Aleanca për Ardhmërinë e Kosovës dëshiron reformë zgjedhore, por kjo parti shprehet e gatshme të hyjë në zgjedhjet e përgjithshme edhe pa të.

Nënkryetari i AAK’së, Ardian Gjini, duke folur në Emisionin Infomagazinë të Klan Kosovës, bëri të ditur se partia e tij do të dëshironte që zgjedhjet e përgjithshme të mbahen më së largu deri më 21 shtator.

Sipas tij, siç raporton lajmi.net, kërkesat e Ambasadorëve në Kosovë për përfundimit të reformës zgjedhore janë të drejta dhe duhet të zbatohen.

“Pozicioni i AAK’së për këtë është se zgjedhjet e ardhshme nuk mund të bëhet pa reforma zgjedhore, pasi që duam të kemi zgjedhje sa më të mira”.

“Ne dëshirojmë që të kemi së pari reformë e pastaj zgjedhje, mirëpo nëse nuk ndodhë reforma, atëherë ne jemi gati”.

“Shpresojmë që edhe forcat tjera politike të kuptojnë që nuk duhet të shkojmë në zgjedhje pas 3 apo 4 muajve sepse shkojnë në dëm të vendit”.

“Nëse të gjithë aleatët tanë thonë se zgjedhjet pa reformë janë të dëmshme, atëherë ne duhet ta kuptojmë se kjo është e vërtet”.

“Ne mendojmë që më së miri do të ishte që zgjedhjet të mbahen më 21 shtator, pasi që është matja e kohës verore, dita më e gjatë, moti më i mirë për të votuar e kështu më radhë”.

Gjini ka kritikuar subjektet tjera politike se janë pro reformave zgjedhore, por nuk kanë bërë asgjë që ato të ndodhin.

“Edhe partitë tjera politike tjera, PDK e LDK po kërkojnë reforma para zgjedhjeve, mirëpo nuk po bëjnë asgjë për të këtë punë”.

“Ka vullnet te partitë politike që të ndodhin reformat para zgjedhjeve, mirëpo po duket që ka hezitim që të shtyjnë reformat në partitë e tyre”.

Nënkryetari i AAK’së ka premtuar ndryshime brenda partiake, duke folur edhe për prurje të reja.

“Kemi takime të përditshme me degët nëpër të gjithë Kosovës”

“Mund të ketë edhe reforma brenda partisë, por aktualisht janë duke ndodhur vendime të rëndësishme për ndryshime në parti për të parë se ku kemi gabuar dhe çfarë duhet përmirësuar për të hyrë në zgjedhjet e radhës”.

“AAK premton se do të ketë prurje të reja dhe njerëz të ri në këtë parti”.

“Premtojmë prurje të reja, mirëpo nuk dëshiroj të përmend emra njëherë. Ne kemi problem që t’i bindim njerëz të rëndësishëm nga shoqëria civile sepse ata kanë të ardhura të mira, ndërsa ne në AAK, nuk kemi paga”.

Ardian Gjini gjithashtu ka folur edhe për akuzat publike të bëra nga persona të ndryshëm drejtuar AAK’së dhe liderit, Ramush Haradinaj, duke e lidhur atë me veprime kriminale të pasluftës në Kosovë.

Ai tha se AAK’së nuk i ka mbetur asgjë tjetër, vetëm t’i padisë ata persona që, sipas tij, kanë shpifur.

“Neve na mbesin vetëm 2 apo 3 veprime: e para është se ne do të veprojmë ose të prodhojmë ide politike, e dyta është që të shohim vetën dhe e treta është t’i drejtohemi drejtësisë”.

“Nuk kemi rrugë tjetër, sepse del dikush i cili del në opinion politik dhe bën akuza. Ne duhet t’i ngrisim padi për shpifje”.

“Duket e rëndë çfarë thotë Donika Gërvalla Shëartz, pasi që dihet se e bija e kujt është”, ka thënë Ardian Gjini në Emisionin Infomagazinë të Klan Kosovës.

Profesori i së drejtës kushtetuese, Arsim Bajrami, ka folur për rritjen eventuale të numrit të deputetëve në Kuvendin e Kosovës. Ai theksoi se numri prej 120 deputetësh në legjislativin e vendit, është numër i mjaftueshëm dhe në përputhje me numrin e popullsisë së Republikës së Kosovës.

Bajrami tha për Telegrafin se edhe shtetet të cilat kanë numër më të madh të banorëve se Republika e Kosovës, si p.sh. Republika e Sllovenisë, në Parlamentin e saj kanë numër më të vogël të deputetëve sesa Parlamenti i Kosovës.

“Çfarëdo rritje e numrit të deputetëve, do ta prish ekuilibrin në Kuvend. Ky ekuilibër është vendosur mirë në atë që njihet si ‘diskriminim pozitiv’, ku pakicave iu është mundësuar një përfaqësim dinjitoz në legjislativin e vendit. Cilado rritje e numrit të deputetëve do ta prish këtë ekuilibër. Dhe, e quaj të panevojshme çfarëdo ndërhyrje në këtë drejtim. Çdo rritje e numrit të ligjvënësve do të kishte edhe implikime buxhetore, do të ndikonte në procesin e vendimmarrjes, do ta rriste shumicën e kualifikuar, do ta rriste shumicën e dyfishtë dhe do ta ndërronte komplet procesin e vendimmarrjes”.

Sipas tij, numri prej 120 deputetëve është numër që i përgjigjet numrit të votuesve dhe numrit të partive politike.

Ndryshe, zëvendëskryeministri i Kosovës, Behgjet Pacolli, ka deklaruar për media se Kuvendi i ardhshëm duhet t’i ketë 135 deputetë, 20 për pakicat, pesë për diasporën dhe 110 për t’u fituar në zgjedhje!

Kryetari i Komisionit për Verifikimin e Veteranëve dhe pjesëmarrësve të luftës së UÇK-së, Agim Çeku, është shprehur i kënaqur me mbarëvajtjen e këtij procesi në Zonën Operative të Shalës, duke thënë se në Brigadën 141 “Meh Uka” të kësaj zone tashme ka përfunduar ky proces.

Çeku ka bërë me dije për “Epokën e re” se në këtë brigadë një numër i konsiderueshëm i atyre që kanë aplikuar për njohjen e statusit të veteranit nuk u është pranuar statusi i veteranit, pasi nuk kanë mundur të verifikohen se kanë qenë luftëtarë të UÇK-së nga komandantët e kësaj brigade. “Procesi në Zonën Operative të Shalës po shkon sipas pritjeve tona. Deri tani ka përfunduar verifikimi i Brigadës 141. Në përgjithësi ky proces ka shkuar mirë. Një numër të konsiderueshëm të aplikacioneve askush nga zinxhiri komandues nuk ka mundur t’i vërtetojë se kanë qenë luftëtarë të UÇK-së. Pra, janë klasifikuar veteranët e kësaj brigade dhe disa, fatkeqësisht, janë të zhgënjyer, sepse nuk ka mundur askush ta vërtetojë se kanë qenë pjesë e luftës”, ka thënë Çeku. Ai ka paralajmëruar se ky proces do të përmbyllet gjatë pranverës, pasi është prioritet i Qeverisë së Kosovës. Sipas tij, nevojitet pak kohë derisa të verifikohen të gjitha aplikacionet. “I kemi thirrur të gjithë komandantët e niveleve të ndryshme, ku secili komandant duhet ta shikojë me kujdes secilin aplikacion. Ne do të bëjmë çmos që ky proces të përfundojë sa më shpejt, duke shpresuar se edhe në Kuvend sa më shpejt do të kalojnë plotësimi dhe ndryshimi i ligjit për vlerat e luftës. Ky proces është një nga prioritetet e qeverisë dhe komisionit. Besoj shumë se do ta kryejmë brenda pranverës ashtu siç ka thënë edhe kryeministri”, është shprehur Çeku.

Ai ka shfaqur shpresën se edhe Kuvendi i Kosovës do ta trajtojë me prioritet amendamentimin e Ligjit për Statusin dhe të Drejtat e Dëshmorëve, Invalidëve, Veteranëve, Pjesëtarëve të UÇK-së, Viktimave Civile dhe Familjeve, në mënyrë që të miratohet para datës 10 mars. “Besoj se deri me këtë datë ky ligj do të amendamentohet, sepse ajo është pengesa kryesore që e ka vonuar këtë proces kaq shumë. Besoj se parlamenti këtë çështje do ta ketë si prioritet dhe shumë shpejt do të aprovohet”, ka deklaruar Çeku. Mirëpo përfaqësuesit e veteranëve janë skeptikë se procesi i verifikimit të kategorive të dala nga lufta do të përmbyllet në pranverë të këtij viti.

Kryetari i OVL-UÇK-së, Muharrem Xhemajli, ka thënë për “Epokën e re” se veteranët nuk janë në dijeni se kur mund të përfundojë ky proces. “Realisht ne nuk e dimë se kur do të përfundojë ky proces, sepse ata kanë premtuar shpesh se ky proces do të përmbyllet këtë muaj apo në muajin tjetër dhe kjo nuk ka ndodhur. Pra, u bënë 15 vjet që ne nuk kemi ligj për luftën e UÇK-së, që është një fatkeqësi shumë e madhe”, ka theksuar Xhemajli. Ai ka përsëritur edhe një herë kërkesën e veteranëve që Ligji për Vlerat e Luftës të amendamentohet para datës 10 mars. “Dhjetorin e kaluar ne ua kemi dërguar një letër të hapur të gjitha institucioneve të Kosovës, duke përfshirë Qeverinë e Kosovës dhe Kuvendin e Kosovës. Kemi kërkuar prej tyre që deri më 10 mars të bëhet plotësim-ndryshimi i Ligjit për Vlerat e Luftës në mënyrë që të njihet lufta e UÇK-së me ligj, tek pastaj të bëhet edhe ligji për benificionet e veteranëve”, është shprehur Xhemajli, duke shtuar se për veteranët është e mirëseardhur që ky proces të përmbyllet sa më shpejt. “Veteranët e luftës jetojnë në një gjendje tepër të rëndë ekonomike, sociale dhe shoqërore. Po ashtu, tash kanë filluar të shfaqen më të madhe te veteranët edhe problemet shëndetësore. Një numër i konsiderueshëm i veteranëve asnjëherë prej se ka përfunduar lufta nuk e ka ndier dorën e shtetit”, ka thënë ai.

Xhemajli ka bërë me dije se nëse deri më 10 mars nuk ndodh plotësim-ndryshimi i Ligjit për Vlerat e Luftës, OVL-UÇK-ja mund të ndërmarrë veprime konkrete. “Për të drejtat e veteranëve vetëm një herë ka pasur protestë në vitin 2010. Kështu që, pas datës 10 mars veprimet tona do të jenë shumë konkrete, jo vetëm deklarative, siç ka ndodhur deri më tash”, ka thënë Xhemajli.