(E plotësuar) Presidentja e vendit, Atifete Jahjaga ka filluar takimin me kryetarin e LDK-së, Isa Mustafa, ku do të diskutohet për tejkalimin e krizës politike.

Në takim po merr pjesë Vjosa Osmani. Ndërkohë, më vonë Jahjaga pritet të takohet me Ramush Haradinajn.

Ndryshe, Jahjaga dje është takuar me Hashim Thaçin, Fatmir Limajn dhe Albin Kurtin.

Jahjaga vazhdon edhe sot takimet me liderët politikë

Presidentja e Republikës së Kosovës, Atifete Jahjaga, ka paralajmëruar edhe sot se do të vazhdoj takimet me liderët partiak, me qëllim të gjetjes së një zgjidhje për të dal nga ngërçi politik.

Jahjaga sot do të takohet me kryetarin e LDK-së, Isa Mustafa si dhe me kryetarin e AAK-së, Ramush Haradinaj. Derisa dje ajo në takime të ndara priti kryetarin e PDK-së, Hashim Thaçi, kryetarin e NISMA-s, Fatmir Limaj dhe kryetarin e Lëvizjes Vetëvendosje, Albin Kurti, me të cilët bisedoi për mënyrat e zgjidhjes së situatës së krijuar me ndërtimin e institucioneve të vendit.

Presidentja Jahjaga dje theksoi se i gjithë procesi lehtësues i diskutimeve me liderët politikë po bëhet me qëllim të ofrimit të zgjidhjeve të qëndrueshme për ndërtimin e institucioneve dhe bazuar në gjithë kuadrin kushtetues të vendit. Ajo tha se do të vazhdojë që të luaj rolin e unitetit të popullit, duke ruajtur paanësinë nga çdo ndikim partiak dhe duke ndihmuar që të ndërtohen institucione të qëndrueshme të shtetit, që do të marrin përsipër obligimet dhe përgjegjësitë për proceset në të cilat ndodhet vendi.

Ajo tha se në rolin e saj kushtetues të garantuesit të funksionimit demokratik të institucioneve kërkon nga liderët e të gjitha partive politike parlamentare dhe nga deputetët e Kuvendit të Kosovës, që të gjejnë zgjidhje më shpejt për ndërtimin e institucioneve të qëndrueshme në vend, për të shmangur çdo mundësi të futjes së vendit qoftë në krizë më të thellë, qoftë në zgjedhje të parakohshme.

Por, takimet e Presidentes Jahjaga deri me tash nuk kanë dhënë rezultate. PDK në njërën anë dhe blloku VLAN në anën tjetër janë barrikada në qëndrimet e tyre sa i përket formimit të institucioneve. PDK vazhdon të thirret si partia e parë në zgjedhjet e 8 qershorit dhe në vendimin e Kushtetuese, ndërsa VLAN insiston se krijimi i institucioneve u takon atyre, ngase e kanë shumicën parlamentare.

Prokuroria Speciale e Kosovës shumë shpejt pritet të ngre aktakuzë ndaj disa të dyshuarve për përfshirje në veprat terroriste.

Aktakuza mund të ngritet ndaj 10 personave, të cilët janë arrestuar para grupit të madh prej 40 të dyshuarve për përfshije në vepra të ndryshme terroriste.

Në një intervistë për Tv Rrokum, ushtruesja e detyrës së kryeprokurorit të Prokurorisë Speciale të Kosovës, Sevdije Morina, tha se kjo prokurori është në fazën e hapjes së hetime edhe ndaj 148 personave të tjerë për përfshirje në vepra terroriste.

Kryeprokurorja Morina tha se Prokuroria Speciale ka pasur prova të mjaftueshme edhe për fillimin e procedurave hetimore ndaj imamëve dhe hoxhallarëve, edhe për caktimin e masës së paraburgimit ndaj tyre.

Sipas saj, imami i Xhamisë së Madhe në Prishtinë Shefqet Krasniqi përveç që dyshohet për nxitje të urrejtjes dhe shtytje për kryerjen e veprave terroriste, dyshohet edhe për pastrim të pareve , qarkullimi i të cilave është bërë përmes një organizate arabe.

Prokuroria Speciale, sipas Morinës, po heton edhe rastin e fundit, të 24 vjeçarit Arbnor Uksmajli, nga Nerodimja e Epërme e Ferizajt, i cili ditë ma parë u vra në luftën e Sirisë, përkrah grupit terrorist ISIS.

Kryeprokurorja nuk përjashton edhe nisjen e hetimeve ndaj hoxhës, i cili u akuzua nga baba i viktimës, se e ka shtyrë djalin e tij të shkojë në luftën e Sirisë.

Në këtë prokurori nga janari deri në shtator janë hetuar 109 raste me 468 persona për korrupsion.

Ndërsa me vendim për fillimin e hetimeve janë 31 raste, me 178 persona të dyshuar për vepra korruptive, ndërsa në fazën preliminare janë 32 raste me 118 persona.

Në mesin e personave që po hetohen për vepra korruptive, sipas Morinës, ka edhe zyrtarë të nivelit lokal dhe qendror, por nuk dha ndonjë emër.

Në këtë prokurori është edhe rasti i ish- zyrtarëve të Ministrisë së Shëndetësisë, ku është i përfshirë ish- sekretari i Përgjithshëm i kësaj ministrie Pleurat Sejdiu.

Ndërkohë, në këtë prokurori po hetohen edhe 17 raste të krimeve të luftës. /TV Rrokum/

Ministri në detyrë i Shëndetësisë, Ferid Agani, nuk e mohon faktin se mund të ketë pacientë të cilëve u janë vënë stentat gabimisht, por prapë mbron marrëveshjet, duke thënë se u shpëtuan jetën 360 pacientëve.

Agani në Rubikon të KTV-së ka thënë se nuk po mund ta besojë gjuhën e mjekëve të përdorur në raport me pacientët.

Ndërsa ka thënë se po qe se dorëheqja e tij do të zgjidhte problemet në shëndetësi këtë gjë ai do ta bënte menjëherë.

Lëvizja Vetëvendosje, nëpërmjet Visar Ymerit, ka mohuar se ka fyer kryetarin e Gjykatës Kushtetuese, Enver Hasani.

“Kushdo që e lexon aktgjykimin e Gjykatës Kushtetuese, këtë që krijoji këtë problem të krijimit të institucioneve, por edhe po që se merret me aktvendimet tjera të Gjykatës Kushtetuese, apo momentet kur kjo Gjykatë ka refuzuar që të marrë në trajtim një çështje që ka të bëjë drejtpërdrejt me sovranitetin dhe funksionimin sovran të Republikës së Kosovës, mendoj që është shumë e qartë që vazhdimisht kjo Gjykatë Kushtetuese ka qenë pre e politikave ditore, në vend se të jetë në përputhje me frymën dhe germën e Kushtetutës së Republikës së Kosovës”, ka thënë Ymeri, transmeton koha.net.

“Veçanërisht në mesin e tyre është Kryetari i kësaj Gjykate Kushtetuese, që e ka dëshmuar edhe publikisht që nuk ka pikë kredibiliteti që të jetë madje as si profesor e lëre më si gjykatës në Gjykatën Kushtetuese. Të thuhet e vërteta për një person nuk është ofendim, por është vetëm konkretizim i të vërtetës”, ka thënë Ymeri.

Anëtari i kryesisë së LDK-së Lutfi Haziri duke komentuar ngërçin politik në vend thotë se presidentja e Kosovës Atifete Jahjaga e ka një sfidë të vogël politike për të zgjedhur. E këshillon që ta dërgoj në Kushtetuese për sqarim nenin 117 të përgjigjes së Kushtetueses.

Në një mesazh për presidenten e Kosovës Atifete Jahjaga, Lutfi Haziri e ka porositur këtë të fundit për të zgjidhur ngërçin, i cili sipas Hazirit për Jahjagën është “situatë e vogël politike”.

Haziri ka kërkuar që Jahjaga të marrë rolin e saj unifikuese si presidente.

Statusi i plotë i Lutfi Hazirit në Facebook:

Për presidenten e Republikës,

Ne qytetarët dhe të zgjedhurit e Republikës jemi të vetëdijshëm se jeni në Zyrën kryesore për të përfaqësuar unitetin dhe jeni pasuese e Dr. Ibrahim Rugovës – presidentit historik, Dr. Fatmir Sejdiut – presidentit të pavarësisë, derisa për pak ditë edhe të ekselencës e tij Behgjet Pacollit – Bacit, të cilin LDK e nxorri nga zyra. Mbaje në mend se të sipërpermendurit e kanë udhëhequr popullin e Kosovës me sfida e probleme të mëdha madje edhe sfida lufte! E Ju, zonja Presidente, e keni në mandat që ta zgjidhni një situatë të vogël politike! Të lutem, tregohuni e dinjitetshme dhe unifikuese. Dërgojeni në Gjykatën Kushtetuese për interpretim nenin 117 dhe uroje pesë vjetorin e themelimit të këtij institucioni. Dërgojeni pyetësorin dhe ndihmojeni vendin për dalje nga kjo situatë. Pas kësaj, edhe pozita e juaj si Presidente do të besohet përnjëmend, e jo ajo që thuhet se jeni ‘Marioneta e këtij vendi’. Zgjidheni vetë: unifikuese apo marionetë! Për fund, ju ftoj ta vizitoni Gjilanin dhe Anamoravën për të parë se si po e mbajmë shtetin në ‘këmbët e qelqit’, ku ngërçi nënkupton mungesë buxheti dhe marrje të taksave komunale nga Qeveria brenda natës! LH

(E plotësuar) Kjo është një fotografi e realizuar pak minuta më parë ku shihet e ëma e Erion Zenës, Pranvera, në përqafim të djalit të saj.

Erioni 8-vjeçar kthehet nga Siria

Pas gati 100 ditësh në Siri, 8-vjeçari Erion Sina është kthyer sonte në orët e mbrëmjes në Kosovë.

Kthimin e tij e ka mundësuar familja e tij në bashkëpunim me autoritetet kosovare, raporton KTV.

Edhe pse nuk e ka thënë asnjë fjalë për rastin, në aeroport ka dalë për ta pritur presidentja e Kosovës, Atifete Jahjaga.

Në këtë mënyrë Erioni i bashkohet nënës së tij, Pranverës, e cila me muaj të tërë ka bërë përpjekje ta kthej nga fronti i luftës.

Kohavisioni kishte raportuar më 25 gusht se si Arben Zena, i ati i Orionit e kishte marrë me vete në Siri 8-vjeçarin. Aty ishte pasqyruar edhe rrëfimi i Pranverës, që kërkonte me ngulm kthimin e të birit.

Ministri në detyrë i Punëve të Jashtme i Kosovës, Enver Hoxhaj, ka pritur të mërkurën në takim ambasadoren e Mbretërisë së Belgjikës, Anick Van Calster.

Ministri Hoxhaj e falënderoi ambasadoren Calster për kontributin dhe përkrahjen që shteti belg ka dhënë për Kosovën në këtë fazë të rëndësishme të shtetndërtimit dhe fuqizimit të subjektivitetit ndërkombëtar të Kosovës.

Hoxhaj veçoi mbështetjen e Belgjikës në proceset që i takojnë të ardhmes euroatlantike, duke u konfirmuar si një prej partnerëve të Kosovës, veçmas në procesin e negocimit të MSA-së dhe nevojën e nënshkrimit të shpejt të marrëveshjes së parë kontraktuale ndërmjet Kosovës dhe BE-së.

Me ambasadoren Calster u diskutua edhe për çështjen e liberalizimit të vizave dhe domosdoshmërinë që edhe kosovarët sa më parë të lëvizin pa viza në Evropë.

Në kuadër të përpjekjeve për të gjetur mënyrat e zgjidhjes së situatës së krijuar në ndërtimin e institucioneve të vendit, Presidentja Atifete Jahjaga, priti në takime të ndara kryetarin e PDK-së, Hashim Thaçin, kryetarin e NISMA-s, Fatmir Limajn dhe kryetarin e Lëvizjes Vetëvendosje, Albin Kurtin.

Në takim me liderët e partive politike parlamentare, Presidentja Jahjaga theksoi se i gjithë procesi lehtësues i diskutimeve po bëhet me qëllim të ofrimit të zgjidhjeve të qëndrueshme për ndërtimin e institucioneve dhe bazuar në gjithë kuadrin kushtetues të vendit, thuhet në njoftimin e lëshuar nga Presidenca.

Ajo tha se do të vazhdojë që të luaj rolin e unitetit të popullit, duke ruajtur paanësinë nga çdo ndikim partiak dhe duke ndihmuar që të ndërtohen institucione të qëndrueshme të shtetit, që do të marrin përsipër obligimet dhe përgjegjësitë për proceset në të cilat ndodhet vendi.

Presidentja tha se në rolin e saj kushtetues të garantuesit të funksionimit demokratik të institucioneve kërkon nga liderët e të gjitha partive politike parlamentare dhe nga deputetët e Kuvendit të Kosovës, që të gjejnë zgjidhje më shpejt për ndërtimin e institucioneve të qëndrueshme në vend, për të shmangur çdo mundësi të futjes së vendit qoftë në krizë më të thellë, qoftë në zgjedhje të parakohshme.

Takimet e Presidentes Jahjaga, në kuadër të procesit lehtësues me liderët e partive politike parlamentare, me kryetarin e LDK-së, Isa Mustafa si dhe me kryetarin e AAK-së, Ramush Haradinaj, do të zhvillohen të enjten.