Konkursi për pranimin e studentëve në afatin e dytë për studimet themelore në vitin akademik 2014/2015, i cili do të shpallej sot, është shtyrë për një ditë tjetër.

Kjo, pasi që gjatë mbledhjes së sotme të senatit, ku edhe do të miratoheshin propozimet nga fakultetet për vendet e lira, dikush ka penguar mbledhjen.

Burime të KosovaPress-it, bëjnë me dije se kanë qenë një grup i studentëve të pavarur që po kundërshtojnë zgjedhjen e rektorit të ri Ramadan Zejnullahut, që kanë penguar mbledhjen e senatit, duke hyrë në sallë dhe duke penguar mbajtjen e kësaj mbledhje.

E si pasoj e kësaj, Universiteti i Prishtinës “Hasan Prishtina”, nuk ka mundur të shpallë konkursin për pranimin e studentëve në afatin e dytë.

Anëtarët e Kuvendit Komunal të Prizrenit, me shumicë votash kanë miratuar vendimin për shpalljen patundshmërisë ku gjendet kinemaja “Lumëbardhi” si pronë me interes publik. Mirëpo përkufizimi i nenit 1 të këtij vendimi është kundërshtuar nga anëtarët e lëvizjes “Vetëvendosje”, për shkak se në arsyetimin e arritjes së qëllimit publik mes tjerash figuron edhe “zgjerimi i rrugës”. Ndërkohë gjatë ditës kanë reaguar edhe nëntë organizata të shoqërisë civile, të cilat kanë shprehur qëndrimin se kinemaja ‘Lumëbardhi’ nuk mbrohet duke rrënuar pjesë të objektit”.

Artan Abrashi i VV-së ka insistuar që përshkrimi “zgjerimi i rrugës” të largohet nga vendimi i KK-së mbi shpalljen e interesit të përgjithshëm publik.

“Prejudikimi i tillë nuk është i dobishëm për dokumentin me të cilin shpallet interesi i përgjithshëm publik”, ka thënë ai, i cili para anëtarëve të organit më të lartë komunal, teksa ka lexuar edhe qëndrimet e shoqërisë civile, pasi që kërkesa e tij që të ftohet ndonjë përfaqësues i këtyre organizatave kishte hasur në vesh të shurdhër.

Por kjo përpjekje e tij nuk ka gjetur përkrahjen e këshilltarëve, të cilët kanë shprehur qëndrimin se ky vendim shërben vetëm për shpalljen e interesit të përgjithshëm publik, pra synon ndërprerjen e privatizimit, derisa destinimi i kësaj hapësire përcaktohet në fazat e mëvonshme.

“Arsyetimi shërben vetëm për vendimin e shpalljes së interesit dhe nuk ka të bëjë me destinimin e objektit”, ka deklaruar Osman Hajdari i Bashkimit Demokratik, duke shtuar se po të prezantohej një dokumentacion më i plotë, atëherë nuk do të kishte nevojë për këtë debat.

Kryesuesi i KK-së, Kujtim Gashi, ka theksuar se këtë çështje ia ka sqaruar edhe përfaqësuesve të shoqërisë civile me të cilët është takuar një ditë më parë. “Si po duket edhe ata po duan të formojnë parti politike”, ka thënë Gashi. Ndërkohë Mybera Mustafa e LDK-së ka theksuar se ky subjekt politik ndan shqetësimet e shoqërisë civile. “Pas shpalljes së interesit publik shpresoj që të respektohen ligjet dhe të mos ketë ndërrim të destinimit të Kinemasë”, ka shtuar ajo.

Në anën tjetër organizatat e shoqërisë civile në Prizren kanë bërë të ditur se ndonëse janë dakord me përpjekjen e Komunës për të shpallur kinemanë “Lumëbardhin” si hapësirë të interesit të përgjithshëm publik, për të ndaluar procesin e privatizimit, ato nuk pajtohen me çfarëdo tentimi për të rrënuar ndonjë pjesë të caktuar të këtij objekti.

“Propozimi i kryetarit të Komunës së Prizrenit që Kuvendi i Komunës të shpallë kinemanë ‘Lumëbardhi’ si hapësirë të interesit të përgjithshëm publik (shoqëror), ndër veprimet e propozuara pas dhënies së këtij statusi përmend edhe ‘zgjerimin e rrugës’. Ndërmarrja e këtij veprimi është në kundërshtim të drejtpërdrejtë me qëllimin e shpalljes së kësaj hapësire si zonë e interesit të përgjithshëm publik, pasi që zgjerimi i rrugës nënkupton rrënim (dhe eventualisht rindërtim) të pjesës së mbyllur të kinemasë ‘Lumëbardhi’”, thuhet në deklaratën e nënshkruar nga Trashëgimia Kulturore pa Kufij, Leo’s Art Organization, DokuFest, X40, EC Ma Ndryshe, Fondacioni Legatum, N’GO, Caritas Switzerland dhe Instituti Demokratik i Kosovës.

Argumenti kundërshtues ndaj përpjekjeve për të rrënuar dhe ndryshuar strukturën aktuale të objektit, respektivisht pjesës së mbyllur të kinemasë “Lumëbardhi” i OJQ-ve është i bazuar në disa parime.

Parimi i parë, sipas tyre, janë vlerat e trashëgimisë kulturore, pasi që, sipas Ligjit të Trashëgimisë Kulturore dhe Rregullores përkatëse, për t’u përfshirë në listën e trashëgimisë kulturore mjafton të plotësohet njëra prej këtyre kritereve (vlerave): historike, arkeologjike, artistike, shkencore, shoqërore, shpirtërore, teknologjike dhe rariteti.

“Kinemaja ‘Lumëbardhi’ plotëson së paku katër nga këto kritere: historike, shoqërore, teknologjike dhe rariteti”, thuhet ndër të tjera në reagimin e shoqërisë civile, përderisa bëhet me dije se po përgatitet dokumentacioni për t’i propozuar Ministrisë së Kulturës përfshirjen e kinemasë “Bistrica” në listën e trashëgimisë kulturore.

Arsyeja e dytë, sipas tyre, është mbrojtja që i garantohet objektit me planin e konservimit, i miratuar nga Kuvendi i Komunës në vitin 2008, që e vendos kinemanë “Lumëbardhi” në hierarkinë më të lartë të objekteve që duhen mbrojtur, duke e barazuar për nga rëndësia monumentale me Kompleksin e Lidhjes së Prizrenit.

“Ky dokument parasheh ruajtjen e strukturës ekzistuese të objektit të Kinemasë, bashkë me funksionin (destinimin) që ka si hapësirë kulturore/filmike (kinema). Plani i konservimit është akt ligjor i Komunës së Prizrenit dhe shkelja e tij nënkupton vepër penale.

Sipas Kodit Penal të Kosovës, kushdo që dëmton ose shkatërron monumentin ose objektin e mbrojtur kulturor, historik, fetar, shkencor apo natyror, dënohet me gjobë ose me burgim deri në dy vjet”, vazhdon qëndrimi i OJQ-ve.

Vlera e tretë, sipas aktivistëve, është se kinemaja “Lumëbardhi” është hapësira më e rëndësishme e skenës kulturore të Prizrenit, pasi që në të kanë lindur dhe janë zhvilluar një numër i madh i festivaleve të qytetit. Përveç vlerave të trashëgimisë kulturore, kinemaja “Lumëbardhi”, sipas tyre, është shndërruar edhe në një shënjues kulturor, pasi që është njëra nga pikat e referimit më të njohura në Qendrën Historike të Prizrenit. Po ashtu vendimmarrësit janë përkujtuar për peticionin e qytetarëve, i nënshkruar më 2007 nga mijëra qytetarë./koha ditore/

Ka vendosur të improvizojë. Moti i ftohtë i Beogradit nuk e ka penguar që lëvizjet e zërit prej këngëtareje dhe lojën me grimasën prej një aktoreje ti bashkojë në performancën e saj. Derisa jashtë sallës ku ajo do të performonte një gup i qytetarëve serbë protestuan pikërisht për ardhjen e saj, Rona Nishliu ka zgjedhur që në Beograd me vete të marrë edhe perlat e Nexhmije Pagarushës e Tefta Tashko Koços.
Nishliu ka nisur kështu performancën e saj në kuadër të festivalit “Mirdita, Dobar Dan”, festival ky që sivjet vjen me edicionin e tij të parë, ky në kujtim të aktorit kosovar me famë botërore Bekim Fehmiu i cili një pjesë të mirë të bagazhit të tij artistik e shkriu pikërisht në kryeqytetin serb.
Rona, e thjeshtë në një fustan të zi dhe me një kontakt të mrekullueshëm me publikun nën shoqërimin e Gent Rushit ka sjellë lojën e saj me xhezin, improvizimet e saja që dikur i bënte në kuadër të DAMFestival në Prishtinë, tendencën që të mishërohet me nota e mimikë, drejt melodive të cilat ndër vite, sipas saj, kanë ndihmuar në formimin dhe avancimin e këngëtarëve shqiptarë.

“Moj e bukura more”, “Një lule”, “Me motive tona” dhe melodi të tjera erdhën në gati dy orë realizim skenik nga Rona e shoqëruesi i saj. Është kthyer dy herë në skenë më duartrokitjet e publikut, krejt në fund për ta sjellë perlën e saj, “Suus”-in që bëri krenarë të gjithë shqiptarët.

“Bekim Fehmiu ka qenë një njeri që i ka dhënë shumë kulturës sonë, dhe jo vetëm. Jam ndier shumë mirë kur e kam marrë ftesën sepse kjo tregon se ky shtet pranon atë që unë bëj dhe atë që unë jam, kjo shumë me rëndësi për mua” shton Nishliu për KultPlus pas performancës në objektin e Orkestrës Filarmonike të Beogradit.

“Jam e sigurt se kjo performancë sot i hap rrugë një festivali dhe prezantimeve e debateve tjera në këtë iniciativë” shton Nishliu. Koncerti ka sjellë melodi që për Nishliun dhe Rushin sjellin në retrospektivë një periudhë të caktuar të formimit të tyre si artistë.

“Ky lloj i improvizimit na lejon të luajmë, na jep liri që të shprehim vullnetin tonë. Është një rezultat i gjendjes emocionale, aty ku xhezi përzihet me motive tradicionale të muzikës sonë. Sa herë e kemi luajtur, pas cdo prezantimi kemi pasur reagime interesante” shton Nishliu.

Performanca është e para shenjë se festivali po nis. Në po këtë sallë të enjten në mbrëmje është gjendur edhe Branka Petric, bashkëshortja e legjendës Bekim Fehmiu.
“Dikush më pyeti se çka do të thoshte Bekimi po të ishte gjallë sot. Unë e di se ai do të befasohej por edhe do të ndihej i lumtur me pritjen dhe këtë që po bëjnë edhe Kosova edhe Serbia për të” ka shtuar Petric.

“Ai ka thënë gjithmonë se artistët duhet të japin maksimumin e tyre në skenë. Këngëtarja që sot ishte në skenë bashkë me shoqëruesin e saj e bënë po këtë gjë. Unë mendoj se shoqëritë tona nuk kanë përparuar shumë, ato duhet ndaluar e biseduar mes vete” shton Petric.

Për KultPlus dhe rreth protestës së vogël të ndodhur në qendër të Beogradit, kjo para objektit të Filarmonisë së Beogradit, Millenko Dereta nga festivali ka treguar se protesta ka qenë e vogël dhe në orën 19:30, gjysmë ore para nisjes së festivalit, ka pasur një grup të vegjël njerëzish që janë ngritur kundër kësaj ngjarjeje, por nuk ka penguar në mbajtjen e koncertit. Sipas tij, është pritur edhe më shumë por për këtë është lajmëruar Policia e Beogradit e cila natën e koncertit ka qenë e pranishme në numër të madh jashtë e përreth objektit të Filarmonisë së Beogradit.

Endien, një djalë i ri nga Belgjika i cili këtyre ditëve ka realizuar një turne nëpër Ballkan, krejt rastësisht u gjend në këtë hapje festivali. Për KultPlus ai tregon se është premtuese që një festival i tillë synon të qetësojë një marrëdhënie që për shumë kohë është e ftohtë dhe e tensionuar.
“Jam shumë i befasuar që ky festival po organizohet. Kam parë jashtë disa njerëz që po protestonin, por kam parë edhe agjendën e festivalit dhe më vjen mirë që me anë të diskutimeve kulturore po synohet të thehet një urrejtje e mbjellë shumë kohë më parë. Diskutimi në nivele të ndryshme e lehtëson procesin” pohon belgu Endien.

Festivali vazhdon sot me debatin mbi dekonstruktimin e të kaluarës së përbashkët, më vnë me prezantimin e Blerta Zeqirit dhe krejt në fund të ditës janë dy paraqitje të shfaqjes teatrale “Dilerat” nga Bekim Lumi, në Qendrën Kulturore REKS. / KultPlus.com