Parlamenti Studentor si organi më i lartë i përfaqëmit të studentëve është duke monitoruar gjendjen aktuale të krijuar në Universitetin e Prishtinës “Hasan Prishtina” dhe pret që kjo situate sa i përket titujve akademik të zgjidhet në Senatin e UP-së i cili është organi më i lartë qeverisës i Universitetit.

Parlamenti Studentor iu bënë thirrje të gjithë studentëve që të distancohen nga veprimet e një numëri të vogël të “studentëve” me agjenda politike dhe që nuk ka për qëllim zgjidhjen e problemeve në Universitetin e Prishtinës. Qëllimi i vetëm i tyre është qëllimi politik duke zhvilluar skenare mediale para Rektoratit, thuhet në njoftimin e Parlamentit Sdunentor.

Nënkryetari i Lidhjes Demokratike të Kosovës, Haki Rugova, ka thënë se pajtohet plotësisht me deklaratën e bashkëpartiakut të tij, Eqrem Kryeziut, i cili ka thënë se në LDK ka edhe njerëz të shitur të cilët, sipas tij, dëshirojnë ta shkatërrojnë këtë parti.

Haki Rugova nuk ka dashur të flasë me emra se kush mund të jenë njerëzit e shitur në LDK, por ka sugjeruar që për këtë çështje të pyetet bashkëpartiaku i tij. “Pajtohem plotësisht me atë që ka thënë Eqrem Kryeziu. Nuk e di se kush janë ata njerëz, pyetni Eqremin, por unë pajtohem me të”, ka thënë Rugova për “Epokën e re”.

Anëtari i Kryesisë së Lidhjes Demokratike të Kosovës (LDK), Eqrem Kryeziu, në një intervistë për “Epokën e re”, i pyetur se a ka njerëz të shitur brenda LDK-së, është përgjigjur: “Natyrisht. Unë thashë se këto gjëra i bëjnë partitë e tjera, madje kjo praktikë ndodh edhe në vendet e stabilizuara. Ju keni pasur rastin që njerëz të qeverive shumë demokratike janë shitur, e lëre më këtu të ne që jemi ngushtë dhe për pak shitemi, sepse është varfëri e madhe. Pra, në këto rrethana mund të bësh lehtë tregti me moral, veçanërisht në rastet kur nuk e ke pasur kurrë”. Sipas Kryeziut, këta njerëz blihen për pak para. “Unë e di se një kohë të gjatë këtu njerëzit komprementohen nga partitë e tjera dhe shiten për 30 aspra ose 30 groshë. Metoda të tilla përdoren, pothuajse gati janë të lejueshme, edhe pse nuk janë burrnore. LDK-ja duhet t’u kundërvihet këtyre metodave”, është shprehur Kryeziu.

Ndërkaq duke folur rreth shtimit të zërave për dorëheqjen e Isa Mustafës nga pozita e kryetarit të LDK-së, Kryeziu ka thënë se Mustafa nuk ka asnjë arsye të japë dorëheqje nga pozita të cilën është duke e ushtruar. “Isa Mustafa nuk e ka pasur rastin ta dëshmojë lidershipin e tij. Të them të drejtën, me një rrugëtim të tillë, kërkesa për dorëheqje nuk është e ndershme”, ka thënë Kryeziu, duke shtuar se është kundër zgjedhjeve të jashtëzakonshme në LDK. “Me emër të Zotit, kah fundi i nëntorit ose në dhjetor, do të mbahen zgjedhjet në parti”, ka deklaruar Kryeziu.

Analistët kosovarë vlerësojnë se Republika e Kosovës nuk ka qenë “imune” përballë presionit të bashkësisë ndërkombëtare, veçanërisht me kompromiset e bëra ndaj Republikës së Serbisë. Sipas tyre, çështja e vendeve të rezervuara për pakicat është test i rëndësishëm për elitën politike kosovare, sepse do të jetë përcaktuese për krijimin e një mendësie të re politike.

Ardian Arifaj, nga instituti KIPRED, mendon se pjekuria e klasës politike nuk matet me atë se sa po u bën ballë Kosova presioneve të bashkësisë ndërkombëtare, por me mënyrën se si kjo klasë politike i mbron interesat e shtetit në raport me të tjerët.

Sipas tij, Republika e Kosovës ka treguar se është e gatshme të ndërmarrë masa afirmuese për pakicat, sa herë që kjo shihet si e nevojshme.

“Çdo vendim i lidershipit kosovar duhet të jetë në përputhje me interesat e shtetit të Kosovës. Ndërsa, mekanizmi kryesor që e determinon numrin e ulëseve në Kuvendin e Kosovës është vota e qytetarëve. Klasa politike kosovare duhet që t’i artikulojë fuqishëm interesat e shtetit dhe të jetë e unisuar në artikulimin, promovimin dhe mbrojtjen e tyre. Prandaj, partitë politike duhet të caktojnë se cilat janë vijat e kuqe mbi të cilat nuk guxohet të shkelet, pavarësisht presionit që mund të vije.

Raporti me bashkësinë ndërkombëtare nuk duhet të jetë një raport i inateve, por i bashkëpunimit dhe argumentimit”, ka thënë Arifaj për Telegrafin.

Drejtori ekzekutiv i Qendrës për Studime Ballkanike, Fadil Lepaja, theksoi se serbët janë trimëruar nga karota që morën me rastin e hapjes së bisedimeve për anëtarësim të Serbisë në Bashkimin Evropian.

Lepaja mendon se ishte i drejtë qëndrimi i Lidhjes Demokratike të Kosovës dhe Lëvizjes Vetëvendosjes kundër edhe një mandati për vendet e rezervuara.

“Nëse pala kosovare pranon shtimin e vendeve të rezervuara në Kuvendin e Kosovës, do t’i ndihmonte Serbisë që në vazhdimësi të kërkojë privilegje për komunitetin serb në Kosovë”, ka thënë ai për Telegrafin.

Lepaja mendon se praktika e trajtimit selektiv të minoriteteve nuk është parimore, ndaj nuk duhet të vazhdojë më. Ai theksoi se ndërkombëtarët duhet të jenë më të kujdesshëm në veprimet e tyre, në ruajtjen e stabilitetit të raporteve në mes të shteteve të Ballkanit.

Nëse, kryeministri Hashim Thaçi u qëndron besnik fjalëve të tij se pas mungesës së konsensusit nuk do të ketë më vende të rezervuara, por edhe nëse LDK vazhdon deri në fund qëndrimin e saj kundër vazhdimit të vendeve të rezervuara, ky do të ishte një moment i rëndësishëm për Republikën e Kosovës, sepse Prishtina për herë të parë do të refuzonte një kërkesë të BE-së dhe të SHBA-ve qëkur ka nisur dialogu me Serbinë.

Zgjedhjet e jashtëzakonshme në Serbi, të cilat me gjasë do të mbahen në gjysmën e dytë të muajit mars, nuk do të kenë kurrfarë ndikimi në zbatimin e marrëveshjeve me Kosovën.

Kështu ka thënë analisti politik, Azem Vllasi, i cili këto zgjedhje i sheh si të dobishme për Kosovën.

Në një bisedë për lajmi.net, Vllasi thotë se propozimet e ZëvendësKryeministri serb Aleksander Vucic për zgjedhje të jashtëzakonshme kanë qëllim për t’ia marrë postin e Kryeministrit Partisë Socialiste.

“Në zbatimin e marrëveshjeve me Kosovën, nuk do të ketë kurrfarë ndikimi, sepse serbët me zgjedhje janë duke u ngutur për arsye krejt tjera, e jo lidhur me negociatat me Kosovën”.

“Partia e Vucicit dhe Nikolicit vlerëson se e tani e ka pozicionin më të mirë në Serbi dhe kështu do ta forcojë pozicionin e vet në pushtet. Me siguri ata synojnë që njëri ta marrë vendin e Kryeministrit e jo t’ia lënë Partisë Socialiste”.

Koalicioni mes Partisë së Presidentit Tomislav Nikolic dhe Kryeministrit Ivica Dacic është duke shkuar drejtë fundit dhe kjo pritet ta çojë Serbinë në zgjedhjet të jashtëzakonshme, të cilat thuhet se mund të mbahen më 16 mars.

Për shkuarjen në zgjedhje të reja tanimë ka vendosur Partia Progresive Serbe, me propozimin e të parit të saj Aleksandër Vucic.

Por, Azem Vllasi thotë se kjo do të ndikojë në uljen e ritmit të bisedimeve dhe gjithashtu do t`i japë kohë palës kosovare të rikonsolidohet, në mënyrë që mos të bëjë koncesione të panevojshme.

“Kjo do të ndikojë edhe në dinamikën e bisedimeve në mes të Kosovës dhe Serbisë, por ajo neve jo vetëm që nuk do të na dëmtojë, por ndoshta do të kemi një dobi prej një ngadalësimi të atij procesi”.

“Pala kosovare nuk është duke ditur ku është fundi i këtij procesi dhe ku është fundi i koncensioneve që është duke bërë. Prandaj, kjo ka një dobi, sepse ndalet pak, në mënyrë që ta bëjë një bilanc se deri ku ka mbërritur deri tani në bisedime me Serbinë, që ka bërë koncensione më shumë seç duhet”.

“Po ashtu ta bëjë një rikonsolidim të brendshëm dhe pas zgjedhjeve në Serbi të mos vazhdojë kështu si deri më tani, në mënyrë rutinore dhe si pa krye”, ka thënë Azem Vllasi.

Organizata Joqeveritare “EC Ma Ndryshe”, gjatë muajit janar ka shqyrtuar çështjen e hulumtimit të kontraktuar nga qeveria lokale për “Përmirësimin e shërbimeve komunale, përgjegjshmërisë dhe zhvillimit të ekonomisë lokale”.

Monitoruesja Elmedina Baxhaku tha se sipas arsyetimit të dhënë nga Komuna gjatë shpalljes dhe dhënies së këtij tenderi, ky hulumtim parashihet që të lehtësoj arkëtimin e të hyrave vetanake.

“Mirëpo ndonëse hulumtimi dhe raporti janë kryer në dhjetor të vitit të kaluar, Drejtoria e Ekonomisë dhe Financave ende nuk e ka bërë publike përmbajtjen e raportit. Nga buxheti komunal për këtë hulumtim janë shpenzuar afër 10 mijë euro”.

“Në komunikim me drejtuesit në detyrë të DEF-it është marrë sqarimi se raporti nga hulumtimi nuk është publikuar për shkak se pritet formimi i qeverisë së re komunale dhe se më pas do të publikohet në ueb faqen e komunës e nëse është nevoja do të ftohen edhe mediet”.

“Me dëshirën që DEF ta përmbush këtë zotim, duke qenë se ka përgjegjësi publike, EC Ma Ndryshe pret nga zyrtarët komunal t’i shpalosin të gjeturat e hulumtimit në afatin sa më të shkurtër kohor, me qëllim që të zhvillohet debati mbi përmirësimin e shërbimeve komunale, përgjegjshmërinë dhe zhvillimin e ekonomisë lokale, me përfshirjen e të gjithë akterëve relevantë”.

Megjithëkëtë ‘EC Ma Ndryshe’ përkujton se një hulumtim i ngjashëm ishte bërë edhe në nëntor të vitit 2012, me kosto prej afër 10 mijë eurosh, dhe DEF asnjëherë nuk i ka bërë publike të gjeturat e raportit, përkundër faktit se mjetet e buxhetit komunal ishin shpenzuar me qëllim të identifikimit të problemeve dhe gjetjes së mundësive të përmirësimit të të hyrave vetanake të komunës së Prizrenit.

“Për këto arsye ‘EC Ma Ndryshe’ rekomandon Komunën e Prizrenit që të zbatojë në përpikëri dispozitat e Udhëzimit Administrativ 2008/09 të MAPL-së për transparencë”.

“Të raportoj më shpesh në media për çështjet që lidhen me shërbimet komunale, përdorimin e buxhetit komunal, zhvillimin ekonomik, përdorimin e pronës komunale, planifikimin urban, investimet, të hyrat komunale dhe çështje tjera”./PrizrenPress.com/