj qeverie, që po i bëhen në mënyrë të veçantë Edi Ramës.
A mendoni se disa zhgënjime të elektoratit vijnë si reagim i natyrshëm pas reformave të dhimbshme, apo pakënaqësia është më e thellë?
Qosja: Është dëshmuar po thuaj në të gjitha vendet ish komuniste se reformat i shkaktojnë pakënaqësi ku më të vogël e ku më të madhe elektoratit. Pakënaqësia e elektoratit është më e madhe kur reformat janë më të thella, më të gjithanshme e sidomos kur janë më të shpejta siç ishin reformat që filloi dhe po zbaton Edi Rama. Edi Rama është detyruar të bëjë reforma më të thella e më të gjithanshme sepse ka trashëguar një gjendje parashtetërore pothuaj kaotike. Ishte detyrë atdhetare e tij dhe e qeverisë së tij, që prej një parashteti në të cilën sundohej pa rend e ligj të krijojë shtet dhe, mundësisht, të krijojë shtet që e quajmë bashkëkohor, dua të them modern. Edi Rama ishte i detyruar të zgjedhe mes Edi Ramës së duartrokitur kudo e kurdo apo Shqipërisë vërtet shtet, mes Edi Ramës së duartrokitur kudo e kurdo apo ardhmërisë së Shqipërisë. Përkrahja që unë i kam dhënë dhe vazhdoj t’ia jap qeverisjes së Edi Ramës, natyrisht, jo pa asnjë vërejtje, mbështetet në deklarimin politik e shtetëror të tij jo për pushtetin vetjak, siç bënte Sali Berisha, po për Shqipërinë shtet, për ardhmërinë evropiane të Shqipërisë, pa marrë parasysh tagrat politike publike që do të paguajë!
Cilat janë ato vërejtje që keni në qeverisjen e Ramës?
Qosja: E para, reformat e filluara prej tij dhe qeverisë së tij, tepër të rëndësishme për të sotmen, të ardhmen dhe për europianizimin e Shqipërisë, janë më të shpejtuara se ç;mund t’i pranojmë, se ç’mund t’i përligjë njëmendësia e Shqipërisë. Më duket se ai e ka harruar një të vërtetë historike: as revolucionet nuk bëhen shpejt.
E dyta, kriteret në përzgjedhjen e kandidatëve për deputetë nuk më duket se në çdo rast ishin të qëndrueshme.
E treta, këshilltarët e tij politikë nga Kosova ishin pafatshëm të zgjedhur.
E opozita, ç’thotë opozita?
Opozita sot po i qet në shpinë Edi Ramës plot vagona me plot gënjeshtra! E kuptueshme! Intelektualët me mendje sipërore si Edi Rama e Rexhep Meidani në politikën ballkanike pashmangshëm ngarkohen me gurë e kusur!
A është koha, sipas jush, që brenda kornizave të ligjit, të korruptuarve t’u sekuestrohen pasuritë; ndërkohë që nuk po ndodh kjo, por po varfërohen të varfërit?
Qosja: Korrupsioni është njëra prej të këqijave më të mëdha, më dëmsjellëse në jetën shoqërore, në procesin e demokracisë dhe në ndërtimin modern të dy shteteve shqiptare.
Në këtë temë, Shqipëria ka shumë pika kontakti me Kosovën, apo jo?
Qosja: Korrupsioni po lulëzon si në Shqipëri ashtu edhe në Kosovë, kur e kur e ku e ku po lulëzon edhe në bashkëpunim mes grupeve a institucioneve të Shqipërisë shtetërore dhe të Kosovës. Më pyetni a është koha që t’u sekuestrohet pasuria të korruptuarve? Koha është, natyrisht, por pasuria të korruptuarve as nuk po u merret as nuk do t’u merret! Në Kosovë po bëhet një e quajtur luftë, por luftë e shtirë, kundër korrupsionit. Me një gjuhë gjoja të vendosur, në të vërtetë të rrejshme, po mbulohet, po maskohet korrupsioni. Po burgosen mësues, infermierë, pylltarë, rojtarë, pse kanë marrë 50 a 100 euro mito, por me asgjë nuk po trazohen zhvatësit e pasurive të Kosovës, milionerët e pasuruar për një vit, për pesë vjet a për dhjetë vjet. Pasuria e tyre e vjedhur, e plaçkitur prej Kosovës nuk do të sekuestrohet, nuk do të nacionalizohet, pa u miratuar ligji për hulumtimin e pasurisë së të pasuruarve – prej disave pas çlirimit të Kosovës e prej disave në kohën e Millosheviqit, mes të cilëve është edhe familja e Ibrahim Rugovës. Sipas mendimit tim, pa miratimin e ligjit për hulumtimin e pasurisë korrupsioni nuk do të mund të parandalohet as në Kosovë e as në Shqipëri.
Z. Qosja, pse duan (dhe vazhdojnë) të ikin shqiptarët?
Qosja: Shqiptarët po ikin prej vendit të vet për disa arsye: për shkak të varfërisë; për shkak të të këqijave politike e shoqërore, që përmes administratës e institucioneve të tij të ndryshme pushteti po u shkakton qytetarëve; për shkak të dëshpërimeve të tjera të ndryshme në pushtetin prej të cilit kanë pritur shumë pas rënies së komunizmit; për shkak të padrejtësive të veçanta që po u bëhen atyre që ikin; dhe për shkak se pushteti, tani fshehurazi, e nxit këtë ikje të shqiptarëve në vendet evropiane dhe në kontinente të tjera dhe e nxit për shkak të devizave që do të çojnë në Kosovë si dhe për shkak të shpëtimit prej të pakënaqurve!
Ju njiheni si një nga kontestuesit e mëdhenj të Sali Berishës. Çfarë përfaqëson në memorien tuaj ky emër aktualisht?
Qosja: Dua të jetë e qartë: Rexhep Qosja nuk është kontestues i Sali Berishës si intelektual, si mjek, si njeri. Jo. Unë e respektoj si intelektual që, më kanë thënë, lexon shumë, si intelektual që, megjithatë, e flet me kujdes gjuhën standarde, si mjek specialist i aftë për trajtimin e sëmundjeve për të cilat është i specializuar. Por unë e kontestoj politikën e tij prej vitit të parë të ngritjes në politikë dhe e kontestoj për shkak të bolshevizmit të tij, për shkak të popullizmit të tij, për shkak të bashkëdyzimit të bolshevizmit dhe fashizmit në atë politikë, për shkak të vrazhdësisë së pamatshme në atë politikë, për shkak të diskursit të tij sheshelian, ndotës, politik, për shkak të dëmit që me atë politikë i ka bërë Shqipërisë e , kur e kur, edhe Kosovës. Edhe tani kur s’është më kryetar i Partisë Demokratike ai po i sjell dëme jo vetëm politike Shqipërisë përmes ujarit të tij politik, Lulzim Bashës, i cili, si po shihet, nuk ka dëgjuar as mësuar kurrkund për kategorinë e quajtur masë morale dhe estetike. Po të dinte gjë për masën, për këtë vlerë prej Greqisë antike e deri sot, ai nuk do të gënjente aq hardallshëm saqë me ato gënjeshtra të tij propagandistike, me të cilat synon të komprometojë qeverisjen Rama-Meta, në të vërtetë po i shkakton havari partisë së tij, të cilën po e çdejton, çka u pa edhe në zgjedhjet e 21 qershorit. Në kujtesën time ai, Sali Berisha, është shënuar si fatkeqësi politike e shtetërore e Shqipërisë.
A besoni se Berisha do ndëshkohet ndonjëherë për krimet e tij të çdo natyre: penale, ekonomike, kombëtare…?
Qosja: Nuk besoj se do të ndëshkohet ndonjëherë.
Kjo çështje shënohet nga elektorati si premtim i parealizuar i këtij kryeministri: jo se ai duhet të bëhet prokuror a gjykatës, po pse nuk ka krye asnjë denoncim…!
Qosja: Mjerisht, Shqipëria vazhdon të jetë e përçarë jo vetëm në pikëpamje politike. Prokuroria e Shqipërisë, pas formimit të Qeverisë Rama-Meta, kishte mundësinë të nxirrte një varg delikuentësh shtetërorë në gjyq, përpos të tjerësh, edhe yshtësit e vrasjes së katër protestuesve në vitin 2011, por qeveria nuk e lejoi këtë. Dhe, nuk e lejoi ndoshta për shkak të drojës prej ngritjes në revolta të PD-së, që Sali Berisha do ta sundojë gjatë me evetefendinjët e tij!
Reforma në sistemin e drejtësisë në Shqipëri është kyçe dhe madje e vonuar. Ju besoni se kjo reformë do të bëhet?
Qosja: Gjyqësori në përgjithësi, në Shqipërinë shtetërore dhe në Kosovë, është tmerrësisht i korruptuar dhe kjo do të thotë i pamoralshëm politikisht dhe juridikisht. Edhe faktorët ndërkombëtarë po bëjnë trysni që reforma e gjyqësorit në Shqipëri të bëhet sa më parë. Besoj se kjo reformë do të bëhet në Shqipëri, por kam drojë se, për shkak të rezistencës që po i bëhet qoftë prej gjyqësorit, qoftë prej PD-së, kjo reformë do të jetë sipërfaqësore. Si e tillë ajo nuk do të sjellë shërimin e sistemit të drejtësisë në Shqipëri. Në Kosovë, fatkeqësisht, gati se nuk po flitet për reformë të sistemit të drejtësisë. Si të flitet? Sistemi i drejtësisë në Kosovë formalisht është perëndimor, por thelbësisht vazhdon të jetë vetëqeverisës jugosllav. Ja një shembull. Para do kohe, kur flitej për korrupsionin edhe të kryeministrit të tanishëm, doli prokurori i Kosovës në një televizion dhe pa e pyetur kush deklaroi: prokuroria po heton për korrupsion disa ministra, por jo edhe kryeministrin! Ishte kjo sjellje tipike e prokurorive të kohës së Jugosllavisë komuniste vetëqeverisesë. Edhe lëndët në gjyqësor këtu përzgjidhen për trajtim në mënyrë selektive – siç duan gjykatësit e gjykatëset dhe këtë seleksion të tyre e përcaktojnë përkatësitë e shkallët politike të akuzuesve e të të akuzuarve, lidhjet, afritë, miqësitë, pazaret e të tjera!
Dalim nga trevat tona. Shkrirja e akujve me Serbinë dhe “ristartimi” i marrëdhënieve mes shqiptarëve e serbëve, inkurajuar nga BE-ja është fakt, në këtë aspekt si e vlerësoni Edi Ramën?
Qosja: Marrëdhëniet e shqiptarëve dhe serbëve do të duhej të normalizohen sepse kjo është në interesin e të dy popujve dhe të shteteve të tyre, Kemi arsye, prandaj, të çmojmë nismat e Edi Ramës për normalizimin e këtyre marrëdhënieve. Por, meqenëse shumëçka për këtë normalizim varet prej ndryshimeve në ideologjinë politike të Serbisë ndaj Kosovës e ndaj shqiptarëve, do të doja që politika e Edi Ramës në komunikim me sheshelistët Vuçiq e Nikoliq dhe me Millosheviqianin Daçiq të jetë më e ngadalshme.
Ndërkaq kemi një ngjarje të pazakontë: Kualifikimin e Shqipërisë në kampionatin e ardhshëm evropian të futbollit. Si e keni përjetuar këtë ngjarje? Kemi këtu parasysh edhe debatet shoqëruese…
Qosja: Pse ta quajmë ngjarje të pazakontë kualifikimin e Shqipërisë në kampionatin e ardhshëm evropian të futbollit? Është ditur se një ditë edhe Shqipëria do të marrë pjesë në atë kampionat dhe kjo ditë, ja, erdhi, sivjet. Dhe, ne aty, në atë kampionat, do të tregojmë fuqinë tonë trupore, muskulore, mjeshtërinë tonë futbollistike dhe disa shkathtësi të tjera që prodhon dhe kërkon futbolli. Por, unë do të dëshiroja që në panairet e librit në Gjermani, në Francë e në vende të tjera të tregojmë edhe mendjen tonë krijuese, edhe imagjinatën tonë krijuese, edhe mjeshtërinë tonë artistike në letërsi. Për këtë arsye, prandaj, do të ishte mirë që përpos shpenzimeve që bëjmë për trainerin italian de Biazi, të bëjmë shpenzime edhe për përkthimet e romaneve, tregimeve, dramave, poezive tona në gjuhë të tjera, si, fjala vjen, në gjermanisht, në frëngjisht, në anglisht, në italisht për t’u paraqitur në ato panaire, siç veprojnë sot të gjitha vendet e vogla, prandaj edhe vendet ballkanike. Nuk do të thosha se paraqitjet e këtilla në panaire janë më pak të rëndësishme se paraqitjet në kampionatin evropian të futbollit. Apo jo?
Më ka gëzuar kualifikimi i skuadrës sonë në kampionatin evropian të futbollit, por nuk do të doja që ky gëzim të shprehet me euforinë me të cilën u shpreh. Jam kundërshtar i reagimeve euforike në përgjithësi, i reagimeve euforike ndaj fitoreve. Euforia nuk është cilësi e njerëzve e as e popujve me qëndrueshmëri psikologjike, shoqërore dhe historike. Nuk duhet ta harrojmë një mendim që e kanë shqiptuar njerëz të mençur të popujve me përvoja të mëdha historike: euforia është ndjenjë e zjarrtë, joracionale, që kalon shpejt dhe mbas saj vjen mahmurlluku! Të mos jemi euforikë dhe të mos jemi mahmurr, pra.
Një situatë kaotike kemi në Kosovë. Një bashkëqeverisje të pazakontë midis LDK-së dhe PDK-së. Pse ka ndodhur kjo?
Qosja: Situata në Kosovë nuk është kaotike por mund të bëhet. Për bashkëqeverisjen, unë do të thosha për bashkësundimin e PDK-së dhe LDK-së, në të vërtetë të Hashim Thaçit me Isa Mustafën, vendimmarrës kryesor ishte Hashim Thaçi, kurse këtij vendimi, kontrbut i kanë dhënë edhe tri partitë opozitare të cilat, si po dëgjohet, nuk kanë pranuar të hyjnë në koalicion me PDK-në, konkretisht me Hashim Thaçin.
Në Shqipëri pyesin ende pse duhej ngritur Gjykata Speciale për krimet e luftës? Si e konsideroni ju këtë akt të Kuvendit të Kosovës?
Qosja: Kam shkruar për këtë çështje dhe ai shkrim është botuar edhe në shtypin e Tiranës e është postuar edhe në rrjetet sociale, prandaj e quaj të panevojshme të flas edhe tani për atë çështje.
Si i gjykoni aktet e Vetëvendosjes?
Qosja: E kam thënë edhe me shkrim se nuk pajtohem me disa veprime të Vetëvendosjes, por aty ku e kam thënë këtë mendim kam shtuar se: pa Vetëvendosjen Kosova do të bëhej një bërrakë politike në të cilën do t’i ndodhnin shumë të këqija Kosovës.
Veprimet e sotme të Vetëvendosjes, të Aleancës për Ardhmërinë e Kosovës dhe të Nismës janë të nxitura prej veprimeve politike dhe shtetërore, në të vërtetë kundërshtetërore të Qeverisë në krye me Isa Mustafën. Qeveria e sotme e Kosovës në krye me ish ministrin e qeverisë së Millosheviqit në Kosovë, Isa Mustafën, po e dëshmon demokracinë e saj të rreme duke tradhtuar interesat kombëtare dhe shtetërore të Kosovës. Nuk ka dyshim së autonomia e veçantë e komunave serbe në Veri të Kosovës e cenon fort sovranitetin e Kosovës. Kjo autonomi bëhet rrezik për ardhmërinë e Kosovës shtet.
Me marrëveshjen për demarkacionin me Malin e Zi, lehtë e shpejt i falen Malit të Zi disa mijëra hektarë tokë të Kosovës. Me njohjen e sovranitetit të Malit të Zi mbi këtë tokë Kosova cenohet në pikëpamje territoriale dhe në pikëpamje gjeostrategjike. Mund të thuhet kështu në radhë të parë sepse ajo është tokë që shtrihet nën vijën më të lartë të bjeshkëve që ndajnë natyrshëm Kosovën prej Malit të Zi.
Opozita vendosmërisht po kërkon të tërhiqet nënshkrimi prej atyre dy marrëveshjeve, që dëmtojnë rëndë Kosovën. Kryeministri i Kosovës vendosmërisht po mohon gatishmërinë që ta tërheqë nënshkrimin e tij.
Ky mospajtim thelbësor Opozitë-Qeveri ka sjellë bllokimin e punës së Kuvendit të Kosovës tani e një muaj.
Kjo gjendje s’mund të vazhdojë gjatë si e tillë. Arrestimi i disa protestuesve, kërcënimet për denoncimin e deputetit Albin Kurti e të deputetes , Albulena Haxhiu, për vepër penale pse kanë qitur gaz lotsjellës në Kuvend i përkeqësojnë edhe më tej marrëdhëniet mes Qeverisë dhe Opozitës. Mund të merret me mend se sa do të ashpërsohen këto marrëdhënie në qoftë se ngrihen denoncime edhe kundër dy deputetëve të Opozitës që hodhën gaz lotsjellës në Kuvend të enjten, më 15 tetor: kundër deputetes Donika Kada Bujupi dhe kundër deputetit Faton Topalli.
Nuk ka dyshim se Kosova po përjeton edhe një krizë të rëndë politike që ka drojë të bëhet konflikt shoqëror! Ky konflikt mund të ketë pasoja në trajtimin e shtetit të Kosovës nga ana e faktorëve ndërkombëtarë, para së gjithash nga BE dhe SHBA.
Rrugëdaljen e sigurt e shoh në mbajtjen e referendumit për deklarimin e popullit për ato dy marrëveshje.
Do të ishte shumë tragjike për Kosovën në qoftë se faktorët ndërkombëtarë lejojnë që të përdoret dhuna shtetërore për ta nënshtruar Opozitën e panënshtrueshme.
Keni bërë një status në facebook muajin shtator, ku evokoni revolucionin francez. Jemi kuriozë të na zgjeronit tekstin e atij shënimi…
Qosja: Është fjala për një mendim të poetit të madh francëz, Lamartinit, që e kam përdorur si moto në librin tim Shqipëria dhe Kosova – si janë dhe si do të duhej të jenë. Nuk është hera e parë që atë mendim të Lamartinit të botuar si moto në librin tim të tjerët e botojnë apo e japin në portalet informative. Dhe, mirë e bëjnë. E vlen të lexohet më shpesh, sidomos prej atyre që bëjnë politikën. Le ta lexojnë edhe njëherë këtu:
Në qoftë se arrin që prej një kombi qytetarësh të bëjë shoqëri të turpshme gënjeshtarësh; në qoftë se e bën atdheun të skuqet për shkak të këqijave zyrtare; në qoftë se lejon që të fundosemi në tragjedi të vërteta të korrupsionit; në qoftë se lejon që pandershmëria e pushtetit shtetëror të pikëllojë dhe poshtërojë kombin dhe pasardhësit – ky pushtet, të jeni të sigurt, do të përmbyset. Dhe, do të përmbyset jo në gjakun e vet, si ai i vitit 1789, po në kurthin e vet. Dhe, meqenëse keni pasur revolucionet e lirisë dhe kundërrevolucionet e famës, tani do të keni revolucionin e ndërgjegjes dhe revolucionin e përbuzjes.
Një pyetje e fundit zoti Qosja: A zgjedh populli gabim apo të zgjedhurit tradhtojnë popullin?
Qosja: Ndodhin të dyja këto të këqija. Historia është përplot shembuj që tregojnë se sa gabimisht mund të zgjedh populli. Nuk është thënë rastësisht pas Revolucionit të Madh Francez: populli është forcë pa sy! Gjermanët – popull me qytetërim e kulturë të pasur, me tradita shtetërore të gjata, në vitin 1933 do të zgjedhin Hitlerin kancelar të Gjermanisë. E Hitleri do të bëhet tragjedia më e madhe e popullit gjerman në gjithë historinë e tij.
Italianët – popull me tradita mijavjeçare shtetërore, qytetëruese dhe kulturore në vitin 1922 do të pajtohen me emërimin e Musolinit kryeministër i Italisë nga mbreti. Dhe, ai do të bëhet tragjedia më e madhe në historinë e shtetit italian dhe të popullit italian.
Është tepër shqetësuese sesa lehtë i ka gëlltitur Kosova karrierat politike të Isa Mustafës në kohën e komunizmit, pas komunizmit dhe gjatë e pas luftës së UÇK-së!
Është tepër shqetësuese sesa lehtë e pamenduar janë zgjedhur deputetë të Kosovës disa individë që shihen në Kuvendin e Kosovës.
Gjermanët, francezët, italianët, anglezët e popuj të tjerë evropianë mund të mos jenë më forcë pa sy, por ne, si po shihet, jemi ende!
Deri kur?
