Që nga mosha e hershme ka filluar të merret me muzikën, të cilën e konsideron edhe si mikeshë që e shoqëron në çdo moment. Është ky këngëtari më i ri në skenën e muzikës shqipe Endrit Hyseni, i cili në një intervistë për gazetën Tribuna ka folur për ëndrrat e tij si artist, sportin e preferuar dhe shumëçka tjetër.

Ka të realizuara vetëm dy këngë, mirëpo Endrit Hyseni premton që do të krijojë edhe shumë këngë të reja për fansat e tij. Në një intervistë për gazetën Tribuna, ai ka thënë se është ndjerë shumë i lumtur që zëri i tij është vlerësuar nga një artist siç është këngëtari Alban Skenderaj dhe po ashtu ka theksuar se kjo gjë e motivon atë që të ngjitet drejt shkallëve të konkursit muzikor ‘X- Factor Albania’. Endriti po ashtu ka pranuar që këngët e tij do t’i grumbullojë në album dhe nuk e përjashton mundësinë e pjesëmarrjes në festivale.

Tribuna: Që sa kohë merreni me muzikë?
Hyseni: Me muzikë merrem që nga fëmijëria , thjesht kënga dhe muzika për mua është një relaksim i shpirtit , shëtitje e ndjenjave nëpër kohë të ndryshme që me sjelle nostalgji dhe me kujton ngjarje të kaluara të shoqëruar me kujtime të bukura në faza të ndryshme të jetës, ajo është mikeshë në çastet e gëzimit , dëshpërimit , lëndimit , ndjenjës së dashuruar. Qysh si fëmijë kam kënduar në shkollë kam marrë pjesë në shumë gara të ndryshme që janë zhvilluar në qytetin tim si dhe pas çdo suksesi natyrisht që edhe çmimet vijnë vet.

Tribuna: Kush e ka zbuluar talentin tuaj?
Hyseni: Talentin tim për muzikë së pari e kanë vërejtur prindërit e mi të cilët janë motivi im kryesor për sukseset e mia të mëtutjeshme, pastaj edhe profesori i muzikës i cili më mësonte për hapat e tjerë në lidhje me muzikën.

Tribuna: Cilin zhanër muzikor preferoni të këndoni?
Hyseni: Ka shumë zhanre të muzikës që janë mjaft të mira mirëpo zhanrin në të cilin ndihem më rehat është roku dhe balada.

Tribuna: A jeni duke punuar në ndonjë këngë të re? Nëse po, a do i realizoni klip?
Hyseni: Kam realizuar dy këngë të mia që quhen ‘Shpirti Im’ dhe ‘Eja Më Merr’ me të cilat jam ndjerë shumë i kënaqur, sa i përket këngës së re ajo natyrisht se do të dalë në muajt në vijim, ndërsa me klip nuk e di ende mirëpo shpresoj që shumë shpejtë do vijë edhe ndonjë klip .

Tribuna: Me kë bashkëpunoni për tekstet, muzikën dhe orkestrimin e këngëve?
Hyseni: Shpeshherë kam shkruar tekste vetë dhe melodinë e kam realizuar me anë të kitarës, kurse për të dyja këngët e mia muzikën dhe orkestrimin e këngëve e ka bërë Armend Gjoni.

Tribuna: A mendoni të bëni bashkëpunime me këngëtarët e tjerë? Nëse po, me kë keni dëshirë të bashkëpunoni?
Hyseni: Në të ardhmen shpresoj të bashkëpunoj me ndonjë këngëtar sepse gjithmonë puna në grup është e suksesshme. Dëshira ime më e madhe është të bashkëpunojë me Alban Skenderaj sepse ai është këngëtari im më i preferuari, ai është këngëtar i cili i përmbush të gjitha vetitë e një artisti.

Tribuna: Si jeni ndjerë në momentin kur Alban Skenderaj ka shpërndarë ‘coverin’ e këngës së tij të kënduar nga ju?
Hyseni: Ndjehem mjaft i lumtur dhe i emocionuar që Albani ka vlerësuar zërin tim dhe ka publikuar ‘coverin’ e këngës ‘Ata Sy’ të cilën e kam interpretuar unë. Është diçka e pa përshkueshme, një emocion shumë i rrallë. Kjo gjë më ka nxitur të mendoj që të marrë pjesë edhe në X Factor Albania , sepse dihet që Albani është njëri nga anëtarët e jurisë dhe do më pëlqente shumë që të punojë më të.

Tribuna: A mendon që në të ardhmen me marrë pjesë në festival?
Hyseni: Mendoj që po, besoj që do të marrë pjesë në një ndër festivalet me të mëdha që organizohen në trojet shqiptare e që është ‘Kënga Magjike’.

Tribuna: A jeni simpatizues i sportit apo kinematografisë?
Hyseni: Jam simpatizues mjaft i madh i sportit në veçanti futbollit dhe ekipi im i preferuar është Real Madridi, më pëlqen shumë edhe bota e filmit, shikoj filma mirëpo më shumë e dua sportin.

Tribuna: Ku e shihni veten pas 10 viteve?
Hyseni: Veten time në te ardhmen e shoh me shumë obligime, projekte të ndryshme ndoshta edhe me realizimin e një albumi.

Tribuna: A mendon se muzika do të jetë profesioni i juaj në të ardhmen?
Hyseni: Muzikën e kam më shumë si hobi , tash jam duke i ndjekur studimet në Fakultetin e Ndërtimtarisë dhe besoj që ky do të jetë profesioni im për të ardhmen.

Në dy ditët e fundit të Seminarit Ndërkombëtar për Gjuhën, Letërsinë dhe Kulturën Shqiptare, janë mbajtur sesioni shkencor i letërsisë me temë “Letërsia shqipe dhe kodet e mëdha” dhe sesioni shkencor i gjuhësisë që këtë vit kishte temën “Gjuha shqipe dhe ideologjia”. Në të dy sesione të gjuhës e të letërsisë, që tradicionalisht mbahen në fund të Seminarit dhe e mbyllin atë, studiuesit kanë paraqitur kumtesat mbi temat e caktuara.

Studiuesit me emër, si: Kujtim M. Shala, Basri Çapriqi, Osman Gashi, Bajram Kosumi, Milazim Krasniqi, Adem Jakllari, Eldon Gjikaj, Anton Berishaj, Vjollca Osja, Viola Isufaj, Nysret Krasniqi, Mark Marku, Nerimane Kamberi, Aljda Selimi, Abdulla Rexhepi, Agron Gjekmarkaj dhe të tjetër studiues kanë paraqitur kumtesat e tyre, për këto dy ditë të sesionit shkencor të letërsisë mbi temën “Letërsia shqipe dhe kodet e mëdha”.

“Kodi biblik në veprën “Abeli” të Etëhem Haxhiademit”, ka qenë kumtesa e Hamit Xhaferit, shprehet se duke u mbështetur në fushën kryesore të interesimeve tona letrare dhe akustike vetvetiu imponohet pyetja lidhur me traditën letërsisë shqipe dhe kodet e mëdha që kanë të bëjnë me praktikat mbi shpenzimet dhe llojin e traditave në letërsi, por të cilat lidhen me kodet e mëdha.

“Tezat themelore të kodeve të Haxhiademit kanë për qëllim të luftojnë frikën e ndikimit duke e mundësuar aktivitetin e hapësirës së personazheve, siç janë Adami, Eva, Kaini, dhe Abeli”, ka thënë Xhaferit. Ai shprehet se në kohët moderne hierarkia e vlerave në të vërtetë peshon në përfshirje të kodeve të mëdha duke krijuar marrëdhënie të reja në letërsi. “Këtu ka më shumë dinamizëm, përdor një strategji të veçantë rrëfimi nëpërmjet të cilit bëhet gërmimi në rrafshin thelbësor të botës konkrete dhe asaj të brendshme të personazheve duke shpalosur çështje më të fshehta të shpirtit të njeriut”, ka treguar Hamit Xhaferit, teksa ka folur për “Abelin”.

Studiesi Ag Apolloni, përmes kumtesës së tij “Rrëfimet e mëdha të letërsisë së vogël”, ka thënë se letërsia shqipe, nëpër faza të ndryshme të saj, ka luajtur me rrëfime të mëdha, të tilla si ai religjioz, nacional, metarrëfimi i deformuar iluminist e metarrëfimi për komunizmin internacional. Sipas tij, metarrëfimi nacional është kodi më i madh dhe më dominues i letërsisë shqiptare, ndërsa figura kryesore e këtij kodi është Skënderbeu. Kurse, kodi kanunor, këtu nuk shihet veças, sepse ai është pjesë e metarrëfimit nacional.

“Përkundër faktit që letërsia shqipe gjithmonë është marrë me rrëfime të mëdha, prapëseprapë ka mbetur letërsi e vogël, letërsi grindavece, që merr edhe funksione jashtëletrare, vetëm për t’ua nxjerrë sytë fqinjëve. Falë metarrëfimeve, kjo letërsi jo vetëm që s’mund të matet me letërsitë e mëdha evropiane, por as me disa letërsi ballkanike, si ajo greke, kroate dhe serbe”, ka thënë Apolloni.

Besim Rexhaj me anë të kumtesës “Pushteti si kod dominant dhe specifik në dramaturgjinë e Kasëm Trebeshinës”, ka thënë se një nga çelësat kryesorë të dekodimeve dhe të interpretimit të opusit dramaturgjik të Kasëm Trebeshinës në kuadër të planit përmbajtjesor të dramave të tij është fillimi, identifikimi i dominateve tematike, motiveve e filozofike të dramaturgjisë së tij.

“Në kontekst të observacioneve të tij të identifikimit të dominateve të specifikave artistike në dramaturgjinë e këtij autori si çelës i dekodimit të planit përmbajtjesor po shndërrohet në dy prej dramave më të realizuara të opusit të tij dramaturgjik”, ka thënë Rexhaj, duke iu referuar dramave “Ëndërr e përjetshme” dhe “Frika dhe krimi”.

Sa i takon sesionit të gjuhës, në kumtesën e saj “Studimet fonologjike shqiptare në kornizat e ideologjisë materialiste”, Aljula Jubani-Bengu shprehet se nëse “kodifikimi” i ortografisë është një çështje gjuhëtarësh që zbatojnë një teori fonologjike të caktuar, bindja e qeverive dhe publikut të gjerë për të përdorur një “spelling sistem” është thellësisht një akt politik. “Preskriptivizmi shtyhet deri në atë pikë që në manualin e fonetikës një nga krerët është pikërisht drejtshkrimi. Kjo praktikë duket pak e përdorur në tekstet dhe manualet e fonetikës, aq më shumë për shqipen, e cila nuk kishte një normë drejtshqiptimore të kodifikuar”, ka treguar Aljula Jubani-Bengu, teksa thotë se drejtshkrimi ynë është “morfofonemor”, që do të thotë se ka një bazë fonologjike, por lidhet me format e fjalëve, për të ruajtur trajtën e morfemave.

Milote Sadiku, në kumtesën e saj, “Rreth përdorimit të metaforave në diskursin politik në gazetat e përditshme të Kosovës”, ka thënë në diskursin politik posaçërisht gjatë fushatës elektorale mund të tematizohen aspekte të ndryshme nga jeta e përbashkët sociale dhe prodhuesi i këtij diskursi qëllimisht zgjedh leksemat e caktuara për të arritur efektin e duhur të recipientit, qëndrimet dhe vlerësimet e autorit (gazetarit).

“Me anë të metaforës ‘korrupsioni është kancer’, potencohet fuqia kërcënuese dhe e rrezikut e kësaj dukurie ndaj shoqërisë tonë. Kjo metaforë e sëmundjes haset shpesh në artikujt e hulumtuar të gazetave”, ka thënë Sadiku për të shtuar se në një numër të madh të artikujve në gazetat tona të përditshme është raportuar vazhdimisht për korrupsionin, për shkak se pritet një përfshirje më emocionuese e lexuesit kur dihet që korrupsioni paraqet një kërcënim për shoqërinë tonë.

Xhavit Beqiri, me anë të kumtesën “Arshi Pipa për politikën e gjuhës në Shqipërinë socialiste”, ka paraqitur qëndrimet e Arshi Pipës kundër standardit të shqipes.

“Kritikat ndaj gjuhës së njësuar letrare dhe atyre që ishin në krye të procesit që e prodhoi atë në pikëpamjen e Pipës del të jetë rezultat i vullnetit të klasës sunduese në Shqipërinë socialiste dhe ideologjisë së saj”, ka thënë Beqiri. Toskërishtja u bë gjuhë zyrtare e partisë dhe e shtetit, kur pushtetin e korrën komunistët, thotë Pipa. “Sa i përket pozicionit të studiuesve nga Kosova dhe studiuesve të tjerë shqiptarë në ish-Federatë të cilët në Konferencën e Prishtinës, vendosën të përqafonin gjuhën zyrtare shqipe, Arshi Pipa pohon këtë kosovarët e bënë për të theksuar rëndësinë e tyre shqiptare në formë proteste kundër refuzimit të Federatës Jugosllave për t’i dhënë Kosovës statusin e Republikës”, është shprehur Xhavit Beqiri.

Në dy ditët e sesionit shkencor të gjuhësisë, me temë “Gjuha shqipe dhe ideologjia”, kumtesat e tyre i kanë lexuar Naser Pajaziti, Elda Molla, Matilda Çollaku, Katarzyna Kropiak, Sadije Rexhepi, Rrahman Paçarizi, Giovanni Belluscio, Anila Omari, Teuta Abrashi, Teuta Toska, Lindita Tahiri, Sahadete Limani-Beqa, Sazana Çapriqi, Mimoza Priku, Julie Kolgjini, Mustafa Ibrahimi, Haki Hysenaj, Maklena Çabe e Linditë Sejdiu-Rugova, Anila Kananaj dhe Bardh Rugova, që janë vetëm disa nga pjesëmarrësit në këtë sesion.

Ndryshe, Seminari XXXIII Ndërkombëtar për Gjuhën, Letërsinë dhe Kulturën Shqiptare, ka filluar më 18 gusht, ndërsa dje (e shtunë) ka qenë dita e fundit e Seminarit.

Mbrëmja e fundit ndërkaq, i ka përcjellë mysafirët nga vende të ndryshme të botës me darkë dhe muzikë shqipe./Zëri/

Një shkollë parauniversitare pa klasën e 13-të, me reforma të cilat po synohet që të fusin mësimin e gjuhës angleze që nga klasa e parë, në klasa ende të ngarkuara me numër të madh nxënësish, sidomos në disa shkolla të arsimit të ulët dhe të mesëm të ulët (klasat 1 deri në 9) me një kurrikulë që nënkupton vlerësim ndryshe për nxënësit, si dhe një sërë ndryshimet të tjera – do të nisë fillimi i vitit të ri shkollor 2014/2015, në shkollat publike të Kosovës.

Përderisa zyrtarë të Ministrisë së Arsimit deklarojnë se kanë bërë të gjitha përgatitjet e duhura për fillimin e vitit të ri shkollor, ekspertë të arsimit parauniversitar, sidomos të atij të detyrueshëm, thonë se në këtë nivel të arsimit shumëçka nuk po shkon mire, shkruan Koha Ditore.

Dukagjin Pupovci, ekspert i arsimit, ka nisur nga e para. Ai ka thënë se kushtet infrastrukturore në arsimin e obligueshëm janë përmirësuar dukshëm. Në 15 vitet e kaluara janë ndërtuar dhe rinovuar qindra objekte shkollore, ndërkohë që në zonat rurale dhe semiurbane një numër i konsiderueshëm punojnë vetëm në një ndërresë, pra kanë kushte për mësim tërëditor. Shumica e shkollave në zonat urbane punojnë në dy ndërresa, gjë që ndodh edhe në vendet e tjera të rajonit, ndërkaq një numër simbolik i tyre vazhdojnë të punojnë në tri ndërresa, ka thënë ai.

Por, ka shtuar se megjithëkëtë, nuk mund të thuhet se çdo gjë ka shkuar si duhet.

Sipas tij, së pari, ka pasur lëshime të shumta në planifikim, kështu që në zonat rurale ka dhjetëra shkolla të reja, të cilat nuk shfrytëzohen sa duhet, pasi ka numër të vogël të nxënësve.

E dyta, cilësia e punëve nuk ka qenë gjithnjë në nivelin e duhur, prandaj edhe ndodh që objektet e reja të jenë në gjendje jo të mirë pas vetëm disa vitesh. E treta, mirëmbajtja e objekteve është jocilësore, pra lejohet që ato të shkatërrohen shpejt dhe të mos ofrojnë kushte optimale për punë.

Dhe, e katërta, në shumicën e shkollave mungojnë mjetet e konkretizimit dhe nuk përdoret sa duhet teknologjia e informacionit, duke e përfshirë edhe internetin.