Mësimdhënësit e Rahovecit, kanë shprehur përsëri pakënaqësinë e tyre me konkursin e rishpallur nga Drejtoria e Arsimit të kësaj komune.

Sipas tyre, edhe konkursi i ri-shpallur ka shkelje ligjore. Drejtoria e arsimit, thotë se konkursi është rishpallur ashtu siç ka kërkuar inspektorati i arsimit, ndërkohë Sindikata e Arsimit ka të drejtë të mbrojë vetëm mësimdhënësit që janë anëtarë të Sindikatës.

Mësimdhënësit e Komunës së Rahovecit: Esheref Haxhiu, Afrim Oruqi, Vjosa Sylka, Rasim Dula, Shkëndije Popaj, Liridon Gashi, Beslim Makshana dhe Blerina Krasniqi, janë të pakënaqur me ri-shpalljen e konkursit nga Drejtoria e Arsimit, për arsye që siç thonë, ka shkelje ligjore. Mësimdhënësi Eshref Haxhiu, tha për Radio Kosovën, se rishpallja e konkursit është në kundërshtim me disa nene të udhëzimit administrativ.  Sipas tij, kjo është bërë për arsye se duan të punësojnë njerëz familjarë dhe partiak.

“Neni 3, ku thotë se profesorëve për mbi tre vjet përvojë pune nuk duhet tu shpallet konkursi dhe shumë pika të tjera të udhëzimit administrativ. Arsyeja e parë është për të larguar disa njerëz, sipas tyre të papërshtatshëm dhe arsyeja e dytë është për të sjellë njerëzit e vet. Gjasa është që ne për 90 për qind do të diskriminohemi prapë. Vetëm po aplikojmë, që nesër mos të na thonë që s’keni aplikuar,” tha Haxhiu.

Ai bëri të ditur se u kanë dërguar letër 10 institucioneve, prej të cilave kanë kërkuar të konfirmojnë nëse rishpallja është në përputhje me ligjin. Por, deri tani kanë marrë përgjigje vetëm nga inspektorati i punës, që ka konstatuar disa shkelje të ligjit të punës. Ndërkohë, Azem Guri, këshilltar i ministrit në detyrë të arsimit, Ramë Buja, tha se për këtë rast ka marrë një shkresë nga sindikata e arsimit, por vetëm për dy mësimdhënës.

Kryetari i Sindikatës së Arsimit, Rrahman Jasharaj, tha për Radio Kosovën, se kanë pranuar ankesën e mësimdhënësve, por në këtë rast Sindikata është e obliguar me ligj të mbrojë vetëm mësimdhënësit që janë anëtarë të Sindikatës.

“I kemi konsultuar shënimet tona, kemi intervenuar në MASHT vetëm për dy mësimdhënës që janë anëtarë të SBASH-ut. Jo që nuk duam për ata tjerët, por nuk kemi të drejtë,” shprehet Jasharaj.

Drejtori i Drejtorisë së Arsimit në Komunën e Rahovecit, Behar Rama, tha për Radion, se konkursi është rishpallur ashtu siç është kërkuar nga inspektorati i arsimit.

“Inspektorati i arsimit ka sjellë vendimin që të rishpallet konkursi, për atë ku ka pasur disa gabime procedurale dhe ne i kemi dëgjuar rekomandimet dhe kemi rishpallur konkursin.”

Megjithatë, mësimdhënësit kanë paralajmëruar institucionet përkatëse, se nëse nuk e zgjedhin problemin e tyre, ata do të dorëzojnë dokumentacionin e të gjitha shkeljeve në EULEX, ambasadat e huaja, si dhe organizatat e tjera ndërkombëtare për mbrojtjen e të drejtave dhe lirive të njeriut.

Parlamenti Studentor i Universitetit “Ukshin Hoti” në Prizren, kërkon anulimin e konkursit të nivelit Mastër në Fakultetin e Shkencave Kompjuterike.

Kryetari i PS-së, Nehat Gashi thotë se shumë studentë kanë ankesa rreth këtij konkursi.

“Pas ankesave të shumta të pranuara nga ana e Studentëve të Fakultetit të Shkencave Kompjuterike që kanë përfunduar studimet themelore në UPZ, dhe pasi që kemi vërejtur që janë bërë shkelje të rënda të Konkursit publik dhe Statutit të UPZ-së. Kërkojmë nga Senati i Universitetit “Ukshin Hoti” në Prizren të bënë anulimin e provimit pranues të organizuar më 17.10.2014, me kandidatët për studentë në nivelin Mastër në Fakultetin e Shkencave Kompjuterike”, thotë Gashi.

Kërkesa e plotë e Parlamentit të Studentëve

Përmes konkursit publik të shpallur me 7.10.2014, studentët ishin njoftuar me kushtet për pranim në Nivelin Mastër, si në vijim:
“KUSHTET E PËRBASHKËTA TË KONKURSIT
Në studimet pasdiplomike – Master do të pranohen kandidatët të cilët i kanë përfunduar studimet Bachelor apo ato para hyrjes në fuqi të Deklaratës së Bolonjës në fakultetet përkatëse të Universitetit Publik të Prizrenit “Ukshin Hoti” apo të Universiteteve tjera, e që kanë kanë arritur notën mesatare 7.50 e më lart. Përzgjedhja e këtyre kandidatëve bëhet sipas ranglistës prioritare të notës mesatare të arritur gjatë studimeve.
Në rast kur numri i kandidatëve është më i vogël se numri i paraparë me konkurs, atëherë mund të pranohen edhe kandidatë me notë mesatare më të ulët se 7.50, por ata do t’i nënshtrohen provimit pranues të përgatitur nga Komisioni i Studimeve i njësisë akademike.”

Ndërsa më datën 15.10.2014, pas mbylljes së konkursit, në orët e vona të mbrëmjes, pas një “vendimi” të Dekanit të Fakultetit të Shkencave Kompjuterike, kandidatët ishin njoftuar përmes uebfaqes se do të mbahet provim pranues me të gjithë kandidatët, teksti si në vijim:
“NJOFTIM
I njoftojmë të gjithë studentët e paraqitur për studimet master në FSHK, se të gjithë kandidatet e interesuar do ti nënshtrohen provimit pranues, pa marre parasysh notën mesatare, pasi që ka numër të madh të të paraqiturve me nota mesatare shumë të përafërta.
Data dhe koha e mbajtjes së provimit mbetet sipas konkursit të shpallur.
DEKANATI”
Më ketë rast, me gjithë shkeljet e bëra, koha ka qenë shumë e shkurtër e njoftimit dhe kanë munguar kriteret e çarta të mbajtjes së provimit pranues, gjithashtu mënyra e vlerësimit nuk është e qartë dhe arsyeshmëria nuk është objektive, që lënë hapësirë për manipulim me listën e të pranuarve.
Përmes këtij vendimi, Dekani i Fakultetit të Shkencave Kompjuterike ka bërë shkeljen të rëndë të institucionit të Konkursit për pranimin e studentëve në nivelin Mastër dhe ka bërë shkelje të rëndë të Statutit të Universitetit.

Dekani gjithashtu ka tejkaluar kompetencat dhe autorizimeve të tij ngase Kriteret për pranim të Studentëve caktohen nga ana e Senatit të Universitetit, shih nenin nenin 47 pika 1.3. dhe nenin 48 pikën 1.11, pikën 1.18.

Kësisoj, vendimi për organizimin e provimit pranues me kandidatët e nivelit Mastër dhe organizimi i provimit pranues është në kundërshtim të plotë me Konkursin publik dhe me Statutin e Universitetit, dhe si i tillë është i kundërligjshëm.

Andaj, kërkojmë nga ana e Senatit të UPZ—së që të anuloj mbajtjen e provimit pranues dhe të kërkojë nga ana e Fakultetit të Shkencave Kompjuterike që të procedojë me listën e studentëve të pranues në nivelin Mastër në këtë fakultet në bazë të Konkursit publik dhe Statutit të Universitetit, Ligjit për Arsim të Lartë dhe udhëzime administrative përkatëse të Ministrisë së Arsimit, të Shkencës dhe të Teknologjisë.
Një vendim i tillë i Senatit do të ishte preventivë për mos lejimin e dështimit të studimeve në nivelin Master në FSHK ngase shumë kandidatë pritet që të ankimohen në instanca më të larta dhe në organet e drejtësisë, që mund të shkaktojë anulimin e Konkursit komplet pas një kohe dhe kësisoj do të ju humb një vit studentëve për shkak të shkeljeve të bëra.

Gjithashtu Kërkojmë nga Rektori dhe Senati që t’i shqiptojë masë disiplinore, rishqyrtimin e pozicionit të tij, Dekanit të Fakultetit të Shkencave Kompjuterike për shkeljen e Konkursit dhe të vendimit të Senatit të bërë dhe për tejkalimin e kompetencave dhe autorizimeve dhe për formën e veprimit jashtë çdo rregulli, kriteri dhe procedure zyrtare ligjore.
Me respekt,
Nehat Gashi,
Kryetar i Parlamentit Studentor të Universitetit “Ukshin Hoti” në Prizren

Universitetit të Prizrenit “Ukshin Hoti” nuk i ka mjaftuar as përgjigjja e dytë e Ministrisë së Arsimit, e cila ka rekomanduar që të respektohet Statuti i Universitetit dhe Ligji mbi arsimin e lartë në garën për rektor, shkruan Koha Ditore.

Këtë përgjigje, Universiteti e ka marrë më shumë se një javë, mirëpo ende nuk i ka ftuar kandidatët në intervistë.

Në këtë garë janë tetë kandidatë: Lirak Karjagdiu, Isuf Musliu, Gani Gjini, Florije Govori-Fejzullahu, Fahredin Shabani, Ramë Vataj, Nagip Skenderi, si dhe Kadri Kryeziu.

Ndër ta, ngërçi aludon te kandidati Kadri Kryeziu, i cili ka titullin “profesor-asistent” dhe jo “profesor i asocuar” apo “profesor i rregullt” siç parashihet me Statutin e UPz-së. Ai është edhe anëtar i Gjykatës Kushtetuese të Kosovës.

Për këta, para një muaji ishte shtruar kërkesa nga një pjesë e Këshillit që të hiqet kjo dispozitë dhe të mos zgjidhet rektori vetëm nga radhët e profesorëve të rregullt e të asocuar. Kjo kërkesë i është dërguar MASHT-it më 16 shtator. Ndërkaq, përgjigja e Ministrisë në të dyja herët ka qenë që të respektohet Statuti i Universitetit, si dhe Ligji mbi arsimin e lartë.

Drojën për dështim të konkursit e kanë shprehur Parlamenti i Studentëve në këtë universitet.

Fituesja e edicioni të dhjetë të çmimit “Muslim Mulliqi”, artistja Flaka Haliti, hapi të premten ekspozitën e saj të parë personale në Kosovë, të titulluar “Herën e fundit kur t’kam Google ty, je dukë ndryshe”, me kurator austriakun Marcus Miessen.

Ekspozita përmbante nota autobiografike, që kanë luajtur rol në zhvillimin e artistes në nivel lokal dhe ndërkombëtar. Ndryshe, shtatë veprat e prezantuara bëjnë pjesë në atë që quhet post-internet art, apo arti që reflekton ndryshimet shoqërore të shkaktuara nga përdorimi i gjerë i internetit, raporton KosovaLive.

Drejtori i Galerisë Kombëtare të Kosovës, gjatë hapjes së ekspozitës tha se përkundër faktit që vepra e Halitit merr zanafillë në Kosovë, gjatë procesit të përpunimit, ajo zbërthehet në tema gloale.

“Galeria Kombëtare ka kënaqësinë që pas gjitha sukseseve të Flaka Halitit dy viteve të fundit në skenën ndërkombëtare, që të ekspozojë në Galerinë Kombëtare, ku do të prezantojmë shtatë projekte të saj. Flaka Haliti nuk ishte vetëm fituese e edicionit të dhjetë të çmimit ‘Muslim Mulliqi’, por këto dy vite Flaka Haliti mori disa shpërblime, përfshirë këtu çmimin e Sallonit të Tetorit në Beograd dhe ai i Henkel në Austri”, tha Shkololli.

Ekspozita që do të qëndrojë e hapur deri më 17 nëntor është multimediale dhe përfshin fotografi, skulptura, instalacione e video. Ekspozita përmban shtatë projekte të Halitit, kryesisht të viteve të fundit, përpos njërit që i takon vitit 2007.

“Duhet ta falënderoj kuratorin Marcus Meisser me të cilin kam punuar gjatë këtyre shumë muajve. Meqenëse një pjesë e ekspozitës udhëton prej Muzeut të Artit në Vjenë, Mumok, më duhet t’i falënderoj ata për krejt përkrahjen që e kanë dhënë për krejt transportin dhe anën financiare, duke përfshirë këtu edhe Hankel Art Award, i cili ka qenë çmim që i bashkëngjitet krejt kësaj ngjarje në 2013/2014”, ka thënë Haliti.

Ndryshe, artistja e lindur në Prishtinë kryesisht merret me vepra me tematikë shoqërore. Sukseset e saj dy vitet e fundit përfshijnë ekspozitën e saj “Unë shoh një fytyrë. A sheh ti një fytyrë” në muzeun Mumok të Vienës dhe çmimin Henkel Art Award në vitin 2013, si dhe çmimi Muslim Mulliqi 2014 nga Galeria e Arteve të Kosovës.