Policia e Kosovës, me anë të një komunikate për media, ka njoftuar se, në komunën e Rahovecit gjatë 24 orëve të fundit është raportuar për një aksident trafiku, ku janë përfshirë tri vetura civile.

Aksidenti ka ndodhur të ënjtën rreth orës 09:55, në fshatin Pastasel të komunës së Rahovecit.
“Fshati Pastasel, Rahovec – 16.10.2014 – 09:55. Raportohet se ka ndodhur aksident trafiku në mes të tri veturave civile.

Deri tek aksidenti ka ardhur ku i dyshuari mashkull K-Shqiptar duke lëvizur me veturën Citroen duke mos e përshtatur shpejtësinë e lëvizjes me kushtet e rrugës humb kontrollin dhe ndeshet me veturën tjetër VW Cady me ngasës viktimën mashkull K-Shqiptar e më pas edhe me veturën e tretë Golf II me ngasës viktimën mashkull K-Shqiptar. Si pasojë e aksidentit përveç dëmeve materiale, lëndime trupore kanë pësuar tre ngasësit dhe katër pasagjer dy meshkuj dhe dy femra K-Shqiptare, të cilat kanë pranuar tretmanin mjekësor”, thuhet në raportin e Policisë së Kosovës për komunën e Rahovecit.

Nga gjithë ata huliganë që hynë në stadiumin e Partizanit të Beogradit për t’i sulmuar futbollistët shqiptarë, vetëm një prej tyre është dënuar, duke u gjobitur me të holla.

Huliganët serbë hynë në fushë për t’i sulmuar futbollistët shqiptarë gjatë ndeshjes së ndërprerë kundër Serbisë në stadiumin e Partizanit të Beogradit.

Por, sa do që tingëllon e pabesueshme, është i vërtetë fakti se vetëm një prej tyre është dënuar, dhe atë në formë të gjobës me të holla, raporton portali serb “Alo”.

I famshmi Ivan Bogdanov nuk u mor fare në pyetje pse hyri në fushë në momentet e përleshjes.

Ndërsa, kryetari i gjykatës për kundërvajtje, Milan Marinovic, thotë se në pyetje është procedura e shkurtër, por që policia ka paralajmëruar se do t’i dorëzojë tetë padi.

“Djaloshi që është gjykuar tashmë e ka bërë pagesën. Kur janë në pyetje paditë tjera, të cilat i presim nga policia, shumica prej tyre kanë të bëjnë me mungesën e dokumentacionit personal dhe për posedimit të mjeteve piroteknike”, thotë Marinovic./lajmi.net/

Ish-udhëheqësi i LDK’së, Eqrem Kryeziu është përfshirë në debatin mes analistit Armand Shkullakut dhe Kryetarit të LDK’së, Isa Mustafës, i cili tha se analisti nga Shqipëria nuk duhet të merret me punët e Kosovës.

Por, Eqrem Kryeziu ka reaguar duke thënë se koha e Rrahman Morinës ka kaluar dhe me këtë edhe ngritja e mureve me Shqipërinë dhe me cilindo shtet tjetër.

“Armand Shkullaku*: Më i rëndësishëm formimi i Qeverisë se një vend pune për Isa Mustafën.
____________
*Madje edhe vogëlsia ime është për qarkullimin e lirë të ideve, të njerëzve e të mallrave.
Ka kaluar koha e Rrahman Morinës, koha e ngritjes së mureve me Shqipërinë, a me këdo tjetër”, ka shkruar Kryeziu.

Ndryshe, Armand Shkullaku, në një intervistë për Express kishte thënë se duhet të formohet shpejt Qeveria e Kosovës në mënyrë që Shteti të mos mbetet peng i një vendi pune për Isa Mustafën.

Pas kësaj, Isa Mustafa ka reaguar duke thënë se i ka tri vende pune, derisa i ka bërë thirrje Shkullakut të merret me punët e Shqipërisë dhe të mos merret me Kosovën.

Lëvizja Vetëvendosje! në Malishevë, ka reaguar edhe sot kundër kryetarit të Komunës, Ragip Begajt. Sipas VV-së prononcimi i djeshëm i Begajt lidhur me komunikatën “Çka po fsheh Kryetari i Komunës së Malishevës Ragip Begaj është i pa vërtetë dhe kundërthënëse.

“Dëshirojmë që t’ia sqarojmë Begajt dhe publikut se ai dhe qeveria lokale të cilën e udhëheqë është i obliguar ligjërisht t’u përgjigjet kërkesave tona dhe të gjithë qytetarëve të interesuar për qasje ne dokumente zyrtare brenda afateve ligjore. Kryetari Begaj nuk mund të fshihet prapa faktit se Komuna ka punë të tjera. Së pari sepse përgjigja në kërkesa për informim është, punë dhe detyrim ligjor, së dyti çdo asamblisti i duhen krijuar kushtet për punë duke ia kompletuar informacionin që kërkon. E së treti, që nuk lidhet me detyrimin ligjor është sjellja konkrete me punën e përgjegjshmërinë, fakt të cilin e dimë të gjithë në Malishevë, e di dhe Kryetari se sot drejtorët Komunal më shumë rrinë në lokale me biznesmenë se sa në vendin e tyre të punës ku do të duhej t’i shërbehej publikut”, thuhet në reagimin e VV-së në Malishevë.

“Po ashtu nga 7 kërkesat që nuk kanë marrë përgjigje, vetëm një është projekt që ka kaluar para disa viteve, të tjerat janë shumë aktuale dhe ky është fakt që e demanton Ragip Begajn”.

“Ndërkohë në lidhje me deklarimin e tij se ku paskemi qenë ne më herët, po ia sqarojmë edhe njëherë Kryetarit Begaj se ishte ai që edhe më herët kishte penguar qasjen në dokumentet zyrtare, në kohën kur ishte nën petkun e PDK-së si Kryesues i Kuvendit Komunal të Malishevës dhe këtë vendim antiligjor që mban nënshkrimin e tij e keni të bashkëngjitur”.

“Kryetari Begaj bashkë me ish-bashkëpartiakun i tij Isni Kilaj në dy vendime njërin të nënshkruar nga vet Ragip Begaj me datë: 08.10.2012 dhe tjetrin të nënshkruar nga ish-Kryetari Isni Kilaj me datë: 09.10.2012 kishin penguar Lëvizjen VETËVENDOSJE! në angazhimin për transparencë”.

“Këto dy vendime që mbajnë dy data tregojnë se si Ragip Begaj iu paraprinte me vendime antiligjore për jo transparencë vendimeve të Isni Kilajt po ashtu për jo transparencë ndaj Lëvizjes VETËVENDOSJE! dhe publikut “

“Këto vendime janë fakte për Ragip Begajn dhe e demantojnë atë se ku paskemi qenë më herët ne si VETËVENDOSJE! Dhe po ashtu e demenatojnë pastertinë e tij të cilën e ka vetëm teorike. Kjo sjellje e Kryetarit e forcon edhe më shumë bindjen tonë të shprehur edhe me fakte se prapa këtyre projekteve fshihen keqpërdorime të parasë publike në të cilat Kryetari i tanishëm dhe bashkëpunëtorët rreth tij kanë qenë dhe janë të përfshirë dhe tregojnë qartë se Begaj është një Kryetar i kapur dhe nuk e do transparencën”./PrizrenPress.com/

Shef i zyrës së BE në Kosovë, Samuel Zbogar ka komentuar incidentet e ndodhura më datën 14 tetor, në stadiumin “Partizani”, në Beograd, gjatë Serbi-Shqipëri, ku huliganët serbë u futën në fushën e gjelbër dhe situata precipitoi në skena dhune.

Sipas Zbogar, Bashkimi Europian ndjen keqardhje për incidentet e ndodhura në Beograd. “Sporti duhet t’i bashkojë njerëzit.

Disa ndeshje po krijojnë emocione negative”- është shprehur Zbogar. Duke mos cilësuar si fitues asnjë nga palët, Samuel Zbogar u shpreh se “të gjithë humbën në Beograd”.

Drejtori i Arsimit në Prizren, Nexhat Çoçaj ka demantuar të gjitha akuzat e LDK-së. Sipas tij, LDK-ja në Prizren po vazhdon të shpif dhe të zbehë imazhin e arsimit në këtë qytet.

“Për hir të opinionit publik, ashtu siç ka konstatuar edhe Policia e Kosovës, siguria në shkollat e Komunës së Prizrenit është më e mirë se në çdo qytet të Kosovës, por dy ngjarjet e fundit gjetja e një arme me gaz dhe zënka në një shkollë na kanë detyruar që të kërkojmë nga Policia që përmes kontrollimeve të shkollave, ta ngrisim edhe më shumë nivelin e sigurisë në shkolla”, thuhet në reagimin e Çoçajt.

”Ndërsa sa i përket “konstatimeve” të komisionit për arsim të LDK-së, duhet të shtoj faktin se vet anëtari i këtij komisioni është duke u dënuar në gjykatë për vjedhjen e të dhënave personale në bankë, të cilat më pas i ka shfrytëzuar për shpifje ndaj meje. Dhe këtu besoj se shumë shpejtë drejtësia do ta thotë fjalën e vet”.

“Ndërsa sa i përket rastit të nxënësve të mjekësisë më duhet të shtoj se është një shpifje e radhës, sepse fatmirësisht në asnjë shkollë të Komunës së Prizrenit nuk ka ndodhur asnjë rast i therjes, për çka mund të vërtetohet edhe në polici. Por, edhe zënkat, që kanë ndodhur për ne janë të papranueshme dhe kemi kërkuar që të shtohet siguria në shkollat”.

“Komisioni pa pasur informacione të sakta ka potencuar edhe për disa punësime, që sipas këtij komisioni janë pranuar pa konkurse. Më duhet të sqaroj se sekretarët në “Ibrahim Fehmiu” në Arbanë dhe në “Abdyl Frashri” janë me kontratë për shërbime të veçanta dhe për hir të opinionit duhet të sqarojmë se sekretarët e shkollave janë shërbyes civil, për të cilët është përgjegjëse zyra e personelit në Komunës”.

“Për hir të opinionit publik duhet të theksojmë se këtë vit Drejtoria Komunale e Arsimit në Prizren është përballur edhe me 62 mësimdhënës të klasave të XIII, që kanë mbetur norma dhe na është dashur që t’i risistemojmë dhe normalisht për ata nuk është hapur konkurs, por u është vazhduar kontrata aty ka pasur vende të lira”.

“Komisionit për Arsim të Degës së LDK-së në Prizren ua rikujtojmë se shpifje dhe shantazhe nuk ndihmohet arsimit, po harrojnë se me këto shpifje po i lëndojnë mësimdhënësit, nxënësit, prindërit dhe qytetarët e Prizrenit. Sepse çdo kush e di se arsimi në komunën tonë është model për komunat tjera në Kosovë”./PrizrenPress.com/

Ka përfunduar takimi i Bllokut me minoritetet. Me të dalë nga takimi, Haradinaj ka thënë se kanë diskutuar për zhagitjen e procesit të formimit të institucioneve.

Ai ka thënë se askush nga pakicat nuk do të shkojë në zgjedhje, ndërkaq ka theksuar se kanë marrë konfirmimin e pakicave se ata do ta përkrahin palën që e ka shumicën.

Haradinaj, ka thënë se do të kërkojnë nga presidentja që të kërkojë sqarim për pikën 127 nga Gjykata Kushtetuese, mirëpo nuk e ka përjashtuar mundësinë që këtë ta bëjë edhe vetë blloku.

Yagcilar: Zgjedhjet nuk janë opsion

“Kemi pasur një takim konsultativ, për të diskutuar për mënyrën se si mund të dalim nga bllokada, kështu që kemi konstatuar se zgjedhjet nuk janë opsion i favorshëm për vendin”, ka thënë Yagcilar, pas takimit me Bllokun.

Ai ka thënë se nuk është çështja se dikush po pengon, por problemi qëndron në atë se duhet sqaruar të drejtat ligjore.

Yagcilar vlerëson se do të ishte mirë që presidentja apo blloku t’i drejtohen Gjykatës Kushtetuese për sqarime shtesë, në mënyrë që të gjendet një zgjidhje./Express/