Gjykata Kushtetuese më nuk shihet si adresë për të ngritur çështjen përkitazi me zgjedhjen e kryetarit të Kuvendit, shkruan sot Koha Ditore.
Debati në Kuvend ndërmjet deputetëve të bllokut LDK-LVV-AAK-Nisma nuk ka prodhuar moment të ri politik e as juridik.

Bllokada në konstituimin e institucioneve vazhdon.

Sociologu Artan Muhaxhiri ka shprehur bindjen se liderët partiakë e kanë zgjedhur rrugën më të vështirë të mundshme për t’iu qasur bllokadës institucionale.

E juristi Fisnik Korencia ka propozuar t’i bëhet kërkesë një “arbitri ndërkombëtar”, siç është Komisioni i Venecias, për të dhënë një opinion se si të dilet nga rruga qorre, në të cilën ka hyrë Kosova prej katër muajsh.

Para pak minutave qytetarët na kanë lajmëruar që në oborrin e Xhamisë së Bardhë në Suharekë ka pasur një përleshje mes dy grupe njerëzish prej 10 personash.

Sipas qyetetarëve njëri grup i të përleshurve janë ata që dyshohen të jenë ekstremistë fetar.

Përleshja ka qenë masive ku janë përdorur vetëm pjesët e trupit për goditje dhe shtyrje.

Burimi i TherandaPost ka thënë se përleshjen e kanë ndaluar persona që ka shkuar nga rruga kryesore në oborrin e Xhamisë për ta ndaluar përleshjen.

Kryetari i Nismës për Kosovën, Fatmir Limaj ka thënë se në Kosovë ka një marrëveshje politike. Kjo marrëveshje sipas tij, e ka krijuar një shumicë parlamentare, e cila është parakusht për qeverisjen.

Sipas tij, nëse nuk do ta kishim këtë shumicë, atëherë do të duhej të shkohej në zgjedhje.

“Ne e kemi një marrëveshje politike dhe kësisoj vendi nuk ka nevojë që të shko j në zgjedhje”, tha Limaj në emsionin “Rubikon” të KTV-së.

Zgjidhja e ngërçit politik në Kosovë duhet kërkuar në dialogun dhe bashkëpunimin mes partive të mëdha demokratike në vend. Kështu ka deklaruar për RTK-në, ish deputeti në Parlamentin Europian, gjermani Bernd Posselt.

Posselt thotë se zgjidhja arrihet nëpërmjet bashkëpunimit dhe dialogut.

“Mendoj se Kosova ka mundësi të mira që të ecë përpara në drejtim të integrimeve europiane por problemi është se për momentin i tërë vendi është i bllokuar që disa muaj, shkaku i fërkimeve të disa partive politike. Unë mendoj se ajo për të cilën Kosova ka nevojë është dialogu dhe bashkëpunimi mes partive të mëdha demokratike për të gjetur një zgjidhje të përbashkët për të ardhmen e Kosovës”, tha Posselt.

Ai rekomandon që zgjidhja të arrihet shpejt. Thotë se Kosovës i duhet qeveri funksionale.

“Nëse nuk kemi qeveri funksionale atëherë problemi nuk mund të zgjidhet , janë disa gjëra që duhet të negociohen por që duhet të negociohen me një qeveri funksionale”, tha ai.

Vetëm kryesuesja e seancës, si deputetja më e vjetër, Flora Brovina e ka të drejtën që të thërras seancë, e as askush tjetër, kështu ka qenë reagimi i deputetit të Partisë Demokratike të Kosovës, Adem Grabovcit.

Në profilin e tij në Facebook, Grabovci, ka shkruar se në seancën e sotme blloku vetëm sa e ka thelluar krizën politike në vend, e cila vetëm sa do t’i shkaktoj dëme të pa parashikueshme vendit.

Sipas, Grabovcit, për të dalë nga situata e tanishme kemi vetëm dy opsione.

“Opsioni i parë është marrëveshja me PDK-në dhe krijimi i institucioneve dhe nëse ky opsion nuk vjen në shprehje, atëherë vjen opsioni tjetër, që është më i padëshiruar, ai i zgjedhjeve të jashtëzakonshme”, ka shkruar ai.

Për rastin e arrestimit të disa zyrtarëve të Ministrisë së Shëndetësisë (MSH) dhe disa mjekëve të dyshuar për keqpërdorim të detyrës zyrtare, të enjten në Prokurorinë Speciale të Kosovës, është intervistuar edhe ministri Ferid Agani.

Ministri në detyrë i Shëndetësisë, Ferid Agani, ka deklaruar për “Epokën e re” se të enjten gjatë intervestimit ka qartësuar para organeve të drejtësisë punën e tij si ministër. “Absolutisht nuk ka pasur keqpërdorim të detyrës zyrtare. Nuk besoj se shërbimi në interes të qytetarëve mund të kualifikohet si keqpërdorim i detyrës zyrtare, përkundrazi mendoj se është funksionalizim i plotë i detyrës zyrtare një gjë e tillë. Prandaj përfundimisht janë dëshmi të pabazuara dhe shumë shpejt do t’i dokumentojmë. Ka mbetur që nesër (e premte) të paraqesim provat e ministrisë dhe mendoj se do të qartësohet dilema sa i përket zyrtarëve të Ministrisë së Shëndetësisë, kurse dyshimet tjera që kanë të bëjnë me akuzat për marrjen apo dhënien e ryshfetit, janë çështje e prokurorisë”, ka deklaruar Agani.

Ai ka shtuar se përfundimi i kësaj do të jetë heqja e një akuze të rëndë mbi Ministrinë e Shëndetësisë dhe qartësimi i raporteve në mes të MSH-së dhe institucioneve shëndetësore. “Në atë kuptim do të ngritët dukshëm përgjegjësia e punëtorëve shëndetësorë dhe institucioneve shëndetësore në zbatimin e ligjit dhe do të parandalohen të gjitha dukurit korruptive, të cilat mund të jenë të ndërlidhura me këto shërbime shëndetësore. Por qytetarët, të cilët i kanë shfrytëzuar shërbimet shëndetësore si rezultat i këtyre politikeve shëndetësore do të jenë ata që më së miri do ta konfirmojnë se Ministria e Shëndetësisë dhe zyrtarët e saj janë të pastër në këtë proces”, është shprehur Agani.

Nëntë personat e arrestuar, prej të cilëve disa zyrtarë të Ministrisë së Shëndetësisë dhe disa të tjerë janë mjekë, Prokuroria Speciale e Republikës së Kosovës, në qershor të vitit 2014 kishte nxjerr aktvendim për fillim të hetimeve. Sipas Prokurorisë për nëntë të pandehurit ekziston dyshimi i bazuar se duke vepruar në bashkëveprim dhe duke shkelur ligjin e prokurimit publik nr.04/L-042, kanë keqpërdorur pozitën e tyre zyrtare, duke nënshkruar marrëveshje bashkëpunimi për sigurimin e shërbimeve shëndetësore, të cilat nuk ofrohen në institucionet publike shëndetësore, me spitalet private.

Ngërçi politik është situatë shqetësuese që po çon drejt kolapsit shumë institucione të tjera. Kështu e vlerëson vonesën në konstituimin e parlamentit, shefi i zyrës së BE-së, Samuel Zhbogar.

Në një intervistë për “Zonën e Debatit” në Klan Kosova, ai u bëri thirrjeve politikanëve të gjejnë zgjidhje për të krijuar institucionet.

Ai ripërsëriti se BE nuk do të ndërhyjë në zgjidhjen e këtij ngërçi sepse kosovarët duhet ta dinë më mirë se çka është e duhur për vendin e tyre.

Secila vonesë sipas tij shkakton shqetësim tek BE-ja, dhe blloku 28 anëtarësh sipas përfaqësuesit të BE-së në Kosovë shpreson se zgjidhja të mos bartet me metoda jashtë institucionale dhe do të eskalonte në rrugë.

Më tutje gjatë kësaj interviste Zhbogar konsideroi se zgjedhjet e reja duhet të jenë opsioni i fundit për daljen nga kjo situatë sepse kjo do të shkaktonte vonesa të tjera që janë të dëmshme për Kosovën.

Zgjedhje në dimër sipas tij, frikësojnë BE-në se nuk do të jenë aq të mira siç kanë qenë ato të 8 qershorit. Ndër të tjera ai tha se sytë e BE-së janë tek presidentja e cila është duke zhvilluar takime me liderët e partive politike për të gjetur zgjidhje.

Shefi i BE-së në Kosovë nuk kundërshtoi takimet e deputetëve në sallën e kuvendit por tha se preferon që seancat të thirren nga kryesuesja Flora Brovina si vazhdimësi e seancës së kaluar konstituive.

Në këtë intervistë, që transmetohet të enjten në 20:45 në Klan Kosova, Samuel Zhbogar flet në detaje për të gjeturat e Komisionit Evropian në raportin e progresit për këtë vit./Klan Kosova/

Asamblisti i Lëvizjes Vetëvendosje! në Prizren, Artan Abrashi, ka kritikuar Qeverinë e Ramadan Mujës për ndërprerjen e punimeve në sheshin e “Lidhjes së Prizrenit”.

Ai thotë se ndërprerja e punimeve lë shumë dyshime në këtë projekt.

“Për Lëvizjen Vetëvendosje është e pashpjegueshme vonesa që po ndodh me këtë projekt në qendër të qytetit. Kjo vonesë sjell edhe dyshime”, ka thënë Abrashi për TVO.

Punimet në sheshin e “Lidhjes së Prizrenit” në Prizren ende nuk kanë përfunduar. Komuna e Prizrenit, ndërkaq nuk ka dhënë një afat se kur mund të përfundojë ky projekt./PrizrenPress.com/