Sot Aleancës për Ardhmërinë e Kosovës iu ribashkua Muhamet Kelmendi. Ky rikthim i Kelmendit u konfirmua sot përmes një komunikate për media nga AAK.

“ Kelmendi do të jetë pjesë e strukturave politikëbërëse e vendimarrëse në Aleancën për Ardhmërinë e Kosovës dhe kandidat për deputet në Kuvendin e Kosovës nga AAK-ja”, thuhet në komunikanë.

E gjatë rikthimit të Kelmendit në AAK, i pari i kësaj partie, Ramush Haradinaj, ka thënë se përvoja e Kelmendit është e rëndësishme për proceset e AAK-së.

“Përvoja dhe ekspertiza e prof. Muhamet Kelmendit është gjithmonë e rëndësishme për proceset dhe zhvillimin e jetës institucionale në vend, e tillë ka qenë edhe në fillimin e ngritjes së institucioneve në Kosovën e pasçlirimit dhe i tillë do të jetë edhe në të ardhmen, në kuadër të Aleancës dhe në institucionet e vendit”, ka thënë Haradinaj.

Muhamet Kelmendi, edhe më herët ka qenë pjesë e Aleancës për Ardhmërinë e Kosovës dhe një ndër bashkëthemeluesit e saj.

Ilir Deda ka bërë kalimin e tij në subjektin politik, Vetëvendosje. Burime të Koha.net bëjnë me dije se kalimi i tij do të zyrtarizohet sot gjatë ditës kur ky subjekt politik do të mbajë prezantimin e Alternativës Qeverisëse në ASK.

Deda, i cili ishte bashkëthemelues i partisë politike “Fryma e Re”, veprimtarinë e tij kryesore e kishte zhvilluar në KIPRED, Instituti Kosovar për Kërkime.

Ai gjithashtu për një kohë shërbeu edhe si këshilltar i presidentes Atifete Jahjaga.

Deda njihet si kritikues i madh i qeverisë Thaçi.

Kryetarja e Komisionit Qendror të Zgjedhjeve, Valdete Daka bëri të ditur se KQZ do të marr të gjitha masat ligjore për organizimin e zgjedhjeve,me qëllimin që këto zgjedhje, të jenë të lira, fer dhe demokratike.

Daka tha se pret që në këto zgjedhje të ketë një numër të madh vëzhguesish, vendor e ndërkombëtar. Ajo po ashtu tha në këto zgjedhje OSBE në veri do të ketë një rol logjistik. Afatet ligjore do të shkurtohen sa i përket fushatës për faktin se nuk ka kohë që fushata të bëhet ashtu sic e parasheh ligji, raporton RTK.

“Sa i përket rolit të OSBE-së, OSBE do të ketë një rol por nuk besoj që do të jetë i njejtë më atë çfarë e pati në zgjedhjet lokale. Por, megjithatë për shkak të arsyeve tashmë të njohura, në pjesën veriore OSBE do të ketë një rol ndoshta më tepër logjistik. Ndërsa sa i përket fushatës zgjedhore do të jetë vendim i KQZ-së natyrisht pasi që të gjitha subjektet politike të japin propozimet e veta”, theksoi Daka.

Zgjedhjet e parakohshme parlamentare do të mbahen me 8 qershor. Zyrtarizimi i kësaj date u bë sot nga e presidentja e vendit Atifete Jahaga, një ditë pas shpërbërjes së Kuvendit të Kosovës. Në një konferencë për media presidentja Jahjaga bëri thirrje për një fushatë të dinjitetshme të partive politike dhe pjesëmarrje sa më masive të qytetarëve në procesin zgjedhor.

Presidentja e Kosovës, Atifete Jahjaga ka deklaruar se bazuar në konsultimet me liderët e partive dhe me KQZ-në ka marr vendimin që zgjedhjet e parakohshme të mbahen me 8 qershor. Ajo tha se pas shpërbërjes së Kuvendit ka takuar liderët politik për datën e zgjedhjeve, pasi që vendi ka hyrë në një proces të rëndësishëm zgjedhor.

“Bazuar në konsultimet politike në vend dhe me kryetaren e Komisionit Qendror të Zgjedhjeve dhe bazuar në kompetencat e mia kushtetuese si dhe në respektimin e afateve ligjore, kam marrë vendimin për dekretimin e zgjedhjeve të parakohshme në vend me datë 8 qershor”.

Jahaga tha se këto zgjedhje duhet të dëshmojnë gatishmërinë tonë për të garantuar votën e lirë të qytetarëve të Kosovës. E para e vendit bëri thirrje për zgjedhje të lira dhe demokratike.

Që nga ky moment i bëjë thirrje gjithë spektrit politik në Kosovë për një fushatë zgjedhore të dinjitetshme dhe të gjithë qytetarëve të vendit pa dallim që të marrin pjesë në zgjedhjet e parakohshme të 8 qershorit për të siguruar një proces të drejtë, sepse këto zgjedhje shënojnë një test të rëndësishëm të zhvillimit të demokracisë së vendit tonë”, tha ajo, raporton RTK.

Presidentja po ashtu bëri të ditur se për të garantuar një proces të rregullt zgjedhor do të kërkojë nga Bashkimi Evropian të dërgojë edhe një mision vëzhgues në Kosovë.

Ndryshe, një ditë më parë me 90 vota për, 4 kundër dhe 3 abstenime u shpërnda Kuvendi i Kosovës.

Gjatë vitit 2013 dhe në katër muajt e parë të 2014-ës në kuadër të monitorimit të transparencës së Qeverisë Komunale të Prizrenit, “EC Ma Ndryshe” ka publikuar të gjeturat e hulumtimeve të ndryshme dhe së bashku me to ka ofruar edhe rekomandime për përmirësimin e gjendjes në dikastere të caktuara. Kjo organizatë gjithashtu ka reaguar edhe ndaj çështjeve të ndjeshme duke kërkuar veprim adekuat nga përgjegjësit e komunës së Prizrenit.

Monitoruesja Elmedina Baxhaku tha se brenda kësaj periudhe qeveria lokale ka ndërmarrë disa veprime në drejtim të zbatimit të disa rekomandimeve, që megjithatë duhet të përcillen me hapa të mëtutjeshëm, në mënyrë që të ketë përmirësim të standardeve të qeverisjes së mirë dhe demokratike.

“Krahas kësaj, ka pas edhe raste kur ekzekutivi komunal i ka injoruar propozimet që kanë ardhur nga shoqëria civile, duke bërë që ndërtimi i partneritetit ndër-sektorial të mbetet ende vetëm një objektiv i dëshiruar”.

Sipas saj, bazuar në këto përvoja, “EC Ma Ndryshe”, ka bërë një bilanc të rekomandimeve të zbatuara dhe të pazbatuara nga Qeveria Komunale e Prizrenit, në mënyrë që ky përkujtues të shërbej si dokument për reflektim dhe veprim konkret nga organet komunale.

“Ndër hapat pozitivë të Komunës së Prizrenit në raport me kërkesat e monitoruesve ka qenë lejimi i pjesëmarrjes së tyre në mbledhjet e ekzekutivit, derisa konkluzionet respektivisht vendimet e kryetarit të Komunës së Prizrenit i janë dorëzuar monitoruesve vazhdimisht dhe me kohë”.
“ Ofrimi i raporteve mujore lidhur me shpenzimet e buxhetit komunal ka shënuar përparim gjatë kësaj periudhe. Po ashtu edhe gatishmëria për të dhënë përgjigje në kërkesat e shumta që janë bërë për qasje në dokumente publike, përkundër ndonjë vonese në këtë drejtim”.
Ajo tha se komunikimi me monitoruesit ka qenë korrekt dhe gjatë kësaj periudhe ka pas nisma ku shoqëria civile është ftuar të jetë pjesë e hartimit të projekteve të caktuara, megjithëse një gjë e tillë duhet të zgjerohet edhe në përgatitjen e politikave publike.

“Megjithatë ekzekutivi i Prizrenit në shumë çështje ka hezituar që t’i shqyrtoj me seriozitet dhe t’i trajtoj me efikasitet të gjeturat dhe rekomandimet e monitoruesve të EC Ma Ndryshe.

Rekomandimet e pazbatuara:
– Zbatimi i përpiktë i dispozitave të Udhëzimit Administrativ 2008/09 të MAPL-së për transparencë dhe informimi i qytetarëve mbi vendimmarrjen;
– Raportimi para medieve për çështjet që lidhen me përdorimin e buxhetit komunal, zhvillimin ekonomik, përdorimin e pronës komunale,planifikimin urban, investimet, të hyrat komunale dhe çështje tjera;
– Plotësimi i Rregullores komunale për Transparencë;
– Menaxhimi dhe shpenzimi i përgjegjshëm i parasë publike;
– Zbatimi i rekomandimeve të dala nga Raportet e Auditimit në 5 vitet e fundit;
– Respektimi i Ligjit për Prokurimin Publik në çdo shërbim, furnizim e tender;
– Pagesat të kryhen në pajtim me kërkesat e kontratës dhe vetëm pasi të jenë bërë verifikimet e duhura se mallrat shërbimet e kontraktuara janë pranuar në sasinë dhe cilësinë e duhur;
– Hartimi i një plani për shlyerjen efikase të borxheve të Komunës;
– Shtimi i aktivitetit për inkasimin e të hyrave vetanake dhe të borxheve ndaj Komunës;
– Mos investimi i parasë publike në projektet që kanë konteste pronësore dhe pa një elaborim të thuktë për funksionalitetin dhe dobinë për qytetarët e Prizrenit;
– Ndërmarrja e veprimeve për parandalimin dhe rrënimin e objekteve pa leje dhe me mbindërtime që nuk i janë përmbajtur planeve rregulluese urbane;
– Dëgjimi me kujdes i vërejtjeve të qytetarëve, kur ata shprehin shqetësime që kanë të bëjnë me lagjet e fshatrat e tyre;
– Zbatimi i dispozitave të LVL-së, Statutit të Komunës së Prizrenit dhe Rregullores për Transparencë mbi “Peticionet” dhe respektimi i të drejtës së qytetarëve për adresim të çështjeve me anë të peticionit;

– Koordinimi mes drejtorive gjatë shqyrtimit të kërkesave për leje për shfrytëzimin e hapësirave publike;

– Shtimi i kapaciteteve për zbatimin e Ligjit për Qasje në Dokumentet Publike në secilin rast, pa përjashtime;

Sigurimi i pjesëmarrjes e angazhimit të qytetarëve me hapjen e të dhënave;

Kreu i Gjykatës Themelore (GJTH) në Prizren, Ymer Hoxha, ka kritikuar përfaqësues të Prokurorisë dhe Policisë për dështim rreth ofrimit të provave në rastin e djegies së objektit të komunës, në tetor të vitit 2007, për të cilin askush nuk është dënuar.Në këtë kohë Komuna e Prizrenit, është qeverisur nga LDK-ja dhe kryetari Eqrem Kryeziu.

Riaktualizimi i çështjes së djegies së sektorit të Kadastrit të Gjeodezisë, prej të cilit patë pësuar edhe një pjesë objektit të administratës komunale të Prizrenit, që ndodhet në mes të qytetit, është bërë në një debat për gjykatën të mbajtur nga organizata joqeveritare “Ec Ma Ndryshe”, në të cilën morrin pjesë drejtues të divizioneve në kuadër të Gjykatës Themelore në Prizren. /Zëri/

Kryetari i Komunës së Malishevës, Ragip Begaj, ka  pritur në zyrën e tij përfaqësuesit e Shoqatës Kosovare të të Shurdhërve, përkatësisht zyrtarin ndërlidhës të Shoqatës së të Shurdhërve të Kosovës, Ramadan Gashi, ku dhe bënë marrëveshje rreth mbështetjes financiare të këtij komuniteti.

Kryetari Begaj i mirëpriti në zyrën e tij, përfaqësuesve të këtij komuniteti, dhe ju dha mbështetjen e kërkesave dhe nevojave që i ka  kjo kategori e shoqërisë.

Begaj e Gashi, biseduan rreth mbështetjes financiare për këtë komunitet ku dhe ranë në ujdi që Komuna ti mbështet me një shumë prej rreth 3000 euro si institucion, dhe pjesën tjetër prej 1500 euro nga interpretët e Shoqatës Kosovare të të Shurdhërve./PrizrenPress.com/