Përveç 40 të arrestuarve nga Policia e Kosovës, të dyshuar për pjesëmarrje në luftë në Siri krah organizatës terroriste të ISIS-it dhe të “Al Nusra”-së, janë edhe 17 të tjerë, të cilët ndodhen në arrati. Prijësi i këtij grupi, mik i afërt i Lavdrim Muhaxherit, nuk është gjendur në shtëpi natën e aksionit policor, shkruan Zëri.

Bujar Brahimi nga Mitrovica për 508 ditë ka qenë pjesë e grupit terrorist ISIS në Siri, shok me njërin nga udhëheqësit e këtij grupi, Lavdrim Muhaxhiri.

Brahimi është kthyer në Kosovë në prill të këtij viti prej ku ka bërë thirrje tek qytetarët e tjerë për të shkuar e për t’iu bashkuar të tjerëve në luftën për xhihad.

Brahimi tashmë dyshohet për terrorizëm dhe i prinë listës prej 57 personave të dyshuar për terrorizëm e nxitje terrorizmi.

Por, ai nuk është në mesin e 40 personave të arrestuar, paraditen e së hënës, në tërë territorin e Kosovës.

Ai bashkë me 16 të dyshuar të tjerë vazhdojnë të jenë në arrati derisa po kërkohen nga Policia.

Ndërkohë, që në këtë aksion të Policisë janë mbyllur dy vende ku është dyshuar se po rekrutohen të rinjtë për në Siri, xhamia ilegale e improvizuar në objektin e Termokosit në lagjen “Dardania”, në Prishtinë , dhe Kulla e Jetimit në Prevallë, e cila dyshohet se ka qenë vendtakim i këtij rrjeti.

Dita Ndërkombëtare e Rinisë festohet çdo vit më 12 gusht, me të vetmin qëllim që të pranoj dhe njoh përpjekjet dhe përkushtimin e të rinjve anembanë botës për përmirësimin e shoqërisë globale.

Po ashtu, kjo ditë ka për synim edhe promovimin e mënyrave të ndryshme nëpërmjet të cilave rinia do të angazhohej në mënyrë aktive në dhënien e kontributeve sa më pozitive për komunitetet e tyre.

Dita Ndërkombëtare e Rinisë u aprovua me një rezolutë të posaçme nga Asambleja e Përgjithshme e OKB-së në vitin 1999.

Kjo ditë do të festohet edhe në Kosovës nga Kuvendi i të Rinjve të Kosovës, i cili organizon aktivitete me rastin e Ditës ndërkombëtare të Rinisë me moton: “Rinia është zgjidhja, jo problemi”.

Ndërsa Misioni i OSBE-së, UNICEF dhe GIZ do të mbështesin 25 Këshilla Lokale për Veprim Rinor (KLVR) në shënimin e Ditës Ndërkombëtare të të Rinjve dhe në prezantimin e brengave të të rinjve tek zyrtarët e nivelit qendror dhe lokal, në disa qytete të Kosovës.

Kryeministri në largim Hashim Thaçi, që nga 26 prilli nuk e ka lëshuar asnjëherë vendin. Pjesëmarrja e tij në ceremoninë e Shenjtërimit të Papa Gjonit të Njëzetetretë dhe Papa Gjon Palit të Dytë në Romë të Italisë, ishte hera e fundit që kur ai kishte marrë pjesë në ndonjë organizim apo ishte pritur nga përfaqësues të ndonjë vendi, shkruan Tribuna.

Vakuumi institucional që është krijuar në Kosovë që pas përfundimit të zgjedhjeve të 8 qershorit, ka ndikuar edhe në mosaranzhimin e takimeve në nivele qeveritare, dhe në mbylljen e dyerve për liderët institucionalë të vendit nga ana qeverive të vendeve evropiane por edhe atyre botërore. Analistët vlerësojnë se kjo mbyllje e Thaçit nuk është duke u bërë krejtësisht me dëshirën e tij, meqë raporti i Clint Williamson si dhe mos formimi i qeverisë së re të dal nga zgjedhjet e 8 qershorit, janë disa nga faktorët që kanë ndikuar në “refuzimin” e këtij të fundit, nga qeveritë evropiane por edhe botërore.

Për analistin nga radhët e Grupit për Studime Politike dhe Ligjore Fisnik Korenica, vendet me më ndikim në Bashkimin Evropian kanë një dozë të rezervës karshi Thaçit, dhe derisa të zgjidhet dilema rreth raportit të Williamson, pritet të vazhdoj ky refuzim.

Mbajtja eventuale e zgjedhjeve të reja në vend po kundërshtohet fuqishëm nga Blloku i partive opozitare. Mirëpo, një opsion i tillë është i mundshëm për Partinë Demokratike të Kosovës, por edhe për Lëvizjen “Vetëvendosje”.

Por, analistët politikë kanë përjashtuar çdo mundësi që vendi të shkojë në zgjedhje, pa prejudikuar se kush do të qeverisë vendin./Zeri/

Përfaqësues të serbëve në Kosovë kanë kërkuar që dialogu i ardhshëm Kosovë-Serbi të fokusohet më tepër në tema teknike, të cilat janë në funksion të përmirësimit të jetesës së serbëve.

Megjithëse i kanë mirëpritur paralajmërimet e koalicionit paszgjedhor për intensifikim të dialogut ndërmjet Qeverisë së Kosovës dhe serbëve lokalë, këta të fundit kërkojnë që edhe dialogu Prishtinë-Beograd të mos ndalet.

Është lëvizja “Vetëvendosje” ajo e cila ka paralajmëruar transformim të dialogut të “mbyllur” diplomatik në Bruksel në dialog të hapur demokratik me serbët e Kosovës, nëse bëhet pjesë e Qeverisë së bllokut opozitar.

Por deputeti në Kuvendin e Kosovës nga Partia Progresiste Demokratike, Nenad Rashiq, i cili për shumë vjet punon në institucionet e Kosovës, ka thënë se si dialogu Prishtinë-Beograd ashtu edhe ai Prishtinë-serbë “autoktonë” e kanë rëndësinë e vet…/Koha Ditore/