Nuk ka prova për trafikim të organeve të njerëzve, nuk ka prova për krim të organizuar dhe as papërgjegjësi nga Shtabi i Përgjithshëm i ish Ushtrisë Çlirimtare të Kosovës, thuhet në hyrje të raportit të kryeprokurorit të Task Forcës, Clint Williamson, i cili është marrë me hetimin e akuzave të ish-senatorit zviceran në Këshillin e Evropës, Dick Marty, rreth pretendimeve se UÇK-ja ka kryer krime gjatë luftës në Kosovë.

E përditshmja serbe “Danas”, duke u thirrur në burime diplomatike në Bruksel, shkruan se pretendimet për trafikim organesh me serbët e zënë rob nga UÇK-ja janë hedhur poshtë, pasi nuk janë gjetur prova që vërtetojnë se pjesëtarë të UÇK-së janë marrë me krime të këtij lloji.

“Por, prokurori Williamson ka gjetur prova të mjaftueshme për të ngritur aktakuzë ndaj gjashtë deri në dhjetë ish-pjesëtarëve të ish Ushtrisë Çlirimtare të Kosovës të cilët pretendohet se kanë kryer krime lufte ndaj civilëve serbë në Kosovë”, shkruan e përditshmja Danas, raporton lajmi.net.

Raporti i prokurorit amerikan pritet të publikohet brenda pak ditësh, ndërsa aktakuzat ndaj ish-pjesëtarëve të UÇK-së, nëse do të ketë të tilla, ato do të trajtohen nga Gjykata Speciale, e cila u themelua muaj më parë me vendim të Kuvendit të Kosovës, dhe e cila pritet të ketë selinë në Prishtinë dhe Hagë.

Autoritetet e Kosova nuk e kanë shfrytëzuar sa duhet mendimin e Gjykatës Ndërkombëtare të Drejtësisë (GJND) rreth ligjshmërisë së shpalljes së pavarësisë së Kosovës për të fuqizuar subjektivitetin e saj ndërkombëtar, shkruan Zëri.

Dje janë bërë katër vjet, nga koha kur GJND-ja vulosi pavarësinë, si të drejtë e popullit të Kosovës për “Vetëvendosje”, por institucionet në Prishtinë, nuk ditën ta shfrytëzojnë këtë “kartë të fuqishme për njohje në botë”.

Anëtari i Kryesisë së LDK-së, Sadri Ferati, duke folur për zhvillimet e fundit në skenën politike, ka thënë se vullneti i shumicës së deputetëve duhet ta bëjë formimin e organeve të Kuvendit dhe Qeverisë së re.

“Për këtë fazë kriteri i vetëm është sigurimi i 61 votave në Kuvend dhe koalicioni LDK-AAK-Nisma tashmë i ka siguruar votat e nevojshme fillimisht për ta zgjedhur kryetarin e Kuvendit, pastaj për ta formuar Qeverinë. Pra sa iu përket votave të deputetëve, formimi i Qeverisë nga koalicioni paszgjedhor LDK-AAK-Nisma është 100 për qind i realizueshëm”, ka thënë Ferati në këtë intervistë për “Epokën e re”.

Ai është shprehur se zgjedhjet e jashtëzakonshme dhe qeveria teknike nuk janë zgjidhje e mirë. “Zgjedhjet nuk do të bëjnë çudira, por përafërsisht do të ngelet ky raport i forcave politike dhe prapë do të kthehet procesi në pikën ku është aktualisht. Prandaj, sikurse qeveria teknike, edhe shkuarja në zgjedhje të jashtëzakonshme nuk është zgjidhje e mirë. Megjithatë, edhe qeveria teknike edhe zgjedhjet janë të mundshme. Por, sipas mendimit tim, gjasat më të mëdha janë të vijë në shprehje vullneti i shumicës së deputetëve në Kuvendin e Kosovës”, është shprehur Ferati.

Ai nuk ka dashur të flasë sa i përket shkresës së PDK-së drejtuar Gjykatës Kushtetuese për seancën konstituive të 17 korrikut, vendimit që mund ta marrë kjo gjykatë. “Nuk e di sa ka gjasa, por edhe nëse kthehet, sërish të njëjtit deputetë do të votojnë Isa Mustafën për kryetar të Kuvendit të Kosovës”, ka deklaruar Ferati.

Po e pret një sinjal nga lideri i PDK-së, Hashim Thaçi, për të nisur procedurën për mandatimin e mandatarit për Qeverinë e ardhshme të Kosovës.

E para e shtetit të Kosovës, presidentja Atifete Jahjaga, edhe pse tashmë e ka të qartë nga Kushtetuesja se cili do të jetë roli i saj për mandatarin e qeverisë, duket se nuk po ka “guximin” të nisë këtë procedurë pa e marrë pëlqimin e kryeministrit në detyrë, njëherësh shefit të PDK-së. Ky veprim i Presidentes është dëshmia më e mirë se Thaçi e Jahjaga vazhdojnë bashkëpunimin e tyre, duke forcuar edhe më shumë raportet miqësore e edhe institucionale. Ky vendim i Jahjagës po ashtu është dëshmia më e mirë se e para e shtetit sikur edhe shumë herë të tjera vazhdon të jetë nën “komandën” e Thaçit.

Por këtë neglizhencë të presidentes Jahjaga për ta caktuar mandatarin për kryeministër nuk e arsyeton Dren Doli, përfaqësues i Grupit për studime politike dhe juridike. Sipas tij Presidentja nuk ka asnjë detyrim që të pres vendimin e Gjykatës, për aq kohë sa Gjykata nuk ka kërkuar nga presidentja që të mos ushtrojë funksionet e saj për shkak të efektit që mund të ketë ankesa e PDK-së në Gjykatën Kushtetuese.

I pyetur nga “Botapress” nëse e para e shtetit të Kosovës po pret një vendim të z. Thaçi për të nisur procedurat për mandatarin e ri, Doli beson se në rastin konkret presidentja edhe sipas vendimit të Gjykatës Kushtetuese, por edhe sipas Kushtetutës, ka detyrimin që të fillojë procedurat për caktimin e mandatarit për formimin e qeverisë. “Në rastin konkret i bie që sipas vendimit përshkrues të Gjykatës, Presidentja duhet të kërkojë nga Partia Demokratike që të propozoj një individ, të cilin ajo do ta caktojë për mandatar për kryeministër. Moszgjedhja e pjesës tjetër të nënkryetarëve të Kuvendit të Kosovës dhe ankesa që PDK-ja ka ushtruar në Gjykatën Kushtetuese në lidhje me vendimin e Kuvendit për zgjedhjen e z. Mustafa për kryeparlamentar nuk është arsye e cila shtyn në vetvete ushtrimin e funksioneve kushtetuese të presidentes”, tha Doli, transmeton bota press.