Grupet punuese të Kosovës dhe Serbisë pritet të takohen në Bruksel me përfaqësuesit e Bashkimit Evropian për të diskutuar zbatimin e rezultatit të zgjedhjeve komunale në veriun e Kosovës të banuar me shumicë serbe.
Sipas Zërit të Amerikës, mospajtimet rreth procedurave kanë bërë që të shtyhet konstituimi i komunave në veri, ndërsa mosmbledhja e kuvendeve komunale deri në fund të kësaj jave mund të çojë në zgjedhje të reja në atë zonë.
Shkolla fillore “Nazim Kokollari” në Prizren, është pasuruar të mërkurën me sallë të edukatës fizike. Përurimi i kësaj salle është karakterizuar me një atmosferë festive.
Kryetari i Komunës së Prizrenit, Ramadan Muja, tha se ndërtimi i sallës së edukatës fizikës në këtë shkollë është i rëndësishëm jo vetëm për nxënësit, por edhe për të rinjtë e lagjes “Dardania”.
Ndërkaq drejtori i Arsimit,Nexhat Çoçaj,tha se gjysmëvjetori i dytë në këtë shkollë por edhe në shkollat e tjara ka filluar mbarë.
Fjalë të mira për realizimin e këtij projekti pati edhe,Tahir Kokollari, baba i dëshmorit,Nazim Kokollari,emrin e të cilit e bart kjo shkollë që nga 22 marsi i vitit të kaluar.
Drejtori i shkollës Xhafer Basha,shprehu besimin se së shpejti kjo sallë do të kompletohet në tërësi me inventarin e nevojshëm.
Objekti i sallës ka kushtuar në vlerë prej 228 mijë eurove të investuara nga drejtoria komunale e arsimit. Objekti në fjalë ka hapësirën prej 930 metër katror duke përfshirë sallën në dimensione 33 X 18 metra si dhe dhomat përcjellëse…/TV Prizreni/
Zyra Rregullatore për Ujësjellës dhe Kanalizim (ZRRUK) e Kosovës, pas analizës së afarizmit të realizuar të kompanive regjionale të shërbimeve publike të ujit gjatë vitit 2013, ka bërë korrigjime të pjesshme në dy kompanitë regjionale, tek “Hidroregjioni-Jugor” në Prizren dhe “Radoniqi” në Gjakovë, me të cilat do të faturohen konsumatorët e shërbyer gjatë vitit biznesor 2014.
“” Në “Hidroregjionin -Jugor” në Prizren tarifa për shërbimet e ujësjellësit për konsumatorët e amvisërisë është ngritur nga 0.35 €/m3 në 0.36 €/m3,për konsumatorët e biznesit dhe institucioneve tarifa për shërbimet e ujësjellësit është rritur nga 0.69 €/m3 në 0.70 €/m3”.
“ Tek “Radoniqi” në Gjakovë tarifa për shërbimet e ujësjellësit për konsumatorët e amvisërisë është ngritur nga 0.35 €/m3 në 0.36 €/m3. Po ashtu edhe tarifa për shërbimet e kanalizimit për konsumatorët biznese e institucione është rritur nga 0.21 €/m3 në 0.22 €/m3?, njofton ZRRUK nëpërmjet një komunikate.
“Arsyet e marrjes së një vendimi të tillë qëndrojnë në faktin se as një nga Kompanitë Regjionale të Ujit (KRU), nuk i ka përmbush ose përafruar përmbushjes së objektivave të dymbëdhjetë (12) treguesve kyç të përcaktuar nga ZRRUK me procesin rregullatorë të tarifave të vitit 2013, të cilët kanë qenë parakusht për të proceduar me metodologjinë e rishikimit të tarifave për ngritje të këtyre shërbimeve publike të ujit”
“Korrigjimet e pjesshme të rishikimit të tarifave te dy kompanitë regjionale të theksuara ma lartë, janë përshtat me ngritje simbolike të tarifave të tyre për nga një (1) cent për m3, pasi që njëra nga to ka të përmbushur tre tregues e tjetra dy dhe që të dy kompanitë i janë përafruar shumë shumës së planifikuar të realizimit të investimeve kapitale të financuar nga mjetet vetanake financiare”, thuhet në komunikatë.
ZRRUK ka vendosur me vazhdimin e vlefshmërisë së tarifave të shërbimeve publike të ujit të vitit 2013 edhe gjatë vitit 2014, të pesë kompanive tjera.
“Ky proces tariforë është pjesë e procesit rregullatorë të tarifave 2012-2014, të përcaktuar mbi bazën e Biznes Planeve Rregullatore të prezantuara nga Kompanitë Regjionale të Shërbimeve të Ujit në gjysmën e dytë të vitit 2011 dhe politikave rregullatorë të këtyre shërbimeve të aprovuar nga ZRRUK”./PrizrenPress.com/
Jakup Krasniqi, thotë se lajmi për kthimin e Fatmir Limajt në PDK është krejt gënjeshtër. Ndryshe, Limaj dhe Krasniqi, dikur dy nga figurat kryesore brenda PDK’së, kanë lënë të hapur mundësinë e krijimit të një partie të re pas prishjes së tyre me PDK’në.
Jakup Krasniqi mohon kthimin e Fatmir Limajt në Partinë Demokratike të Kosovës.
Në media sot ka qarkulluar një lajm në të cilin thuhej se deputeti Limaj do të kthehet në PDK, pas konsultimeve të supozuara se kanë ndodhur mes tij dhe Kryeministrit dhe kryetarit të kësaj partie, Hashim Thaçi.
Por, ky lajm demantohet nga politikani aktualisht më i afërt me Limajn, Kryeparlamentari Jakup Krasniqi.
“Është gënjeshtër”, thotë Krasniqi për lajmi.net.
“Për këtë çështje më mirë është të pyetet Fatmir. Por, unë nuk besoj se lajmi është i vërtetë”.
“Besoj se është krejt gënjeshtër, mirëpo për këtë duhet të flasë vetë ai”, thotë Krasniqi për lajmi.net.
Thaci LImaj Krasniqi
Limaj dhe Krasniqi, dikur dy figura kryesore brenda PDK’së, kanë lënë të hapur mundësinë e krijimit të një partie të re, pas përplasjeve që ata kishin me drejtuesit e kësaj partie.
Si deputetë të dy votuan në disa raste kundër vendimeve të koalicionit qeveritar.
Limaj në Malishevë dhe Krasniqi në Drenas, po ashtu, u angazhuan maksimalisht për fitoren e dy Iniciativave Qytetare në këto komuna, që garonin përballë PDK’së, e cila humbi njërën nga këto beteja zgjedhore.
Pas zgjedhjeve lokale Thaçi dhe Zëvendëskryetari i PDK’së, Kadri Veseli, u kanë bërë thirrje Limajt dhe Krasniqit që të kthehen në PDK, por thirrje e tyre nuk ka mirëkuptimin e tyre.
Deri tash Limaj dhe Krasniqi kanë folur për një alternativë të re politike, por pa dhënë detaje dhe pa ndërmarrë hapa konkret, duke lënë kështu hapësirë për debate dhe interpretime të ndryshme.
Gjatë viteve të 80-ta dhe 90-ta të shekullit të kaluar kosovarët kishin jetuar me muzikën e Shemsi Krasniqit i njohur si Shemi. Ishin me dhjetëra këngë të grupit “Ilirët” që sikur u shuan kur përfundoi lufta në Kosovë – rokeri kishte vendosur t’i thotë “tung” muzikës. Por, i bindur se ka gabuar ai është rikthyer pas njëmbëdhjetë viteve. E tash, së bashku me krijimin e këngëve të reja, ai është duke i përpunuar të vjetrat
Pa i mbushur të njëzetat ka dalë për herë të parë para publikut, i cili, në Jugosllavinë e dikurshme e mirëpriste muzikën rok shumë më shumë sesa që e mirëpret publiku në ditët e sotme. Muzika rok kishte filluar të lulëzonte, ndërkaq, një djalosh nga Prishtina në bashkëpunim me moshatarët e tij po fillonin kultivimin e muzikës rok. Pak a shumë, kështu nis karriera e Shemsi Krasniqit para më shumë se tridhjetë viteve, i cili pas një kohe do të bëhet vokalisti i grupit muzikor “Ilirët”. Dhe, sot, më shumë se tre dekada pasi ka kënduar për herë të parë, ai vazhdon të “qëndrojë në këmbë”, me pretendimin se i tillë do të jetë deri në frymëmarrjen e fundit.
“Kam nisur të këndojë për herë të parë në vitin 1978/79. Aty i kam bërë hapat e parë me kitaristin, Menan Kiseri, me grupin që atëherë quhej Mehida, ka qenë grupi im i parë. Me të kam filluar, e paraqitja e jonë zyrtare ka qenë tek “Rina këndon”, ishte festivali që organizohej nga Reshat Randobrava. Aty Mehida ka dalë për herë të parë”, fillon bisedën për KultPlus, Krasniqi, gjatë së cilës, ai do të shpalos detaje të shumta nga jeta dhe karriera e tij.
Hallet e Kosovës nëpër rreshtat e këngëve
Pothuajse secila këngë që është interpretuar nga Krasniqi në kuadër të grupit “Ilirët” në njërën formë apo në tjetrën e prekte hallin e shqiptarëve. Kjo veçanërisht gjatë viteve të nëntëdhjeta.
“Oj hapsane e lyme me kallaj, të kam mbajt në mendje dhe të mbajë. Si harrojë torturat ç’mi ke shtu, kënd pa e vrarë e kënd pa e varru”, është njëra nga këngët që sikurse me videoklipin edhe me tekstin e këngës trajtonte burgosjen e shqiptarëve nga pushteti serb.
“Përveç një teksti të një kënge, të gjitha tekstet tjera i kam shkruar vetë”, thotë shkurt Shemsi Krasniqi, teksa tregon për këngët që i ka krijuar për dekada me radhë.
Gjatë bisedës ai tregon se si gjendja e rëndë nëpër të cilën po kalonin shqiptarët e Kosovës e kanë inspiruar që t’i shkruaj tekstet e ndryshme, të cilat më pas t’i bëjë këngë.
Siç tregon Krasniqi, i ati i tij kishte qenë njëri nga të mbijetuarit e Masakrës së Tivarit ku u grumbulluan shqiptarët nga pushteti serb u dëbuan në qytetin malazez, dhe më pas u ekzekutuan.
Ndërkaq, në vitet e nëntëdhjeta në Kosovë kishte nisur aksioni “Falja e Gjaqeve”, që ishte udhëhequr nga Anton Çetta, aksion ky pas së cilit mijëra familje që ishin në gjak me njëri-tjetrin ia patën shtrirë dorën e pajtimit njëri-tjetrit. Këngëtari, që tashmë ka kaluar të pesëdhjetat thotë se ishte përpjekur ta ngrisë vetëdijen tek popullata se nuk është koha të bëhen vrasje në mes vete, por të organizohen për t’iu kundërvënë pushtetit të Sllobodan Millosheviqit.
Shemsi Krasniqi dhe grupi “Ilirët” kishin kënduar edhe dhjetëra këngë të tjera, siç ishte edhe ajo “Larg vendlindjes” që trajtonte çështjen e azilantëve kosovarë që gjatë viteve të 90-ta të shekullit të kaluar, jetonin të vetmuar nëpër shtetet perëndimore, ku njihet edhe refreni “Oj Kosovw ty tw kam hajmali”.
Edhe pse, në raportuarin e “Ilirët” ka edhe dhjetëra këngë të tjera, që trajtojnë fatin e keq të shqiptarëve, ky grup i ka kënduar edhe dashurisë e jetës rinore. Njëra nga to është hiti kamotshëm “Kazanova”. E tërë kënga, fund e krye flet për vajzën e re prishtinase të viteve të shtatëdhjeta dhe tetëdhjeta.
“E kam dashur jetën e lehtë, kam qenë edhe muzikant, kam pasur edhe femra, ka diçka aty. Kazanova lidhet me mua, sepse, unë s’kam ditë as kur është natë as kur është ditë. Kam fluturuar tërë kohën. Tash është më lehtë, përpara ka qenë e vështirë”, ka thënë Shemi.
Rikthimi pas njëmbëdhjetë vjetëve pushim
Disa këngë të realizuara pak kohë para luftës në Kosovë, të transmetuara tek qytetarët nëpërmjet kasetave me shirit magnetik, dhe nëpërmjet video-kasetave që gjatë viteve të nëntëdhjeta bëheshin për çdo Vit të Ri, përbëjnë krijimtarinë muzikore të këngëtarit, me të cilët, në një farë forme ai i kishte dhënë fund karrierës së tij.
Ishin duetet me këngëtaren Ganimete Abazi, një duet me këngëtaren Mihrije Braha, dhe disa këngë të realizuara të cilat mbetën si dhurata e fundit për kosovarët nga grupi që shumë breza ishin rritur me të. Ndërkaq, mundësia e vetme për t’i dëgjuar ato këngë ishte në kanalin YouTube, në të cilin deri së voni “Ilirët” dhe Krasniqi nuk kanë pasur fare kanal personal.
Për vokalistin e grupit “Ilirët” nuk dihej asgjë, ndërkaq, vetë ai kishte refuzuar çdo mundësi që të dalë në opinion, të këndojë apo të jap intervista.
“Pas rikthimit tim pas 11 vjetëve, rinia mi njihte këngët por mua si personalitet nuk më njihte. Dhe thash është mirë kësaj rinie t’ia bëjmë ato këngët e vjetra, t’i përpunojmë pak. I kemi përpunuar disa këngë, me Mihrien (Braha) i kam kënduar, kanë dalë bukur, kemi fituar popullaritet mjaftë”, thotë ai.
Por, cila ishte arsyeja që njëri nga grupet më të mira të muzikës rok, që i kishte mbijetuar kohërave shumë të vështira, të vendoste që mos të këndojë më.
“Ka qenë ajo koha kur përfundojë lufta. Shumë ma shtrojnë këtë pyetje, e as vet s’di të përgjigjem. Kam menduar se misioni im ka përfunduar. Unë tërë jetën kam kënduar për çështjen kombëtare edhe kam menduar se misioni im ka përfunduar me përfundimin e luftës. Por, për rikthimin tim ka luajtur rol edhe shëndeti im. E kam pasur një atak në zemër, edhe ata më kanë preferuar t’i kthehem muzikës, sepse, muzika kinse qenka ushqim, apo relaksim, është mirë të merresh me muzikë, e qetëson zemrën. E kam marrë si hajgare, por ka dalë kështu, prej se jam rikthyer e ndjejë shumë mirë vetën”, tregon babai i dy djemve, Ponisin shtatëmbëdhjetë vjeçar dhe Uliksin tetëvjeçar.
Ai madje është i bindur se tashmë është turp nëse e lë muzikën pas gjithë krijimtarisë që ka pasur.
“Natyrisht që jam penduar për pauzën. Bile mendoja ta kisha nxjerrë nga një këngë për çdo vit, kjo më kishte mbajtur. Por mua për njëmbëdhjetë vjet më ka mbajtur kënga ‘xhamadani’. Po mos të ishte ajo këngë unë s’do të isha askund”, thotë ai.
Historia e këngës “Xhamadani vija-vija”
Njeriu që tashmë mund të cilësohet si këngëtar aktiv, e që thotë se nuk pretendon të pasurohet nga muzika, prandaj, punë primare e ka atë të menaxherit tek biznesi i miqve të tij, është personi që e ka bërë të “njohur” këngën “Xhamadani vija-vija”.Ai thotë se kjo këngë ishte kompozuar nga dy shkodranë, sikurse edhe teksti që ishte shkruar, pastaj e kishte kënduar këngëtarja Shkurte Fejza, por siç thotë ai, kjo nuk ka zgjatur shumë kohë.
“E keni vërejtur se ajo këngë e lyp një dinamikë tjetër, jo për t’ia mohuar Shkurtës. Me Enis Preshevën producentin tonë e kemi bërë atë këngë në vitin 1997 dhe mund të them se kam pas dëshirë ta bëjë atë këngë edhe një herë, por s’mund të bëhet më mirë. Janë disa këngë që mbetën të tilla, kemi dashtë ta bëjmë me filarmoni, por prapë kemi thënë se s’mund të bëjmë asgjë më shumë se që kemi bërë. Enisi i ka dhënë vulë asaj kënge”, nënvizon ai.
Kjo këngë, që në njëqind vjetorin e shpalljes së Pavarësisë së Shqipërisë ishte bërë “Himni i shqiptarëve”, e ka edhe një simbolikë tjetër.
Në sheshin “Nëna Terezë” po mbahej koncerti festiv me rastin e përvjetorit të pavarësisë së Kosovës. Dhe aty, pa pritur fare, ka shpërthyer Shemi në duet me Ganimete Abazin pikërisht me këtë këngë.
Në fakt, në këtë paraqitje ishte rikthyer edhe këngëtarja Abazi, e cila, gjithashtu nuk ishte marrë me muzikë aktive për më shumë se një dekadë. Dhe, tani pas rikthimit, a do të ketë sërish projekte muzikore të përbashkëta?
“Për sa i përket bashkëpunimit me Ganën, kohën e fundit i kemi pasur disa biseda por nuk e di. Ndoshta do të bashkëpunojmë me disa këngëtare, që po quhen vipa, sepse, po kërkojnë që të kem duete të tilla. Nëse i përpunojë këngët që i kemi kënduar me Ganën, aty nuk duhet të këndojë Ganja, sepse, duhet bërë ndryshime”, thotë ai.
Projektet me të cilat do të prezantohet
Viti që kemi lënë pas nuk ka qenë edhe aq pasiv për Shemin. Ai është paraqitur me disa duete, me disa këngë të reja, dhe me përpunime të këngëve të vjetra.
Por, viti 2014 do të jetë edhe më i frytshëm. Të paktën kështu beson vetë prishtinasi që si i ri kishte jetuar në lagjen e “Katër Llullave” në Prishtinë, ndërkaq, tash jeton në lagjen Arbëria.
“Kam nostalgji për ato këngë (këngët e viteve të 90-ta). Tash jam duke i përpunuar dy këngë, të vitit 96/97 kur kemi bërë ne muzikë, le të jenë sekret se cilat këngë janë ato, sepse janë përpunime, të dyja janë duete me femër. Janë disa projekte, një këngë jam duke e punuar në Shqipëri, e para do të dalë në fund të këtij muaji, është duke e punuar Alfred Cula, ndërkaq Shkodran Tolaj është duke e punuar një këngë tjetër, ai ma ka punuar edhe këngën ‘Rini thuaja këngës’. Mund të them se i vetmi njeri që ka shkruar për mua është Shkodran Tolaj, ai më njeh mirë”, thekson ai.
Pak kohë pasi ishte rikthyer në skenën muzikore, këngëtari Krasniqi patë nxjerrë këngën “Mixha Mursel”, që portretizonte një plak që i kishte bërë mbi shtatëdhjetë vjet, që s’kishte përkujdesje nga djemtë e tij, dhe që përherë kishte lakmi në vajza të reja e të bukura.
Krasniqi thotë se e ka inat që jetën e tij personale, apo një ngjarje që ndërlidhet me jetën e tij ta bëjë këngë, dhe se e njëjta gjë e irriton kur e bëjnë të tjerët, por siç thotë ai, kësaj radhe ka bërë përjashtim, duke ia kushtuar një këngë axhës së ndjerë, të cilën, megjithatë, ai thotë se e ka zbukuruar paksa nga realiteti.
“Më vjen keq që se kam incizuar sa ka qenë ai gjallë, edhe e pata shkruar tekstin qysh kaherë, diku në vitet e 90-ta, e pastaj e pata harruar krejt, por pastaj basisti im, Shkëlzeni, më tha se e kam pasur një tekst diku, iu kujtua atij, kështu ka lindur kënga”, thotë ai.
Në suksesin e mëtutjeshëm ai është i bindur maksimalisht, ngase, siç thotë , ka pasur raste kur i ka matur forcat me këngëtarë “modern”.
Shumë të rinj shqiptarë në atë kohë kishin filluar të merren me muzikë rok. Në fakt, në vitet e 70 të shekullit të kaluar u patën themeluar rok-grupet e para shqiptare, si grupi 403 apo Gjurmët, por, pothuajse asnjë grup i tillë nuk i ka mbijetuar kohës.
Shemsi Krasniqi e kujton me ëndje kohën kur, organizonte festivalin BUM, në të cilin siç thotë ai, shkëlqenin rok-grupet shqiptare të kohës.
“Është evidente që atëherë (vitet e 70-ta) ka pasur më shumë vlera muzika rok. Atëherë është dashtë roku shumë, kanë qenë grupet e mëdha, Gjurmët, 403, Ilirët, Minatori, TNT, ka pasur grupe të mira. Kur i thirrsha unë grupet nga Jugosllavia në Bum Festival ata asgjë nuk ishin më të mirë si unë. Po tash, nëse dëshiron të fitosh para, me vlera këtë s’mund ta bësh. Mund ta rrahin shpinën por fiton kuantiteti”, thotë këngëtari, që megjithatë pretendon se muzikës nuk do t’i thotë kurrë “lamtumirë” .
Në shumicën e paraqitjeve, mbase në të gjitha, qofshin ato të kamotshme apo të pasluftës, Krasniqi del me kapele në kokë. Edhe ky detaj e ka një histori të veten.
“Nëna ime më thoshte gjëja më e bukur tek ti janë flokët, këtë e di gjenerata ime, i kam pasur shumë të mira, edhe femrat më donin vetëm nga flokët. Por më vonë më ranë flokët. Kur shkuam në turne në Gjermani, në vitin 1995, Leci (Ibrahim Krajkova) që ishte si një udhëheqës i joni, më tha o njeri qite një kapele se po dukesh si frankeshtajn, sepse, kokën e kisha një pjesë me flok e një pjesë pa flok. E morra një kapele, atë kohë kemi qenë grupi më i popullarizuar që nga formimi, ka qenë koha e dueteve me Ganën (Ganimete Abazin), viti 1995/96. E vendosa kapelën, dolëm me Ganën edhe e kallëm. Pas kësaj erdhi menaxheri Fazli Rexha edhe më tha mos e hiq kapelën se po thonë, çka po bën ky njëri me kapelë, e kalli krejt. Edhe kështu ka mbetur kapela”, thotë ai.
Një kujtim tjetër i tij, që ka të bëjë me të kaluarën është rreziku, që ai thotë se ka kaluar, teksa është përpjekur të bëjë disa foto me veshje ushtarësh, për të ilustruar kopertinën e njërit prej albumeve të tij.
“Unë edhe kameramani Sylejman Kllokoqi e kemi bërë budallakinë më të madhe në jetë dhe nuk di pse jemi gjallë. Kemi shkuar mbi Gërmi, në malet e Butovcit që t’i bëjmë fotot me tesha të UÇK-së për kopertinë të albumit, në vitin 1997. Edhe sikur të na kishin zënë do të na vrisnin të dyve, duke na cilësuar si terroristë, ose si organizatorë të ndonjë sulmi, në atë kohë bëheshin atentate të shumta”, thotë ai.
Vështirësi e kohës, siç kujton Krasniqi, kanë qenë edhe xhirimet e këngëve për video-kaseta që bëheshin gjatë viteve të nëntëdhjeta, ndërsa kujton se shpeshherë ka hyrë policia serbe dhe i ka ndaluar xhirimet, që atë kohë bëheshin në ambiente të improvizuara.
“Unë i kam vesh i pari teshat e ushtrisë, jo Jakup Krasniqi. Në Zvicër, në koncert e kam veshë krejt grupin me uniformë të UÇK-së, kam thënë ka ardhur koha, pastaj ka dalë Jakup Krasniqi ka dhënë intervistë. Unë kam thënë prej sodit fillon ushtria”, ka kujtuar ai.
Më 4 janar Biblioteka Universitare e Kosovës është dashur të fillonte punën e ndarë nga Biblioteka Kombëtare. Mirëpo, kjo ende nuk ka ndodhur. Zyrtarë të Ministrisë së Arsimit, asaj të Kulturës dhe Universitetit të Prishtinës, arsyetojnë se ky proces është ngadalësuar për çështje teknike, të cilat ende nuk kanë përfunduar. Pritet që javën e ardhshme të përurohet objekti i ri i Bibliotekës Universitare.
Zëdhënësi i Ministrisë së Arsimit, Arbër Morina, tha për Radio Kosovën, se kanë përfunduar të gjitha përgatitjet për fillimin e punës së Bibliotekës Universitare të ndarë nga ajo Kombëtare, por objekti në të cilin duhet të vendoset Biblioteka nuk ka përfunduar të gjitha punimet. Ai bëri të ditur se brenda gjatë javës së ardhshme do të bëhet edhe inaugurimi i objektit të ri për Bibliotekën Universitare.
“Ne si Ministri e Arsimit i kemi kryer të gjitha obligimet, duke përfshirë ndarjen e buxhetit, ndarjen administrative të punëtorëve, bartjen e buxhetit në Ministrinë e Kulturës. Ajo që ka mbetur pa u realizuar është objekti ku do të vendoset Biblioteka Universitare. Sipas raporteve që kemi nga departamenti i infrastrukturës, pranimi teknik i këtij objekti do të bëhet brenda kësaj jave dhe pritet që javën e ardhshme të behët edhe përurimi i Bibliotekës Universitare”, tha ai.
Edhe këshilltarja në Ministrinë e Kulturës, Jehona Shyti, thotë se janë përmbushur të gjitha obligimet që i kanë takuar kësaj ministrie, por ka mbetur vetëm ndarja fizike e këtyre dy institucioneve.
“Ka mbetur pa u bërë ndarja edhe fizikisht e këtyre dy institucioneve, për faktin se objekti i Bibliotekës Universitare akoma është duke zhvilluar punime. Na kanë thënë nga Ministria e Arsimit, se janë vetëm çështje teknike. Ne jemi të gatshëm dhe në pritje të një konfirmimi nga UP dhe MASHT, që biblioteka Universitare të kalojë në objektin që e kanë tashmë”, tha ajo.
Ndërkohë, Rektori i Universitetit të Prishtinës, Ibrahim Gashi, ditë më parë ka shprehur shqetësimin e tij për vonesat rreth lëshimit të objektit. Ai ka konfirmuar për Radio Kosoven se është zgjedhur Bordi i Bibliotekës, i cili ka hartuar rregulloren e punës, por i gjithë problemi ka mbetur vetëm te objekti. Për ndarjen e Bibliotekës Kombëtare dhe Universitare, është nënshkruar një memorandum mirëkuptimi ndërmjet Ministrisë së Arsimit, asaj të Kulturës, Universitetit të Prishtinës, Ministrisë së Financave dhe Bibliotekës Kombëtare e Universitare. Biblioteka Kombëtare do të mbetet nën mburojën e Ministrisë së Kulturës, ndërsa ajo Universitare nën Universitetin të Prishtinës “Hasan Prishtina”.
Kryeministri Hashim Thaçi sot ka lavdëruar gjashtë vjetorin dhe fillimin e shtatë vjetorit të qeverisjes së vet si kryeministër i Kosovës. Lidhur me këtë, ai në rrjetin social Facebook ka shkruar: “Nesër, me 9 janar, fillojmë vitin e shtatë të qeverisjes. Ishin vite të rëndësishme të rezultateve të prekshme dhe thelbësore. Vitet e shpalljes së Kosovës shtet i pavarur, demokratik dhe sovran, vite të konsolidimit dhe forcimit të shtetit tonë, të njohjes së pavarësisë së Kosovës nga 104 shtete, të anëtarësimit të Kosovës në Bankën Botërore, në Fondin Monetar Ndërkombëtar, në Bankën Europiane për Rindërtim dhe Zhvillim, Bankën Zhvillimore të Këshilli dhe në shumë organizata rajonale dhe ndërkombëtare.
Në këto vite përmbyllëm me sukses mbikëqyrjen ndërkombëtare të pavarësisë, filluam procesin dhe jemi në fazën e negocimit të Marrëveshjes së Asociim – Stabilizimit, dhe presim përmbylljen e negociatave në pranverën e hershme.
Po ashtu, brenda këtyre viteve Qeveria e Kosovës ka përmbushur pothuajse të gjitha kriteret teknike dhe presim që gjatë këtij viti Komisioni Europian të merr rekomandimin e merituar për heqjen e vizave edhe ndaj qytetarëve të Kosovës.
Ishin këto vite të fuqizimit të rendit dhe ligjit, të luftës kundër korrupsionit, krimit të organizuar dhe dukurive tjera negative, vite të reformave të thella demokratike, politike, ekonomike dhe legjislative.
Ishin vite të relaksimit të skenës politike, të shtensionimit të marrëdhënieve ndëretnike, të fillimi të marrëveshjes së normalizimit të marrëdhënieve midis shtetit të Kosovës dhe atij të Serbisë.
Ishin vite të përmirësimit fundamental të infrastrukturës rrugore, të ndërtimit të rrugës së Kombit dhe të rrugëve tjera regjionale dhe lokale. Sot, Kosova është vendi me infrastrukturë rrugore të ndërtuar në kohë rekorde dhe me aeroportin më modern në rajon.
Në këto vite arritëm përmirësimin optimal të furnizimit me energji elektrike, u bënë reforma të rëndësishme në sistemin e edukimit, duke përmirësuar kushtet infrastrukturore në tërë Kosovën me ndërtimin dhe renovimin e mbi 100 shkollave.
Në këto vite u vërtetua pafajësia e shumë bashkëluftëtarëve dhe komandantëve të UÇK-së, të cilët u akuzuan padrejtësisht.
Gjatë këtyre viteve, duke ngritur disa herë pagat e të gjithë mësuesve, përforcuam mirëqenien për të gjitha kategoritë sociale, duke arritur standarde rajonale. Synimi ynë që të arrijmë standarde evropiane”./PrizrenPress.com/
Policia në Prizren ka arrestuar disa persona për gjuajtje me armë të zjarrit. Zëdhënësi i PK-së, Hazir Berisha tha se pas arrestimit lënda e të dyshuarëve ka kaluar në Prokurorinë Themelore në Prizren.
“Me datën 7 janar, rreth orës 13:00, Policia në Prizren ka pranuar një informatë e cila bënte me dije se në fshatin Billushë, gjatë një ahengu familjar një ditë më parë, një qytetar kishte shkrehur disa fishekë nga arma pushkë gjysmë automatike me ç’rast kishte shkaktuar rrezik të përgjithshëm”
“Ndërkaq pasi policia ka kërkuar nga i dyshuari armën, i njëjti pa kundërshtim ia ka dorëzuar policisë një armë zjarri me numër serik B 2757. Në konsultim me prokurorin rasti i kalon prokurorisë sipas procedurës së rregullt”
“Po ashtu me datën 06 janar, rreth orës 01:00 minuta, para restorantit “Paradiso” që gjendet në rrugën “Tahir Sinani” janë dëgjuar krisma nga arma. Reagimi policor ka qenë i menjëhershëm dhe pas një shkëmbimi të informacioneve me policë të Nën Stacionit Policor në Zhur, është bërë i mundur arrestimi i dy të dyshuarve të cilët pasi kishin shtënë në ajër, me një automjet mercedes kishin ikur në drejtim të Zhurit. Në këtë rast është konfiskuar një pistoletë e llojit “Ekol Special 99” kalibri 9 mm me tre fishekë”.
“Ndërkaq, në Lladraviq të Malishevës është hasur një i dyshuar që kishte dalë në gjueti në kundërshtim me ligjin të cilit i është sekuestruar arma e gjahut dhe ndaj të njëjtit është iniciuar rasti penal. Po ashtu edhe në fshatin Celinë të Rahavecit, dy gjahtarëve nga Rogova u janë sekuestruar dy armë të gjahut me 33 fishekë pasi të njëjtit janë hasur nga roja e gjahut duke gjahtuar ilegalisht “.
Zëdhënësi Hazir Berisha, po ashtu njoftoi se policia ka arrestuar dy persona edhe për dhunë familjare.
“Për ushtrim të dhunës në familje janë arrestuar dy persona të gjinisë mashkullore në dy raste të ndara, njëri në Spoijë të Suharekës, ndërsa tjetri në Rahavec. Dy të arrestuarit po mbahen në ambientet mbajtëse te policisë”./PrizrenPress.com/
Shkruan: Zafir Berisha
Shtresimi i problemeve politike që nga pas lufta dhe veçanërisht pas shpalljes së pavarësisë së Kosovës kanë për rezultat edhe krizën sociale dhe ekonomike te vendit, këto janë të ndërlidhura mes veti që s’ka komente tashmë, se kjo bëhet për tu arritur ajo që qytetari nuk e sheh ose së paku nuk ka kohë me pa ashtu siç duhet, se çka po ndodhe me Kosovën dhe perspektivën e saj.
Vendi është futur në një gjendje politike tepër delikate gjatë këtyre viteve e veçanërisht gjatë viti që lamë pas me marrëveshjen e 19 prillit nga e cila marrëveshje janë në pah simptomat e para qe Kosova po rrëshqet drejt shtetit jofunksional duke i krijuar hapësirë Serbisë qe përmes strukturave që po i legalizon në Kosovë të ketë ndikimin e vet për një kohë shumë të gjatë ku situatën politike dhe ekonomike të vendit tonë ta ketë në dorë për eksperimente të ndryshme me të cilat do ti tregon botës se Kosova nuk mundet me funksionuar si shtet.
Zgjedhjet lokale ishin hap i parë i Serbisë ne synimet e veta karshi Kosovës dhe një pjesë e klasës politike në Kosovë u tregua shumë e paditur, për mos me e thanë e humben atë qe është fituar me shumë sakrificë për dekada te tëra.
Serbia fillon bisedimet për integrime ne BE që vjen si rezultat i negociatave me Kosovën që u mbajtën në Bruksel, ku Kosovën e përfaqësonte Kryeministri me një pjesë te vasalëve te tij politik.
Rezultati i bisedimeve ne Bruksel është edhe legalizimi i strukturave paramilitare serbe në 9 komuna të Kosovës dhe mbi 300 pjesëtarëve te MUP-it serb që do te jenë Polic të Kosovës për ti mbrojtur ata. Negociatorët tash kërkojnë që edhe me ndryshime në Kushtetutën e Kosovës ti behet vend këtyre grupeve paramilitare në Kuvend te Kosovës me qëllimin që të realizohet ajo që thash me lartë, rreth synimeve te Serbisë, BE meqë po ngutet për futjen e Serbisë ne gjirin e vet nuk e ka hallin tonë sepse ne me “liderë” të pa përgjegjshëm me të cilët jemi përfaqësuar ne negociata nuk kemi merituar më shumë, halli i BE-se është tek sindroma “ Ukrainë ” që mund të përsëritet edhe ne Ballkan, BE nuk është që nuk e din që Serbia ne Kushtetutën e vet e ka Kosovën si Krahine e shtetit te vet, por është e interesuar që përkohësisht te “mbylle” problemin e Ballkanit, problem që mund të mbetet një vullkan i heshtur dhe mund te shpërthej atëherë kur dëshiron Serbia, e cila veç me kurdisjen e situatës që është duke bërë sipas planeve te saj për realizim te ambicieve gjenetike ndaj tokave të huaja.
Rreziku qe i kanoset Kosovës në të ardhmen e afërt është se skenarët e sotëm që në pamje duken se po bëhen për llogari te politikes ditore, munden nesër te shpërthejnë dhe Kosova te gjendet me hapa mbrapa, ku do te detyrohet te pajtohet me një realitet të ri që nuk do të jetë i këndshëm, por që do te jetë real, mbi te cilin do te nisin negociata te reja me Serbin ne një realitet te ri.
Marr kurajën që edhe të parashoh një situatë në të cilën do të gjendet Kosova pas “arritjeve” që i ka bërë në negociata, nga te cilat mundësin e destabilizimit te Kosovës e ka ne dorë. Pas forcimit të strukturave paramilitare nëpër institucione të Kosovës, ajo gjithmonë to te kërkoj shumë e më shumë për të arritur deri tek një revolt e arsyeshme e qytetarëve të Kosovës, e përafërt me atë të 2004, ku do të pësojnë njerëz të pafajshëm të vullnetit te mirë, por qe kjo situatë mund të stimulohet nga “negociatorët” e sotëm të cilët nesër do te jenë në pozita tjera dhe do ta kenë gojën plot patriotizëm, ku nga gjendja e krijuar do të qohet peshë diplomacia ndërkombëtare dhe Kosova të mbetet prapë ne agjendën e tyre, por tash me një realitet te ri, ku rezultati veç mund te paramendohet.
Një mike e Kosovës para një kohe dha një sugjerim publik qe te kihet parasysh rreziku i një Republike Serbe, por kjo mbeti veç një deklaratë koti sa po vërehet, e qe ne fakt nuk është ashtu, sepse u tha me një moment shumë delikat dhe nga përfaqësuesja e një vendi shumë me ndikim ne politiken globale. Sido që te jetë situata ne te cilën gjendet Kosova edhe në ketë moment ka zgjidhje, sa nuk është bërë vonë dhe ajo gjendet tek njerëzit qe i kanë dhënë kompetenca pa e ditur se çka po i japin ekipit negociator, pra Kuvendi i Kosovës ka njerëz që kanë një përgjegjësi në veprimet e veta që të krijojnë situata në Kosovë që të ndodhin disa zhvillime para se me ndodhë skenarët e rrezikshëm për perspektiven e Kosovës.
(Autori është kryetar i Bashkimit Demokratik në Prizren)
Për Fatmir Limajn, kthimi në PDK, nuk është as temë diskutimi. Kështu bëjnë të ditur burime të KosovaPress-it. Njerëz të tij të afërt bëjnë me dije se kjo as që diskutohet, por se çfarë është vendimi i tij do të merret vesh shumë shpejtë.
Sipas këtyre burimeve, Limaj s’e konsideron as si temë kthimin në PDK dhe vështirë që ka diçka që do ja ndërron mendimin.
Ky reagim vije ndaj një shkrimi të publikuar sot në media, sipas të cilit, Fatmir Limaj është duke shqyrtuar mundësinë e kthimit në PDK./Kosovapress/