Festimi i 6 vjetorit të Pavarësisë fillon sot me shpjegimin nëpër të gjitha shkollat e Kosovës, ku ora e parë do t’i kushtohet kësaj feste. Nën organizimin e Qeverisë së Republikës së Kosovës, në Prishtinë dhe qytetet tjera të Kosovës, si dhe në të gjitha ambasadat e Kosovës në botë, do të organizohen aktivitete me rastin e Ditës së Pavarësisë.

Pasdite në Galerinë Kombëtare të Kosovës do të hapet ekspozitë e Koleksionit të “Marubit”. Ndërsa, nesër pasdite në Muzeun e Kosovës bëhet hapja e ekspozitës “Shkatërrimi i Trashëgimisë Kulturore në Kosovë 1998-1999”.

Po ashtu, në të gjitha ambasadat e Republikës së Kosovës në botë, organizohen pritje për korin diplomatik, zyrtarë shtetesh, si dhe personalitete të rëndësishme të shteteve përkatëse. Kurse, në ora 18:00, në Hotelin Swiss Diamond, mbahet koncert i tenorit Agim Hushi.

Festa vazhdon edhe me datë 16 shkurt, ku në Teatrin Kombëtar do të mbahet Koncerti Festiv i Ansamblit Kombëtar SHOTA.

Ndërkaq, në orën 19:30, në Hotelin Emerald, nga Presidentja e Republikës së Kosovës, organizohet pritje solemne për mysafirë të ftuar.

E në ditën kur është shpallur pavarësia e Kosovës, do të bëhen homazhe para varrit të presidentit Rugova, homazhe para varrezave të Komandantit Legjendar Adem Jashari dhe familjes Jashari në Prekaz.

Ndërsa, në orën 11:00, është paraparë të mbahet mbledhja solemne e Kuvendit të Republikës së Kosovës. Po në të njëjtën ditë do të organizohet pritje për mysafir të ftuan nga kryeministri i Kosovës, Hashim Thaçi.

Festa do të vazhdojë në sheshin “Zahir Pajaziti” në Prishtinë, ku në ora 12:00 do të organizohet manifestimi qendror, ku do të bëhet parakalimi i njësiteve të FSK-së, Policisë së Kosovës, Shërbimit Korrektues. Në orën 14:00, po në të njëjtin shesh organizohet koncert për fëmijë, për të vazhduar me koncert me këngëtarët më eminentë të vendit, i cili do fillojë nga ora 20:00 deri në 22:30, ku edhe do të bëhet ndezja e fishekzjarrëve.

E sa i përket Komunave të Kosovës, që nga orët e mëngjesit do të fillojnë me homazhe në varrezat e dëshmorëve dhe tek shtatoret e heronjve të Kosovës. Pastaj, do të organizojnë seanca solemne në Kuvendet e Komunave. Kurse, në mbrëmje do të organizohen koncerte në sheshet e qyteteve, dhe në përfundim bëhet ndezja e fishekzjarrëve.

Prokuroria e Kosovës ka nisur hetimet ndaj aksionit simbolik të Grupit të Pavarur të Studenteve, të cilët patën hy në ligjëratën e profesorit Milazim Krasniqi. Studentët patën thënë se kanë dashur t’i tregojnë se çka është racist.

Sipas një videoje që është publikuar, shihet se grupi i studentëve kanë hyrë në kohën ku sipas pamjeve, shihet se është duke u mbajtur provim dhe i janë drejtuar Krasniqit me fjalët “racist” dhe “fashist” si dhe “marre”.

Në të njëjtën video, shihet se Krasniqi është duke thënë “ju kanë mashtruar”. Hetimet kanë nisur me kërkesë të profesorit Milazim Krasniqi dhe i ka nisur prokuroja serbe, Javorka Prlinceviq pranë Gjykatës Themelore.

“Si Grup i Pavarur i Studenteve konsiderojmë që nisja e hetimeve në lidhje me aksionin simbolik protestues është e qëllimshme dhe formë e drejtpërdrejt e shantazhit ndaj Grupit organizator protestues dhe vet udhëheqësit të saj Roland Sylejmanit.

Kërkojmë nga Prokuroria që menjëherë të nisë hetimet ndaj Departamentit të Gazetarisë rreth mënyrës se si janë punësuar stafi akademik aty, gjithashtu kërkojmë që sa më parë Milazim Krasniqi të largohet nga pozita e Shefit dhe Profesorit në Departamentin e Gazetarisë”, thuhet në një komunikatë të Grupit të Pavarur të Studentëve.

Në dhjetor të vitit të kaluar i dyshuari kryesor për vrasjen e pjesëtarit të EULEX-it Andrius Senaviçius ka qëndruar në veri të Kosovës.
I dyshuari, (emër i njohur për redaksinë v.j.) është identifikuar para disa muajsh në bazë të hetimeve të Prokurorisë Speciale të Republikës së Kosovës. Gazeta Tribuna ka mësuar rezultatet e hetimeve por edhe një ngjarje që e ka pamundësuar arrestimin e këtij të dyshuari. Për të ndalur operacionin e kapjes së tij kishin ndërhyrë Brukseli dhe Beogradi.

Burime të gazetës kanë shpjeguar në kushte anonimiteti se Brukseli kishte kërkuar kohë, pasi që një akt i tillë do t`i qiste “hije të zezë” raportit të përfaqësues së lartë të BE-së Catherine Ashton për shtetet anëtare, raport ku ajo në superlativ kishte vlerësuar sjelljet e Beogradit dhe Prishtinës gjatë dialogut.

Veç kësaj, zyrtarët në Bruksel, sipas burimeve të gazetës, janë frikësuar se pas zbulimit të identitetit të të dyshuarit, Serbia nuk do të mund ta merrte miratimin e shteteve anëtare për statusin e kandidatit. Frika kryesore ka qenë se kundër nisjes së bisedimeve për anëtarësim të Serbisë do të votonte vetë Lituania, shteti prej nga ka ardhur doganieri që u vra në veri të Kosovës

Kryetari i Gjykatës Themelore të Mitrovicës Veriore do të jetë i nacionalitetit serb, ndërsa Kryeprokurori i nacionalitetit shqiptar.

Ata do të drejtojnë Gjykatën në të cilën struktura etnike do të jetë 60 përqind shqiptare e 40 përqind serbe, shkruan Koha Ditore.

Kjo marrëveshje, sipas kësaj gazete, është arritur në takimin e fundit mes Kryeministrit të Kosovës, Hashim Thaçi dhe atij të Serbisë, Ivica Dacic, që po mbahet në Bruksel.

Zëvendëskryeministri Hajredin Kuçi nuk e ka mohuar e as pohuar mundësinë e ndarjes etnike të Gjykatës në Veri.

“Jam në aeroplan. Kabashi është ende në Bruksel duke negociuar”, ka thënë Kuçi.