Gati tre muaj nga zgjedhjet e 8 qershorit, partitë ende nuk po mund të bien dakord rreth krijimit të institucioneve të reja.

Edhe pse Gjykata Kushtetuese konkludoi se pati shkelje gjatë seancës konstituive të 17 korrikut, partitë politike nuk ndryshuan qëndrimet rreth saj.

Tash në prag të mbajtjes së kësaj seancë, Presidentja e Kosovës, Atifete Jahjaga, u ka bërë thirrje deputetëve të Kuvendit të Kosovës, të angazhohen për të gjetur zgjidhje për konstituimin e Kuvendit.

Në përgjigje për RTK-në përmes postës elektronike, Arbër Vllahiu, zëdhënës i presidentes Atifete Jahjaga, është shprehur se:

“Presidentja Jahjaga, që prej fillimit të mandatit të saj, ka luajtur rolin e faktorit të unitetit dhe të garantuesit të funksionimit demokratik të institucioneve. Në zbatim të mandatit të saj kushtetues, Presidentja ka lehtësuar edhe takimet e mëhershme të liderëve politikë në Kosovë, në përpjekje për të siguruar funksionimin kushtetues te institucioneve. Në çdo rast, Presidentja Jahjaga, në kuadër të kompetencave të saj kushtetuese do të garantojë unitetin e popullit në vend. Në veçanti, në rast të rrezikimit të funksionimit të institucioneve dhe të proceseve nëpër të cilat po kalon vendi, nuk përjashtohet mundësia që Presidentja Jahjaga të lehtësojë diskutimet me forcat politike, gjithnjë duke ruajtur pavarësinë dhe autonominë institucionale”.

Por, a ka afat ligjor brenda të cilit seanca duhet të mbahet? Sekretari i Kuvendit të Kosovës, Ismet Krasniqi, përmes postës elektronike, tha se në Aktgjykimin e Gjykatës Kushtetuese, nuk është përcaktuar afati për vazhdimin e seancës konstituive.

I pyetur për nënshkrimin e 40 deputetëve me të cilin partitë e Bllokut do të kërkonin seancë, nëse këtë nuk e bën deputetja e PDK-së, Flora Brovina, sekretari i Kuvendit tha se duhet referuar gjithashtu Aktgjykimit te Gjykatës Kushtetuese.

Ndërkaq përfaqësuesit e bllokut LDK-AAK-NISMA, thonë se nëse PDK-ja nuk i përmbahet afatit, ata njëanshëm përmes 40 nënshkrimeve të deputeteve do ta thërrasin seancën konstituive.

Gjithçka mbetet të shihet në ditën edhe kur do të caktohet vazhdimi i seancës konstituive.

Hulumtuesi në institutin KIPRED, Albert Krasniqi ka thënë se vendimi i Gjykatës Kushtetuese ku kërkon nga deputetët që të qëndrojnë në sallë gjatë konstituimit të Kuvendit, nuk mund të vlejë, pasi sipas tij askush nuk mund t’i detyroj deputetët të qëndrojnë në sallë.

“Vendimi i Gjykatës Kushtetuese, që kërkon nga të gjithë deputetët të qëndrojnë në sallë në momentin e konstituimit të Kuvendit nuk mund të vlejë për deputetët, pasi të paktën në këtë pikë Kushtetuta është e qartë dhe parasheh situatat kur deputetët mund të mungojnë në seancën konstituive dhe betimin ta bëjnë në seancën e radhës kur të jenë të pranishëm”, ka vlerësuar Krasniqi, për Zërin.

Koalicioni paszgjedhor, LDK-AAK-Nisma, menjëherë ka bërë me dije se nuk do t’i shkojnë në takim, kryesueses së seancës konstituive, deputetes së PDK-së, Flora Brovina.

Por, kjo e fundit në një prononcim për Indeksonline ka bërë të qartë se ajo nuk e ka në plan që ta thërras vazhdimin e seancës konstituive pa marrëveshje të liderëve partikë.

Madje, mosprezencën e partive në këtë takim, Brovina e llogarit si të pakuptimtë dhe të palogjikshme.

“Unë i kam ftuar për të enjten. Pres deri të enjten. Ndoshta mund të jenë gabim ata. Nuk do të thërras seancën pa një marrëveshje me ata. Duhet te merremi vesh. Është e palogjikshme kjo. Ne po bisedojmë me serbët që deri dje na vranë, dhe jo me këta shqiptarë. Kjo s’ka kuptim. Ne po flasim vetëm për një vazhdim të asaj seance, jo për tjetër”, tha Brovina për Indeksonline

Brovina i ka kujtuar bllokut, LDK-AAK-Nisma, se për thirrjen e seancës, e ka pas vete edhe Gjykatën Kushtetuese, që ka vërtetu që ajo nuk ka shkel kushtetutshmërinë.

Kryesuesja e seancës konstitutive të Kuvendit, Flora Brovina, ka ftuar për të enjten në takim konsultativ liderët e partive politike parlamentare për të diskutuar rreth vazhdimit të seancës së 17 korrikut.

Por, Blloku Opozitar nuk do t’i përgjigjet ftesës së saj. Bilall Sherifi nga NISMA për Kosovën, në një prononcim për Politiko.net, ka thënë se nuk është kompetencë e Brovinës që t’i ftojë liderët në takim.

“Flora Brovina e ka vetëm një detyrë: ta thërrasë seancën konstituive në vazhdim. E para, nuk ka kompetencë, as kushtetuese, as në bazë të Rregullores së Punës, që t’i ftojë liderët në konsulta. E dyta, ne si Bllok e kemi marrëveshjen. Blloku pret që ajo t’i ushtrojë përgjegjësitë e saj për ta ftuar seancën”, ka thënë Sherifi.

Ai ka bërë me dije se blloku tash e dy muaj ka pasur konsulta dhe kanë arritur një marrëveshje për të formuar institucionet e reja.

“Konsultat ne i kemi bërë tash e dy muaj dhe marrëveshja është arritur. Ne presim që këtë marrëveshje ta jetësojmë në seancën konstituive, me gjasa shumë të mëdha që kësaj marrëveshjeje t’i bashkohet edhe Vetëvendosje”, ka deklaruar Bilall Sherifi.

Sekretari i Përgjithshëm i LDK’së, Ismet Beqiri, ka thënë se LDK nuk do të shkojë në konsultime te Flora Brovina.

Beqiri ka thënë se Brovina s’ka kompetencë të takohet me liderët e parive por detyra e saj është vetëm të thërras vazhdimin e seancës konstituive.

“Nuk është kompetencë e Flora Brovinës t’i thërras në konsultime liderët e partive politike. Nuk kemi çka të konsultohemi sepse rregullat janë të qarta. Brovina duhet të thërras seancës sepse e vetmja punë e saj është kjo, nëse nuk e thërret ajo, atëherë, ne e thërrasim”, ka thënë Beqiri, për Gazetën Express.

“S’kemi asnjë arsye të shkojmë në një konsultim të tillë sepse s’kemi për cka të konsultohemi”, ka shtuar ai.

Beqiri ka thënë se kërkesa e sotme e PDK’së për një marrëveshje është e palogjikshme pasi marrëveshja ekziston mes partive kryesore politike për ndërtimin e institucioneve.

“S’kemi arsye të shkojmë sepse s’kemi për cka të konsultohemi dhe as të merremi vesh ashtu qysh po kërkon PDK. Kjo është përgjigja e LDK’së se PDK s’mund të na tregojë se ku duhet të shkojmë për konsultime”, ka thënë ai.

Deputeti i Vetëvendosjes, Ilir Deda, ka thënë se më së miri do të ishte që PDK të lejojë konstituimin e Kuvendit nga shumica parlamentare. Ai ka thënë se strategjia e PDK-së është bllokimi i institucioneve dhe moslejimin e partive tjera të formojnë Qeverinë.

Deda ka thënë se PDK s’i ka numrat dhe nuk ka shumicën në Kuvend.

“PDK duhet të lëshojë rrugë. S’duhet të bllokojnë sepse kjo bllokadë nuk është e mirë për funksionim të Kosovës”, ka thënë Deda në Info Magazinë të Klan Kosovës.

Sa i përket koalicionit me PDK-në, Ilir Deda ka thënë se s’ka asnjë formë të bashkëpunimit me PDK-në.

“Jo” është përgjigjur kur është pyetur lidhur me deklaratat e Xhavit Halitit se PDK mund të bëjë koalicion me VV-në.

Deda ka komentuar edhe vendimin e Gjykatës Kushtetuese duke thënë se është një vendim i pazbatueshëm.

Sipas tij, Gjykata ka ndërhyrë në punët e Kuvendit duke thënë se s’duhet të ketë zgjedhje të reja.

Edhe pse kryesuesja e seancës konstituive, Flora Brovina u ka bërë ftesë të gjitha partive që të takohen me të, në mënyrë që të merren vesh për hapat e mëtutjeshëm të organizimit të seancës konstituive dhe për tejkalimin e situatës. Nënkryetari i AAK-së, Ardian Gjini i ka thënë Gazetës Blic se ata nuk do t’i shkojnë në takim Flora Brovinës.

Gjini ka thënë se Brovina nuk është kryetare e Kuvendit dhe nuk ka të drejtë që të bëjë ftesa të tilla.

“Ajo nuk është kryetare e Kuvendit. Ajo nuk ka asnjë kompetencë që të bëjë një gjë të tillë. Ajo po i tejkalon autorizimet e veta, ajo është thjeshtë vetëm një kryesuese e Kuvendit dhe asgjë më shumë”, ka thënë Gjini.

Sipas tij, krejt çka pret Blloku prej Flora Brovinës është caktimi i seancës. Madje, ai i ka dhënë ultimatum Brovinës që ta caktojë seancën deri në fund të javës.

“E presim që deri në fund të kësaj jave ajo ta caktoj datën e mbajtjes së seancës konstituive. Në të kundërtën do ta bëjmë ne vetë një gjë të tillë”, ka thënë Gjini.