Organizata Joqeveritare “EC Ma Ndryshe” ka shqyrtuar sërish çështjen e ndriçimit të Urës së Gurit dhe atë të Arastës, në Qendrën Historike të Prizrenit.

Valon Xhabali, Koordinator i Programit të Trashëgimisë Kulturore tha se gjatë muajit janar monitoruesit e organizatës kanë kërkuar sqarime nga Drejtoria për Shërbime Publike në lidhje me afatin e largimit të ndriçimit nga këto ura, që vitin e kaluar ishin vendosur pa leje të Drejtorisë së Urbanizimit dhe Planifikimit Hapësinor dhe pa pëlqimet e Institutit për Mbrojtjen e Monumenteve Historike dhe të Këshillit për Trashëgimi Kulturore të Qendrës Historike të Prizrenit.
“DSHP nuk e ka parë të udhës që të ofroj përgjigje, duke shkelur parimet bazë të transparencës, por edhe dispozitat e Ligjit për Qasje në Dokumente Publike”.

“Në muajin nëntor të vitit të kaluar DSHP pat sqaruar se me 11 shtator 2013 ka lëshuar pëlqimin për NSH “Hisar Kosova” për pastrimin e shtratit të Lumëbardhit, rregullimin e mureve mbrojtëse në vendet e dëmtuara dhe ndriçimin e urave në qytet. “Përkohësisht është bërë ndriçimi i urave i cili do qëndrojë deri në festat e fundvitit dhe janë bërë disa riparime të vogla si ngjyrosja e parmakëve, rregullimi i trotuarit në urë, të cilat kanë qenë mjaft të dëmtuar dhe mundë të qëndrojnë deri në rregullimin e urës së re”, thuhej në përgjigjen e DSHP-së”.

Edhe pse kanë kaluar më shumë se një muaj nga përfundimi i festave të fundvitit ndriçimi ilegal në urat e lartpërmendura vazhdon të funksionoj. EC Ma Ndryshe 3 muaj më parë pat dokumentuar intervenimet pa leje e pa pëlqime në këto ura, që përbëjnë shkelje të drejtpërdrejtë të dispozitave të Ligjit për Qendrën Historike të Prizrenit.

“EC Ma Ndryshe” përkujton sërish se ky ligj, përcakton se për çdo aktivitet në Qendrën Historike duhet të konsultohen Instituti për Mbrojtjen e Monumenteve të Prizrenit dhe Këshilli për Trashëgimi Kulturore i Qendrës Historike dhe se pas pëlqimeve të tyre Drejtoria e Urbanizmit lëshon lejen përkatëse ose e refuzon duke u bazuar në Planin e konservimit dhe ligjet në fuqi.

“Rasti i këtyre dy urave tregon mungesën e vullnetit të institucioneve komunale për të përfillur ligjet në Qendrën Historike të Prizrenit”.

“Marrë parasysh neglizhencën e Komunës së Prizrenit, EC Ma Ndryshe i bën thirrje MMPH-së dhe MKRS-së që të intervenojnë për zbatimin e ligjshmërisë në Qendrën Historike të Prizrenit, duke nisur nga Ura e Gurit dhe ajo e Arastës”

EC Ma Ndryshe gjithashtu inkurajon institucionet mbikëqyrëse, si IMMH-në dhe KTK-në në veçanti, për denoncimin publik të këtyre rasteve.

“EC Ma Ndryshe” në korrik të vitit 2013 ka nisur zbatimin e projektit “Urbanizmi i Prizrenit nën vëzhgim të përhershëm”, përkrahur financiarisht nga Fondacioni i Kosovës për Shoqëri të Hapur (KFOS). Nevoja për mbikëqyrjen e zhvillimeve në sektorin e urbanizimit ka rrjedhë si pasojë e zhvillimeve të shumta negative gjatë periudhës së pasluftës dhe tranzicionit që janë manifestuar me degradimin urban dhe planifikimin e pa-balancuar hapësinor. Projekti do të vazhdoj me monitorimin dhe publikimin e të gjeturave në sektorin e urbanizimit dhe planifikimit hapësinor, sikurse edhe me adresimin e përgjegjësisë institucionale./PrizrenPress.com/

Partia Demokratike e Kosovës(PDK) në Malishevë ka akuzuar IQM-në për largim nga puna të njerëzve profesional.

“Kreu i Komunës Ragip Begaj ka vazhduar me përndjekjen e kundërshtarëve politik duke larguar nga puna zyrtarët e certifikuar dhe zëvendësuar me zyrtarë të pa certifikuar të cilët nuk kanë të drejtë ligjore as të vendosin nënshkrimin në shkresa zyrtare”, ka thënë kryetari i Degës së PDK-së, Isni Kilaj.

“Pas largimit të 12 drejtorëve nga vendi i punës si menaxher është larguar edhe Elmi Paçarizi ,zyrtar me certifikim të avancuar të prokurorimit…”.

Kryetari i Komunës, Ragip Begaj, ndërkaq ka mohuar se është larguar Paçarizi nga puna.

“Paçarizi në pozitën e re e ka të njëtën kategori të vendit të punës me të njëjtën pagë”, ka thënë Begaj./PrizrenPress.com/

Partitë opozitare dhe shoqëria civile kërkojnë nga lideri i PDK-së, Hashim Thaçi që të vije sa më shpejt në Prizren për të formuar Qeverinë “Muja III”.
Lulëzim Kabashi nga koalicioni AAK-LDD u ka bërë thirrje kryeministrit Thaçi dhe ministrit Enver Hoxhaj që të vijnë në Prizren dhe të zbatojnë marrëveshjen e nënshkruan në balotazhin e 1 dhjetorit të vitit të kaluar.

“Kryetari Muja nuk mund të vendosë ngase marrëveshjet janë nënshkruar me kryeministrin Thaçi dhe ministrin Hoxhaj dhe zbatimi i këtyre marrëveshjeve është në dorën e tyre”, ka thënë Kabashi,shkruan Koha Ditore.

“Ne presim që në 3-4 ditët e ardhshme të vihet në funksion marrëveshja në mënyrë që qeveria e re të nuse punën “.

Përveç partive në koalicion thirrje për formimin e qeverisë së re në Prizren kanë bërë edhe partitë opozitare dhe shoqëria civile.

Kryetari i Degës së PDK-së në Prizren,Minir Krasniqi ka shprehur bindjen se ”në seancën e ardhshme të KK-së kryetari Muja do t’i njoftojë këshilltarët me emrat konkret të drejtorive”./PrizrenPress.com/

Dita Botërore Kundër Kancerit e gjenë Kosovën me 735 persona të prekur nga kanceri vetëm gjatë gjashtëmujorit të parë të vitit 2013, dhe me mungesë të barnave për trajtim. Mosha më e shpeshtë tek femrat mbetet ajo 55 vjeçare, dhe 68 te meshkujt.
Kështu tregojnë statistikat që posedon Instituti Kombëtar i Shëndetit Publik, ku po vazhdojnë të lajmërohen numër i madh i personave të prekur nga kjo sëmundje.

KosovaPress ka vizituar dje këtë repart në të cilin ka gjetur pacientë që tregonin se barnat për trajtim po i’u mungojnë dhe shpeshherë po duhet të shpenzojnë vetë për t’i siguruar ato.

I prekur nga kanceri në mushkëri, Hysni Shala nga fshati Brojë ka ardhur t’u trajtuar në QKUK. Ai ka thënë për Kosovapress se është shumë i pakënaqur nga gjendja që është në QKUK.

‘Kushtet janë shumë të këqija, është fjala menaxhimi prej drejtorit nuk është në rregull, arsyeja është se nuk e ka stafin sa duhet……ka mbetur vetëm një motër ajo endet atë anë endet këtë anë, një mjek, thirr andej, thirr këndej…..fajet i ka menaxheri i spitalit kush është ai Behxhet Osmani……Shumicën i blejmë, kur ka si blejmë, këtë herë ka pas, por një të premte nuk më ka shkuar hiç mirë, deri në 400 euro i kam ble’, ka thënë ai.
Edhe Florije Hamza, nënë e tre fëmijëve, 40 vjeçare, vuan nga kanceri në veshkë tash një vit e gjysmë.

Ajo pa dashur të dalë para kamerave, rrëfen për KosovaPress se ka dy muaj që pret terapinë.

Hamza thotë se barnat janë shumë të shtrenjta dhe ajo nuk ka mundësi t’i sigurojë vet ato, andaj pret tash dy muaj që t’ia sjellin.

Por, Florija vazhdon të jetë optimiste. Ajo porositë të gjitha gratë e prekura nga kjo sëmundje që mos të humbin shpresën për shërim.
Ndërsa, Destan Azemi, onkolog në QKUK, thotë për KosovaPress se, Instituti i Onkologjisë ofron çdo gjë falas për pacientët që kurohen aty.
‘Në Institutin e Onkologjisë nuk paguhet asnjë send, as vizita, as puna laboratorike, as inçizimet as terapia, absolutisht, këto janë krejt falas edhe tjerave ditë, sepse vet natyra e punës e bënë që Ministria e ka rregulluar me ligj këtë punë, nuk kemi çka me fol për çmime, gjithçka është falas’, ka thënë ai.

Sa i përket numrit të pacientëve, Azemi ka thënë se fillimisht nuk ka qenë numër i madh, pasiqë pjesa më e madhe ka shkuar në Shkup dhe Tiranë. Por ai thekson se tani numri është rritur dukshëm.

Ai ka thënë se, gjatë vitit të kaluar kanë pasur 24 mijë vizita, 725 prej tyre që shkonin për të parën herë.

Ai porositë të gjithë njerëzit që një herë në 6 muaj të vizitohen në qendrat spitalore.

Lloji më i përhapur i kancerit mbetet ai i gjirit tek femrat, ndërsa tek meshkujt ai i mushkërive. Kështu bënë të ditur Faik Hoti, zëdhënës për informim në Ministrinë e Shëndetësisë.

‘Në bazë të raportit që e posedon Instituti Kombëtar i shëndetit publik, janë disa kategori që veçohen me incidencë më të theksuar. Në këtë aspekt si më të theksuar janë karcinomat, apo neoplazmat malinje të gjirit, pastaj vijnë melanomat apo neoplazmat malinje të lëkurës, vijnë pastaj llojet e tumoreve dhe kancerëve të traktit digjitiv, ndërsa në vendin e katërt janë të renditura sëmundjet kancerogjene që prekin traktit respirator’, ka thënë ai.
Ndërsa, për rastet që trajtohen jashtë vendit, Hoti ka thënë se, vitin e kaluar kanë qenë vetëm 22 rate që janë rekomanduar nga Instituti i Onkologjisë për trajtim jashtë vendit.

Ai, gjithashtu thekson se mamografia mund të bëhet përveç në QKUK, edhe në spitalin e Pejës, atë të Prizrenit, Gjakovës e Gjilanit. Derisa thotë se në spitalin eMitrovicës, pritet të funksionalizohet një mamograf.

Sipas Hotit, një shërbim që i ka munguar Kosovës ka qenë aplikimi i radioterpisë në sektorin publik dhe tanimë edhe kjo është funksionalizuar vitin që shkoi, ku deri më tani eksitojnë mbi 3200 procedura të radioterapisë që janë aplikuar në Onkologji.
Sot, në Ditën Botërore Kundër Kancerit, Shoqata e Kosovës KundërKancerit thekson se do të japë kontributin e saj brenda mundësive që kanë.

Xhavit Bicaj, profesor i Radiologjisë në Fakultetin e Mjekësisë dhe njëri ndër themeluesit e kësaj shoqate, thotë për KosovaPress se kanë vendosur që nga nesër të funksionojnë si ndërmjetësues mes pacientëve dhe MSH-së. Sipas tij, kjo është një përpjekje për t’iu ndihmuar të prekurve nga kjo sëmundje.
‘Ne si shoqatë kemi vendosë që prej nesër e tutje të jemi edhe avokatë të familjes, gjegjësisht familjarëve dhe të prekurve nga sëmundjet malinje, dhe të gjithë ata që kanë problem dhe që mund të ndërmjetësojmë kushtimesh them të jemi një urë lidhëse në mes të shoqërisë civile, mes familjarëve dhe pacientëve dhe institucioneve tona këtë rast ministrisë. Ne do të bëjmë të pamundurën të jemi avokat i pacientëve dhe familjeve që janë të goditura nga kjo e keqe’, thotë ai.
Ndryshe, sipas MSH-së, vitin e kaluar 23% e buxhetit të të gjitha barnave, i është dedikuar sëmundjes së kancerit.