Mëson se Kryetari i Partisë së Drejtësisë, Ferid Agani, ka thirrur një mbledhje të Kryesisë së PD-së për nesër në ora 17:00, ku temë do të jetë shkarkimi i deputetit Gëzim Kelmendi nga detyra e nënkryetarit të partisë.

“Nesër në mbledhje të Kryesisë do të diskutohen qëndrimet e deputetit Gëzim Kelmendi, i cili është shprehur publikisht se nuk do ta votoj kryeparlamentarin e propozuar nga PDK-ja dhe javën e kaluar është tërhequr nga Grupi Parlametar i PDK-së. Ne nuk jemi krejt dakord me vendimin e tij për mos votimin e kandidatit për Kryetar të Kuvendit të propozuar nga PDK-ja. Mirëpo, jemi kategorikisht kundër që një deputet të shkarkohet dhe largohet nga PD-ja për shkak të raportit të tij ndaj një partie tjetër, në këtë rast PDK-së, sepse në fund të fundit PDK-ja e ka shkelur premtimin për ndryshimin e Udhëzimit Administrativ që ndalon vajzat me mbulesë të vijojnë mësimin”, tha një zyrtar i lartë i PD-së për Veriu.info.

Ai thotë se deputeti Gëzim Kelmendi, i cili njëherësh është edhe nënkryetar i PD-së, ka mbështetje të fuqishme të strukturave të PD-së, përfshirë edhe disa prej nënkryetarëve të partisë dhe një pjesë të Kryesisë.

“Nëse kalon propozimi i kryetarit Ferid Agani në mbledhjen e nesërme të Kryesisë, atëherë kjo çështje do t’i kaloj Këshillit Drejtues të partisë për ta vendosur”, thotë zyrtari i lartë i PD-së për Veriu.info.

Burimet të Veriu.info bëjnë të ditur se ky veprim i Ferid Aganit, është një lloj mase paraprake e tij, në mënyrë që deputeti Gëzim Kelmendi të mos mundet ose t’i vështirësohet shumë mundësia për t’i bërë konkurrencë në garën për kryetar të PD-së, në zgjedhjet e brendshme partiake të cilat pritet të zhvillohen pas disa muajsh.

Lideri i LDK-së, Isa Mustafa ka thënë se nuk e pengon askë të shpreh mendimin e tij, porse marrëveshja e koalicionit opozitar nuk ndryshon. Mustafa ka folur pas takimit disa orësh të bllokut opozitar me përfaqësues të minoriteteve jo serbe.

“Biseduam dhe e konfirmuam që të vazhdojmë me projektin e përbashkët të koaliciont tonë. Duhet bërë ndryshime në qeverisjen e këtij vendi”, ka thënë Mustafa.

“Jemi të vendosur që ta shfrytëzojmë që sa më shpejtë ta gjejmë një zgjidhje”, ka thënë më tej lideri i LDK-së.

Isa Mustafa i ka hedhur poshtë kështu mendimet e disa prej zyrtarëve të partisë së tij se është ai që duhet të emërohet kryeministër e jo Ramush Haradinaj i cili është i nominuari zyrtar i koalicionit opozitar.

Ndërkaq, lideri i AAK-së, iu ka thënë gazetarëve se “iu sigurojmë që kjo situatë nuk do të shkojë deri në pakufi”.

Në bazë të planit strategjik për bashkëpunim ndërinstitucional mes Prokurorit të Shtetit dhe agjencive që zbatojnë ligjin në Kosovë në luftimin e krimit të organizuar dhe korrupsionit, sot u.d i Kryeprokurorit të Shtetit, Sylë Hoxha, ka pritur disa nga përfaqësuesit e këtyre agjencive.

Gjatë takimit ata kanë biseduar për ngritjen e mëtutjeshme të bashkëpunimit dhe koordinimit në mes të Prokurorit të Shtetit me këto agjenci, në luftë kundër korrupsionit, krimit të organizuar dhe kriminalitetit në përgjithësi.

Në këtë takim ishin, drejtori i Doganave të Kosovës, Lulzim Rafuna, zëvendësdrejtori i Përgjithshëm të Administratës Tatimore të Kosovës, Nahit Shala, drejtori i Njësisë së Inteligjencës Financiare, Dardan Nuhiu dhe drejtori i Agjencisë Kundër Korrupsion, Hasan Preteni.

Në një komunikatë për media nga Prokuroria e Shtetit thuhet se gjatë këtij takimi u bisedua për hapat që janë marrë lidhur me zbatimin e planit strategjik për bashkëpunim ndërinstitucional dhe hapat konkret që do të merren në luftë kundër korrupsionit dhe krimit të organizuar, me qëllim të arritjes se rezultateve konkrete.

Vëmendje e veçantë gjatë takimit thuhet se iu kushtua luftës kundër krimeve ekonomike, (shpëlarja e parasë, evazioni fiskal etj.), me ç’rast u vlerësua se institucionet tanimë kanë krijuar disa mekanizma të cilat janë duke punuar në luftë kundër krimeve ekonomike dhe dukurive tjera kundërligjore.

“U.d, kryeprokurori Hoxha, tha se është i kënaqur me bashkëpunimin dhe bashkërendimin e veprimeve në mes të Prokurorit të Shtetit dhe agjencive që zbatojnë ligjin në Kosovë dhe shtoi se hapat konkret që janë ndërmarrë dhe ato që pritet të ndërmerren në të ardhmen, do të ndikojnë në ngritjen e efikasitetit në luftë kundër korrupsionit dhe krimit të organizuar”, thuhet në komunikatë.

Në anën tjetër, përfaqësuesit e agjencive pjesëmarrëse të takimit vlerësuan angazhimin e Prokurorit të Shtetit në koordinimin dhe bashkërendimin e aktiviteteve të përbashkëta në luftë kundër të gjitha dukurive kundërligjore.

Kryeministri i Kosovës, Hashim Thaçi, ka thënë se të gjithë duhet ta respektojnë Kushtetutën e Kosovës dhe ligjet dhe i gjithë spektri duhet të reflektoj ne interes të vendit dhe të qytetarëve të Kosovës.

Ai ritheksoi se kanë organizuar zgjedhje fer dhe të lira e po ashtu do t’i japin një përgjigjen më të mirë të mundshme qytetarëve të Kosovës për ndërtimin e institucioneve stabile, efikase dhe të cilat do të punojnë për zhvillim ekonomik, rritjen e vendeve të reja të punës dhe integrimin e Kosovës ne BE dhe NATO.

Thaçi tha se do të vazhdojnë ta realizojnë ‘Misionin e Ri’ për të cilin tha se edhe rruga që po fillon Deçan-Plavë është pjesë e ‘Misionit të Ri’.

Kryetari i Komunës së Gjilanit, Lutfi Haziri, njëherësh anëtar i Kryesisë së Lidhjes Demokratike të Kosovës (LDK), duke i komentuar deklaratat e deputetit të zgjedhur të LDK-së, Arben Gashi, i cili ka kërkuar që marrëveshja në mes partive të VLAN-it të rishikohet, ka theksuar se mendimi ndryshe është vlerë të cilën e ka LDK-ja.

Sipas tij, deklarimet e deputetit të LDK-së nuk e prekin veprimin politik dhe unitetin veprues.

Nuk ka të bëjë as me ndarje nga politikat dhe uniteti që e ka ndërtuar Isa Mutafa si kryetar i LDK-së.

“Gashi ka shprehur, sipas asaj qe unë lexoj, disponim qytetar që zgjidhja më i mirë do të ishte nëse Isa Mustafa do të ishte kryeministër. Për këtë qëllim LDK-ja e ka nominuar gjatë zgjedhjeve të 8 qershorit, mirëpo situata pas zgjedhjeve ka ndryshuar, duke ndryshuar kështu edhe pozicioni dhe kërkesa politike qe vetë i pari i LDK-së e ka thënë (marrëveshje me partnerët e VLAN-it që ai të jetë kandidat për kryeparlamentar). Partia jonë ka një demokraci të brendshme, gjë të cilën e tregon edhe rasti i shprehjes së mendimit të deputetit Arben Gashi”, ka thënë Haziri për Telegrafin.

Ndërsa, i pyetur se a mund të ndodhë që deklarimet e Gashit, të ndikojnë që të rritet zinxhiri i kundërshtimeve brenda partisë, ai ka thënë se, “LDK-ja, pavarësisht mendimit ndryshe, është shumë kompakte në vendimit të cilat i merr”.

“Andaj unë besoj se marrëveshja do të vazhdoj të respektohet, sepse edhe në Kryesi edhe në Këshill të Përgjithshëm, pavarësisht mospajtimeve, për veprimet politike ka unitet, unitet të cilin e ruan një logjikë politike e unifikimit dhe e konsistencës të cilin LDK-ja e ka vendosur”, ka theksuar Haziri.

Ndryshe, deputeti i zgjedhur i LDK-së, Arben Gashi, ka deklaruar për media se kërkesa e tij që i pari i LDK-së të jetë kandidat për kryeministër, “është mendim personal i thënë me zë të lartë po që thuhet nga shumica e anëtarësisë së LDK-së”.

Kryetari i Prizrenit, Ramadan Muja, gjatë hartimit të buxhetit për vitin 2015-2017-të më shumë është kujdesur për të rritur luksin për vete, se sa për të përmisuar jetën e qytetarëve.

Buxheti për Zyrën e kryetarit të Komunës së Prizrenit, krahasuar me të kaluarin, për vitin 2015-20170-të është rritur për 42.27 për qind. Ky buxhet javën e kaluar është votuar edhe nga asamblistët e Kuvendit Komunal.

Ndërkaq, partitë opozitare e akuzojnë kryetarin Muja se me këtë buxhet më shumë e ka rritur luksin e tij personal, se sa që ka mbështetur interesat e përgjithshme të qytetarëve.

Asamblisti i Bashkimit Demokratik, Osman Hajdari thotë se kryetari Muja më shumë e ka rritur buxhetin për vete se sa që ka subvencionuar zhvillimin ekonomik dhe bujqësin.

“Ne konsiderojmë se rritja e buxhetit për Zyrën e Kryetarit është i paarsyeshëm”, thotë Hajdari. Sipas tij, buxheti komunal është dashur të ndahet në mënyrë më racionale.

“Nëse e marrim parasysh varfërin e qytetarëve, rritja e buxhetit për Zyrën e Kryetarit është një llukës”.

Edhe asambleistja e Lëvizjes Vetëvendosje! Drita Millaku thotë se kryetari i Prizrenit, Ramadan Muja me këtë buxhet më shumë e ka shtuar llukësin e tij, se sa që ka përmisuar jetën e qytetarëve.

“Zyrës së Kryetarit nuk i janë shtuar nevojat për rritje, përpos nëse nevojë konsiderohet superluksi”, thotë Billaku. /PrizrenPress.com/