Pas një takimi disa orësh të hënën mbrëma ndërmjet liderëve të tyre, Isa Mustafa dhe Behgjet Pacolli LDK-ja dhe AKR-ja janë marrë vesh për bashkëpunim ndërmjet tyre, por vetëm pasi të përfundojnë zgjedhjet e 8 qershorit.

“Lidhja Demokratike e Kosovës dhe Aleanca Kosova e Re njoftojnë opinionin publik se kanë zhvilluar takime intensive sa i përket bashkëpunimit për zgjedhjet e 8 qershorit.

Pas takimit të sotëm ndërmjet kryetarit të LDK-së, z.Isa Mustafa, dhe presidentit të AKR-së, z.Behgjet Pacolli, LDK-ja dhe AKR-ja në parim janë pajtuar që programet e të dy palëve kanë ngjashmëri dhe garantojnë zhvillim të Kosovës, në interes të qytetarëve të Kosovës.

LDK-ja dhe AKR-ja do të garojnë të vetme në zgjedhje, ndërkaq detajet e bashkëqeverisjes pas zgjedhjeve do të konkretizohen në ditët në vijim”, thuhet në një njoftim të partisë së Mustafës.

Kreu i PDK’së Hashim Thaçi nuk po lë qoshe të Kosovës pa shkelur si pjesë e fushatës zgjedhore, por është bërë i pakapshëm për anëtarët e partisë së tij.

Ai nuk po u përgjigjet kërkesave të anëtarëve që po kërkojnë të dinë nëse do të mund të jenë kandidatë të PDK’së për deputetë.

Kjo, pasi lideri i partisë ka vendosur që gjithçka rreth zgjedhjeve ta bëjë vetë, duke e anashkaluar kështu Këshillin Drejtues të partisë.

Zyrtar të lartë të PDK’së i kanë thënë Tribunës në kushte anonimiteti, se ky këshill ende nuk ka diskutuar për listën e kandidatëve për deputetë dhe as që është mbledhur, qysh prej kohës kur është vendosur të votohet për krijimin e Gjykatës Speciale për krimet e UÇK’së.

Anëtari i kryesisë së LDK-së Eqrem Kryeziu, ka thënë se do të ishte një fitore shumë e madhe për Kosovën dhe rrugën e saj evropiane po sikur pas këtyre zgjedhjeve të bëhet transferi i pushtetit. Kryeziu ka thënë se LDK-ja është e përgatitur për zgjedhjet e parakohshme parlamentare që do të mbahen më 8 qershor

Ai vazhdon të insistojë se di të ishte në interes të Kosovës një koalicion LDK-PDK i cili do të ofronte garanci për një qeverisje antikorrupsion.

“Në qoftë se do të kishim garanci nga partitë e mëdha, se tani është koha e fundit kur duhet të trembemi nga përgjumja dhe të bëhet një qeveri antikorrupsion, natyrisht se do ta përkrah 100 për qind koalicionin LDK-PDK” ka thënë Kryeziu për Epokën e Re, duke shtuar se, nëse LDK-ja dhe PDK-ja i ofrojnë kuadrot e tyre më të mira, që nuk kanë afera korruptive, atëherë ky koalicion do të ishte në interesin e të gjithëve.

Sipas Kryeziut, oferta e LDK-së për zgjedhjet parlamentar është më e mira, duke thënë se fitorja e LDK-së do të ishte një e mirë për Kosovën.

“Në programin e LDK-së janë angazhuar më shumë se 70 ekspertë të fushave të ndryshme, mbi të cilat mbështetet platforma jonë për Kosovën, e cila mendoj se është më e mira. Të them të drejtën unë jam duke bërë të drejtën edhe unë jam duke bërë një parafushatë të vogël. Do të ishte fitore shumë e madhe për Kosovën dhe rrugën e saj evropiane sikur të bëhej transferi i pushtetit”, ka thënë Kryeziu.

E shtuna e 10 majit për pak sa nuk u bë ditë zie për Zvicrën, por edhe për Kosovën. Aeroplani i kompanisë ajrore “Air Berlin”, i linjës Cyrih-Prishtinë, i cili ishte nisur në orën 6:50 me 150 pasagjerë në bord, i shpëtoi më të keqes falë sportistit të njohur Nehat Llovca, i cili me familje jeton dhe vepron në Solothurn të Zvicrës.

Më poshtë mund ta lexoni rrëfimin e Llovcës, i njohur në karate, kik-boks dhe tay-boks, për Dialog Plus.

“Isha ulur në mes të aeroplanit. Dëgjoja zëra të ndryshëm, edhe britma, por më dukej vetja se jam në ëndërr. Zërat rriteshin gjithnjë e më shumë, prandaj më doli gjumi. E pashë veten me rripin e sigurisë dhe përnjëherë më shkoi dora për ta hequr. Shihja njerëz me lot në sy, të mëdhenj e të vegjël duke qarë, kurse në hyrje të aeroplanit, te dera e parë, një person ishte në këmbë dhe e kishte një shishe në dorë. Herë pas here shihej drita e shkrepëses. U mundova ta qetësoja veten, apo ta freskoja nga gjumi, por menjëherë trupi mu rrëqeth kur dëgjova zërin tij që bërtiste: ‘Allahu ekber! Do të shkojmë në xhenet të gjithë’! Nuk e di se si kam shkuar deri tek ai, ngase isha në mes të aeroplanit. Sapo i jam afruar nuk e kam pyetur asgjë, por vetëm e kam kapur fort. I thashë që të mos lëvizte…

Personi në fjalë e dinte gjermanishten. Ishte aty ndërmjet 35-40 vjeç. Se nga ishte, nuk e di. Nuk e pyeta as për emrin, as se nga vjen. Doja ta ndaloja që të mos e bënte më të keqen. Prandaj, nuk më interesonte se kush është, por vetëm të mos e bënte atë që donte…

Nuk e godita, por e mora me të mirë që të qetësohej, të mos lëvizte. Ai gjithnjë lëvizte dhe më kërkonte që ta liroja. Kur e pashë se po përpiqej të lëvizte dhe nuk kishte gjasa që të më sulmojë, menjëherë u detyrova ta shtrija për toke.

Kur e shtriva në korridorin e aeroplanit, njëra nga stjuardesat m’i afroi prangat dhe e lidha. Njerëzit filluan të qanin edhe më shumë, sidomos fëmijët, vajzat dhe gratë. Por, qanin edhe stjuardesat. U thashë të rrinin rehat, ngase gjithçka është në rregull. Sa e mbaj ashtu të shtirë, ai më kërkonte ta liroja, se tani do të sulmonin shokët që kinse i kishte në aeroplan. Në fakt, ai nuk kishte shokë, por dëshironte të më mashtronte. Nuk e liroja, duke i thënë në rregull, le të vijnë shokët tu, t’i shohim kush janë ata. Por, sinqerisht, më dukej se ishte i ngarkuar psikikisht, se një njeri me gjendje të mirë nuk e bën një gjë të tillë rrezikshme e shumë të rëndë…”, thotë Llovca, i cili nuk e di se çfarë kishte ai në shishe.

“Nuk e kisha mendjen se çfarë ka aty, por doja që të mos ndodhte më e keqja. Fati që u zgjova menjëherë dhe e ndala…

Sapo arritëm në Prishtinë, menjëherë erdhën policët dhe e morën. Policia më falënderoi dhe deshën ta marrin emrin tim, të dhënat e mia. U thashë që nuk ka asnjë problem, ngaqë unë kam ardhur në vendin tim, kurse fati deshi që nuk ndodhi më e keqja. Jam sportist dhe falë Perëndisë, isha shumë i shpejtë…

Piloti më përqafonte, bashkë me ndihmësin, sikur edhe i gjithë ekipi i aeroplanit. Dilnin në foto me mua edhe pasagjerët. Mu duk vetja vërtet një hero”, thekson Nehati nga Llovca e Gjilanit, i cili bashkë me familjen e tij jeton dhe vepron në Zvicër.

Deputetët e legjislaturës tashmë të shpërndarë të Kuvendit të Kosovës, janë ulur gju më gju me popullin për të kërkuar vota për mandatin e ardhshëm.

Kështu ka vepruar këto ditë edhe Nait Hasani, deputet i PDK’së.

Diku në Malishevë, atë e kanë pritur me meze, domate, speca, kurse për pjatë kryesore ka pasur fasule me mish.

Burime të Telegrafit nga AKR bëjnë të ditur se sot do të takohen kreu i LDK-së, Isa Mustafa, dhe lideri i AKR-së, Behgjet Pacolli.

Sipas informatave, takimi do të zhvillohet në ora 21:00, në shtëpinë e Pacollit, ndërsa arsyeja e takimit është negocimi i një koalicioni parazgjedhor.

“Qëndrimet janë përafruar”, thotë burimi.

Kreu i Lëvizjes Vetëvendosje, bashkë me Visar Ymerin, Dardan Sejdiun e Besnik Bislimin kanë dalë në një konferencë ku kanë treguar se si e sheh kjo parti politikën tatimore.

Aty është thënë se Vetëvendosje i bazon politikat fiskale në parimet e drejtësisë dhe barazisë në tatime dhe shpërndarje.
“Politikat fiskale duhet t’i drejtojmë kah stimulimi i prodhimit, investimit e krijimit të vendeve të punës. Ato duhet ta bëjnë balancimin e barrës së financimit të buxhetit, në bazë të të mirave që qytetarët përfitojnë nga paratë publike”.
Përmes një njoftimi për shtyp, është thënë se Vetëvendosje beson se tatimi duhet të jetë progresiv duke rritur të hyrat nga tatimet në të ardhura. Ky nivel progresiv i tatimeve do të zbatohet në vite për të siguruar tranzicionin e nevojshëm të mbledhjes së të hyrave.
“Kështu sigurohemi se shtresa e varfër dhe e mesme do të paguajnë më pak tatime në qeverisjen e Vetëvendosjes. E, shtresa e pasur do të kontribuojë më shumë drejt zhvillimit të vendit, në përputhje me të mirat që i gëzon nga shoqëria.

Ne do ta njehsojmë pagën minimale. Nivelet e tatimit do të lidhen me pagën minimale. Progresioni i tatimeve fillon prej 0% për pagën minimale, në 5% për trefishin e pagës minimale, 10% për pesëfishin e pagës minimale, 20% për dhjetëfishin, dhe 30% për njëzetëfishin e pagës minimale e tutje. Ndërsa taksa korporative do të ketë margjinat e barabarta me taksën mbi të ardhurat”.

Skema aktuale tatimore dhe e qeverisjes së VETËVENDOSJE!-s
Aktualisht skema tatimore për pagat 80-250 Euro, paguhen 4% tatim në të ardhura personale. Nëse Vetëvendosje vjen në pushtet, për pagat 0-170 euro, tatimi në të ardhura duhet të jetë 0%. Për pagat 250-450 euro, aktualisht paguhen 8% tatim në të ardhura personale, ndërsa Vetëvendosje thotës e për paga nga 170-500 euro, tatimi në të ardhura duhet të jetë 5%. Kurse për pagat mbi 450 Euro, paguhen 10% tatim në të ardhura personale, ndërsa sipas VV-së, për pagat 500-850 euro, tatimi në të ardhura duhet të jetë 10%. E vetëvendosje mendon të tatojë me 20 % pagat nga 850-1700 euro, kurse ato që janë mbi 1700 euro, tatimi në të ardhura të jetë 30%.
Sipas VV-së, Bashkimi Evropian lejon dhe rekomandon disa nivele të Tatimit në Vlerë të Shtuar. Duke marrë parasysh gjendjen e rëndë ekonomike e sociale në vend, qeverisja jonë do të implementojë shkallëzimin e Tatimit në Vlerë të Shtuar në Kosovë në tri nivele.
“TVSH do të jetë e përjashtuar për prodhimet ushqimore bazë të jetës në Kosovë, pra për bukë, vaj, kripë, sheqer, qumësht, miell e libra. Ndërsa produktet që konsiderohen si më luksoze do të rriten deri në shkallë prej 20 për qind, në nivel me shumë shtete të BE-së. TVSH është tatim në konsum, me të shpërblehet apo ndëshkohet një aktivitet i caktuar. Ne do ta përdorim për të stimuluar apo destimuluar aktivitete të caktuara. Qeverisja jonë do të largojë TVSH-në në arsim, si dhe do të lehtësojë nga TVSH të gjitha aktivitetet arsimore me interes për shoqërinë”.
Kosova ka një shkallë prej 10 për qind tatimi në fitim. Vetëvendosje thotë se tatimi në fitim do të rivlerësohet.
“Kjo politikë tatimore do të përdoret nga qevrisja jonë për të stimuluar hapjen e vendeve të reja të punës. Me shkallëzimin Qeveria jonë do të ofrojë lehtësime tatimore për investimet që synojnë aktivitete prodhuese dhe hapjen e vendeve të punës. Çdo kompani që dëshmon riiinvestimin e fitimit për hapjen e vendeve të reja të punës, sidomos në prodhim, do të lirohet nga tatimi në fitim”.
Vetëvendosje thotë se edhe tatimi në pronë do të rivlerësohet për të balancuar barrën e tatimit në mes të popullatës sipas të mirave që përfitojnë nga shoqëria si dhe duke marrë parasysh nevojën e Kosovës për të punuar tokat bujqësore. Si rrjedhim, tokat e papunuara do të tatohen më lart.
“Kjo do të bëhet me qëllim të motivimit për ta punuar tokën”, thotë Vetëvendosje.
Nëse Vetëvendosje do të qeveriste, thotë se përpos masave institucionale për luftimin e informalitetit, si metodë tjetër për forcimin e raporteve në marrëdhëniet e punës parasheh subvencionimin progresiv tatimor për punëdhënësit që punësojnë punëtorë të rinj dhe ata ekzistues, sipas numrit dhe statusit të ndërmarrjes sipas kësaj shkalle: Nga 1 deri 10 të punësuar – 1% të lirimit në tatime për çdo të punësuar; Nga 11 deri 50 të punësuar – 0,5% lirimit në tatime për çdo të punësuar; Mbi 51 deri 200 të punësuar – 0,3% lirimit në tatime për çdo të punësuar; Mbi 200 të punësuar – 0,1% lirimit në tatime për çdo të punësuar.