Burim Ramadani i AAK-së, në Facebook, ka shkruar se për gati shtatë vjet me radhë, kryeministri në ikje, Hashin Thaçi, i ka vjelur bizneset në Kosovë. Sipas tij, Thaçi me qeverinë e tij të korruptuar nuk ka lënë asnjë moment të vetëm pa marrë tallin apo përqindjen në secilin tender.

“Kanë falemimentuar një numër i konsiderueshëm i bizneseve për shkak të tallit të madh që i ka marrë qeveria. A beson dikush se Thaçi dhe qeveria e tij e korruptuar do të ndryshojë kursin? Jo, kurrë.

Me përpjekjet e fundit dhe me shoun që po bën, ai realisht po dëshiron të shkelë dinjitetin e bizneseve. I vjeli pa pikë marre, tash tenton t’i mashtrojë pa pikë marre”, ka shkruar Ramadani.

Vetëvendosje është e bindur se korrupsioni e ka pamundësuar në masë të madhe zhvillimin shoqëror e ekonomik.

Sipas kësaj partie, krimet kundër qytetarëve të Kosovës nuk vjetrohen kurrë. Nëse ata do të vinin në pushtet, qeverisja do të punonte dhe do të ndihmonte që të gjithë ata që kanë uzurpuar, vjedhur, keqmenaxhuar me vetëdije pronën dhe paranë publike, dhe prej të cilës kanë përfituar vetë, do të përgjigjen para drejtësisë.

Kështu është thënë sot në një konferencë për media ku janë prezantuar masat në planin qeverisës e ligjvënës për forcimin e rolit të Prokurorisë, Policisë, agjencive dhe institucioneve mbështesë të ligjit e rendit. Për to kanë folur lideri I lëvizjes, Albin Kurti, ish deputetja Albulena Haxhiu, I sapo ardhuri në këtë parti Avni Zogiani, si dhe Merita Mustafa e Ylli Hoxha.

“Ne angazhohemi që qytetarëve të Kosovës t’u kthehet pasuria e zhvatur nga të gjithë personat për të cilët drejtësia do të dëshmonte që e kanë bërë këtë. Policia e shtetit dhe Prokuroria kanë rol kyç në luftimin e krimit të organizuar dhe korrupsionit në Kosovë. Ne do ta kemi prioritet sigurimin e kushteve adekuate të punës së prokurorëve dhe të punonjësve në agjenci të antikorrupsionit, si dhe të personave kyç që janë pjesë aktive e zbatimit të ligjit”, thuhet në një komunikatë për shtyp të lëshuar nga Vetëvendosje.

Vetevëvendosje ka thënë se qeverisja e tyre do të zbatojë masat antimafia, antikorrupsion dhe për konfiskim të pasurisë së pajustifikueshme. Disa nga hapat kryesorë që do të ndërmarrim janë:
1. Ligji për Prokurim Publik: do të zbatohet në tërësi. Do të punohet që të thjeshtësohet në mënyrë që të jetë sa më transparent dhe lehtë i implementueshëm për zbatuesit e ligjit në Kosovë;
2. Ligji për shqyrtimin dhe vërtetimin e pasurisë së pajustifikueshme: Vetëvendosje e ka bërë gati dhe tashmë e ka dorëzuar në Kuvend “Ligjin për konfiskim e pasurisë së justifikuar dhe aplikimin e tij, pa kufizime për kohën, vendin dhe mënyrën e përfitimit.
3. Ligji Antikorrupsion: Ne do ta realizojmë hartimin e vënien në zbatim të këtij ligji i cili krijon mekanizmat për hetimin e cilitdo proces të prokurimit, dhe të zyrtarëve të administratës. Me të do t’i jepet fuqi instrumenteve për hetimet nga drejtoritë e krimit ekonomik në Polici.
4. Në qeverisjen tonë të gjitha kontratat që e kalojnë një shumë të caktuar do të kenë dy nënshkrime. Nënshkrimi i dytë do të bëhet nga Sekretari i Përhershëm i çdo autoriteti kontraktues.

Sipas VV-së, duke marrë parasysh rolin kyç që e kanë institucionet policore dhe gjyqësore në luftimin e korrupsionit në Kosovë, prioritet i Ministrisë së Drejtësisë, Financave dhe Kryeministrit do të jenë sigurimi i kushteve adekuate të punës së prokurorëve dhe të punonjësve në agjenci të antikorrupsionit, si dhe të personave kyç që janë pjesë aktive e luftimit të kësaj dukurie.

“Ne do të marrim menjëhërë inisiativa institucionale për rritjen e numrit të prokurorëve e gjyqtarëve dhe ngritjen e një programi efikas të mbrojtjes së dëshmitarëve”.

“Do të sigurohemi që t’i forcojmë mekanizmat mbikëqyrës dhe kontrollues. E po ashtu, do të kërkojmë përgjegjësi nga Zyra e Prokurorit Special, në kuadër të Ministrisë së Drejtësisë, për progresin në secilin rast të dorëzuar nga Agjensia kundër korrupsionit tek ky institucion”.

“Ne do të implementojmë Rregulloren për rekrutimin dhe trajnimin adekuat të zyrtarëve të prokurimit publik, të cilët duhet të kenë diplomë universitare dhe ta vijojnë trajnimin e organizuar nga Instituti Kosovar për Administratë Publike për t’u certifikuar”.

“Qeverisja jonë do të krijojë programin për specializimin e Prokurorëve dhe Hetuesve për krime specifike”.

“Policia në qeverisjen tonë konceptohet si një institucion në funksion të mbrojtjes e në shërbim të secilit qytetar, në zbatim të ligjit, e jo në shërbim të pushtetit. Policia do të garantojë zbatimin e ligjit dhe ruajtjen e garantimin e jetës dhe të gjitha të drejtave qytetare, njerëzore e politike të qytetarëve tanë. Si dhe të drejtën demokratike për protestë e për organizim politik”.

Në këtë drejtim transformimi i Policisë, sipas VV-së, është i domosdoshëm. Forcat policore të Kosovës duhet të organizohen sipas territorit me ndarjet administrative por edhe sipas fushëveprimeve të caktuara, prej atyre që luftojnë krimin e organizuar dhe terrorizmin e deri te policia pyjore dhe ajo e trafikut.

“Ne do të themelohet Akademia Policore, me cikël shkollimi 3 vjeçar (bachelor) për hyrje në shërbimin policor, me qëllim të rritjes së profesionalizmit në polici dhe marrjes së gradës”.

“Për qeverisjen tonë prioritete bazë janë sigurimi i kushteve më të mira të punës për policët, zhdëmtim adekuat në rast të lëndimeve dhe mbrojtje institucionale (ekonomike e sociale) për familjet e policëve të cilët humbin jetën në detyrë. Falë zbatimit të ligjit dhe etikës nga qeverisja jonë, Sindikata e Policisë e Kosovës do ta ketë hapësirën që të forcohet për të mbrojtur të drejtat e policëve kundrejt Qeverisë dhe partizimit. Në këtë drejtim masat afatgjatë që do të marrim për garantimin e Policisë është hartimi dhe aplikimi me përpikmëri i Statusit të Oficerit të Policisë”. /PrizrenPress.com/

Instituti Demokratik i Kosovës (KDI) përmes konferencës për media ka bërë publike raportin mujor të monitorimit të komunave në regjion të Prizrenit për muajin prill 2014 ku janë pasqyruar vendimet e marra nga ana e kuvendeve të komunave në regjion të Prizrenit si dhe mungesën e gatishmërisë së respektimit të depozitave ligjore në fusha të caktuara nga institucionet vetëqeverisëse lokale.

Gjatë konferencës për media, zyrtari i KDI-së Haxhi Seferqaj tha se në muajin prill të gjitha kuvendet e komunave të regjionit të Prizrenit kanë realizuar aktivitete duke mbajtur seanca të rregullta. Lidhur me këtë të gjitha kuvendet e komunave në regjion të Prizrenit (Prizren, Suharekë, Rahovec, Malishevë, Dragash dhe Mamushë) kanë thirrur nga një seancë dhe të gjitha këto seanca kanë qenë të thirrura si të rregullta.

Duke vazhduar me të gjeturat në procesin e marrjes së vendimeve në kuvendin e komunës së Prizrenit ku tha se “votimi i katër komisioneve në çelës pa specifikuar se kush do të jetë përfaqësues (emëruar) në këto komisione përbën shkele procedurale nga ana e Kuvendit të Komunës. Instituti Demokratik i Kosovës (KDI) kërkon nga Kryesuesi dhe anëtarëve të Kuvendit të Komunës së Prizrenit që të respektojë projekt vendimet e hartuara ngase në projekt vendim është specifikuar edhe emërimi i anëtarëve derisa votimet për këto komisione janë marrë në parim dhe si qelës të përfaqësimit të subjekteve politike, anëtarë nga shoqëria civile dhe ekzekutivi. Lidhur me këtë KDI kërkon që emërimi i anëtarëve në komisione të bëhet me votim nga vetë anëtarët e kuvendit të komunës dhe në pajtim me projekt vendimet e hartuara nga sekretaria e kuvendit”.

“Në kuvendin e Komunës së Prizrenit në seancën e fundit kishte edhe përplasje ndërmjet Kryetarit të Komunës dhe anëtarëve të Kuvendit. Lidhur me këtë, Instituti Demokratik i Kosovës (KDI) reagimin e kryetarit të Komunës së Prizrenit e cilëson si shantazh dhe kërcim ndaj anëtarit të kuvendit andaj i bënë thirrje kryetarit të komunës që për kërcimin e tillë ndaj anëtarit të këtij institucioni të kërkojë falje publike dhe njëherit Kryesuesit të Kuvendit të Komunës i bënë thirrje në respektim të Rregullores së punës së Kuvendit për një disiplinë dhe rend më të mirë për mbarëvajtjen e seancave të kuvendit të Komunës së Prizrenit”, përfundoj Seferqaj.

Zyrtari tjetër i KDI-s, Naim Cahanaj tha se Instituti Demokratik i Kosovës (KDI) qysh në fillim të muajit prill kishte rekomanduar Kuvendet e Komunave të regjionit të Prizrenit që të respektojnë dipspoziatat ligjore në lidhje me raportimet financiare në kuvendet e komunave përkatëse. Referuar nenit 45.4 të Ligjit Nr.04/L-194 për ndryshimin dhe plotësimin e Ligjit Nr.03/L-048 për menaxhimin e financave publike dhe përgjegjësit.

“Kryetari i komunës duhet të përgatitë dhe t’i dorëzojë kuvendit komunal raporte tremujore të cilat mbulojnë vitin fiskal deri në fund të tremujorit i cili sapo ka përfunduar. Këto raporte duhet t’i dorëzohen kuvendit komunal dhe një kopje duhet t’i dorëzohet ministrit brenda tridhjetë (30) ditëve pas përfundimit të çdo tremujori dhe më pas duhet të publikohen nga kryetari i komunës në faqen e internetit të komunës”.

“Mungesa e raportimit të raporteve tre mujore financiare gjatë seancave të mbajtura të muajit prill bie ndesh me afatin kohorë të përcaktuar me legjislacionin në fuqi andaj Instituti Demokratik i Kosovës (KDI) rithekson nevojën e raportimit financiarë të ekzekutivit të komunës (kryetarit) karshi kuvendit si institucion më i lartë i vetëqeverisjes lokale dhe si të tilla këto raporte të ekzekutiveve komunale në komunat e regjionit të Prizrenit të jenë rregullta dhe periodike në bazë të legjislacionit në fuqi”.

“Një obligim të tillë ligjore nuk e ka respektuar Kryetari i Komunës së Prizrenit, Suharekës, Dragashit dhe Rahovecit derisa Kryetari i Komunës së Malishevës dhe Mamushës kanë respektuar aftin kohorë duke raportuar pranë kuvendeve përkatëse raportet financiare tre mujore janar-mars 2014. Instituti Demokratik i Kosovës (KDI) i rekomandon Kryesuesve të Kuvendeve dhe gjithë anëtarëve të kuvendeve të komunave në regjion të Prizrenit që të kërkojnë në vazhdimësi respektimin e afateve kohore kur është në pyetje raportimi financiarë i kryetarëve karshi këtyre institucioneve”.

“Instituti Demokratik i Kosovës (KDI) gjatë muajit prill 2013, në drejtim të kuvendeve të komunave të regjionit të Prizrenit ka kërkuar qasje në dokumente publike. Bazuar në afatin kohorë të përcaktuar me ligjin për qasje në dokumente publike ku specifikon në mënyrë decidive se “institucioni publik obligohet që brenda shtatë (7) ditëve, prej kohës së regjistrimit të kërkesës, të nxjerr vendim për lejimin e qasjes në dokumentin e kërkuar ose të japë përgjigje me shkrim për të arsyetuar refuzimin e plotë apo të pjesërishëm dhe informon kërkuesin për të drejtën që ai ka për parashtrimin e një kërkese për rishqyrtim”.

“Një respektim të tillë kohor të kthimit të përgjigjeve për qasje në dokumente publike kanë kryer vetëm katër nga gjashtë komunat e regjionit të Prizrenit dhe komuna e cila i është përgjigjur më shpejtë kërkesës për qasje në dokumente publike ka qenë Komuna e Malishevës derisa Komuna e Suharekës dhe Prizrenit ishin dy komunat të cilat nuk kanë respektuar afatin kohorë në kthimin e përgjigjes për lejimin ose mos lejimin e qasjes ne dokumente publike”, përfundoj Cahanaj. /PrizrenPress.com/

Kryetarit  të Prizrenit, Ramadan Mujës, i është dorëzuar sot aktgjykimi nga Gjykata Themelore në Prizren. Avokati i Mujës, Ruzhdi Berisha konfirmoi marrjen e aktgjykimit të klientit të tij.

“Po sot e kam marrë aktgjykimin e kryetarit”, konfirmoi Berisha për “PrizrenPress”.

Ai tha se përvec palës mbrojtëse, aktgjykimi i është dorëzuar edhe kryetarit Ramadan Mujës.
“Edhe kryetari e ka marrë aktgjykimin edhe unë”, tregoi ai.

Avokati Berisha, paralajmëroi se do të parashtrojë ankesë ndaj aktgjykimit të Ramadan Mujës.
“Sigurisht që do të ankohemi. Bile ankesën e kam të gatshëm vetëm do të procedoj”,tha Berisha.
Kryetari i Komunës së Prizrenit, Ramadan Muja, në muajin mars të këtij viti është shpall fajtor dhe është dënuar me dy vjet burgim me kusht nga një trup gjyqësor i EULEX-it në Gjykatën Themelore të Prizrenit.

Bashkë me Mujën fajtor janë shpallur edhe pesë ish-drejtorë të tij, të mandatit të kaluar, por ata janë dënuar më pak se sa shefi i tyre.

Pala mbrojtëse e të akuzuarve ka paralajmëruar ankesë, ndërsa nëse vendimi i shkallës së parë konfirmohet nga Gjykata e Apelit, atëherë në Prizren duhet të zhvillohen zgjedhjet e jashtëzakonshme për kryetar të komunës./PrizrenPress.com/

Prokuroria për Krime Lufte e Serbisë ka në dorë informatat sipas të cilave gjatë luftës në Kosovë, afër Rudnicës (te Rashka, në Serbi) ishin ekzekutuar 82 shqiptarë. Këtë e ka pohuar për TV B92 prokurori për krime lufte i Serbisë, Vlladimir Vukçeviq.

Ai ka thënë se po verifikohet nëse trupat e tyre ndodhen në guroren e Rudnicës, ku po zhvillohen gërmime pas dyshimeve se aty ka një varrezë masive me trupa shqiptarësh, transmeton Koha.net.

Prokurori ka thënë se ata persona janë të evidentuar si të zhdukur “dhe po shikojmë nëse eventualisht trupat e tyre ndodhen në Rudnicë” dhe se “ tash për tash nuk mund të flasim kush e ka bërë këtë”.

Prokurori Vukçeviq ka thënë se dyshimet janë mbështetur në xhirimet satelitore. “Një ekspert danez ka konfirmuar se në atë gurthyese nga xhirimi shihej se kishte dhe të hedhur.

Gërmimet në Rudnicë (afër Rashkës, në Serbi) kanë filluar në fillim të dhjetorit të vitit 2013 dhe aty dyshohet se janë hedhur trupat e 250 shqiptarëve, të vrarë në Kosovë. Aty tashmë janë identifikuar përmes ADN-së trupat e dy shqiptarëve.

Rastin e varrezës masive në Rudnicë, sipas prokurorit serb, e ka zbuluar një dëshmitar i mbrojtur i EULEX-it. Sipas tij në gurthyesin e braktisur Rudnicë më 1999 ishin hedhur trupa shqiptarësh dhe më vonë terreni ishte mbuluar me dhe e asfalt.

Sot në fshatin Gollubovc të Malishevës, edhe zyrtarisht ka filluar ndërtimi i objektit të shkollës fillore në këtë fshat. Gurëthemelin e ndërtimit të shkollës, e vendosi i pari i Malishevës, Ragip Begaj, i cili bashkë me drejtorin e arsimit, Blerim Thaçi dhe drejtorin e urbanizimit, Urim Kastrati, morën pjesë në fillimin e punimeve të objektit të ri të shkollës.

“Unë para marrjes së mandatit për udhëheqjen e Komunës së Malishevës, kam dhënë një pretim, të cilin po e mbaj, e premtim i imi ishte, se do të investoj në zonat më të thella të komunës sonë, në ato zona ku kanë munguar investimet”, tha Begaj, në ceremoninë e fillimit të punimeve për ndërtimin e shkollës së fshatit.

“Urime për shkollën e re, në veçanti për ju nxënës shumë urime, e trashëgofshi shkollën”, tha mes tjerash Begaj, e më pas i porositi mësimdhënësit, që të punojnë në arsimimin e fëmijëve.

Kjo shkollë, ka një hapësirë prej 1300 metra katrorë dhe objekti do ti ketë dhjetë klasa për mësim, ndërsa ndërtimi i saj, sipas kontratës është me kohëzgjatje dy vjeçare. Ndërtimi i shkollës do të bëhet nga buxheti i Komunës së Malishevës dhe kap një shumë 298 mijë euro. Punëkryes i punimeve është N.N.P. “Sinani ING” nga Prishtina.

Fshati Gollubovc, është prej fshatrave më të largëta nga qendra komunale e Malishevës. /PrizrenPress.com/

Komisioni Qendror i Zgjedhjeve dhe Paneli Zgjedhor për Ankesa dhe Parashtresa thonë se partitë politike mbesin fushë e pakontrolluar në aspektin e llogaridhënies financiare. Ato vazhdojnë të shohin shumë zbrazëti në skemën institucionale që mbikëqyr dhe heton aktivitete financiare të subjekteve politike.

Dy segmentet që shqyrtojnë dhe vendosin rreth raportimit financiar të partive politike thonë se skemës i nevojitet një mekanizëm shtesë që kontrollon mirëfilli aktivitetet financiare të tyre.

Bazuar në raportet e financave që partitë politike dërgojnë në Komisionin Qendror të Zgjedhjeve (KQZ), kryetarja e këtij organi Valdete Daka, thotë se nuk ekziston ende kontroll i mirëfilltë financiar në raport me subjektet politike.

“Aktualisht me ligj jemi njëfarë mbledhësi i raporteve financiare që ua dërgojmë Auditorit. Por, vërehet që ka shumë zbrazëti në mekanizmin e kontrollit, që duhet t’i bëjë subjektet politike më llogaridhënëse ndaj publikut”, i ka thënë Daka Radio Kosovës.

Paneli Zgjedhor për Ankesa dhe Parashtresa deri më tani ka shqiptuar mbi 2000 gjoba për parregullsi ndaj partive politike. Totali i këtyre gjobave ka shkuar në miliona euro. Për, këtë arsye ky organ konsideron se aktivitetin financiar të partive politike nuk ka kush ta kontrolloj. Mul Desku, nga PZAP thotë se nevojitet një mekanizëm më serioz kontrolli.

“Këtu mungon një mekanizëm që do të ishte një lloj auditori apo hetuesi i pavarur që heton çdo aktivitet financiar të partive politike. Kjo për të ditur se nga po i marrin ato financa , si po i shfrytëzojnë ato, a po i japin llogari ndokujt dhe a po i kalojnë kufizimet ligjore të kuotave për shpenzime”, ka thënë Desku.

Deri më tani Prokuroria e Shtetit sipas koordinatores Kundër Korrupsionit Laura Pula, nuk ka ndryshuar metodë hetimi të keqpërdorimeve të mundshme të subjekteve politike. Pula i ka thënë Radio Kosovës se po pritet të nënshkruhet serish memorandumi që ishte nënshkruar me segmentet tjera në zgjedhjet e kaluara lokale.

Nëse materia e këtij memorandumi do të jetë e njëjtë, atëherë as prokuroria nuk konsiderohet se disponon gjithë mekanizmat që kontrollojnë mirëfilli aktivitet e paligjshme financiare të partive politike.

Megjithatë në këtë betejë shumica e institucioneve po mbështeten tek Qendra e Inteligjencës Financiare, e cila mund të hetoj transaksionet e mundshme të dyshimta të partive politike.