Në kuadër të përgatitjeve të Zgjedhjeve të Parakohshme Parlamentare 2014 dhe të bashkërendimit të aktiviteteve me institucionet tjera, kryetarja e Komisionit Qendror të Zgjedhjeve, Valdete Daka dhe Kryeshefi Ekzekutiv i SKQZ-së, Enis Halimi, pritën në takim Drejtorin e Përgjithshëm të Policisë së Kosovës, Shpend Maxhuni, i cili shoqërohej nga Drejtori i Departamentit të Operacioneve në kuadër të Policisë së Kosovës, Rashit Qalaj

Fillimisht kryetarja Daka në emër të KQZ-së shprehu falënderime për angazhimin e Policisë së Kosovës në kryerjen me sukses të detyrave në aspektin e sigurisë gjatë procesit zgjedhor edhe në të kaluarën. Në këtë aspekt, Daka shprehu gatishmërinë e Komisionit Qendror të Zgjedhjeve për të bashkëpunuar në vazhdimësi.

Në anën tjetër, Drejtori i Përgjithshëm i Policisë së Kosovës, Shpend Maxhuni tha me këtë rast se Policia e Kosovës ka filluar me përgatitjet e nevojshme në kuadër të përgjegjësive institucionale dhe ligjore që ka dhe do të bashkërendojë aktivitetet me KQZ-në dhe institucionet tjera në funksion të realizimit të suksesshëm të procesit zgjedhor.

Komisioni Qendror i Zgjedhjeve dhe Policia e Kosovës janë në fazën e fundit të hartimit të Planit Operacional të Sigurisë për Zgjedhjet e Parakohshme. /PrizrenPress.com/

Ish kandidati për kryetar të Komunës së Prishtinës nga radhët e AAK-së, Besnik Tahiri, ka mohuar zërat se ai do ta braktisë partinë e Ramush Haradinajt, duke kaluar në një parti tjetër.

Në një bisedë për Indeksonline, Tahiri ka treguar se AAK-në nuk do ta ndërrojë për asnjë rast, duke bërë të ditur se do të jetë kandidat për deputetë në Kuvendin e Kosovës.

“Unë jam kadidat për deputetë në listën e Aleancës për Ardhmërinë e Kosovës, dhe në asnjë formë dhe për asnjë rast nuk do ta ndërrojë partinë. Është një dezinformim i ultë. Garoj me AAK-bë për një drejtim të ri për vendin”, tha Tahiri për Indeksonline.

Tahiri, konsideron se AAK ka programin më të mirin dhe se janë mëse të përgatitur për zgjedhjet.

“AAK asnjëherë nuk ka qenë me e përgatitur se sa këto zgjedhje, garon me kryetarin e vet, ka programin më të mirin, dhe ka predispozita të mira. AAK do të jetë partia më e mirë në Kosovë”, theksoi ai.

Ministri i Mjedisit dhe Planifikimit Hapësinor, Dardan Gashi aksionin e parë në Brezovicë e ka filluar me largimin e rampës në hyrje të Qendrës për Skijim në Brezovicë.

“Ka kohë që qytarët detyrohen të paguajnë jo pak para kur duan ta shijojnë. Kjo rampë dhe ky parking që e ka vendosur Komuna e Shtërpcës janë të paligjshme dhe e habitshme njëkohësisht, sepse parqet nacionale nuk janë pronë komunale, por janë e të gjithë qytetarëve të Kosovës”, ka thënë me këtë rast ministri, Dardan Gashi.

Me një aktvendim të Drejtorisë së Inspektoriatit të Ministrisë së Mjedisit më datë 12.05.2014, urdhërohet Drejtoria e Zhvillimi Ekonomik, Komuna e Shtërpcës që në afat prej 7 ditësh të largoj rampën e vendosur në Hyrje të Qendrës për Skijim në Brezovicë. Në rast të mos veprimit sipas paragrafit I. të këtij Aktvendimi, MMPH do të largoj vetë atë dhe shpenzimet do t’i bartë institucioni i cili e ka vendosur.

“Gjatë javës do të takohem dhe me kryetarin e Ferizajt, nga i cili do të kërkojë që të ndikojë te vartësit e tij të përshpejtojnë procedurat e mbledhjes së dokumentacionit që gjenden në arkivat e kësaj komune, për Brezovicën, dhe t’i dorëzojnë ato te kolegët e tyre nga Ministria e Mjedisit, për të përmbyllë brenda pak ditësh procesin e verifikimit dhe analizave dhe të ekzekutohet ligji përnjëherë”, ka thënë Gashi.

Kundër këtij aktvendimi, pala mund të paraqes ankesë në MMPH në afat prej 8 ditësh. Ankesa kundër këtij vendimi nuk e ndalon ekzekutimin e tij.

Kryetari i Këshillit për Mbrojtjen e të Drejtave dhe Lirive të Njeriut, Halit Barani, nëpërmjet një komunikate ka shprehur shqetësimin, për siç ka thënë ai “përcjelljen që po i bëhet nga zyrtarët e EULEX-it”, gjë të cilën ai e ka vlerësuar si “të njëjtë me atë të policisë serbe”.

“Mbrëmë, më 11.5.2014, në orën 18:51, derisa ishte para shtëpisë sime, erdhi një automjet i policisë së EULEX-it, xhip i kaltër me targa EU-2226, në të cilin ishin dy zyrtarë të EULEX-it. E ndalën xhipin 26 metra larg meje, njëri prej zyrtarëve doli nga xhipi, nxori një fotoaparat dhe me fotografoi mua që isha para shtëpisë sime, në rrugë me dy nipa të mi”, ka shkruar Barani.

Sipas tij, zyrtari në fjalë, pasi i bëri disa fotografime, rrugën, shtëpinë dhe atë, nuk vazhduan rrugën por e kthyen automjetin nga kishin ardhur dhe u larguan në drejtim të qytetit, bënë të ditur BotaPress.

“Vlen të përmendet se njëjtë si këta dy zyrtarë të EULEX-it, kanë vepruar policia dhe udbashët serb, para luftës së Ushtrisë Çlirimtare të Kosovës 1998/99 dhe ushtria franceze në vitet 2000 – 2008. Unë personalisht dhe familja ime, këtë gjest shumë të shëmtuar të dy zyrtarëve në fjalë, e konsiderojmë si provokim dhe presion psikik të paarsyeshëm. Me sjellje të tilla as EULEX-i, as veglat qorre të tij dhe askush tjetër asgjë nuk mund të arrij përveç humbjes së imazhit edhe ashtu të humbur në popullin e Kosovës”, përfundon reagimin Barani.