Bllokimi politik që po e frenon krijimin e institucioneve nuk duhet ekzagjeruar, thotë ambasadori britanik në Kosovë, Ian Cliff.

Në një intervistë për “Kohën Ditore” ai shpreh pritjet e tij që gjithçka të nisë të zgjidhet pas vendimit të Gjykatës Kushtetuese, ndërsa thekson se Qeverinë e ardhshme të Kosovës e presin sfida të mëdha, siç janë: zhvillimi ekonomik, dialogu me Serbinë dhe integrimet evropiane.

Në intervistë Cliff ka theksuar se Lista Serbe do të duhej të jetë pjesë e Qeverisë, por jo faktor përcaktues i krijimi të saj.

Duke folur për dialogun e ardhshëm mes Kosovës dhe Serbisë, Cliff ka thënë se nuk duhet lejuar që Asociacioni i Komunave me shumicë serbe të jetë një lloj shteti brenda shtetit të Kosovës.

Ai ka lavdëruar institucionet e drejtësisë në Kosovë rreth masave të ndërmarra në luftën kundër radikalizmit.

Kryetari i Këshillit Kombëtar të Nismës për Kosovën, Jakup Krasniqi ka thënë se ka raporte të shumë të mira me Xhavit Halitin, por edhe me shumë personalitete tjera të PDK-së. Ai ka thënë se është i pakënaqur me vendimet e kryetarit të partisë.

Ai këto komente i ka bërë në emision Argument Plus në RTV21.

“Nuk kam pasur probleme me asnjë njeri në PDK. Kam pasur pakënaqësi me mënyrën se si është udhëhequr partia, se si janë marrë vendimet në parti, se si është ngufatur partia”, ka thënë Krasniqi, transmeton Gazeta Blic.

Krasniqi ka folur edhe për vendimin e Gjykatës Kushtetuese të Kosovës, e cila e ka rrëzuar Isa Mustafën nga posti i kryeparlamentarin. Sipas tij, ende nuk është publikuar aktgjykimi i Gjykatës Kushtetuese, andaj edhe ende nuk e dimë saktësisht se çka përmban ai.

Krasniqi ka thënë se cdo bashkëpunim me PDK-në nuk sjell asgjë të mirë për vendin. “Ne u kemi qëndruar besnik parimeve tona”, ka thënë Krasniqi.

I dyti i Nismës ka thënë se ka pasur përpjekje nga PDK që të takohen me njerëz të partisë sonë.
“Ka pasur përpjekje që të takohen me mua, me z. Limaj, por edhe me anëtarë të tjerë”, ka thënë Krasniqi.

Margarita Kadriu, deputete e PDK-së, thotë se Gjykata Kushtetuese sot e ka bërë “super të qartë” se kush është grupi më i madh parlamentar.

Andaj ajo pret që në seancën në Kuvendin e Kosovës të hidhet në votim emri i një kandidati të PDK-së për kryetar të Kuvendit.

“Unë mendoj se duhet të kthehemi në seancën e Kuvendit, të votojmë kandidatin i cili është kandidat i grupit më të madh parlamentar, gjë që sot shumë qartë u tha, për të gjithë, i pëlqeu a si pëlqeu dikujt, është çështje që nuk ka relevancë në këtë rast, me rëndësi është që kandidati i Grupit më të madh Parlamentar do të hidhet në votim”, tha Kadriu në një intervistë për RTV21.

Kadriu thotë se PDK nuk i ka problem votat, dhe se kjo do të dëshmohet në Kuvend. Tha se janë të hapur dhe nuk kanë vija të kuqe për asnjë subjekt politik.

Ajo u shpreh kundër zgjedhjeve të reja në vend, mirëpo tha se “jemi të gatshëm si Parti Demokratike e Kosovës që cilido skenar që të jetë i përgatitur, do të thotë ne të shkojmë më tutje, me rëndësi është të krijohen institucionet dhe institucionet të krijohen me bazë, vullnetin e popullit”.

A ka vdekur Lavdrim Muhaxheri? Në fund të korrikut lideri i luftëtarëve shqiptare për xhihad në Siri (në foto) ka postuar foto të tij në Facebook, ku shfaqet duke prerë kokën e një të riu që thuhet se ishte spiun.

Pak ditë më parë, mediat në Ballkan, duke iu referuar një lajmi të një televizioni kurd, raportonin se 24-vjeçari nga Kosova ka vdekur. Megjithatë, në mediat sociale një mik i tij e mohoi një gjë të tillë.

Derisa bota perëndimore dhe agjencitë e sigurisë po merren dhe po e përpijnë vrasjen e gazetarit amerikan, James Foley, me gjasë nga një britanik i IS, vendet e Ballkanit po merren me versionet e veta të këtij problemi. Me qindra shqiptarë myslimanë nga Kosova, Maqedonia e Shqipëria raportohet se kanë shkuar për ta ndjekur rrugën e xhihadit, së bashku me myslimanë të Bosnjës, transmeton koha.net. Një video e fundit e Shtetit Islamik shihet Muhaxheri duke e reklamuar pasaportën e tij të Kosovës, përkrah shqiptarëve tjera nga Shqipëria, Maqedonia dhe Kosova. Muhaxheri shihet me një shpatë dhe premton se do ta pushtojë Romën dhe Spanjën e më pas shqiptarët në video i shkatërrojnë pasaportat e tyre.

Gjithsesi, fenomeni nuk është i kufizuar vetëm për myslimanët. Në fakt, në javët e fundit po merr një tjetër rëndësi edhe çështja e serbëve ortodoksë të cilët kanë shkuar dhe vazhdojnë të shkojnë në luftën që po zhvillohet në Ukrainë.

Në një deklaratë të kryeministrit të Serbisë Aleksandër Vuçiq, të gjithë ata që shkojnë në luftën e Ukrainës janë mercenarë dhe veprimet e tyre janë tepër të dëmshme për Serbinë.

Deri tani, askush nuk e di sesa serbë kanë shkuar për të luftuar në Ukrainë, gjithsesi mendohet se numri i tyre është mes 30 dhe 100 personave. Vuçiq thotë se serbët janë duke luftuar në të dy anët, edhe pse dyshohet se pjesa më e madhe ka të ngjarë të jetë në anën e rebelëve pro-rusë, transmeton koha.net.

Si Serbia ashtu edhe Kosova tani janë duke përgatitur legjislacionin për t’i ndaluar qytetarët e tyre që të marrin pjesë në luftëra të huaja. Bosnja veçse e ka aprovuar këtë ligj.

“The Economist” thotë se, sipas shifrave policore, deri mët ani në Siri dhe Irak janë vrarë 16 shqiptarë të Kosovës.

Në fund, prestigjiozja londineze “The Economist”, përmend edhe shkrimin e të përditshmes “Koha Ditore” rreth dekonspirimit dhe vrasjes së një bashkëpunëtori të AKI-së në Siri, i cili, siç raportoi “Koha Ditore”, ka qenë i infiltruar në mesin e xhihadistëve shqiptarë.

Edhe Partia e Fortë ka reaguar për vendimin e Gjykatës Kushtetuese.

Kryetari i saj, Visar Arifaj në Twitter ka shkruar:

“Tash vendimin e Gjykatës Kushtetuese duhet me e çu n’Gjykatë Kushtetuese për me e vlerësu kushtetutëshmërinë”

Kryeministri në detyrë, Hashim Thaci, ka përshëndetur vendimin e Gjykatës Kushtetuese, duke thënë që praktikat e ligjshmërisë në vendin tonë, po forcohen çdo ditë.

“Shteti i Kosovës çdo ditë e më shumë po i forcon praktikat e respektimit të kushtetueshmërisë dhe të ligjshmërisë. Sot, Gjykata Kushtetuese tha fjalën e vet për rrjedhën e seancës konstituive të datës 17 korrik 2014 dhe i hapi rrugë formimit të institucioneve të Kosovës në përputhje me vullnetin e qytetarëve të shprehur në zgjedhjet e 8 qershorit.
Kosova ka vënë edhe praktikën e pranimit të vendimeve të institucioneve gjegjëse prandaj presim që të gjitha palët do ta pranojnë edhe këtë vendim të Gjykatës Kushtetuese.
Partia Demokratike e Kosovës, si prijëse e proceseve shtetformuese, do të punojë intensivisht që sa më shpejtë të formohen institucionet e reja në Kosovë, në përputhje me mandatin që ka marrë nga qytetarët e Kosovës në zgjedhjet e përgjithshme dhe të fillojë të implementojë “Misonin e Ri” për zhvillimin ekonomik të Kosovës, hapjen e vendeve të reja të punës dhe procesin e pandalshëm të integrimeve evropiane.
Edhe në mandatin e ardhshëm, fryma e bashkëpunimit dhe e qasjes gjithëpërfshirëse në proceset madhore për vendin tonë, do të jenë bosht i angazhimit dhe filozofisë politike të Partisë Demokratike të Kosovës”, ka shkruar ai në profilin e tij në FB.