Qindra mijëra euro do të derdhen në arkën e Policisë së Kosovës. Vetëm gjatë një jave që Policia ka organizuar për sigurinë në trafik janë shqiptuar me mijëra tiketa për ngasësit e pandërgjegjshëm.

Java e sigurisë që ka filluar më 1 maj dhe përfundon të mërkurën (sot), ka mbledhur me qindra mijëra euro. Gjatë shtatë ditëve të kësaj jave policia ka shqiptuar gjithsej 8 mijë e 292 gjoba.

Tribuna ka bërë një llogaritje matematikore ku një tiketë e ka llogaritur 15 euro që është gjoba më e vogël sipas ligjit. Nëse këto 8 mijë e 292 gjoba do të ishin nga 15 euro atëherë në arkën e buxhetit do të derdhen 124 mijë e 380 euro.

E kjo shumë duhet të jetë më e madhe kur kihet parasysh se gjobat në trafik variojnë prej 15 më e vogla e deri 150 më e larta./tribuna/

Për dy muaj sa nuk do të jetë funksional Kuvendi i Kosovës, qeveria nuk do të ketë pengesa t’i qojë në vend projektet e planifikuara. Nëse ekziston vullnet i ekzekutivit, shteti nuk do të ketë krizë as në ekzekutimin e buxhetit.

Kështu thonë njohës të ekonomisë, sipas të cilëve shumë projekte mund të vazhdohen edhe nga qeveria e ardhshme, e cila do të dalë pas mbajtës së zgjedhjeve në muajin qershor të këtij viti.

Por, ata paralajmërojnë se projektin më madhor të premtuar deri tash, atë të ndërtimit autostradës Prishtinë-Shkup, qeveria aktuale nuk do t’ia lë askujt në dorë. Sipas tyre këtë projekt qeveria e tanishme do të nisë së shpejti vetëm për të fituar vota

Diplomatët në BE thonë se janë të vetëdijshëm nga përvoja e hidhur e zgjedhjeve të vitit 2010 dhe me përvojën e mirë nga zgjedhjet e fundit lokale, prandaj presin që zgjedhjet parlamentare të kalojnë pa mashtrime.
Por, ende nuk e kanë të qartë se cili trup ndërkombëtar do të duhej të konfirmonte rregullsinë e zgjedhjeve, shkruan sot Koha Ditore. Që tani kanë filluar konsultimet që të formohet një mision i BE-së për të vëzhguar këto zgjedhje, porse kjo duhet të bëhet me ftesë të autoriteteve të Kosovës.

Pas zgjedhjeve të vitit 2010, Bashkimi Evropian pati një qëndrim jo unik rreth mirëvajtjes së zgjedhjeve në Kosovë. E interesuar më së shumti për gatishmërinë e Kosovës për të hyrë në dialog me Serbinë, me qëndrim atëherë të qartë se “kryeministri Thaçi është njeriu më i duhur për kompromise“, nga Zyra e përfaqësueses së lartë të BE-së, Catherine Ashton, hezituan të pranojnë faktet nga terreni se në ato zgjedhje ka pasur jo vetëm parregullsi, por edhe mashtrime. Në deklaratat e Zyrës së zonjës Ashton bëhej thirrje që “të formohet sa më parë qeveria dhe të nisë sa më parë dialogu me Beogradin“.

Për ta mjaftonte se në ato zgjedhje nuk ka pasur gjakderdhje, dhe për standarde evropiane thoshin: “Nga Kosova ne nuk presim standarde aq të larta“.
/Koha Ditore

Presidentja e Republikës së Kosovës sot (e enjte) dekreton datën e mbajtjes së zgjedhjeve të parakohshme nacionale, shkruan sot Koha Ditore.

Në tavolinën e presidentes Atifete Jahjaga janë dy data të mundshme – 8 dhe 15 qershori. Shpërndarja e Kuvendit, të mërkurën, ka bërë që ligjërisht 8 qershori të jetë datë e arritshme për mbajtjen e zgjedhjeve nacionale.

Por, siç merr vesh gazeta, më shumë favorizohet data 15 qershor për t’i dhënë mundësi organizatorit të zgjedhjeve t’i bëjë përgatitjet e nevojshme.

E koha e shkurtër për përgatitjen e zgjedhjeve nga ana e Komisionit Qendror ka ngritur shqetësime për mundësinë e manipulimit me vota, njëjtë si në vitin 2010.

Kjo legjislaturë në historinë e parlamentarizmit do të hyjë si legjislatura më joefektive

Profesori i Parlamentarizmit, Arsim Bajrami, ka thënë se zgjidhja e vetme për të dalë nga situata e krijuar ka qenë shpërndarja e Kuvendit të Kosovës – shkruan Epoka e re.

“Duke qenë se opozita e ka bllokuar funksionalitetin e Kuvendit, PDK është treguar e përgjegjshme dje ka pranuar të votojë shpërndarjen e Kuvendit, sepse është përgjegjëse si parti udhëheqëse të ruajë funksionalitetin e shtetit, të ruajë kredibilitetin e Kuvendit dhe në një situatë çfarë është krijuar në Kuvend, është parë se shpërndarja e tij ka qenë instrumenti i vetëm prë të dalë nga situata”, ka thënë Bajrami.

Ai ka thënë tutje se me shpërndarjen e Kuvendit i pushon mandati edhe Qeverisë, e cila do të udhëheqë shtetin deri në momentin kur do të përfundojë cikli zgjedhor dhe do të konstituohen organet e reja.

Sipas tij, kjo legjislaturë do të hyjë në histori si legjislatura me performancën më të dobët.

/Epoka e re