Këshilltari i presidentes së Kosovës Arbën Vllahiu, thotë se vendi është në një periudhë kohore kur është i domosdoshëm krijimi i institucioneve.

Thotë se mungesa e institucioneve po e pengon edhe punën ë e institucioneve të tjera dhe vetë rrugën dhe bashkëpunimin e Kosovës me faktorin ndërkombëtar. Tha se qëllimi i takimeve në presidencë është lehtësimi i dialogut në mes të partive.

“Në këtë fazë ta quaj kritike që jemi sot ka qenë e domosdoshme që presidentja në kuadër të kompetencave të saj kushtetuese që ka të bëjë me rolin e saj kushtetues si faktor i unitetit të popullit të Kosovës dhe gjithashtu si garantues i funksionimit demokratik të Kosovës të t;i fitoj dhe t””i ulë në tavolinë liderët e partive parlamentare për të dëgjuar prej tyre se çfarë kanë për të thënë dhe cilat janë mënyrat që ata propozojnë për të gjetur zgjidhjen për këtë çështje”, tha Vllahiu për RTK.

Sipas Vllahiut janë vetë deputetët të cilët duhet të gjejnë zgjidhjen në bazë të lifjeve dhe Kushtetutës.

“Po e ritheksojmë edhe një herë faktin se janë deputetët e Kuvendit e Kosovës të cilët bazuar në Kushtetutën e Republikës së Kosovës, bazuar në ligjet e Kosovës, bazuar në vendimin e Gjykatës Kushtetuese duhet të gjejnë forcën duhet të gjejnë guximin që të gjejnë zgjidhjen brenda institucionit të cilin e përfaqësojnë dhe për të cilin janë zgjedhur apo janë votuar nga qytetarët e Kosovës”, tha Vllahiu.

Presidentja e Kosovës, Atifete Jahjaga, ka lëshuar një komunikatë për media pas takimit që pati me partitë parlamentare.
Jahjaga ka thënë se deputetët e Kuvendit të Kosovës kanë përgjegjësinë e tyre në zgjidhjen e çështjeve brenda Kuvendit të Kosovës.

Më poshtë mund ta lexoni njoftimin që e ka dërguar Zyra e Presidentes.

“Presidentja e Republikës së Kosovës, zonja Atifete Jahjaga, ka ftuar në takime të veçanta liderët e partive politike parlamentare për të diskutuar për zhvillimet pas mbajtjes së seancës së sotme konstituive të Kuvendit të Kosovës. Në takime të veçanta kanë marrë pjesë udhëheqësit e PDK-së, me kryetarin Hashim Thaçi, të Listës Sërpska, të udhëhequr nga zotëri Slobodan Petrovic, të grupit parlamentar Gjashtë Plus, të LDK, AAK, Nisma, Lëvizja Vetëvendosje, të përfaqësuar nga zotëri Isa Mustafa, zotëri Ramush Haradinaj, zotëri Fatmir Limaj dhe zotëri Albin Kurti, si dhe deputetët e komuniteteve të tjera të përfaqësuar në Kuvendin e Kosovës.

Presidentja Jahjaga, në kuadër të kompetencave të saj kushtetuese, si garantuese e funksionimit demokratik të institucioneve dhe faktor i unitetit të popullit, në takimet me udhëheqësit e partive politike parlamentare ka theksuar se konstituuimi i institucioneve të Kosovës është domosdoshmëri për të çuar përpara proceset nëpër të cilat po kalon vendi. Ajo tha se deputetët e Kuvendit të Kosovës kanë përgjegjësinë e tyre në zgjidhjen e çështjeve brenda Kuvendit të Kosovës, duke u bazuar në Kushtetutën dhe ligjet e vendit dhe në respektim të vendimit të Gjykatës Kushtetuese.

Presidentja Jahjaga tha se takimet e sotme zhvillohen me qëllim të lehtësimit të diskutimeve me forcat politike për gatishmërinë e deputetëve të Kuvendit për të gjetur zgjidhje për formimin e institucioneve të reja të vendit”, thuhet në kumtesën e lëshuar nga Presidenca e Kosovës.

Ka filluar takimi i Bllokut LDK-AAK-Nisma dhe VV, me presidenten e vendit.

Edhe pse të ftuar veçmas, liderët e katër partive të Bllokut, kanë vendosur të shkojnë së bashku.

Ky takim erdhi pas ftesës urgjente që presidentja u bëri partive politike, pas dështimit për zgjedhjen e kryeparlamentarit.

Mahir Yagcilar : Zgjidhja të gjendet brenda kuvendit

Kryetari i Partisë Demokratike Turke të Kosovës, KDTP, Mahir Yagcilar takoi Presidenten Atifete Jahjaga.

Yagcilar, tha se me presidenten Jahjaga u konsultua rreth gjendjes politike të krijuar së fundmi në Kosovë ndërsa theksoi se Grupi 6 + do të pranojë çdo zgjidhje që është në përputhje me Kushtetutën.

Sipas tij, do të ishte me rëndësi që zgjidhja të gjendet brenda Kuvendit.

VLAN në ora 16:00 te presidentja

Kryetarët e VV-LDK-AAK-NISMA, do të shkojnë bashkë në takim te Presidentja Atifete Jahjaga.

Takimi i VLAN-it me Presidenten do të fillojë në ora 16:00.

Presidentja takon Listën Serbe

Pas takimit me kryeministrin në detyrë, Hashim Thaçin, presidentja takoi deputetët e Listës Srpska, Aleksandar Jabllanoviq, kryetari i Partisë Liberale Serbe, Sllobodan Petroviq dhe Goran Rakiq, kryetar i Mitrovicës Veriore. Përfaqësuesit e Listës Srpska nuk u prononcuan pas takimit.

Kuçi: Tash duhet t’i jepet mundësia presidentes

Ka përfunduar takimi në mes të presidentes dhe përfaqësuesve të Partisë Demokratike të Kosovës. Në takim, përveç Thaçit kanë qenë edhe dy nënkryetarët e PDK-së, Kadri Veseli dhe Hajredin Kuçi.

Hajredin Kuçi pas takimit theksoi se takimi është mbajtur me ftesë të presidentes, më qëllim që t’i dëgjojë opinionet lidhur me hendekun politik dhe nevojën për zgjidhje adekuate.

“Ne si parti politike i jemi përgjigjur pozitivisht ftesës së presidentes dhe tani do të jemi pjesë aktive, konstruktive që t’i ndërtojmë institucionet mbi bazën e vullnetit të qytetarëve. Mandati i presidentes si simbol i unitetetit politik dhe garantues i funksionimit kushtetues të institucioneve, ne e respektojmë dhe në këtë drejtim ne do të marrim pjesë. Edhe në këtë takim dhe në takime tjera, kushdo që ka vullnet të mirë. Por është obligim kushtetues t’i përgjigjemi presidentes. Mendoj se është faza fillestare, ku secili duhet ta jap mendimin e vet. Pastaj, është faza tjetër që secili duhet t’i bëjë kompromiset e veta. PDK do të jetë konstruktive. Do të jetë ajo që respekton vullnetin e qytetareve dhe kushtetutën”, tha ai.
Kuçi tha se tash duhet t`i jepet mundësia dhe mbështetja adekuate presidentes.

Presidentja thërret në takim liderët e partive

Ky takim është thirrur, pas ndërprerjes së seancës konstituive, ku dështoi të zgjidhjet kandidati i PDK-së, Arsim Bajrami, në pozitën e Kryetarit të Kuvendit.

Kryetari i NISMA-s ka theksuar se pavarësisht gjendjes politike në të cilën po gjendet, Kosova nuk po shkon drejtë një krize parlamentare.
Megjithëse kryetari i NISMA për Kosovë, Fatmir Limaj nuk ishte pjesë e seancës së sotme konstituive të Kuvendit të Kosovës pasi që ishte prezent në seancën gjyqësore për rastin ‘Kleçka’, ai komentoi për rrjedhën e seancës në Kuvend.

E sipas tij, ajo që ka ndodhur sot në seancë ishte e pritur nga të gjithë dhe se sot edhe një herë është bërë e ditur shumica parlamentare.

Sipas tij, duhet të gjendet sa më shpejtë një zgjidhje dhe vendit t’i kthehen institucionet. Por ai ka thënë se nuk është zgjidhje mbajtja e zgjedhjeve tjera parlamentare.

“Tash pasi që PDK-ja e ka shfrytëzuar mundësinë dhe të drejtën e vet që i ka dhënë gjykata për të propozuar kandidatin e saj, u pa se nuk i kanë votat dhe duhet t’i jepet mundësia deputetët të gjejnë zgjidhje dhe kështu ta kenë një kandidat të pranueshëm ku do të votohet nga shumica e deputetëve të Parlamentit të Kosovës, pavarësisht kush do të jetë ai”, ka thënë ai.

Pavarësisht gjendjes politike në të cilën po gjendet Kosova tani, Limaj nuk mendon se vendi po shkon drejtë një krize parlamentare.

“Problemi i krizës parlamentare është kur asnjëra palë nuk ka mundësi dhe hapësirë për të formuar qeverinë, mungojnë shumica parlamentare. Në Kosovë nuk është kjo, nuk është ky rast”, ka vlerësuar Limaj.

Limaj këto komente i bëri pas ndërprerjes së seancës gjyqësore në Gjykatën e Apelit në Prishtinë, e cila nuk vazhdoj për shkak të ankesave nga ana mbrojtëse e të akuzuarve.

Sipas këtyre të fundit, kolegji gjyqësor ka marrë rolin e prokurorit dhe nga ai kërkuan që të tërhiqet.