Një gjykatës federal amerikan caktoi për në muajin maj fillimin e gjykimit të kosovarit Sami Osmankaç, i akuzuar për përgatitjen e një sulmi terrorist në Tampa të shtetit amerikan Florida.

Sami Osmankaç, shtetas amerikan i natyralizuar, është arrestuar në janar të vitit 2012 pas një operacioni të FBI’së. Ai akuzohet se ka bërë përpjekje të përdorë armë të shkatërrimit në masë dhe posedimin e një automatiku të paregjistruar.

Autoritetet thonë se Osmankaç planifikoi ta sulmojë një pikë të frekuentuar të natës dhe më pas të marrë pengje në mënyrë që të kërkojë lirimin e të burgosurve myslimanë. FBI thotë se posedon një videoxhirim të cilin Osmankaç e kishte bërë për ta publikuar pas bombardimit.

Gjykatësja e Gjykatës së Distriktit postoi të premten një njoftim në listën e çështjeve gjyqësore se procesi gjyqësor ndaj Osmankaçit do të fillojë më 27 maj, transmeton lajmi.net.

Gjykimi ndaj tij ishte caktuar të fillojë në tetor të vitit të kaluar, por ishte shtyrë pasi mbrojtja kishte ngritur shqetësime rreth kompetencës mendore të të akuzuarit. Megjithatë një ekspert i angazhuar nga Gjykata arriti në përfundimin se Sami Osmankaç është I aftë të qëndrojë në gjykim.

Drejtuesit e institucioneve të Kosovës dhe njohësit e integrimeve evropiane kanë thënë se Serbia do të kushtëzohet që ta njohë Kosovën si shtet sovran para se të bëhet anëtare e Bashkimit Evropian, shkruan Zëri.

Ky qëndrim i tyre është si reagim ndaj deklaratës së ambasadorit gjerman në Kosovë, Peter Blomeyer, i cili ka thënë se Serbisë nuk do t’i kërkohet që ta njohë Kosovën në një të ardhme të afërt dhe se pa njohjen e Rusisë dhe të Serbisë, statusi i Kosovës është i padefinuar.

Njohësit e së drejtës ndërkombëtare thonë se deklarata e ambasadorit gjerman për çështjen e statusit të Kosovës është e saktë, edhe pse kjo është e dhimbshme për Kosovën.

Zëvendëskryeministri i Kosovës, Hajredin Kuçi, është përgjigjur shkurt duke u shprehur i bindur se njohja e Kosovës do të jetë kusht për Serbinë para se kjo të bëhet anëtare e BE-së.

Misioni europain për sundimin e ligjit në Kosovë me letra nuk u beson mjekëve kosovarë QKU’së që ti bëjnë kontrollet e të burgosurve të këtij misioni që trajtohen në këtë institucion.

Koha Ditore shkruan se e ka parë një dokument të EULEX’it që parasheh që të burgosurit të trajtohen edhe nga mjekët e misionit EULEX.

Deri tash, sipas mjekëve, një gjë e tillë nuk po ndodh. Sami Lushtaku, kryetari i Skenderajt për një mandat të tretë, dhe njëherit i burgosur i EULEX’it nën dyshimin që ka kryer krime lufte, po kurohet vetëm nga mjekët kosovarë të QKU’së.

Profesori i Matematikës në UP, Qëndrim Gashi e ka vazhduar polemikën e Rektorin Ibrahim Gashin, për të cilin ka thënë se është në panik.

Ai ka thënë se Rektori Gashi, në intervistën e dhënë në RTK, ka mashtruar qytetarët e Kosovës.

“Brenda pak minutave në RTK, Rektori Gashi tenton të na mashtrojë prapë.
1. Ai tha se më ka emëruar mua Kryetar të Aleancës Franceze. Kjo është e pavërtetë. Unë jam zgjedhur nga Kuvendi i anëtarëve në vitin e kaluar, ku ai s’është as anëtar. Aleanca është OJQ dhe nuk ka mundësi të emërohet Kryetari e sidomos jo prej dikujt që as nuk ka lidhje me të.
2. Rektori Gashi tha se debati nuk ka të bëjë me vlerën e punimeve. Pikërisht vlera e punimeve po kontestohet sepse historiani me punimin “Mineralet dhe menaxhimi i tij” mund të jetë vetëm sharlatan, por jo edhe historian. Z. Rektor si duket qenka në panik”, ka reaguar Qëndrim Gashi në Facebook.

Rektori i Universitetit të Prishtinës, Ibrahim Gashi nuk e ka ndërmend të jap dorëheqje, dhe një kërkesë të tillë, siç thotë, “e bërë nga rreth 30 persona në një komunitet prej rreth 60 mijë studentësh”, është banale.

Ai ka thënë se ka shumë shkencëtarë të mëdhenj të huaj, që kanë rënë në lajthitje nga revistat virtuale. Gashi thotë se është kontestuar revista dhe jo punimet e tij.

“Nuk e kam ndërmend të jap dorëheqje sepse është banale kërkesa, dhe vjen prej një grupi të caktuar njerëzish të cilët e kanë pasë gjithmonë derën qelë nga ky menaxhment për të kontribuar në të mirën e universitetit”, ka thënë Gashi për RTK-në.

Ai thotë se kritikat po vijnë nga profesor brenda UP-së, të cilëve u është dhënë hapësirë e mjaftueshme për kontribut në UP.

“Janë dy profesorë që e kanë ngritur këtë problem, dhe unë mund t’i them edhe me emër që ata janë pjesë e forumeve. Qëndrim Gashi është pjesë e Këshillit Botues dhe është i emëruar nga unë si udhëheqës i aleancës franceze në Fakultetin Filologjik; Popovci është anëtar i Këshillit të Shkencës dhe Hajrullahu ka pasë mbështetjen time të vazhdueshme, të cilën e ka keqpërdorë skajshëm”, ka thënë Gashi.

Ndërkohë Gashi, ka kritikuar edhe Lidhjen Demokratike të Kosovës, për inicimin e diskutimit për UP-në në Parlamentin e Kosovës. Ai ka thënë se megjithëse e kupton se jemi në vit zgjedhor, partitë politike duhet të rrinë larg universitetit “Hasan Prishtina”./KP/