Partia Demokratike e Kosovës(PDK) në Prizren, ka humbur besimin se mund të shpallet i pafajshëm kryetari i Komunës Ramadan Muja nga Gjykata e Apelit. Ky subjekt politik ka filluar të mendojë për zgjedhje të jashtëzakonshëm.

Burimet e ‘PrizrenPress’-it bëjnë të ditur se Kryesia e PDK-së në Prishtinë ka filluar të interesohet për gjetjen e një emri të ri të kandidatit për kryetar të Prizrenit.

“Jemi duke shikuar mundësin e gjetjes së një emri të ri për kandidat të mundshëm për kryetar të Prizrenit, nëse Gjykata e Apelit konfirmon dënimin për Ramadan Mujën”, tregon burimi brenda PDK-së në Prishtinë.

Në muajin qershor do të rikthehet në gjykatë kryetari i Komunës së Prizrenit, Ramadan Muja. Gjykata e Apelit më në fund ka arritur të caktonte nisjen e shqyrtimit të ankesës së mbrojtjes së Mujës, që e kishin bërë për vendimin e shkallës së parë.

Në mars të 2014-s, kryetari Muja qe dënuar me 2 vjet burgim me kusht, për veprën penale – keqpërdorim të detyrës zyrtare. Mujës, nga tabori i PDK-së, i ishte ndaluar edhe ushtrimi i funksioneve publike 30 muaj. Por, për krejt këto dhe në fakt anulimin e vendimit të shkallës së parë, ishte ankuar kryetari i Prizrenit, çfarë e ka shtyrë vendimin që të bëhej i plotfuqishëm, rrjedhimisht edhe shtyrjen e zgjedhjeve në qytetin e dytë më të madh të Kosovës.

Me kusht në këtë proces janë dënuar edhe 5 zyrtarë të tjerë të Komunës së Prizrenit. Vonesat në caktim të kësaj seance ishin shkaktuar për shkak të mosfunksionimit të Këshillit Gjyqësor të Kosovës gjatë kohës së bllokadës institucionale.

Pavarësisht verdiktit final të Gjykatës së Apelit, PDK-ja nuk dëshiron që të përcaktohet në momentin e fundit për kandidatin për kryetar të Prizrenit.

“Sigurisht që ne besojmë në pafajësinë e Ramadan Mujës, mirëpo nuk guxojmë që ky besim të na përmiell deri në vendimin final të gjykatës, pasi që nëse ndodhë e kundërta nuk kemi kohë për t’u përcaktuar për emrin tjetër të kandidatit për kryetar të Prizrenit ”,tregon burimi për “PrizrenPress”.

Sipas të njëjtit burim, PDK-ja po e shikon mundësin që të përcaktohet për një emër , i cili do të ruante fitoren në Prizren.

“Sigurisht që nëse shkohet në zgjedhje të jashtëzakonshme ne përcaktohemi për emrin që do të ruante pa problem fitoren e PDK-së në Prizren”./PrizrenPress.com/

Komisioni për të Drejtat e Njeriut, Barazi Gjinore, Persona të Pagjetur e Peticione kërkon që çështja e të zhdukurve të diskutohet më shpejtë në takimet e dialogut Kosovë-Serbi. Ky komision planifikon të nxjerrë disa rekomandime që pastaj pritet të procedohen në Kuvend, ku tema e të zhdukurve në dialogun Prishtinë-Beograd, mendohet të radhitet në rekomandimin e parë.

Brenda shtatë ditësh, komisioni planifikon të ftojë në takim shefin e mjekësisë ligjore, Arsim Gërxhaliun dhe kryesuesin e Komisionit Qeveritar për Persona të Pagjetur, Prenk Gjetaj, më të cilat synojnë t’i diskutojnë disa çështja, përpara se të nxjerrin një rekomandim. Një prej rekomandimeve që pritet t’i nxjerrë ky komision është edhe kërkesa nga Qeveria e Kosovës, që të raportojë çdo gjashtë muaj për bisedimet me Serbinë lidhur me zbardhjen e fatit te të pagjeturve.

Anëtarja e komisionit, nga radhët e AAK-së, Teuta Haxhiu, tha se duket kërkuar që në takimin e parë që do të mbajë Kosova me Serbinë, të shtrohet çështja e zbardhjes së fatit te të zhdukurve.

Ajo tha se duhet ftuar edhe drejtorin e Mjekësisë Ligjore, Arsim Gërxhaliun dhe kryesuesin e Komisionit Qeveritar për Persona të Pagjetur, Prenk Gjetaj, që të përballen ne mbledhjen e radhës së komisionit. E më pas të dalin me rekomandime.

Anëtarët e komisionit, në mbledhjen e sotme, diskutuan për t’i dhënë një afat kohor qeverisë që të raportojë për dialogun me Serbinë lidhur me çështjen e të zhdukurve. Sipas tyre, është mirë të raportohet çdo gjashtë muaj.

Grupi punues i Komisionit për të Drejtat e Njeriut, Barazi gjinore, Persona të Pagjetur e Peticione, i përbërë nga Mexhide Topalli, Mytaher Haskuka dhe Kujtim Paçaku, kanë hartuar një raport me rekomandime lidhur me shqyrtimin e peticionit të qytetarëve të Rahovecit, për ndriçimin e fatit të Ukshin Hotit.

Përmes tij, kërkojnë delegacioni kosovar në bisedimet me Serbinë, rastin e Ukshin Hotit, ta trajtojnë si të veçantë. Gjithashtu, kërkojnë që institucionet e Kosovës të angazhohen më shumë që Bashkimi evropian, si ndërmjetësues në dialogun Kosovë-Serbi, të ushtrojë trysni mbi Beogradin në mënyrë që këta të fundit të jenë më bashkëpunues në zbardhjen e fatit të Ukshin Hottit dhe të zhdukurve të tjerë. Ata kërkojnë që Qeveria e Kosovës të ndaj fonde dhe të mbështesë Departamentin e Mjekësisë Ligjore në procesin e zhvarrimit dhe të identifikimit të mbetjeve mortore.

Ani pse peticioni që paraqiti grupi punes i kishte plotësuar kushtet formale, ai nuk u arritë të shqyrtohet në tërësi në mbledhjen e sotme.

Pika e tretë nuk gjeti mbështetjen e anëtarëve tjerë të komisionit.

Anëtarët e komisionit nuk dëshirojë që të trajtojnë ndryshe nga rastet e tjera të zhdukura, atë të Ukshin Hotit.

Pritet që së shpejti të mbahet një seancë parlamentare, e veçantë për çështjen e personave të zhdukur, ku komisioni do t’i adresojë rekomandimet e veta./Politiko/

Në organizim të OJQ “EC Ma Ndryshe” në Prizren sot është mbajtur tryeza e diskutimit “Ekspeditiviteti i gjyqësorit kundruall rasteve të zyrtarëve publik”, konkretisht që kishte të bënte edhe me rastin e kryetarit të Prizrenit, Ramadan Muja.Panelistë të kësaj tryeze: Ymer Berisha, zyrtar komunal për informim, Arbër Rexhaj nga Lëvizja Vetëvendosje në Prizren dhe Ismet Kryeziu, drejtor ekzekutiv i Institutit Demokratik i Kosovës (KDI).

Lidhur me temën e kësaj tryeze, i pari ka folur zyrtari komunal për informim, Ymer Berisha, i cili tha se komuna e Prizrenit rrespekton në tërësi të gjitha obligimet ligjore për plasimin e vendimmarrjes, ndërsa rolin e gjyqësorit e vlerësoi në shërbim të demokracisë, ndërsa rreth rastit Muja, tha se deri sa nuk merret verdikti final i të gjitha instancave të drejtësisë, kryetari nuk është fajtor. Por , ndryshe nga zyrtari Berisha, ka shprehur qendrimet e tij drejtori ekzekutiv i KDI-së, Ismet Kryeziu, i cili tha se gjyqesori në Kosovë ka një integritet të dobët në funksion të qeverisjes së mirë, duke numëruar skandale në Prokurorinë e Shtetit, Këshillin Gjyqësor dhe zvarritjen e procesit nga Gjykata Supreme ndaj çështjes së Ramadan Mujës. Ai tha se organet e drejtësisë janë të ndikuara nga politika dhe struktura kriminale, dhe së për këto dhe çështje të tjera, nuk gëzojnë besueshmëri nga qytetarët.

Ndërkaq, panelisti tjetër, Arbër Rexhaj, këshilltar i LVV-së në Kuvendin e Prizrenit, tha se pas dënimit të Ramadan Mujës nga Gjykata, ai e ka humbur autoritetin moral, ndërsa shtoi se komuna e Prizreni është kampione e shkeljeve ligjore në mbarë vendin. Qëllimi i mbajtjes së kësaj tryeze nga organizatorët kishte të bënte me faktin se në muajin mars është bërë një vit që prej se Gjykata Themelore e Prizrenit ka shpallur aktgjykimin fajësues ndaj kryetarit të komunës së Prizrenit. Ndonëse kanë kaluar një vit ankesa e mbrojtjes së kryetarit të Prizrenit ende nuk është shqyrtuar në Gjykatën e Apelit.

Në anën tjetër organet e drejtësisë vazhdimisht kanë theksuar se rastet korruptive dhe të abuzimit me detyrën zyrtare janë prioritare për shqyrtim. Por tashmë janë mbushur dy vjet që prej se organet e drejtësisë merren me rastin e kryetarit të Prizrenit dhe çështja ende nuk është përmbyllur. Kjo tryezë, thanë më tej organizatorët , është një përpjekje për të diskutuar mbi rreziqet që i kanosen integritetit të institucionit të kryetarit të komunës dhe parimit të qeverisjes së mirë në nivel lokal nga zyrtarët publik që ballafaqohen me procese gjyqësore, që marrin kohë për t’u zgjidhur. Gjatë diskutimeve të tryezës, janë analizuar mundësitë për masat që mund të ndërmerren për rritjen e efikasitetit të gjyqësorit në trajtimin e rasteve të zyrtarëve publik që kanë problem me ligjin./TV Prizreni/